Kafɔɔ ya na tirige
11
Caŋa ka sipyiire tʼa pa tigire shan Tɛhɛnɛ Baa Kilɛ na. Ba Tɛhɛnɛ Baa Kilɛ ya yee logo wɛ, a wu luu di yìri. A Tɛhɛnɛ Baa Kilɛ wo na kʼi shɔ buguro ti na, a kee di buguro ti kabanugo ka sòrogo. 2 Wee tuun wu ni a sipyiire tʼi sipyaa wá Musa mu. A Musa di Tɛhɛnɛ Baa Kilɛ ɲɛɛri, a na kʼi fugi. 3 A pʼi wee xuu wu mɛgɛ le na Tabeeraa, bani wee xuu wu ni Tɛhɛnɛ Baa Kilɛ ya na shɔ pu buguro ti na.Sipyiire tʼa xaara yegeŋɛ pye
4 Ayiwa, shi watii shɛɛn piimu pu bye Izirayɛli nagoo pu tɛ ni ge, a xaara la di ba sii shɔ pee ni. A Izirayɛli nagoo pu bɛ di ganha na mɛhɛɛ suu, na yu: «Ee! Ba jɔgɔ di ba wù kan xaara wù xa? 5 Ta xɔnhɔrɔ fyaa wèe di bi xhaa mamama ni Misira fiige ki ni? Pee kaa ya pa digi wù funyɔ ni na fara kɔnkɔmu wu na, ni gboliye ye, ni puwaro we, ni jaa we, ni namaa jaa we.» 6 Wèe zɔlɔɔ pʼa shɛ garaa tanha nimɛ. Wù ɲii ɲɛ yafiin latii ni wɛ, fo maanɛ.»
7 Ayiwa, wee maanɛ we bi foro shinmapya fɛni. Tige ka mɛgɛ ki ɲɛ na Budeliyɔmu, wu bi fiinŋɛ ba kee wo kuro ti ɲɛ wɛ.* 8 Izirayɛli nagoo pu bi ma foro wu fɛni, na wu kuu, lee kadugo na, pʼa ba wu tire tira na, kelee na wu su sugo ni. Pii wa bi wu sori, pii di wu kaani ŋmɔmi. Wu ni ŋmɔmi tipoomɔ pu ɲɛ nigin. 9 Wu ni mɛŋɛ ki ma digi shiizhan piige ni Izirayɛli nagoo pu buguro ti na.
10 Ayiwa, a Musa di Izirayɛli nagoo pu ɲa pʼa pinnɛ pu fàya buguloo pu ɲahagbaa na kpɔnhɔɔ kpɔnhɔɔ, na mɛhɛɛ suu. A Tɛhɛnɛ Baa Kilɛ luu di sii yìri fo xuuni. Lee ya ta tàan Musa ni wɛ, 11 a wu Tɛhɛnɛ Baa Kilɛ pye: «Ɲaha na mʼa ma bulona wu kana mɛ wɛ? A ɲaha di nɛ pye nɛ ya ta fɛrɛmɛ ta mu ɲaha tàan wɛ, fo mu ya pii sipyii pii bɛɛri wo tuguro ti taha nɛ ɲuŋɔ ni wɛ? 12 Ta nɛ wʼa yere pii sipyii pii bɛɛri wo yacɛrɛɛ na? Ta nɛ wʼa pu se? A mʼi na jo fo nɛ wu pu taha na dodoŋɔ na ba pya nu ma wu pya taha mɛ wo dodoŋɔ na wɛ. Mʼa fiige kemu wo ɲɔmɛɛ lɔ pu sefɛlɛɛ pu mu ge, na di da se ni pu ni fo wà. 13 Mii nɛ di da xaara ta di gan pii sipyii pii bɛɛri mu wɛ? Bani pʼa mɛhɛɛ suu nɛ fɛni na nɛ wu xaara kan pu mu pu xa. 14 Nɛ yɛ nigin wa da já pii sipyii pii bɛɛri ɲuŋɔ tuguro na wɛ. Pu tuguro tʼa pɛlɛ nɛ na. 15 Yani ma tee tuguro te bɛɛri taha na ɲuŋɔ ni ge, di bu da na fɛrɛmɛ ta ma ɲaha tàan, na munaa li wolo, kɔnhɔ na ɲii ganha bu daha nayɛ pyaa ki wo ɲaa wu na wɛ.»
