Saraya yemu yʼa yaa na wo ɲiga bɛɛri ge
28
Ayiwa, a Tɛhɛnɛ Baa Kilɛ di Musa pye: 2 «Yi jo Izirayɛli nagoo pu mu na: ‹Saraya yemu yʼa yaa na wo nɛ mu ge, yi kasɛɛgɛ yaha yi na, yʼi da yi wo yi woloduun ni. Yee saraya yemu yi ma sòrogo fɛɛfɛɛ, yi nugo kʼi dan nɛ ni ge, yee yi wa nɛ wo yalige ke.› 3 Mʼa pu pye sanha na: ‹Saraya yemu yee ya yaa na wo, ma yi sòrogo fɛɛfɛɛ nɛ mu ge, yee yi wa mɛ. Caŋa caŋa, yi yee nigin dubyapepinyɛ shuun sòrogo, yemu yi ɲɛ fɛ baa ge. Kee ɲɛ saraga nizogoŋɔ kemu na ba wo gbee ge. 4 Yi ba dubyapepinŋɛ nigin wolo ɲisɔɔgɔ ki na, yʼi ba kisaŋa wolo yakoŋɔ ki ni. 5 Yʼi olivu sìnmɛ litiri nigin ni taaga le farini myɛ kiloo taanri ni yi tɔnhɔ, kee di bye dubyapepinŋɛ ka bɛɛri wo myɛ saraga. 6 Kee ɲɛ saraga nizogoŋɔ, kemu na ba wo gbee ge. Sinayi faaboboŋɔ ki na kʼa ɲɔ kɔn na wo*. Saraga nizogoŋɔ ki ɲɛ kii kemu nugo ya dan Tɛhɛnɛ Baa Kilɛ ni ge. 7 Yʼi duvɛn litiri nigin ni taaga pye dubyapepinŋɛ ka bɛɛri wo saraga niwoŋɔ. Tɛhɛnɛ Baa Kilɛ wo fɛfɛɛrɛ xuu wu ni kee duvɛn saraga niwoŋɔ ke ya yaa na wolo. 8 Yʼi ba dubyapepinŋɛ shuun wogo ki wolo yakoŋɔ ki ni. Myɛ saraga ni duvɛn saraga kemu kʼa taha ɲisɔɔgɔ wo dubyapepinŋɛ ki na ge, yee ninuyɔ di daha yakoŋɔ ki bɛ wo dubyapepinŋɛ ki na. Kee ɲɛ saraga nizogoŋɔ kemu nugo kʼa dan Tɛhɛnɛ Baa Kilɛ ni ge.› »Saraga kemu kʼa yaa na wo cadɛɛngɛ bɛɛri ge
9 «Ayiwa, cadɛɛngɛ ki bu nɔ, yi ma yee nigin dubyapepinyɛ shuun fɛ baa woyo wolo saraga. Pu myɛ saraga kʼi bye farini myɛ kiloo gbaara, na pee tɔnhɔ sìnmɛ ni. Duvɛn wemu wʼa yaa na pye yee wo saraga niwoŋɔ ki ge, yʼi wee bɛ fara yi na. 10 Cadɛɛngɛ bɛɛri, kee saraga nizogoŋɔ ke kʼa da wolo na fara ɲiga bɛɛri wo saraga nizogoŋɔ ni ki duvɛn niwomɔ wu na.»
Saraga kemu kʼa yaa na wo yevorovoŋɔ bɛɛri ge
11 «Ayiwa, yevorovoŋɔ bɛɛri, ki cazhiige ke, yi ma nupepinyɛ shuun, ni dubyapoo nigin, ni yee nigin dubyapepinyɛ gbarashuun wolo na pye saraga nizogoŋɔ Tɛhɛnɛ Baa Kilɛ mu. Yi bɛɛri di bye fɛ baa. 12 Nupepinŋɛ ka bɛɛri wo myɛ saraga di bye farini myɛ kiloo gbarashɛɛrɛ na pu tɔnhɔ sìnmɛ ni. Dubyapoo wu wo myɛ saraga kʼi bye farini myɛ kiloo gbaara na pu tɔnhɔ sìnmɛ ni. 13 Yee nigin dubyapepinŋɛ ka bɛɛri wo myɛ saraga di bye farini myɛ kiloo taanri na pu tɔnhɔ sìnmɛ ni. Kee ɲɛ saraga nizogoŋɔ kemu nugo ya dan Tɛhɛnɛ Baa Kilɛ ni ge, 14 Nupepinŋɛ ka bɛɛri wo saraga niwoŋɔ di bye duvɛn litirilee taanri. Dubyapoo wu wogo kʼi bye duvɛn litirilee shuun. Yee nigin dubyapepinŋɛ ka bɛɛri wogo di bye duvɛn litiri nigin ni taaga. Kee ɲɛ saraga nizogoŋɔ kemu ya yaa na wo yeŋɛ bɛɛri wo cazhiige ki na yee li funŋɔ ni ge. 15 Yʼi sikapoo nigin bɛ pye jurumu yafa wo saraga Tɛhɛnɛ Baa Kilɛ mu. Kee saraga nizogoŋɔ ke na ba fara ɲiga bɛɛri wo saraga nizogoŋɔ ke ni ki duvɛn saraga niwoŋɔ ki na.»
