Faa yapyiire wo saraya ye
15
Ayiwa, A Tɛhɛnɛ Baa Kilɛ di Musa pye: 2 «Yi jo Izirayɛli nagoo pu mu na: ‹Fiige kemu nʼa da ba gan yi mu, kee di bye yi tatɛɛngɛ ge, yi ba jé kee ni tuun wemu ni, 3 wa ba jo wu saraga wolo Tɛhɛnɛ Baa Kilɛ mu saraga kemu na zòrogo kɔnhɔ ki nugo di daan Tɛhɛnɛ Baa Kilɛ mu ge, kʼa pye saraga nizogoŋɔ la, kʼa pye ɲɔfaaga wogo la, kʼa pye daan na mu wo saraga la, ki shiin ya pye kalenɛ wo saraga la, ki bu bye nù kelee dubya kelee sika, 4 wemu wʼa da saraga ki wolo Tɛhɛnɛ Baa Kilɛ mu ge, dubyapige nigin bɛɛri wʼa da gbo na pye saraga nizogoŋɔ kelee saraga nidiige ge, wufɔɔ di farini myɛ kiloo taanri lɔ, wu sìnmɛ litiri nigin ni taaga le pee ni wu tɔnhɔ, 5 wu duvɛn litiri nigin ni taaga lɔ, kee di bye saraga niwoŋɔ, wu yee fara kee saraga ki na. 6 Wu bu bye dubyapoo, wufɔɔ di farini myɛ kiloo gbaara lɔ, wu sìnmɛ litirilee shuun le pee ni wu tɔnhɔ, 7 wu duvɛn litirilee shuun pye saraga niwoŋɔ. Kee saraga ke ma da ba wolo lee wologana li na ge, kee wo nugo ki na ba daan Tɛhɛnɛ Baa Kilɛ ni. 8 Li bu da nago nupepinŋɛ wufɔɔ wʼa da gan Tɛhɛnɛ Baa Kilɛ mu, ki bu da saraga nizogoŋɔ kelee ɲɔfaaga saraga, kelee yi bɛɛri ya pinnɛ saraga kemu na ge, 9 farini myɛ pe pʼa da vara kee na ge, pee ɲɛ kiloo gbarashɛɛrɛ, na sìnmɛ litirilee taanri taga pee tɔnhɔ, 10 na duvɛn litirilee taanri pye saraga niwoŋɔ ke. Kee saraga nizogoŋɔ ke wo nugo ki na daan Tɛhɛnɛ Baa Kilɛ ni. 11 Nupepinŋɛ bɛɛri ba da wolo saraga, kelee dubyapoo, kelee dubyapige, kelee sikapige, le wologana le na kʼa da wolo. 12 Yapɔrɔyɔ yi mɛhɛ ɲɛhɛ tawologo ni, ki nigin wa bɛɛri ni ki farini myɛ kiloo ɲɔ, ni ki duvɛn litirilee ɲɔ. 13 Wemu bɛɛri wʼa se Izirayɛli shɛn ge, wu ba da saraga wolo, kemu na zòrogo ki nugo di daan Tɛhɛnɛ Baa Kilɛ ni ge, le wologana le na wʼa yaa na ki wolo. 14 Nabun wemu bɛ wu ɲɛ nabɔrɔ na yi mu, kelee wu caŋa na mɔ ni yi ni tiinnɛ li na ge, wee wa bɛ ba da saraga wolo, kemu na zòrogo ki nugo di daan Tɛhɛnɛ Baa Kilɛ ni ge, le wologana le na wu bɛ wʼa da ki wolo. 15 Sipyiire ti bɛɛri tʼa da ba binnɛ we saliya nigin we na, na wu koo ɲaari, yee fara nadadiinmɛɛ pu bɛɛri na. Wee na ba bye yee kadugo nagoo pu bɛɛri mu saliya wemu da ga yìri wɛ. Yee ni nabuun bu bɛɛri na ba bye nigin we saliya we ni Tɛhɛnɛ Baa Kilɛ ɲaha tàan. 16 Saliyanumɔ ni ɲɔmɛjuu ninunɔ li da ba bye yee ni nabuun pu bɛɛri ɲuŋɔ ni, pee piimu bɛɛri pu wa tiinnɛ na ni yi ni ge.› »*Na buuri nizhiimɛ wu pye saraga
