Pʼa maya shuun yàa ni warifyɛn ni
10
Ayiwa, a Tɛhɛnɛ Baa Kilɛ di Musa pye: 2 «Warifyɛn tɔɔrɔ ta shɔhɔ, mʼa maya shuun wa yàa. Ma na ba sipyiire ti yiri na binnɛɛ ni yee ni, na buguro ti bɛ wo gɔɔngi wu koo kaan pu mu ni yee ni. 3 Pu ba yee maya shuun wu pinnɛ wi tuun bɛɛri ni, sipyiire ti bɛɛri di ba tiyɛ pinnɛ ma ɲaha tàan Ɲuŋɔ Tacirige Fàya Puga ki tajege ki ɲɔ na. 4 Pu ba maga nigin pe yɛ wi, Izirayɛli kashɛn keye yi wo ɲuŋɔfɛɛ pu yɛ nigin di ba puyɛ pinnɛ ma ɲaha tàan. 5 Maga ki ba mɛɛgbɔɔ kan tuun wemu ni, buguro ti kagɛrɛgɛ kemu ki wa Kilɛ-nɔhɔ ki na ge, kee di gɔɔngi. 6 Maga ki ba mɛɛgbɔɔ kan tɔɔɲii shuun wuu li ni, kagɛrɛgɛ kemu ki wa woroo kulo kacɛ ki na ge, kee di gɔɔngi. Maga ki mɛɛgbɔɔ li na ba bye buguro ti kɔɔngi kɔɔngi mɛɛ le. 7 Ga pu ba da sipyiire ti bɛɛri yiri binnɛ, pʼi maya yi wi, ga pʼi ganha bu yi mɛhɛɛ ki pɛlɛ wɛ. 8 Arɔn wo jalaa pee, pee piimu pu ɲɛ saraya ɲaha shɔɔnrivɛɛ pu ge, pee yɛ pʼa da ba maya yi wi. Wee na ba bye yi ni yi kadugo shi nibama wu mu saliya wemu da ga yìri wɛ. 9 Yi ba shɛ diin yi wo fiige ki ni tuun wemu ni, yi ba da gaaŋi kashɛn na, yi wo pɛn wa fɛni wee wemu ya pa kashɛn kɔn yi na ge, yʼi maya yi wi yʼi mɛɛgbɔɔ kan. Lee funŋɔ ni Tɛhɛnɛ Baa Kilɛ, yi Kilɛ wu na ba wu funŋɔ to yi na, na yi shɔ yi pɛɛn pu na. 10 Yi na ba ye maya ye wi yi fundanga caya yi bɛ na, na fara yi kaleŋɛɛ caya na, ni yi yevorovoyo kaleŋɛɛ caya na. Yi na ba yi wi saraya nizogoyo ni ɲaɲiŋɛ saraya yi woloduun wu ni. Lee na ba yi wo Kilɛ wu funŋɔ tirige ni yi kaa ni. Nɛ ɲɛ Tɛhɛnɛ Baa Kilɛ, yi Kilɛ we.»Ɲahaŋa kʼa Izirayɛli nagoo pu ɲaha co na gaaŋi
11 Ayiwa, yee shuun wuu li yeŋɛ shuun wogo ki cabyaa kɛlɛɛ shuun (20) wu na, a ɲahaŋa kʼi yìri laha Ɲuŋɔ Tacirige Fàya Puga ki ɲuɲɔ na. 12 A Izirayɛli nagoo pʼi yìri Sinayi siwaga ki ni na gaaŋi ba pʼa tahala tahala puyɛ na wɛ. A ɲahaŋa kʼi digi, na shɛ yere Paran siwaga ki ni. 13 Lee lʼa pye pu ɲara li nizhiinɛ, pʼa lemu pye Tɛhɛnɛ Baa Kilɛ wo ɲɔjomɔ na Musa mu ge. 14 A Zhuda wo kagɛrɛgɛ ki wo kashɛn keye yʼi fɛnhɛ yìri ni yi wo tuugoshɛmɛ pu ni. Zhuda wo gbawege ki wo kashɛn keŋɛ ki ɲuŋɔfɔɔ wu bye Aminadabu ja Nasɔn. 15 Shuwari ja Netaɲɛli, wee di ɲɛ Isakari wo gbawege ki wo kashɛn keŋɛ ki ɲuŋɔfɔɔ we. 16 Xhelɔn ja Eliyabu, wee di ɲɛ Zabulɔn wo gbawege ki wo kashɛn keŋɛ ki ɲuŋɔfɔɔ we. 17 Lee kadugo na, a pʼi fàya puga ki waraga, a Gɛrɛshɔn wo kpuun li namaa pee ni Marari wo kpuun li namaa pʼi puga ki yɛrɛyɛ yi lɔ. 18 Lee kadugo na a Urubɛn wo kagɛrɛgɛ ki wo kashɛn keye yʼi daha wà ni yi wo tuugoshɛmɛ pu ni. Sheduri ja Elisuri wu bye Urubɛn wo gbawege ki wo kashɛn keŋɛ ki