Nɔburuu 19

Fɛfɛɛrɛ lɔhɔ ki wo yaagana

Ayiwa, a Tɛhɛnɛ Baa Kilɛ di Musa ni Arɔn pye: 2 «Nɛ Tɛhɛnɛ Baa Kilɛ ya saliya wemu teŋɛ ge, wee saliya wu wo ɲɔmɛɛ la li ɲɛ le: Yi jo Izirayɛli nagoo pu mu na pu pa ni nupya niɲɛ ni ma mu, wemu ɲɛ manɛ baa, fɛ di ɲɛ wu na wɛ, pʼi sanha zhu bɛ taha ɲa wu katige ni-i ge. 3 Yʼi ba wu kan saraya ɲaha shɔɔnrivɛɛ Eleyazari mu. Wee di shɛ ni wu ni buguro ti kadugo yíri, watii di shɛ wu gbo wà wu ɲaha tàan. 4 Eleyazari di wu kabee taga shishan pa lɔ, wu pu ɲɛrɛgi ɲɛrɛgi fo tɔɔɲii gbarashuun Ɲuŋɔ Tacirige Fàya Puga ki shizhaa wu na. 5 Lee kadugo na pʼi nupya wu bɛɛri sòrogo wu ɲii na: wu xaara te ni wu sɛɛgɛ ni wu shishan ni wu fure ti bɛ. 6 Saraya ɲaha shɔɔnrivɔɔ wu sɛdiri tinnɛ, ni izopu tige genɛ, ni lize mɛɛ niɲii la lɔ, wu yee wá nupya wu wo sòrogo sòrogo na ki ni. 7 Lee kadugo na saraya ɲaha shɔɔnrivɔɔ wu wu fàya yi je ni lɔhɔ ni, wu wuli, sani wu jé buguro ti ni ge. Wu na ba gori yaha fɔɔnrɔ ni fo na shɛ nɔ yakoŋɔ ki na. 8 Sipya wemu wʼa nupya wu sòrogo ge, weefɔɔ di wu fàya je ni lɔhɔ ni, wʼi wuli, wʼi gori yaha fɔɔnrɔ ni fo na shɛ nɔ yakoŋɔ ki na. 9 Sipya wemu wu ɲɛ fɛɛfɛɛ ge, weefɔɔ di nupya wu shɔɔnrɔ ti kuu, wu shɛ ti yaha buguro ti kadugo yíri xuu wa ni wemu ɲɛ fɛɛfɛɛ ge. Tee na ba mara yaha wà Izirayɛli nagoo pu mu, fɛfɛɛrɛ lɔhɔ ki wo yaa wu kaa na. Lee kalɛɛ le ɲɛ jurumu yafa wo saraga. 10 Sipya wemu wu da ba nupya wu shɔɔnrɔ ti kuu ge, wee bɛ di wu fàya je, wu gori yaha fɔɔnrɔ ni fo na shɛ nɔ yakoŋɔ ki na. Wee na ba bye saliya wemu da ga yìri wɛ, Izirayɛli nagoo pee ni nadadiinmɛɛ pu bɛɛri mu.

Keree kiimu ya yaa ni fɛfɛɛrɛ bye ni ge

11 Sipyaa sipya wʼa kpɔn gbo na ge, weefɔɔ na ba gori yaha fɔɔnrɔ ni fo cabyaa gbarashuun. 12 Weefɔɔ ya yaa na fɛfɛɛrɛ lɔhɔ ki taga wuyɛ pye fɛɛfɛɛ caŋa taanri wogo ke ni caŋa gbarashuun wogo ki na. Lee bu bye, wu na bye fɛɛfɛɛ. Ga wu bye wu ya fɛfɛɛrɛ lɔhɔ ki taga wuyɛ pye fɛɛfɛɛ caŋa taanri wogo ke ni caŋa gbarashuun wogo ki na wɛ, wu na ba gori yaha ni wu fɔɔnrɔ ni. 13 Sipya wemu bu gbɔn gbo na, na zhe wu da wuyɛ pye fɛɛfɛɛ wɛ, weefɔɔ ya Tɛhɛnɛ Baa Kilɛ wo fàya puga ki nɔrɔgɔ. Wee sipya we ya yaa na wu niŋɛ wolo Izirayɛli nagoo pu ni, bani fɛfɛɛrɛ lɔhɔ ki ya ta wo wu na wɛ. Fɔɔnrɔ fɔɔ wu ɲɛ wii, wu fɔɔnrɔ tʼa kori yaha wu na.

