Izirayɛli nagoo pʼa ɲuŋɔ nari*
14
Wee tuun wu ni, a sipyiire ti bɛɛri di sipyaa le, a pʼi kee piige ki bɛɛri pye na mɛhɛɛ suu. 2 A Izirayɛli nagoo pu bɛɛri di ganha na Musa ni Arɔn yɔhɔyɔhɔ. A sipyiire ti bɛɛri di pu pye: «Wèe ɲɛhɛ da bi xhu bɛ Misira fiige ki ni, kelee na xu ke siwaga ke yɛpyaa bɛ ni, lee bi da bɔrɔ. 3 Ɲaha na Tɛhɛnɛ Baa Kilɛ di gaaŋi ni wèe ni kee fiige ki ni ŋmɔpara li shɛ gbo wɛ? Wù pɛɛn pu na ba wù cèe pee ni wù nagoo pu kuu lɔ. Ta li ya pɔrɔ wèe pu kuri wʼà gaaŋi Misira fiige ki ni wɛ?» 4 A pʼi yi jo puyɛ mu na: «Yi pa wù ɲuŋɔfɔɔ wa teŋɛ wùyɛ ɲuŋɔ ni, wù guri wʼà se Misira fiige ki ni.»5 A Musa ni Arɔn di do, na pu ɲahaya ye buri buri ɲiŋɛ ki na Izirayɛli nagoo pu bɛɛri nibinnɛgɛ ɲaha tàan. 6 A Nuni ja Zhozuwe ni Zhefunɛ ja Kalɛbu logoo di sii yìri fo pʼa pu fàya shɛɛngi. Pee bɛ pu bye fiige ki saalavɛɛ pu ni. 7 A pʼi Izirayɛli nagoo pu bɛɛri pye: «Fiige kemu wèe ya shɛ saala ge, kʼa sii tàan fo xuuni. 8 Wèe bu daan Tɛhɛnɛ Baa Kilɛ mu, wu na wèe leŋɛ kee fiige ki ni, na ki kan wèe mu. Ki bɛɛri kʼa ɲi fo na fúu nujirimɛ ni sɛrɛ na. 9 Ga yi ganha bu ɲuŋɔ nari Tɛhɛnɛ Baa Kilɛ na wɛ, yʼi ganha bu fya bɛ kee fiige ke wo sipyii pu ɲaha na wɛ, bani wèe na zhɛ pii sipyii pii shi tɔ kanna wèe ya kaa bɛ pye wɛ. Pu wo yasunyɔ yʼa pu wá, ga Tɛhɛnɛ Baa Kilɛ di ɲɛ ni wèe ni. Lee wuu na, yi ganha bu fya pu na wɛ.»*
Kilɛ luu ya yìri Izirayɛli nagoo pu tàan
10 A sipyiire ti bɛɛri di jo na pu Zhozuwe ni Kalɛbu wá gbo ni kagereye ni, ga a Tɛhɛnɛ Baa Kilɛ wo nɔɔrɔ wu wuyɛ shɛ Izirayɛli nagoo pu bɛɛri na na foro Ɲuŋɔ Tacirige Fàya Puga ki ni.
Kilɛ ya jaagi kanhama shan Izirayɛli nagoo pu ɲuŋɔ ni
11 A Tɛhɛnɛ Baa Kilɛ di Musa pye: «Tuun wekɛ ni pii sipyii pii di da ba nɛ wo fanhara ti ɲɔ yaha wɛ? Fo tuun wekɛ ni pʼi da ba dà nɛ na wɛ? Na ta nɛ dʼa kakanhaŋaa niɲɛhɛŋɛɛ pye bɛ pu niŋɛ ni. 12 Nʼa da ba kafɛɛgɛ yama taga pu gbo, di pu kyɛɛgi. Lee kadugo na di ba shi wa yeege ma ni wemu baraga na ba sii bɛlɛ, wʼa nɔhɔ ɲɛhɛ Izirayɛli nagoo pu na ge.»
