Yawurire shɔhɔɔ kʼa ɲɛri na pye tuubɛbɛɛŋɛɛ
17
A Tɛhɛnɛ Baa Kilɛ di Musa pye: 2 «Yi jo saraya ɲaha shɔɔnrivɛɛ Arɔn ja Eleyazari mu na wu yawurire shɔhɔɔ ki wolo na ki ni, wu ki funŋɔ naganhaa ki wá taliige ni. Bani yawurire shɔhɔɔ kʼa pye fɛɛfɛɛ. 3 Sipyii piimu pʼa jurumu wu pye na puyɛ shi tɔ ge, yi pee wo yawurire shɔhɔɔ ki lɔ, yʼi ki shɔhɔ yi pye tuubɛbɛɛyɛ, yʼi yee taga saraya tawologo ki ɲɔ tɔ. Bani pʼa yere xɔ ni ki ni Tɛhɛnɛ Baa Kilɛ ɲaha tàan, lee lʼa ki pye fɛfɛɛrɛ wogoo. Lee na ba bye Izirayɛli nagoo pu mu ɲaha shɛshɛɛrɛ.» 4 Na kʼa sipyii piimu sòrogo ge, tɔɔrɔ daɲaa yawurire shɔhɔɔ kiimu kʼa bye pu keŋɛ ni ge, a saraya ɲaha shɔɔnrivɛɛ Eleyazari di kee lɔ, na ki shɔhɔ na pye tuubɛbɛɛyɛ na yee taga saraya tawologo ki ɲɔ tɔ. 5 Lee na ba Izirayɛli nagoo pu funŋɔ tun nago sipyaa sipya wu ɲɛ wu ɲɛ Arɔn wo tirige shɛn wa-ɛ ge, na wee wa shishiin ganha ga nudanga yawurire le yawurire shɔɔ ni di vulo Tɛhɛnɛ Baa Kilɛ na wɛ. Kɔnhɔ wufɔɔ ganha da bye Kore ni wu wo tahama-nɔhɔmɔɔ pu shi wɛ, ma na jo ba Tɛhɛnɛ Baa Kilɛ bi yi jo Musa ɲɔ na wɛ.6 Ɲimuguro ti na a Izirayɛli nagoo pu bɛɛri di ganha na Musa ni Arɔn yɔhɔyɔhɔ, a pʼi jo: «Yee pʼa Tɛhɛnɛ Baa Kilɛ wo sipyii pu gbo.» 7 Ba sipyiire ti bɛɛri ya pa binnɛ Musa ni Arɔn fɛni wɛ, a pʼi pu ɲahaya caanna ɲɛri Ɲuŋɔ Tacirige Fàya Puga ki yíri. A ɲahaŋa di ba ki ɲɔ tɔ, a Tɛhɛnɛ Baa Kilɛ wo nɔɔrɔ wu wuyɛ shɛ. 8 A Musa ni Arɔn di fulo Ɲuŋɔ Tacirige Fàya Puga ki na. 9 A Tɛhɛnɛ Baa Kilɛ di Musa pye: 10 «Yi foro pii sipyii pii tɛ ni, kɔnhɔ di pu kyɛɛgi taapile ni.» A pʼi do, na ɲahaya ye buri ɲiŋɛ na.
11 A Musa di Arɔn pye: «Ma yawurire shɔɔ li lɔ, mʼa naganhaa kʼi wolo saraya tawologo ki ni ma le li ni, mʼa nudanga yawurire ta le wà, mʼa fyaala shɛ sipyiire ti yíri, mʼa shɛ jurumu yafa wo yaaŋa ki pye pu na. Bani Tɛhɛnɛ Baa Kilɛ luu lʼa yìri. Yama pʼa ɲɔ kɔn xɔ.» 12 A Arɔn di yawurire shɔɔ li lɔ ba Musa ya yi jo wɛ, na baa kari sipyiire ti yíri. Lee bi kafɛɛgɛ yama pu ta pʼa ɲɔ kɔn xɔ sipyiire ti na. A wu nudanga yawurire ti le na ki ni, na sipyiire ti wo jurumu wu yafa. 13 A wu yere sipyixuyo ye ni wyii pu tɛ wu ni, a kafɛɛgɛ yama pʼi yere. 14 Sipyii piimu pʼa xu pee yama pu keŋɛ kurogo ge, pee ya pye sipyii kabɔfoŋɔɔ kɛ ni shishɛɛrɛ, di xhuu gbarashuun (14 700). Piimu pʼa xu Kore wo keree ki funŋɔ ni ge, lee niŋɛ ɲɛ pee ni wɛ. 15 Lee kadugo na, a Arɔn di guri pa Musa yíri Ɲuŋɔ Tacirige Fàya Puga ki ɲɔ na. Lee bi kafɛɛgɛ yama pu ta pʼa yere.