14 Ayiwa, sipya wa bu xhu fàya puga ka funŋɔ ni, yee ya yaa na saliya wemu ɲaari ge, wee we: sipyii piimu bɛɛri pu ɲɛ kee puga ki ni ge, ni sipyii piimu bɛɛri pʼa jin kee puga ki ni ge, pee bɛɛri na ba gori yaha fɔɔnrɔ ni fo cabyaa gbarashuun. 15 Yaaga bɛɛri ki ɲɛ kee fàya puga ki ni kemu ɲɔ ya tɔ wɛ, ga fo ki ɲɔ na bi mugi yaha ge, yee bɛɛri ya nɔrɔgɔ. 16 Sipya wa bu gbɔn gbo na sige ni, wa na wu gbo, kelee wu na xu wuyɛ ni, kelee wufɔɔ shiin bu gbɔn gbo kaciige na, kelee faŋa, weefɔɔ na ba gori yaha fɔɔnrɔ ni fo cabyaa gbarashuun.

17 Ayiwa, fɔɔnrɔ ɲɛ sipya wemu na ge, yi bu jo yʼi wee wa pye fɛɛfɛɛ, nupya wemu wʼa sòrogo na pye jurumu yafa saraga ki ge, yi ma wee wo shɔɔnrɔ ta kuu ma le yaaga ka ni, lɔhɔ kemu kʼa buloo na fòro lobulowii ni ge, na kee ka ko le ti ni. 18 Sipya wemu wu ɲɛ fɛɛfɛɛ ge, wee ma Izopu wɛzhana la lɔ na lee mini wolo kee lɔhɔ ki ni, na kee ɲɛrɛgi ɲɛrɛgi fàya puga ki na sipya wʼa xu kemu ni ge, na ki ɲɛrɛgi ɲɛrɛgi puga ki funŋɔ yɛrɛyɛ yi bɛɛri na, sipyii piimu pu bye ki ni ge, na ki ɲɛrɛgi ɲɛrɛgi pee bɛ na. Sipya wemu bɛ wʼa kpɔn gbo na ge, wa na wu gbo, kelee wu na xu wuyɛ ni, kelee na kpɔn wu kaciige kelee wu faŋa na ge, wʼa ki ɲɛrɛgi ɲɛrɛgi weefɔɔ bɛ na. 19 Sipya wemu wu ɲɛ fɛɛfɛɛ ge, wee na kee lɔhɔ ki ɲɛrɛgi ɲɛrɛgi mu fɔɔnrɔ fɔɔ wu na caŋa taanri wogo ki na, ni caŋa gbarashuun wogo ki na. Caŋa gbarashuun wogo ki na, wʼa wu pye fɛɛfɛɛ na foro wu fɔɔnrɔ ti bɛɛri ni. Sipya wemu wu ɲɛ ni fɔɔnrɔ ti ni ge, wee na wu fàya je, na wuu, yakoŋɔ ki ba nɔ wʼa bye fɛɛfɛɛ. 20 Ga fɔɔnrɔ ɲɛ sipya wemu na ge, wee bu zhe wu da wuyɛ pye fɛɛfɛɛ wɛ, weefɔɔ niŋɛ na ba gɔn wolo Izirayɛli nagoo pu ni, bani wʼa Tɛhɛnɛ Baa Kilɛ wo fɛfɛɛrɛ xuu wu nɔrɔgɔ. Fɛfɛɛrɛ lɔhɔ ki na kori ɲɛrɛgi baa wu na, lee na, fɔɔnrɔ ti ɲɛ wu na. 21 We na ba bye saliya Izirayɛli nagoo pu mu wemu da ga yìri wɛ. Wemu wʼa fɛfɛɛrɛ lɔhɔ ki ɲɛrɛgi ɲɛrɛgi ge, weefɔɔ na ba wu fàya yi je. Wemu wʼa kpɔn kee fɛfɛɛrɛ lɔhɔ ki na ge, weefɔɔ na ba bye fɔɔnrɔ fɔɔ fo na shɛ yakoŋɔ ki pye kʼa nɔ. 22 Yaaga bɛɛri na fɔɔnrɔ fɔɔ wʼa kpɔn ge, kee ya nɔrɔ. Sipya watii bɛ bu gbɔn kee yaaga keka na, weefɔɔ bɛ na bye fɔɔnrɔ fɔɔ fo na shɛ yakoŋɔ ki pye kʼa nɔ.