Saraya ɲaha shɔɔnrivɛɛ pee ni Levi wo tirige shɛɛn pu wo nibyegee
18
Ayiwa, a Tɛhɛnɛ Baa Kilɛ di Arɔn pye: «Kanahana bɛɛri lʼa pye fɛfɛɛrɛ xuu wu ni ge, lee na ba bye yee wo ɲuŋɔ wuu, ma ni ma jalaa pee, ni Levi wo tirige shɛɛn pu ni. Ga kanahana bɛɛri lʼa pye na ɲaha tii saraya ɲaha shɔɔnrivɛɛrɛ ti wo kapyeŋɛɛ ki na ge, lee na ba bye yee wo ɲuŋɔ wuu, ma ni ma jalaa pu yɛ ni. 2 Ma cebooloo pu lɔ fulo mayɛ na, pʼi bye ma tɛgɛvɛɛ, ma tolɛ Levi wo tirige shɛɛn pee. Ga ma ni ma nagoo pu ni, yee yɛ di da yeree tuun bɛɛri ni fɛfɛɛrɛ puga ki ni kariɲɛɛgɛ ɲɔmɛɛ li wo keshi wu ɲahagbaa na. 3 Levi wo tirige shɛɛn pu na ba yaha ma yahama ni, na kapyeŋɛɛ pyi fàya puga ki ni. Ga pu ganha ga fulo saraya yi tawologo ki na wɛ, pʼi ganha ga fulo fɛfɛɛrɛ xuu wu wo fɛfɛɛrɛ yaaga ka shishiin bɛ na, lee di bye kaɲuŋɔ lʼi xu nɔ pu na, lʼi xu nɔ yee bɛ na wɛ. 4 Pu na ba bye ma yahama ni, na kasɛɛgɛ yaha Ɲuŋɔ Tacirige Fàya Puga ki na, na ki labye wu bɛɛri pyi. Shɛnte ganha ga fulo yi na wɛ. 5 Yee pʼa yaa na kasɛɛgɛ yaha fɛfɛɛrɛ xuu we ni saraya tawologo ki na, kɔnhɔ nɛ wo loyire li ganha bu do sanha Izirayɛli nagoo pu ɲuŋɔ ni wɛ. 6 Nɛ wʼa yi cebooloo Levi wo tirige shɛɛn pu ɲaha bulo na foro Izirayɛli nagoo pusamaa ni. Nɛ Kilɛ yahama ni pʼa yaha, a nɛ pu kan yee mu, kɔnhɔ pu da Ɲuŋɔ Tacirige Fàya Puga ki wo labye wu pyi. 7 Ga mu Arɔn ni ma wo kadugo shi nibama wu bɛɛri ni, yee pu wa da ba byi saraya ɲaha shɔɔnrivɛɛ pee. Yi na ba yi wo kapyeŋɛɛ ki pyi saraya yi tawologo ki ɲuŋɔ ni, ni fɛfɛɛrɛ ti wo fɛfɛɛrɛ xuu wu ni, ɲahaparaga fàŋa ki kadugo yìri. Yee wo taa kapyeŋɛɛ ki wa kere. Yee wo loolodaa li wa saraya ɲaha shɔɔnrivɛɛrɛ te. Shɛnte bɛɛri wʼa fulo wee xuu wa na ge, weefɔɔ na gbo.»Saraya yemu yi ɲɛ saraya ɲaha shɔɔnrivɛɛ pu wo taa ge
8 Ayiwa, a Tɛhɛnɛ Baa Kilɛ di Arɔn pye: «Fɛfɛɛrɛ saraya yemu bɛɛri Izirayɛli nagoo pʼa wo na gaan nɛ mu ge, yemu bɛɛri pu ma wolo yi ni na yaha yi yɛ ge, nɛ wʼa mu pye yee wo keree shɔɔnrivɔɔ. Yee na ba bye mu wo taa. Yee na ba byi ma kadugo shi nibama namaa pu bɛ wo tahaa fo gbee. Lee ɲɔmɛɛ le na ba bye kalɛɛ lemu da ga yìri bada wɛ. 9 Fɛfɛɛrɛ ti wo fɛfɛɛrɛ saraya yemu pʼa wo na gaan nɛ mu ge, yemu na ba sòrogo ge, pu bu yee wolo xɔ yi ni, yisaya ɲɛ mu woyo. Saraga bɛɛri Izirayɛli nagoo pʼa wolo nɛ mu ge, kʼa pye shinma saraga la, kʼa pye jurumu yafa saraga la, kʼa pye yaaŋa wo saraga la, yee saraya ye bɛɛri yi