Musa ya pii yaha pʼa shɛ Kana fiige ki saala
(Dutɛrɛnɔmɛ 1:19-33)
13
A Tɛhɛnɛ Baa Kilɛ di Musa pye: 2 «Kana fiige kemu nʼa da gan Izirayɛli nagoo pu mu ge, sipyii pʼi tun pʼi shɛ ki saala. Mʼa namaa nigin nigin lɔ gbaweye yi bɛɛri wo ɲahagbaa fɛɛ pu ni, mʼa pee tun.» 3 A Musa di pu tun na foro Paran wo siwaga ki ni Tɛhɛnɛ Baa Kilɛ wo ɲɔmɛɛ li na. Pee namaa pu bɛɛri bye Izirayɛli gbaweye yi wo ɲahagbaa fɛɛ pʼa. 4 Pu mɛyɛ yi wa ye: Urubɛn wo gbawege ki shɛn wu bye Zakuri ja Samuwa. 5 A Simiɲɔ wo gbawege ki shɛn wu bye Ɔri ja Safati. 6 A Zhuda wo gbawege ki shɛn wu bye Zhefunɛ ja Kalɛbu. 7 A Isakari wo gbawege ki shɛn wu bye Yusufu ja Yigali. 8 A Efirayimu wo gbawege ki shɛn wu bye Nuni ja Ose. 9 A Bɛnzhamɛ wo gbawege ki shɛn wu bye Arafu ja Paliti. 10 A Zabulɔn wo gbawege ki shɛn wu bye Sodi ja Gadiyɛli. 11 A Yusufu ja Manase wo gbawege ki shɛn wu bye Susi ja Gadidi. 12 A Dan wo gbawege ki shɛn wu bye Gemali ja Amiyɛli. 13 A Azɛri wo gbawege ki shɛn wu bye Mikayɛli ja Seturi. 14 A Nɛfitali wo gbawege ki shɛn wu bye Vofisi ja Nabi. 15 A Gadi wo gbawege ki shɛn wu bye Maki ja Gewɛli.16 Musa ya namaa piimu tun pu shɛ fiige ki sɛɛri ge, pee wo mɛyɛ yʼa pye ye. A Musa di Nuni ja Ose mɛgɛ le na Zhozuwe.
17 A Musa di pu tun kari na pu shɛ Kana fiige ki sɛɛri. A wu pu pye: «Yi jé fiige ki woroo kulo kacɛ ki na, yʼi shɛ dugi faaya yi na. 18 Yʼi fiige ki kemɛ wii, dii ki wa ge. Sipyii piimu pu wa ki ni ge, yʼi pee bɛ sɛɛri baraga bi ɲɛ pu ni, kelee pu shiin bi ɲɛ baraga baa. Pu bu da pʼa ɲɛhɛ, kelee pu shiin ya ɲɛhɛ wɛ. 19 Yʼi fiige ki sɛɛri ki bu da kʼa taan, kelee ki shiin ya taan wɛ, ni kulogoo ki bɛ, ki ɲɔ bu da mugi wá, kelee ki shiin bu da kʼa kuuri ni kashɛn ɲaha kɔn kɔn kasɔrɔgɔ ni. 20 Yʼi ɲiŋɛ ki bɛ wii ki bu da kʼa gbile, kelee ki fanha bu da kʼa xɔ. Ki bu da ni tiire ni, kelee ki shiin bu da tiire baa. Yʼi la le yiyɛ ni yʼi ba ni kee fiige ke wo tige yasɛyɛ ya ni.» Wee tuun wu bye ɛrɛzɛn nizhiimɛ wu wo lɛduun.
