Mariyama ni Arɔn ya tigire taha Musa na
12
Ayiwa, Musa bi Kushia shɛn cee wa leŋɛ, a Mariyama ni Arɔn di tigire taha wu na wee cee wu wo leŋɛ wu na. 2 A pʼi jo: «Wee tuun wu ni ta Musa yɛ nigin ɲɔ na Tɛhɛnɛ Baa Kilɛ ya yu? Ta wu ya yu mɛ wèe bɛ ɲɔ na wɛ?» A Tɛhɛnɛ Baa Kilɛ di yee logo.3 Na ta Musa di bi bye sipya wemu ya wuyɛ tirige ge, sipya bye ɲiŋɛ ki na wemu ya wuyɛ tirige na Musa xɔ wɛ.
4 Lee taapile li ni a Tɛhɛnɛ Baa Kilɛ di Musa ni Arɔn ni Mariyama pye: «Yi taanri wu bɛɛri pu foro shɛ Ɲuŋɔ Tacirige Fàya Puga ki ɲɔ na!» A pu taanri wu bɛɛri di gari wà. 5 A Tɛhɛnɛ Baa Kilɛ di digi ɲahaŋa ni na pa yere Ɲuŋɔ Tacirige Fàya Puga ki ɲɔ na. A wu Arɔn ni Mariyama yiri, a pu shuun wu bɛɛri di fulo. 6 A wu jo: «Yi ɲuwegee shan, yemu nʼa da jo ge, yʼi yi kemɛ logo. Kilɛ tudunmɔ bu bye yee tɛ ni, kashɛgɛɛ ni nɛ ma nayɛ shɛɛ wu na, na yu ni wu ni ŋmunɔyɔ ni. 7 Ga nɛ wo kapyebye Musa wuu li wa lee la shi wɛ, wee wemu wu ɲɛ ɲɔmɛɛ fɔɔ nɛ puga ki bɛɛri ni ge.* 8 Nɛ jomɔ tiini na yu wee mu ɲɔ ni ɲɔ. Nɛ jomɔ fiinŋɛ na yu wu mu, nɛ pu yu taleŋɛɛ ni wɛ. Wee ya Tɛhɛnɛ Baa Kilɛ pyegana li ɲaa. Ayiwa, a ɲaha di yee pye yee ya ta fya tigire daha na nɛ kapyebye Musa na-ɛ wɛ?»
9 A Tɛhɛnɛ Baa Kilɛ luu di yìri pu tàan, a wu laha pu tàan, na gari. 10 Ɲahaŋa kʼa yìri laha yɛ fàya puga ki ɲuŋɔ ni, a togo di foro Mariyama na, na wu ceesɛɛgɛ kʼi fiinŋɛ yeege ba nɛzhi ɲɛ wɛ. A Arɔn di ŋmahana ɲɛri na Mariyama wii, na wu ta wʼa ɲɛri togo fɔɔ. 11 Wee tuun wu ni a Arɔn di Musa pye: «Nʼa ma ɲɛɛri na kafɔɔ, jurumu wèe ya pye wù wo fungɔngɔ baara ti funŋɔ ni. Ma ganha bu lee jaagi shan wù na wɛ! 12 Pya wemu nixhugo kʼa se fo wu ceexaara ti taaga ka na fɔnhɔ wu seduun wu ni ge, nʼa ma ɲɛɛri, wù ceboroshɔ wu ganha bu bye wee wa shi wɛ.»
13 Ayiwa, a Musa di mujugbɔɔ wá Tɛhɛnɛ Baa Kilɛ mu na: «Ee Kilɛ, nʼa ma ɲɛɛri, wu cuuŋɔ!» 14 A Tɛhɛnɛ Baa Kilɛ di Musa pye: «Wu to da bi ɲɔlɔhɔ wá wu ɲaha ni, ta wu bi da gori ni kee shiige ke ni fo cabyaa gbarashuun wɛ? Yi wu yeege buguro ti ni, yʼi wu yaha wu yɛ fo cabyaa gbarashuun. Lee kadugo na yʼi wu kuruŋɔ pa leŋɛ yiyɛ ni.*» 15 Wee tuun wu ni a pʼi Mariyama yeege buguro ti ni fo cewuu. Sipyiire ti ya yìri wà wɛ, fo na shɛ Mariyama kuruŋɔ na pa leŋɛ pu ni sanha. 16 Lee kadugo na a pʼi yìri foro Azerɔti ni, na shɛ pu buguro ti sin Paran siwaga ki ni.