ɲɛ fɛɛfɛɛ dɔgɔ ni. Yee bɛɛri na ba bye ma ni ma jalaa pu woyo. 10 Yi na ba yee yaŋmuyɔ ye li xuu ni wemu wu ɲɛ fɛɛfɛɛ dɔgɔ ni ge. Ga, namaa yɛ pu wa da ba yi li, bani fɛfɛɛrɛ yaliye yi ɲɛ yii. 11 Na fara yee na, saraya yemu bɛɛri Izirayɛli nagoo pʼa wo na gaan nɛ Tɛhɛnɛ Baa Kilɛ mu, mʼa ki figi figi na ɲaha tàan ge, yemu bɛɛri pu ma wolo yee saraya yi ni ge, nɛ yee bɛɛri kan ma ni ma jalaa ni ma pushaa pu mu. Wee na ba bye saliya wemu da ga yìri bada wɛ. Piimu bɛɛri ba bye fɛɛfɛɛ ma puga ki ni, pee bɛɛri na já yi li. 12 Faa yapyiire nizhiire temu bɛ Izirayɛli nagoo pʼa wo na gaan nɛ Tɛhɛnɛ Baa Kilɛ mu ge, ma na jo sìnmɛ pu bɛɛri wo nijemɛ pe, ni duvɛn wu bɛɛri wo nijemɛ we, ni shinma wu bɛɛri wo nijemɛ we, nɛ yee bɛ kan yi mu. 13 Ɲiŋɛ ki faa yapyiire nizhiire temu bɛɛri pʼa ma na gaan nɛ Tɛhɛnɛ Baa Kilɛ mu ge, yee bɛɛri ɲɛ ma woyo. Sipya bɛɛri wu ɲɛ fɛɛfɛɛ ma puga ki ni ge, weefɔɔ na já yi li. 14 Yaŋmuyɔ yemu bɛɛri na yi kafɛɛ ya pu keye laha fɛɛfɛɛ, na yi yaha nɛ Tɛhɛnɛ Baa Kilɛ yahama ni Izirayɛli ni ge, yee bɛɛri na ba bye ma woyo*. 15 Munaa yara wo boo nizhiimɛ wemu bɛɛri wʼa kan Tɛhɛnɛ Baa Kilɛ mu ge, lʼa pye sipyiyawyii la, lʼa pye yapɔrɔgɔ la, yee bɛɛri na ba bye ma woyo. Ga sipyiyawyii wo jashiimɛ we, mʼa wee ɲuŋɔ wolo. Yapɔrɔyɔ yemu bɛ yʼa nɔhɔ ge, mʼa yee bɛ wo bee nizhiilee pu ɲuŋɔ wolo. 16 Jashiilee pu wo ɲuwuuro ti pɛrɛmɛ pu na ba bye wari sikilee kaguro, na saha ni Tɛhɛnɛ Baa Kilɛ wo fɛfɛɛrɛ xuu wu wo sikili wu ni. Pee sikilee kaguro wu na bye geraa kɛlɛɛ shuun (20). Jashiimɛ wa bɛɛri wu shi wu bu nɔ yeŋɛ nigin na tuun wemu ni, wee tuun wu ni wu ɲuŋɔ da já wolo.a 17 Ga nushɔ, ni dubyashɔ, ni sikashɔ, ma ganha bu sɔɔ pʼa yee wo bee nizhiilee pu ɲuyɔ wo wɛ, bani yee ɲɛ fɛfɛɛrɛ yaŋmuyɔ. Ma na ba yee wo shishan pu ɲɛrɛgi saraya tawologo ki na, na yi sìnmɛ pu sòrogo. Pee na ba bye saraga nizogoŋɔ kemu wo nugo kʼa dan Tɛhɛnɛ Baa Kilɛ ni ge. 18 Yi xaara ti na ba bye ma wuuro ba yapɔrɔyɔ yi wo gbiilee pu ni yi kanige cɛ shegee ki ɲɛ mɛ ma woyo wɛ. Pee gbiilee pii ma figi figi Tɛhɛnɛ Baa Kilɛ ɲaha tàan. 19 Izirayɛli nagoo pʼa fɛfɛɛrɛ saraya yemu bɛɛri wo na gaan nɛ Tɛhɛnɛ Baa Kilɛ mu ge, yemu bɛɛri pu ma wolo yi ni na yaha yi yɛ ge, nɛ yee bɛɛri kan ma ni ma jalaa ni ma pushaa pu bɛ mu. Lee na ba bye kariɲɛɛgɛ ɲɔmɛɛ lemu da ga yìri wɛ, lʼi wa da ɲɛri bɛ wɛ. Nɛ yɛ pyaa kʼa lee jo kan ma ni ma kadugo shi nibama wu mu.»