Arɔn wo pubiin lʼa wɛrɛ yeege
16 A Tɛhɛnɛ Baa Kilɛ di Musa pye: 17 «Jo ni Izirayɛli nagoo pu ni, mʼa pubegee kɛ ni shuun shɔ pu mu. Gbawege ka bɛɛri wo ɲahagbaa fɔɔ di ba ni pubiin nigin ni ma mu. Mʼa wa bɛɛri mɛgɛ ka wu wo pubiin li na. 18 Mʼa Arɔn mɛgɛ ka Levi wo gbawege ki wo pubiin li na, bani pubiin nigin wu da ba bye gbawege ka bɛɛri wo ɲahagbaa fɔɔ wu mu. 19 Mʼa shɛ kee pubegee ki yaha Ɲuŋɔ Tacirige Fàya Puga ki ni, kariɲɛɛgɛ ɲɔmɛɛ li keshi wu ɲahagbaa na, xuu wemu ni nɛ ma yee ɲuŋɔ cirini ge. 20 Ná wemu nɛ shɔɔnri lɔ ge, wee wo pubiin li na ba wɛrɛ yeege. Izirayɛli nagoo pu wa yee yɔhɔyɔhɔ yɔhɔyɔhɔgana lemu na ge, nɛ na ba lee xɔ.»
21 A Musa di jo ni Izirayɛli nagoo pu ni. A gbaweye yi bɛɛri wo ɲahagbaa fɛɛ pu bɛɛri di pubegee kan wu mu. Ɲahagbaa fɔɔ wa bɛɛri wʼa pubiin nigin kan. Ki bɛɛri bye pubegee kɛ ni shuun. Arɔn bɛ wo pubiin li bye kee ni. 22 A Musa di shɛ kee pubegee ki yaha Tɛhɛnɛ Baa Kilɛ ɲaha tàan, Ɲuŋɔ Tacirige Fàya Puga ki ni. 23 Ɲimuguro ti na ba Musa ya pa jé Ɲuŋɔ Tacirige Fàya Puga ki ni wɛ, Levi wo gbawege ki wo pubiin le, lee na Arɔn wo mɛgɛ ki bye, a Musa di shɛ lee ta lʼa fun fo na fyɛn, na nagoo bɛ pye fo pu na lɛ bɛ. Amandi tige nagoo pu bye pee nagoo pee.* 24 A Musa di kee pubegee ki bɛɛri lɔ laha Tɛhɛnɛ Baa Kilɛ ɲaha tàan, na gari ni ki ni Izirayɛli nagoo pu mu. A pʼi shɛ ki wii, a pu bɛɛri di pu wo pubegee ki lɔ lɔ.
25 A Tɛhɛnɛ Baa Kilɛ di Musa pye: «Arɔn wo pubiin li kuruŋɔ shɛ yaha kariɲɛɛgɛ ɲɔmɛɛ li keshi wu ɲahagbaa na, Ɲuŋɔ Tacirige Fàya Puga ki ni. Li na mara yaha wà, na bye ɲaha shɛshɛɛrɛ pii nʼa she fɛɛ pii wuu na, mʼa na mɛyɔgɔŋɔ ki yereŋɛ pu ɲɔ na, kɔnhɔ pu ganha bu xhu wɛ.» 26 A Musa di kee bɛɛri pye ba Tɛhɛnɛ Baa Kilɛ ya yi jo wu mu wɛ. 27 Lee kadugo na, a Izirayɛli nagoo pʼi Musa pye: «Li wii, wèe ya piin, wèe bɛɛri pʼa da xhuu! 28 Bani sipyaa sipya wʼa fulo Tɛhɛnɛ Baa Kilɛ wo Ɲuŋɔ Tacirige Fàya Puga ki na ge, weefɔɔ na xhuu. Ta wèe bɛɛri pʼa yaa na xu yɛrɛ?»