16 Ayiwa, a Tɛhɛnɛ Baa Kilɛ di Musa pye: «Izirayɛli nɔhɔlɛɛ piimu mʼa cɛ ɲahagbaa fɛɛ ni ɲuŋɔfɛɛ pu ge, pee kɛlɛɛ gbarashuun yiri pinnɛ, mʼa ba ni pu ni Ɲuŋɔ Tacirige Fàya Puga ki ɲahagbaa na. Pʼi ba yere na ɲaha tàan ni ma ni. 17 Nɛ na ba digi di shɛ jo ni ma ni wà. Kilɛ Munaa le li wa ma na ge, nɛ na ba la lɔ lee ni na kan pu mu, kɔnhɔ pʼi ma tɛgɛ pii sipyii pii wo ɲuŋɔ tuguro ti na, lee funŋɔ ni, pu tuguro ti da bye nige mu ɲuŋɔ ni mayɛ nigin wɛ. 18 Yi jo sipyiire ti mu na pu puyɛ pye fɛɛfɛɛ pu wá ɲiga na. Na xaara pʼa da ba xha ɲiga na, bani pʼa mɛhɛɛ su Tɛhɛnɛ Baa Kilɛ ɲuwii ni na jo: ‹Ee! Ba jɔgɔ di ba wù kan xaara wù xa? Wèe bi sii fɛrɛ Misira fiige ki ni!› Lee na Tɛhɛnɛ Baa Kilɛ wʼa da ba xaara kan yee mu ɲiga na yi xa. 19 Tʼa da ba da caŋa nigin na wɛ, kelee cabyaa shuun, kelee cabyaa kaguro, kelee cabyaa kɛ, kelee cabyaa kɛlɛɛ shuun (20) wɛ, 20 ga fo yeboŋɔ, fo ti ba shɛ ɲɔ kɔn na ma yi munawegee ni, na ti la xɔ yi ni fɛɛfɛɛ. Bani yee ya she Tɛhɛnɛ Baa Kilɛ ni, wee wemu wu ɲɛ yee niŋɛ ni ge. A yee di mɛhɛɛ su wu ɲaha tàan, na ɲaha kaa na yee dʼa foro Misira fiige ki ni wɛ?» 21 A Musa di jo: «Nɛ ni pii sipyii pii na ɲɛ fo sipyii kabɔfoŋɔɔ xhuu gbaara (600.000). A mʼi jo na mu na ba xaara kan pu mu pʼa xhaa fo yeboŋɔ bɛɛri! 22 Ali wèe mɛhɛ ba wù niiyɛ yi bɛɛri ni wù yatɔɔyɔ yi bɛɛri xuli pu mu, ta yee na pu yaa mɛ? Ali wèe mɛhɛ da bi da já suumɔ lɔhɔ ki fyaa pu bɛɛri co, ta pee bɛ na pu yaa mɛ?»
23 A Tɛhɛnɛ Baa Kilɛ di Musa pye: «Ta Tɛhɛnɛ Baa Kilɛ keŋɛ kʼa gbere gɛ? Yemu nɛ jo ge, lee bu da li na da bye, kelee li shiin da bye wɛ, nimɛ ma da ba lee cɛ.»
