Kore ni Datan ni Abiramu ya nʼa she le puyɛ ni
16
Ayiwa, caŋa ka Levi ja Kexhati wo ja Zhizari, wee wo ja Kore, were ni Urubɛn wo gbawege ki sipyii pʼa bi woni pye, pee ɲɛ Eliyabu jalaa Datan ni Abiramu, ni Pɛlɛti ja Oni. 2 Pee sipyii shishɛɛrɛ wʼa bi nʼa she le puyɛ ni na wá Musa na. Pʼa bi ɲuŋɔfɛɛ piimu shɔɔnri, pu tayerege na pɛlɛ, pu mɛyɛ bɛ dʼa foro Izirayɛli nagoo pu ni ge, a pee ɲuŋɔfɛɛ pu xhuu shuun ni kɛlɛɛ kaguro (250) di fara pu na. 3 A pʼi puyɛ pinnɛ, na yìri Musa ni Arɔn fɛni na pu pye: «Yee ya li kasa ye, sipyiire ti bɛɛri ti ɲɛ Tɛhɛnɛ Baa Kilɛ wo yahama ni, Tɛhɛnɛ Baa Kilɛ bɛ di ɲɛ pu niŋɛ ni. Ɲaha na yee dʼa yiyɛ yirige Tɛhɛnɛ Baa Kilɛ wo sipyii pu ɲuŋɔ ni wɛ?»4 Tuun wemu ni Musa ya yee logo ge, na do, na ɲaha ke buri ɲiŋɛ na, 5 na Kore ni wu wo sipyii pu pye: «Ɲiga ɲisɔɔgɔ na, wemu wu ɲɛ Tɛhɛnɛ Baa Kilɛ wo wu ge, wemu wu ɲɛ Tɛhɛnɛ Baa Kilɛ wo yahama ni ge, Tɛhɛnɛ Baa Kilɛ na ba wee shɛ, na wu yaha wʼa fulo wu na. Wemu ɲaha wʼa bulo ge, wu na ba weefɔɔ yaha wʼa fulo wu na. 6 Mu Kore ni ma wo tahama-nɔhɔmɔɔ pu ni, lemu yʼa da ba bye ge, lee li wa mɛ: Yi bɛɛri pu pa yawurire shɔhɔɔ lɔ, 7 yi ba na le ki ni ɲiga na, yʼi nudanga yawurire le ki ni Tɛhɛnɛ Baa Kilɛ ɲaha tàan. Tɛhɛnɛ Baa Kilɛ ba wemu shɔɔnri lɔ, wee wu ɲɛ Tɛhɛnɛ Baa Kilɛ wo yahama ni. Yee Levi nagoo pu pʼa li kasa ye!»
8 Ayiwa, a Musa di Kore pye: «Levi wo tirige shɛɛn pee, yi ɲuwegee shan. 9 Izirayɛli wo Kilɛ wʼa yee ɲaha bulo na foro Izirayɛli nagoo pu ni, kɔnhɔ yʼi fulo wu na, yʼi da Tɛhɛnɛ Baa Kilɛ wo fàya puga ki labye wu pyi. Yʼi da yeree sipyiire ti bɛɛri ɲahagbaa na, yʼi da labye pyi ti mu. Lee ya ta yee yaa-i gɛ? 10 Mu ni ma ceboronamaa pu bɛɛri, yee piimu pu ɲɛ Levi wo tirige shɛɛn pu ge, Tɛhɛnɛ Baa Kilɛ ya yee yaha yee pʼa fuloo wu na, a yʼi dɛri na giin di da saraya ɲaha shɔɔnrivɛɛrɛ bɛ pyi! 11 Lee na, mu ni ma wɔɲii pu ni, Tɛhɛnɛ Baa Kilɛ fɛni yee ya yìri, bani li can koo ni, ɲaha Arɔn di ɲɛ fo yee pʼa yu yʼa zhaan wu ni wɛ?»
12 Lee kadugo na, a Musa di tuduro yaha pʼa shɛ Eliyabu ja Datan ni Abiramu yiri. Ga, a pee di jo: «Wèe wa da zhɛ wà wɛ! 13 Fiige kemu kʼa ɲi fo na fúu nujirimɛ ni sɛrɛ na ge, mu ya wèe yeege kee ni, kɔnhɔ mʼa ba wù gbo siwaga ki ni. Ga lee bɛ na, lee bɛ ya mu yaa wɛ, a mʼa nɔhɔ na giin mʼa mayɛ teŋɛ ma pye wèe ɲuŋɔfɔɔ sanha! 14 Fiige kemu kʼa fúu nujirimɛ ni sɛrɛ na ge, mu ya ta wèe leŋɛ kee ni bada wɛ. Mu ya ta kɛrɛyɛ ni tiire kɛrɛyɛ kan wèe mu wù ta wɛ. Mu wa giin na fyɛnmɛɛ pu wa pii sipyii pii bɛɛri gɛ? Bada, wèe kunni wa se wɛ!»
15 Ayiwa, a Musa luu di yiri fo xuuni. A wu Tɛhɛnɛ Baa Kilɛ pye: «Ma ganha bu da zɔɔ pu wo saraga ki na wɛ. Nɛ sanha pu keŋɛ yaaga ka shishiin lɔ ɲa wɛ, ali kafaŋa ke ka bɛ wɛ. Nɛ di wa sanha kanahana bɛ pye wa na pu ni wɛ.»