13 A Musa di Tɛhɛnɛ Baa Kilɛ pye: «Ga Misira shɛɛn pu na ba yee logo dɛ, pee piimu tɛ ni mu ya pii sipyii pii yeege ni fanha nigbɔhɔ ni ge.* 14 Pu na ba yi paari ke fiige ke shɛɛn pu mu. Pʼa yi logo na mu Tɛhɛnɛ Baa Kilɛ wa pii sipyii pii niŋɛ ni, na mu ya mayɛ shɛɛ pu na, na mu Tɛhɛnɛ Baa Kilɛ wo ɲahaŋa kʼa yeree pu ɲuɲɔ na, na mu ma ɲaari pu ɲahagbaa na ɲahaŋa ni caŋa ni, na ɲaari pu ɲahagbaa na piige ni ɲahaŋa na wogo ni. 15 Mu bu pii sipyii pii kyɛɛgi ba shɛn nigin ɲɛ wɛ, shi wemu wʼa mu kaa logo ge, wee na ba jo: 16 ‹Tɛhɛnɛ Baa Kilɛ ya kàa na fiige kemu wo ɲɔmɛɛ lɔ pii sipyii pii mu na wu ba ki kan pu mu ge, wu ya já pu leŋɛ ki ni wɛ, lee wuu na wʼa pu gbo siwaga ki ni.› 17 Ayiwa, nʼa ma ɲɛɛri nimɛ Kafɔɔ, ma sefɛɛrɛ ti shɛ ma na jo ba mʼa yi jo wɛ na: 18 ‹Tɛhɛnɛ Baa Kilɛ luu ya yìri tɔvuyo na wɛ, wu saama pu dʼa pɛlɛ shɛn. Wʼa sipyii pu wo tiibaara te ni pu jurumu wu yafani pu mu. Mu ya nahama fɔɔ yari jaagi baa wɛ. Wʼa tii wo tiibaara foo tɔni pu nagoo mu fo na shɛ nɔ pu sii taanri wuu kelee sii shishɛɛrɛ wuu li na.›* 19 Nʼa ma ɲɛɛri, ma saama nigbɔ pu wuu na pii sipyii pii wo tiibaara ti yafa pu mu, ma na jo ba mʼa yafani pu mu na co wù foroduun wu na Misira fiige ki ni fo na pa nɔ nimɛ na wɛ.» 20 A Tɛhɛnɛ Baa Kilɛ di jo: «Nɛ yafa pu mu ma na jo ba mʼa li sha na mu wɛ. 21 Ga nɛ wu ɲɛ Kilɛ ɲìi wo we, Tɛhɛnɛ Baa Kilɛ wo nɔɔrɔ wu bɛ dʼa ɲiŋɛ ki bɛɛri ɲi.* 22 Pii sipyii pii bɛɛri ya nɛ wo nɔɔrɔ wu ɲa, na nɛ wo kakanhaŋaa nibyegee ki bɛ ɲa Misira fiige ke, ni siwaga ki ni. Lee kadugo na a pʼi na taanna wii tɔɔɲii kɛ, na zhe pu da nɛ jomɔ pu logo wɛ. 23 Lee wuu na nɛ kàa pu sefɛlɛɛ pu mu jo nɛ na ba fiige kemu kan pu mu ge, we wa nigin bɛ da ki ɲa wɛ. Piimu bɛɛri pʼa nɛ fanha ge, wee wa nigin bɛ da jé ki ni wɛ. 24 Ga nɛ kapyebye Kalɛbu, wee wo fungɔngɔ ki ya pye ni piisamaa wo fungɔnyɔ yi ni nigin wɛ. Wʼa nɛ ɲɔmɛɛ co keree bɛɛri ni. Lee wuu na fiige kemu wʼa shɛ sɛɛri ge, nɛ na ba wu leŋɛ ki ni. Kee na ba bye wu kadugo shi nibama wu wogo.*
25 «Ayiwa, ni Amalɛki shi shɛɛn ni Kana shɛɛn wa fadaaŋa ki na, ɲiga na, yi ŋmahana kuri, yʼi da se siwaga ki ni Suumɔ Loɲiga ki shizhaa wu na.»