17 A Tɛhɛnɛ Baa Kilɛ di Musa pye 18 na wu yi jo Izirayɛli nagoo pu mu na: «Fiige kemu ni nɛ yi ɲaha co na se ge, yi ba shɛ jé kee ni tuun wemu ni, 19 Yi ba da zhɛ ki buuri wu ɲɔ kɔn da li, yʼi wa wolo kan Tɛhɛnɛ Baa Kilɛ mu mamama yakanga. 20 Yi ba farini myɛ pu tɔnhɔ, yʼi nizhiimɛ pu fɔ, yʼi wee buurishiimɛ wu kan na mu ba yi ma yi alikama nizhiimɛ wu pye yalɔɔrɔ ti lɔduun ni wɛ. 21 Yi shi wemu bɛɛri wʼa ma yi kadugo ge, wa bɛɛri ba wu farini myɛ nizhiimɛ tɔnhɔ, wufɔɔ di fɛnhɛ buurishiimɛ wu kan Tɛhɛnɛ Baa Kilɛ mu mamama yakanga.
Wa bu saliya wu kyɛɛgi na ta wufɔɔ ya li ɲɔ wolo wu wu kyɛɛgi wɛ
22 Tɛhɛnɛ Baa Kilɛ ya ɲɔmɛjogoo kiimu jo Musa mu ge, yi bu wuregi, na lee ɲɔmɛɛ la kyɛɛgi, na ta yi ya li ɲɔ wolo li kaa na wɛ, 23 kee ɲɔmɛjogoo kiimu bɛɛri Tɛhɛnɛ Baa Kilɛ ya jo Musa mu wʼa jo yi mu, na co fo caŋa ɲii lemu ni wʼa ki jo Musa mu ge, fo na shɛ nɔ yi shi nibama wu bɛɛri na, 24 Sipyiire ti bu lee ɲɔmɛɛ la kyɛɛgi na ta pu ya li ɲɔ wolo li kaa na wɛ, pu funŋɔ bɛ di ya to li gyɛɛgi wu na wɛ, wee tuun wu ni sipyiire ti bɛɛri tʼa da nupepinŋɛ nigin wolo saraga nizogoŋɔ, kee kemu wo nugo kʼa dan Tɛhɛnɛ Baa Kilɛ ni ge. Kee saraga ke ni farini myɛ pemu pʼa yaa ni duvɛn wemu ni ge, yee di wolo fara ki na. Pʼi sikapoo nigin bɛ wolo na pye jurumu yafa saraga. 25 Saraya ɲaha shɔɔnrivɔɔ wu na ba Izirayɛli nagoo pu bɛɛri wo jurumu yafa wu wo yaaŋa ki pye, lee ma yafa pu mu, bani pu ya ta li ɲɔ wolo li kaa na, na pee nahama pu pye wɛ. Pu ba ba ni kee saraga ke ni tuun wemu ni, kee saraga kemu ki da zòrogo na ni Tɛhɛnɛ Baa Kilɛ mu ge, na pu jurumu yafa saraga ki bɛ wolo Tɛhɛnɛ Baa Kilɛ mu pu wo piinŋɛ ki wuu na, pʼa kemu pye na ta pu ya li ɲɔ wolo li kaa na wɛ ge, 26 nɛ na yafa Izirayɛli nagoo pu bɛɛri mu, na yafa nadadiinmɛɛ pu bɛ mu pee piimu pu wa ni pu ni ge, bani pu bɛɛri ya lee kanahana li pye na ta pu ya li bye ɲɔ wolo li kaa na wɛ. 27 Li bu da nago shɛn nigin wʼa kanahana li pye na ta wu ya li ɲɔ wolo li kaa na wɛ. Wufɔɔ na yee nigin sikashɔ wolo saraga wu wo