ɲuŋɔfɔɔ we. 19 Surishadayi ja Shelumyɛli, wee di ɲɛ Simiɲɔ wo gbawege ki wo kashɛn keŋɛ ki ɲuŋɔfɔɔ we. 20 Duwɛli ja Elizafu, wee di ɲɛ Gadi wo gbawege ki wo kashɛn keŋɛ ki ɲuŋɔfɔɔ we. 21 Lee kadugo na, a Kexhati wo kpuun lʼi fɛfɛɛrɛ xuu wu wo yɛrɛyɛ yi lɔ. Xuu bɛɛri ni pu da zhɛ diin ge, Kexhati wo kpuun li shɛɛn pu ma yaa na shɛ pu ta pʼa Fàya Puga ki sin na xɔ. 22 Lee kadugo na a Efirayimu wo kagɛrɛgɛ ki wo kashɛn keye yʼi daha wà ni yi wo tuugoshɛmɛ pu ni. Amiyudi ja Elishama wu bye Efirayimu wo gbawege ki wo kashɛn keŋɛ ki ɲuŋɔfɔɔ we. 23 Pedasuri ja Gamaliyɛli, wee di ɲɛ Manase wo gbawege ki wo kashɛn keŋɛ ki ɲuŋɔfɔɔ we. 24 Zhidoni ja Abidan, wee di ɲɛ Bɛnzhamɛ wo gbawege ki wo kashɛn keŋɛ ki ɲuŋɔfɔɔ we. 25 Sana li na a Dan wo kagɛrɛgɛ ki wo kashɛn keye yʼi daha wà ni yi wo tuugoshɛmɛ pu ni. Amishadayi ja Ayezɛri wu bye Dan wo gbawege ki wo kashɛn keŋɛ ki ɲuŋɔfɔɔ we. 26 Okiran ja Pazhiyɛli, wee di ɲɛ Azɛri wo gbawege ki wo kashɛn keŋɛ ki ɲuŋɔfɔɔ we. 27 Ena ja Ayira, wee di ɲɛ Nɛfitali wo gbawege ki wo kashɛn keŋɛ ki ɲuŋɔfɔɔ we. 28 Izirayɛli nagoo pu ba da gɔɔngi xuu bɛɛri ni, le tahalagana le na pu kashɛn keye yi ma dahala yiyɛ na ma kari.
Musa ya jo na Obabu wu pee ɲaha co ɲara li na
29 Ayiwa, ná wa bye wà na Obabu, wee bye Majan shɛɛn Erewɛli* wo ja, Musa wo yafɛna. A Musa di wee pye: «Tɛhɛnɛ Baa Kilɛ ya fiige kemu wo ɲɔmɛɛ lɔ wèe mu ge, kee ni wèe wa gaaŋi. Tɛhɛnɛ Baa Kilɛ ya ɲɔmɛɛ lɔ na wee na zhɛ saama pye Izirayɛli nagoo pu mu. Ta ma wù da se wà shiizhan, wù na zhɛ ma bɛ niŋɛ le pee saama pu ni.» 30 A Obabu di wu pye: «Ahayi, nʼa da zhɛ ni yi ni wɛ, ga nʼa da guri da gaaŋi na to puga, na wo fiige ki ni.» 31 A Musa di wu pye: «Nʼa ma ɲɛɛri, ma ganha bu laha wù na wɛ, bani mʼa ke siwaga ke cɛ xuuni, mu na wèe buguro ti tasinyɛ yi bɛ cɛ, lee funŋɔ ni ma na ba bye wù ɲahagbaa mɛɛ. 32 Ma bu binnɛ ni wù ni, saama pemu Tɛhɛnɛ Baa Kilɛ da zhɛ bye wù mu ge, wù na zhɛ ma niŋɛ le pee ni.»
33 Ayiwa, a Izirayɛli nagoo pʼi yìri Tɛhɛnɛ Baa Kilɛ wo faaboboŋɔ ki na, na cabyaa taanri ɲara pye. A Tɛhɛnɛ Baa Kilɛ wo kariɲɛɛgɛ ɲɔmɛɛ li wo keshi wu doro pu ɲaha na kee cabyaa taanri wu funŋɔ ni, kɔnhɔ wu shɛ taŋmɔŋɔ sha pu mu. 34 Ba pʼa kɔɔngi pu tatɛɛngɛ ka bɛɛri ni wɛ, Tɛhɛnɛ Baa Kilɛ wo ɲahaŋa ki ma bye pu ɲuɲɔ na caŋa ni. 35 Kariɲɛɛgɛ ɲɔmɛɛ li keshi wu ba da yìri tuun bɛɛri ni da gaaŋi, Musa ma jo: «Tɛhɛnɛ Baa Kilɛ, yìri! Ma pɛɛn pu bɛɛri pu caaga! Piimu pʼa ma kɔ ge, pee pʼa fe ma ɲaha na!»* 36 Pu ba da kariɲɛɛgɛ ɲɔmɛɛ li keshi wu tirige tuun bɛɛri ni wʼa jo: «Tɛhɛnɛ Baa Kilɛ, kuri pa diin Izirayɛli nagoo kabɔhɔɔ niɲɛhɛŋɛɛ ki niŋɛ ni.»