20 A Tɛhɛnɛ Baa Kilɛ di Arɔn pye: «Nɛ na ba fiige kemu kan Izirayɛli nagoo pu mu ge, ma cɛn taa wa da ba bye kee ɲiŋɛ ki ni wɛ, ma taa di wa da ba bye yaaga ka shishiin bɛ ni kee fiige ki ni wɛ. Nɛ wu da ba bye ma wo cɛn ni ma taa Izirayɛli nagoo pu tɛ ni.»
Lemu li ɲɛ Levi wo tirige shɛɛn pu wo taa ge
21 Ayiwa, a Tɛhɛnɛ Baa Kilɛ di Arɔn pye: «Izirayɛli nagoo pʼa jagi wemu bɛɛri wo ge, nɛ wee bɛɛri kan Levi wo tirige shɛɛn pu mu pu wo labye wu faara, pʼa wemu pyi Ɲuŋɔ Tacirige Fàya Puga ki ni ge. Wee na bye pu wo loolodaa* 22 Lee funŋɔ ni Izirayɛli nagoo pusamaa ya yaa na fuloo nige Ɲuŋɔ Tacirige Fàya Puga ki na wɛ, kɔnhɔ pu ganha bu jurumu pye pʼi xhu wɛ. 23 Levi wo tirige shɛɛn pu pu wa da ba labye wu pyi Ɲuŋɔ Tacirige Fàya Puga ki ni. Jurumu bɛɛri wu da ba bye wee xuu wu ni ge, wee wo jaagi kanhama pu na ba do pee ɲuŋɔ ni. Taa ɲiŋɛ wa da ba gan Levi wo tirige shɛɛn pu mu ba Izirayɛli nagoo pusamaa ɲɛ wɛ. Wee na ba bye yi kadugo shi nibama wu bɛ mu saliya wemu da ga yìri bada wɛ. 24 Izirayɛli nagoo pʼa yaa na jagi wemu wo na gaan nɛ Tɛhɛnɛ Baa Kilɛ mu ge, wee na ba gaan pu mu na pye pu wo taa cɛn. Lee wuu na nɛ pu pye jo taa ɲiŋɛ da ba gan pu mu Izirayɛli nagoo pu tɛ ni wɛ.»
Levi wo tirige shɛɛn pʼa jagi wemu wo ge
25 Ayiwa, a Tɛhɛnɛ Baa Kilɛ di Musa pye 26 na wu yi jo Levi wo tirige shɛɛn pu mu na: «Jagi we nɛ kan yi mu yi wo cɛn taa ge, Izirayɛli nagoo pu ba wee wolo tuun wemu ni na pa gan yi mu, yiyɛ pyaa ki bɛ di wee jagi wu wo jagi wu wolo kan Tɛhɛnɛ Baa Kilɛ mu. 27 Izirayɛli nagoo pʼa lemu wo pu shinmafomɔ we ni pu duvɛnfomɔ wu ni na gaan nɛ mu ge, jagi wu wo jagi wu na ba yaha lee wo fɛ pu ni Levi wo tirige shɛɛn pu shizhaa na. 28 Lee funŋɔ ni, yi ba jagi bɛɛri ta Izirayɛli nagoo pu mu, yʼi wa wolo wee ni yi kan Tɛhɛnɛ Baa Kilɛ mu. Wemu yi da ba wolo wu ni di gan Tɛhɛnɛ Baa Kilɛ mu ge, yʼi wee kan saraya ɲaha shɔɔnrivɛɛ Arɔn mu. 29 Yaaga bɛɛri kʼa loolo yi na ge, yʼi Tɛhɛnɛ Baa Kilɛ wo taa wolo ki ni. Yaaga kemu pʼa loolo yi na ge, kemu ki ɲɛ kee wo nijeŋɛ ni ki nifɛɛfɛɛgɛ ge, yʼi kee kan Tɛhɛnɛ Baa Kilɛ mu.» 30 Yi bu kee nijeŋɛ ki wolo xɔ ki ni, kisaŋa ya ɲɛri yi mu ba shinmapya ɲɛ wɛ yʼa wemu ta yi wo shinma shuu li na ge, kelee ɛrɛzɛn lɔhɔ, yʼa kemu ta yi wo ɛrɛzɛn lɔhɔ ki tawologo ki ni ge. 31 Xuu bɛɛri wʼa yi taan ge, yi ni yi puga shɛɛn di shɛ kee li wà. Yʼa labye wemu pyi Ɲuŋɔ Tacirige Fàya Puga ki ni ge, wee labye wu wo kanhama saraa wu wa. 32 Yi bu yi wo nidaa li wo yaceŋɛ ki wolo kan xɔ nɛ Tɛhɛnɛ Baa Kilɛ mu, kisaŋa wo li da bye nige yi mu kakuunɔ wɛ. Lee funŋɔ ni, yi da Izirayɛli nagoo pu wo fɛfɛɛrɛ saraya yi nɔhɔ wɛ, yi ma bye yi da xhuu wɛ.»