jurumu wu wuu na. 28 Sipya wemu wʼa kanahana li pye na ta wu ya li ɲɔ wolo li kaa na wɛ ge, saraya ɲaha shɔɔnrivɔɔ wu na ba weefɔɔ wo jurumu yafa wu wo yaaŋa ki pye Tɛhɛnɛ Baa Kilɛ ɲaha tàan. Kee yaaŋa ki bu bye xɔ, kanahana li na yafa li pyevɔɔ wu mu. 29 Wa bɛɛri ba kanahana la pye na ta wufɔɔ ya li ɲɔ wolo li kaa na wɛ, ma kantiinlɛ fara ma nadadiinmɛ na, wee saliyanumɔ we koo pu bɛɛri wa da ɲaari. 30 Ga sipya wemu bu dɔ, na kanahana pye, ma kantiinlɛ fara ma nadadiinmɛ na, Tɛhɛnɛ Baa Kilɛ mɛgɛ weefɔɔ ya kyɛɛgi. Weefɔɔ ya yaa na wu niŋɛ kɔn wolo wu sipyii pu ni. 31 Wʼa Tɛhɛnɛ Baa Kilɛ wo jomɔ pu fanha, na wu saliya wu bɛ kyɛɛgi. Wee sipya wʼa yaa na wu niŋɛ wolo sipyiire ti ni. Wu tiibaara ti wo jaagi kanhama pu na bye wubile li ɲuŋɔ ni.
Ma bu cadɛɛngɛ ki kyɛɛgi, mʼa yaa na gbo
32 Ayiwa, na Izirayɛli nagoo pu yaha siwaga ki ni, pʼa pa ná wa ɲa wu na kajiiye shaa cadɛɛngɛ ka na. 33 Piimu pʼa wu ɲa wu na kajiiye yi shaa ge, a pee di ba ni wu ni Musa ni Arɔn ni sipyiire tisara bɛɛri mu. 34 A pʼi wu kemɛ mara, bani wu ni lemu li bi yaa ge, lee bi sanha zhɛ wɛ. 35 A Tɛhɛnɛ Baa Kilɛ di Musa pye: «We ná we ya yaa na wu gbo. Sipyiire ti bɛɛri ya yaa na wu wá gbo ni kagereye ni buguro ti kadugo yíri.» 36 Wee tuun wu ni a sipyiire ti bɛɛri di wu yeege buguro ti kadugo yíri, na wu wá ni kagereye ni fo na wu gbo, ba Tɛhɛnɛ Baa Kilɛ ya yi jo Musa mu wɛ.
Faleye yi wo ɲɔwaya yi keree
37 Ayiwa, a Tɛhɛnɛ Baa Kilɛ di Musa pye 38 na wu yi jo Izirayɛli nagoo pu mu na: «Yi ni yi kadugo nagoo pu bɛɛri ni, yʼa zhaanra yɛri yi fadeye ɲɔwaya yi na tuun bɛɛri ni. Yʼi da bula lize mɛhɛɛ nigin nigin leni zhaanra ti bɛɛri nigin nigin ni*. 39 Wee tuun wu ni, yi ba tee zhaanra ti ɲaa, yi funyɔ na da dun ni Tɛhɛnɛ Baa Kilɛ wo ɲɔmɛjogoo ki bɛɛri ni, yi ma ganha na ki koo ɲaari, lee funŋɔ ni, yi da ga koo yaha yʼi daha yi zɔlɔɔ pee, kelee yi ɲìi ki wo ɲidaan wu fɛni wɛ, wee wemu wʼa ɲɔmɛɛ baa fɛɛrɛ waa yi na ge. 40 Lee na bye kaɲuŋɔ yi ma fungɔngɔ yaha nɛ wo ɲɔmɛjogoo ki bɛɛri na, na ganha na ki koo ɲaari. Yi ma bye fɛfɛɛrɛ wuu yi Kilɛ wu mu. 41 Nɛ ɲɛ Tɛhɛnɛ Baa Kilɛ, yi wo Kilɛ we, wee wemu wʼa yi yeege Misira fiige ki ni, na bye yi Kilɛ wu ge. Oo dɛ, nɛ ɲɛ Tɛhɛnɛ Baa Kilɛ, yi wo Kilɛ we.»