21 A pʼi gari, na shɛ fiige ki sɛɛri, na ɲɔ kɔn Zini wo siwaga ki na, fo na shɛ nɔ Erexhɔbu na, Amati kulo li tajege ki ɲɔ na. 22 Woroo kulo kacɛ ki na pʼa toro, na shɛ nɔ Eburɔn ni. Lee bi Anakia shi shɛɛn pu ta wà: Ayimani ni wu kpuun, ni Sheshayi ni wu kpuun, ni Talimayi ni wu kpuun. Eburɔn kulo lʼa sin yee gbarashuun, a Tanisi kulo lʼi na sin Misira fiige ki ni. 23 Ba pʼa pa nɔ Ɛsikɔli wo fadaaŋa ki na wɛ, na ɛrɛzɛn geŋɛ ka kɔn ni ɛrɛzɛn karaga ka ni. A pʼi kee suri kagaanga ka ni, na kee taha sipyii shuun kapaya na. A pʼi ba ni gerenadii ni piimu ya lɛ ge, ni nitoroŋɔ nilɛgɛ bɛ. 24 A pʼi wee xuu wu mɛgɛ le na Ɛsikɔli fadaaŋa kee ɛrɛzɛn karaga ki wuu na, Izirayɛli nagoo pʼa kemu kɔn wà ge.b
Tudunmɔɔ pʼa pa pu kaɲagaa ki paari
25 Cabyaa kɛlɛɛ shishɛɛrɛ (40) funŋɔ ni, a pʼi shɛ kee fiige ki saala na kuri pa. 26 Ba pʼa nɔ wɛ, na gari Musa ni Arɔn ni Izirayɛli nagoo pu bɛɛri yíri Kadɛsi kulo li ni, Paran siwaga ki ni. A pʼi pu tama paari pu ni Izirayɛli nagoo pu bɛɛri mu, na kee fiige ki wo tiye yasɛyɛ ya shɛ pu na.
27 Yemu pʼa paari Musa mu ge, yee yi wa mɛ: «Mʼa wù tun fiige kemu ni ge, wèe ya shɛ ki saala. Can na ki bɛɛri kʼa ɲi fo na fúu nujirimɛ ni sɛrɛ na. Ki tiye ya wo yasɛyɛ yi wa ye. 28 Ga sipyii piimu pu wa kee fiige ke ni ge, pu baraga kʼa pɛlɛ. Pu kulogoo kʼa sii pɛlɛ pɛlɛ xuuni, na kasɔrɔyɔ taga ki bɛɛri maha círi. Na fara lee na, wèe ya Kana shɛɛn wo naŋmaga Anaki wo shi shɛɛn pii bɛ ɲa wà. 29 Amalɛki shi shɛɛn pu wa kee fiige ki woroo kulo kacɛ ki na. Xhɛti shi shɛɛn ni Zhebusi shɛɛn ni Amɔri shi shɛɛn dʼa tiin faaboboyo kulogoo ki ni. Kana shɛɛn dʼa tiin suumɔ lɔhɔ ki kacɛ ki na, ni Zhurudɛn Gba wu ɲɔ ki na.»
30 Na sipyii pu yaha pu na Musa yɔhɔyɔhɔ, a Kalɛbu di pu jomɔ xɔ na jo: «Wù yìri nimɛ wù ke fiige ke co, wù ki pye wù wogo, bani wèe na já ki na.» 31 Ga namaa piimu pʼa pinnɛ shɛ ni wu ni ge, a pee di jo: «Wèe da já zhɛ do pii sipyii pii na wɛ, bani pu fanha ya ɲɛhɛ na kanha wèe wogo na.» 32 Fiige kemu pʼa shɛ saala ge, a pʼi ki jomɔ kolo jo Izirayɛli nagoo pu mu na: «Fiige kemu wèe ya shɛ saala ge, kee ya ki nadadiinmɛɛ juuri. Sipyii piimu bɛɛri wèe ya ɲa wà ge, pu bɛɛri pu ɲɛ sipyitɔɔnyɔ. 33 Ali wèe ya sipyigagaya bɛ ɲa mɛ, Anaki wo shi shɛɛn pee. Wee shi wu bɛɛri wu ɲɛ sipyigagaya. A wèe di wùyɛ ta pu fɛɛ ni ba kabeeye ɲɛ mɛ wɛ. A pu bɛ di wèe ta ba kabeeye ɲɛ wɛ.»