26 A Tɛhɛnɛ Baa Kilɛ di Musa ni Arɔn pye: 27 «Pii sipyii pii ya kolo. Pu ɲɛ fo na nɛ yɔhɔyɔhɔ. Nɛ na ba pii keree ku fo tuun wekɛ wɛ? Izirayɛli nagoo pʼa nɛ yɔhɔyɔhɔ, na tigire temu bɛɛri tari nɛ na ge, nɛ yi bɛɛri logo. 28 Yi yi jo pu mu na Tɛhɛnɛ Baa Kilɛ ya jo: ‹Nɛ ɲìi wo wu mɛgɛ ki wuu na, lemu bɛɛri yee ya jo le nɛ ɲuwegee ki ni ge, lee nʼa da ba bye yi na. 29 Pʼa yee piimu bɛɛri tɔrɔ ge, ma lɔ yee kɛlɛɛ shuun (20) na na duri fo na shɛ nɔ yi ɲahagbaa fɛɛ pu na. Yee piimu bɛɛri pʼa nɛ yɔhɔyɔhɔ ge, yee bɛɛri na ba xhu ke siwaga ke ni.* 30 Nɛ kàa jo nɛ na ba yee leŋɛ fiige kemu ni, yʼi diin wà ge, yee wa shishiin wa da ba jé ki ni wɛ, fo Zhefunɛ ja Kalɛbu ni Nuni ja Zhozuwe. 31 Yi nagoo piimu kaa yee ya jo na yee wo pɛɛn pu na ba pu kuu ge, pee nʼa da ba leŋɛ kee fiige ki ni. Kee fiige kemu ni yee ya she ge, pee na ba ki shi cɛ.› » 32 Ga yee pi ge, yee nixhuyo na ba do do ke siwaga ke ni. 33 Yi nagoo pu na ba bye yapɔrɔnahamaa siwaga ki ni fo yee kɛlɛɛ shishɛɛrɛ (40), na yee wo ɲɔmɛcobaana li kanhama soro fo yee bɛɛri ba shɛ xhu xɔ tuun wemu ni siwaga ki ni.* 34 Ba yee ya cabyaa kɛlɛɛ shishɛɛrɛ (40) pye na fiige ki saala wɛ, mu yee wo tiibaara ti foo da ba dɔ yee mu fo yee kɛlɛɛ shishɛɛrɛ (40): Caŋa ɲii bɛɛri lee ma bye yee nigin. Lee funŋɔ ni, na she Kilɛ ni, lemu li ɲɛ lee wo kuduun ge, yee na ba lee cɛ. 35 Nɛ Tɛhɛnɛ Baa Kilɛ wʼa yi jo. Oo dɛ, mu nʼa da ba ye sipyikuuyo ye pye, yee yemu yʼa yiyɛ pinnɛ nɛ fɛni ge. Pu bɛɛri na ba juri ke siwaga ke ni, ke ni pu bɛɛri wa da ba xhu.»
36 Musa ya namaa piimu tun pʼa shɛ fiige ki saala, a pee di ba na ba fiige ki kaa kolo jo fo na sipyiire ti bɛɛri pye ti na Musa mɛgɛ ki yɔhɔyɔhɔ ge, 37 pee piimu pʼa kayekuuyo jo fiige ki shizhaa na ge, a pee bɛɛri di gburogi xu Tɛhɛnɛ Baa Kilɛ ɲaha tàan. 38 Pee namaa pu ni, pee piimu bɛɛri pʼa shɛ fiige ki saala ge, Nuni ja Zhozuwe ni Zhefunɛ ja Kalɛbu, pee yɛ pʼa kori ɲiifɛɛrɛ na pu ni.
Sipyiire tʼa Kilɛ ɲɔmɛɛ yaha sanha
(Dutɛrɛnɔmɛ 1:41-46)
39 Ayiwa, a Musa di kee keree ki bɛɛri paari Izirayɛli nagoo pu mu, a daajeŋɛ di jé pu ni fo xuuni. 40 Ɲimuguro ti na a pʼi ba sɔɔ yìri na duri na gaaŋi faaboboyo yi xuu wu ni, na yu: «Wèe ya jurumu pye. Tɛhɛnɛ Baa Kilɛ ya xuu wemu kaa jo ge, wù funŋɔ ki wa wù shɛ jé wu ni.» 41 A Musa di jo: «Lekɛ na yʼi wa se wà wɛ? Tɛhɛnɛ Baa Kilɛ wo koo le yee wa yɛri mɛ. Yee wa da bee wɛ. 42 Yi ganha da zhɛ wɛ, bani Tɛhɛnɛ Baa Kilɛ wa ni yi ni wɛ. Yi ganha bu shɛ yiyɛ kan yi pɛɛn mu pu gbo wɛ. 43 Amalɛki shi we ni Kana shɛɛn pu wa wà yi ɲaha na, pee na zhɛ yi gbo ni pu ŋmɔparaa ki ni. Bani yee ya kuri Tɛhɛnɛ Baa Kilɛ fɛni, wu da ba bye ni yee ni wɛ.»
44 Lee bɛ na a Izirayɛli nagoo pʼi ɲuwii waha, na dugi kari faaboboyo yi na, ga Tɛhɛnɛ Baa Kilɛ wo kariɲɛɛgɛ ɲɔmɛɛ li keshi we, ni Musa ya ta kɔɔngi buguro ti na wɛ. 45 Wee tuun wu ni, a Amalɛki shi we ni Kana shɛɛn piimu pu bye yee faaboboyo yi ni ge, a pee di digi pa, na ba pu kyɛɛgi xuuni, na pu niinɛ fo na shɛ nɔ Ɔrima ni.