Kilɛ ya Kore, Datan ni Abiramu yɛ kyɛɛgi laha wà
16 A Musa di Kore pye: «Ma ni ma sipyii pu ni, yi bɛɛri pu pa ɲiga na Tɛhɛnɛ Baa Kilɛ ɲaha tàan, ma ni ma sipyii pee, ni Arɔn bɛ. 17 Wa bɛɛri di wu yawurire shɔɔ lɔ, wu nudanga yawurire le li ni, wu ba ni li ni Tɛhɛnɛ Baa Kilɛ ɲaha tàan. Ki bɛɛri na bye yawurire shɔhɔɔ xhuu shuun ni kɛlɛɛ kaguro (250). Ma ni Arɔn ni, yi bɛ di ba ni yi wo yawurire shɔhɔɔ ki ni.» 18 Ayiwa, a wa bɛɛri di wu yawurire shɔɔ lɔ, na na le li ni, na nudanga yawurire le li ni, na shɛ yere Ɲuŋɔ Tacirige Fàya Puga ki tajege ki ɲɔ na na fara Musa ni Arɔn bɛ na. 19 Ba Kore ya sipyiire ti bɛɛri yiri na pa binnɛ Musa ni Arɔn ɲaha tàan Ɲuŋɔ Tacirige Fàya Puga ki tajege ki ɲɔ na wɛ, wee tuun wu ni, a Tɛhɛnɛ Baa Kilɛ wo nɔɔrɔ wu wuyɛ shɛ sipyiire ti bɛɛri na. 20 A Tɛhɛnɛ Baa Kilɛ di Musa ni Arɔn pye: 21 «Yi laha pii sipyii pii tàan, kɔnhɔ di pu kyɛɛgi taapile ni.»
22 A Musa ni Arɔn di do, na pu ɲahaya ye buri ɲiŋɛ ki na, na jo: «Ee Kilɛ, mu wemu wu ɲɛ munahaa ki bɛɛri kafɔɔ ge, ta ma da ba luu yirige sipyiire ti bɛɛri tàan, na ta shɛn nigin yɛ dʼa jurumu wu pye ya?»
23 A Tɛhɛnɛ Baa Kilɛ di Musa pye: 24 «Yi jo sipyiire ti mu na pu laraga kɔn Kore ni Datan ni Abiramu yɛ wo fàya buguloo pu na.»
25 A Musa di yìri, na gari Datan ni Abiramu fɛni. A Izirayɛli nɔhɔlɛɛ pʼi daha wu na. 26 A wu shɛ jo ni sipyiire ti ni na: «Yi laraya kɔn ye sipyikuuyo ye wo fàya buguloo pu na. Yi ganha bu da gbɔn pu yaaga ka shishiin na wɛ, kɔnhɔ yi bɛ ganha bu ba binnɛ gyɛɛgi ni pu ni pu wo jurumu wu wuu na wɛ.» 27 Wee tuun wu ni, a sipyiire tʼi laraga kɔn Kore ni Datan ni Abiramu yɛ wo fàya buguloo pu na. A Datan ni Abiramu yɛ di foro yere pu wo fàya buguloo pu ɲɔ na, pu ni pu cèe, ni pu nagoo, ni pu ɲabiye.
28 Ayiwa, a Musa di jo: «Le na yee da ba li cɛ na Tɛhɛnɛ Baa Kilɛ wʼa nɛ tun nɛ wu kii keree kii bɛɛri pye, na nɛ ta na ki pyi nayɛ ni wɛ. 29 Pii sipyii pii bu xhu ba sipyii pusamaa bɛɛri ya xhuli wɛ, sipyii pusamaa ya xhuli xugana lemu na ge, pu bu xhu lee na, wee tuun wu ni, Tɛhɛnɛ Baa Kilɛ ya ta nɛ tun wɛ. 30 Ga Tɛhɛnɛ Baa Kilɛ bu kaa nivonɔ la pye, ɲiŋɛ ke bu ki ɲɔ mugi na pii ni pu keŋɛ yaŋmuyɔ yi bɛɛri jɔ, na pu ɲìi wuu pu tirige xuu kulo ni, wee tuun wu ni yee da li cɛ na pii sipyii pii ya ta Tɛhɛnɛ Baa Kilɛ wii yaaga wɛ.»
31 Ba wʼa xɔ yɛ pee jomɔ pu bɛɛri na wɛ, a ɲiŋɛ kʼi ja pu tɔɔyɔ yi nɔhɔ ni. 32 A ɲiŋɛ kʼi ki ɲɔ mugi na pu jɔ, pu ni pu puga shɛɛn na fara Kore wo tahama-nɔhɔmɔɔ pu bɛɛri na ni pu keŋɛ yaŋmuyɔ yi bɛɛri. 33 A pu ɲìi wuu di digi xuu kulo ni, pu ni pu keŋɛ yaŋmuyɔ yi bɛɛri. A ɲiŋɛ kʼi ki ɲɔ tɔ wá pu na. A pu ɲuŋɔ di dugo mu lee tugogana li na sipyii pusamaa tɛ ni. 34 Izirayɛli nagoo piimu bɛɛri pu bi pu maha ge, a pee bɛɛri di baa pu sipyaa ki ɲaha na, bani pu bi fyagi na ɲiŋɛ ki ganha da ba pee bɛ jɔ wɛ.
35 Namaa xhuu shuun ni kɛlɛɛ kaguro (250) wemu wʼa nudanga yawurire ti le ge, a na di yìri Tɛhɛnɛ Baa Kilɛ yíri, na ba pee sòrogo fɛɛfɛɛ.