Saraya yemu yʼa yaa na wo Ɲuwuuro Kalenɛ le ni shizhɛnhɛrɛ baa buuri kalenɛ li ni ge
16 «Ayiwa, yee li yeŋɛ nizhiige ki wo caŋa kɛ ni shishɛɛrɛ wogo ki na ba bye Tɛhɛnɛ Baa Kilɛ wo Ɲuwuuro ti wo Kalenɛ le. 17 Kee yeŋɛ ki ninuŋɔ wo caŋa kɛ ni kaguro wogo ki na Shizhɛnhɛrɛ Baa Buuri wu wo Kalenɛ li ma ɲɔ kɔn. Sipyiire ti bɛɛri na ba shizhɛnhɛrɛ baa buuri li lee cewuu li wo cabyaa gbarashuun wu bɛɛri funŋɔ ni. 18 Lee cewuu li wo cazhiige ki na, sipyiire ti bɛɛri na ba binnɛ na Tɛhɛnɛ Baa Kilɛ pɛlɛ. Yi bɛɛri di yi wo kapyeŋɛɛ ki yereŋɛ kee caŋa. 19 Yʼi nupepinyɛ shuun ni dubyapoo nigin, ni yee nigin dubyapepinyɛ gbarashuun wolo pye saraga nizogoŋɔ Tɛhɛnɛ Baa Kilɛ mu. Yi bɛɛri di bye fɛ baa. 20 Yʼi yi wo myɛ saraga ki bɛ fara yi na, na ki tɔnhɔ sìnmɛ ni. Nupepinŋɛ ka bɛɛri wo myɛ saraga di bye farini myɛ kiloo gbarashɛɛrɛ. Dubyapoo wu wogo kʼi bye farini myɛ kiloo gbaara. 21 Yee nigin dubyapepinŋɛ ka bɛɛri wogo di bye farini myɛ kiloo taanri. 22 Yʼi sikapoo nigin bɛ pye jurumu yafa wo saraga. Pu na jurumu yafa wu wo yaaŋa ki pye yi mu. 23 Yee saraya ye bɛɛri na ba wolo na fara caŋa bɛɛri wo ɲisɔɔgɔ ki wo saraga nizogoŋɔ ki na. 24 Yi na ba yee saraya nizogoyo ye sòrogo caŋa bɛɛri fo na shɛ da cabyaa gbarashuun. Yi sòrogo sòrogo nugo ki wa dan Tɛhɛnɛ Baa Kilɛ ni. Yee na ba wo na fara ɲiga bɛɛri wo saraga nizogoŋɔ ke ni ki duvɛn saraga niwoŋɔ ki na. 25 Cewuu li caŋa gbarashuun wogo ki bɛ na, sipyiire ti bɛɛri na ba fɛfɛɛrɛ pinnɛgɛ ka pye kee caŋa ki bɛ. Yi bɛɛri di yi wo kapyeŋɛɛ ki yereŋɛ kee caŋa ki bɛ.»
Saraga kemu kʼa yaa na wo Pantekɔtia wu wo kalenɛ li ni ge.
26 «Ayiwa, Gba Nɔhɔ Tiinnɛ Kalenɛ li ba nɔ, yi ba da zhɛ yee li wo shinmafomɔ wu saraga ki kan Tɛhɛnɛ Baa Kilɛ mu, sipyiire ti bɛɛri na ba fɛfɛɛrɛ pinnɛgɛ ka pye kee caŋa. Yi bɛɛri di yi wo kapyeŋɛɛ ki yereŋɛ kee caŋa. 27 Yʼi nupepinyɛ shuun ni dubyapoo nigin, ni yee nigin dubyapepinyɛ gbarashuun wolo pye saraga nizogoŋɔ Tɛhɛnɛ Baa Kilɛ mu. Yee wo sòrogo sòrogo nugo ki wa dan wu ni. 28 Yʼi yi wo myɛ saraga ki bɛ fara yi na, ma ki tɔnhɔ sìnmɛ ni. Nupepinŋɛ ka bɛɛri farini myɛ kiloo gbarashɛɛrɛ, dubyapoo wu ɲɛ farini myɛ kiloo gbaara, 29 yee nigin dubyapepinŋɛ ka bɛɛri ɲɛ farini myɛ kiloo taanri. 30 Yʼi sikapoo nigin bɛ wolo saraga nizogoŋɔ, kɔnhɔ pʼi jurumu yafa wu wo yaaŋa ki pye yi mu. 31 Yee saraya ye bɛɛri na ba wolo na fara ɲiga bɛɛri wo saraga nizogoŋɔ ke ni ki myɛ saraga ki na. Yi bɛɛri di bye fɛ baa, yʼi yi duvɛn saraga niwoŋɔ ki bɛ fara yi na.»