Kilɛ ya wu Munaa li tirige nɔhɔlɛɛ pu na
24 Ayiwa, a Musa di foro kari, na shɛ Tɛhɛnɛ Baa Kilɛ wo kafila wu jo sipyiire ti mu. Lee kadugo na a wu nɔhɔlɛɛ kɛlɛɛ gbarashuun (70) ɲaha bulo pinnɛ Izirayɛli nagoo pu ɲahagbaa fɛɛ pu ni, na pee yereŋɛ na Fàya Puga ki maha círi. 25 A Tɛhɛnɛ Baa Kilɛ di digi ɲahaŋa ki ni, na ba jo ni wu ni. Kilɛ Munaa lemu li bye wu na ge, a wu lee la kan nɔhɔlɛɛ kɛlɛɛ gbarashuun (70) wu mu. Ba Kilɛ Munaa lʼa tigi pu na wɛ, a pʼi ganha na Kilɛ tuduro yu. Ga lee tɔɔɲii li yɛ na pʼa da, pu ya Kilɛ tuduro jo nige wɛ.
26 Namaa shuun wa bi kori wà buguro ti na, wa mɛgɛ ki bye na Ɛlidadi, wusama mɛgɛ di ɲɛ na Medadi, a Kilɛ Munaa lʼi shɛ digi pee bɛ na, a pu bɛ di ɲɔ kɔn na Kilɛ tuduro yu buguro ti na. Pee bɛ wo mɛyɛ yi bi ka, ga pee di bi ta foro shɛ Fàya Puga ki ɲahagbaa na wɛ. 27 A lɛvɔɔ wa di baa kari, na shɛ Musa pye: «Ɛlidadi ni Medadi wa Kilɛ tuduro yu buguro ti na.» 28 Nuni ja Zhozuwe wemu wʼa pye Musa wo kapyebye fo wu nɔhɔpiire ti ni ge, a wee di jo: «Na kafɔɔ Musa, pu pye na pu lee ɲɔ yaha!» 29 A Musa di wu pye: «Ta nɛ wuu na lee ɲɛpɛɛn la jé ma ni? Tɛhɛnɛ Baa Kilɛ wu li pye wu wo sipyii pu bɛɛri di bye Kilɛ tudunmɔɔ, Tɛhɛnɛ Baa Kilɛ di wu Munaa li tirige pu na!» 30 Lee kadugo na a Musa ni Izirayɛli nɔhɔlɛɛ pʼi yìri wà na kari buguro ti na.
Kilɛ ya shazhɛɛyɛ ya yaha pa
31 Ayiwa, a Tɛhɛnɛ Baa Kilɛ di kafɛɛgɛ ka ja na yìri suumɔ lɔhɔ ki kacɛ ki na. A kee kafɛɛgɛ kʼi ba ni shazhɛɛyɛ ya ni na pa wo na buguro ti bɛɛri maha, na co buguro ti na fo na shɛ nɔ caŋa ɲii nigin ɲara wo laraga ɲuŋɔ kana na. Yi bi pa binnɛ yiyɛ ɲuŋɔ ni na co ɲiŋɛ ki na, na yìri fugba ni fo na nɔ mɛtɛrɛ nigin shi na. 32 A Izirayɛli nagoo pʼi foro yee shazhɛɛyɛ yi fɛni, na yi co na shɛ kee caŋa ki xɔ, na ba piige ki bɛ pye na yi coni. Ɲimuguro ti bɛ na, a pʼi yi co ma caŋa ki xɔ. Wa shishiin wo nijoyo ya xuuŋɔ kiloo kabɔfonɔ nigin (1.000) na wɛ. A pʼi ba yi caa na buguro ti maha. 33 Ga ba pʼa pa xaara ti ɲɔ kɔn da xhaa wɛ, na xaara ti yaha pu ɲɔyɔ yi ni, ali pu sanha ti sanha wɛ, a Tɛhɛnɛ Baa Kilɛ luu di yìri pu tàan fo xuuni. A Tɛhɛnɛ Baa Kilɛ di yama niguumɔ wá pu na. 34 A pʼi wee xuu wu mɛgɛ le na Kibɔrɔti-Ataavab, bani piimu bɛɛri pu bye ni yaligee wo lakuuŋɔ ki ni ge, wà pʼa pee bɛɛri nixhuyo yi le. 35 A sipyiire tʼi yìri Kibɔrɔti-Ataava ni, na gari Azerɔti ni. A pʼi shɛ diin wà.