Ɲuwuuro kalenɛ li keree
9
Ayiwa, Izirayɛli nagoo pu na foro xɔ Misira fiige ki ni, li yee shuun wuu li wo yeŋɛ nizhiige ke*, a Tɛhɛnɛ Baa Kilɛ di jo ni Musa ni Sinayi siwaga ki ni. 2 A wu jo: «Tuun wemu wʼa shɛ Izirayɛli nagoo pu na Ɲuwuuro Kalenɛ li wo pyeduun ge, pʼa li pye pʼa sahaŋi ni wee tuun wuyɛ pyaa ni. 3 Ke yeŋɛ ke cabyaa kɛ ni shishɛɛrɛ wu na yʼa da li pye, yakoŋɔ ɲibiire ti ni, wee wu ɲɛ li pyeduun we. Yʼi li pye cibɛ na saha ni li ɲɔmɛhɛɛ kee, ni li kodorogoo ki bɛɛri ni.»4 Ayiwa, a Musa di yi jo Izirayɛli nagoo pu mu, na pu Ɲuwuuro Kalenɛ li pye. 5 A pʼi Ɲuwuuro Kalenɛ li pye yee li yezhiige ki cabyaa kɛ ni shishɛɛrɛ wu na, yakoŋɔ ɲibiire ti ni, Sinayi siwaga ni. A pʼi li pye cibɛ, na bɛ ni Tɛhɛnɛ Baa Kilɛ wo nijoyo yi bɛɛri ni Musa mu.
6 Ga lee bi namaa pii ta wà, pee bye fɛɛfɛɛ wɛ, bani pee bi kpɔn gbo wa na, a lee di pee pye pu ya já Ɲuwuuro Kalenɛ li pye li caŋa na wɛ. Kee caŋa kiyɛ pyaa, a pʼi gari Musa ni Arɔn fɛni. 7 A pʼi shɛ Musa pye: «Wèe kunni wa fɛɛfɛɛ wɛ, bani wèe ya kpɔn gbo na. Lekɛ lʼi da wèe sige wèe ganha bu wù wo saraya yi pinnɛ gan Tɛhɛnɛ Baa Kilɛ mu yi kanduun ni ni Izirayɛli nagoo pusamaa ni-i wɛ?» 8 A Musa di pu pye: «Yi na sige naha di shɛ logo Tɛhɛnɛ Baa Kilɛ ɲɔ na yi keree na.» 9 A Tɛhɛnɛ Baa Kilɛ di Musa pye: 10 «Yi jo Izirayɛli nagoo pu mu na: ‹Yee wa bu bye wu ɲɛ fɛɛfɛɛ wɛ, kelee wufɔɔ wo tirige shɛn bu bye wu ɲɛ fɛɛfɛɛ wɛ, na li kaɲuŋɔ pye wufɔɔ ya kpɔn gbo na, kelee wufɔɔ ya kari taliige kulo ni. Lee bɛ na, wufɔɔ ya yaa na Ɲuwuuro Kalenɛ li pye Tɛhɛnɛ Baa Kilɛ mu. 11 Wufɔɔ na ba wu wo Ɲuwuuro Kalenɛ li pye yee li yeŋɛ shuun wogo ki wo cabyaa kɛ ni shishɛɛrɛ wu na, yakoŋɔ ɲibiire ti ni. Pʼi Ɲuwuuro Kalenɛ li xaara ti pinnɛ xa ni shizhɛnhɛrɛ baa buuri, ni wɛzoroyo sawo ni. 12 Yafiin bɛ ganha bu shɔn ti ni wɛ, pʼi ganha bu kaciige ka shishiin kɛgi wɛ. Pʼi lee kalenɛ li pye na saha ni Ɲuwuuro Kalenɛ li kodorogoo ki bɛɛri ni.
13 « ‹Sipya wemu bu bye fɛɛfɛɛ, na zhe wu ya ta Ɲuwuuro Kalenɛ li pye wɛ, wufɔɔ di ya ta kari kulo bɛ ni wɛ, yi weefɔɔ kɔri yee Izirayɛli nagoo pu ni. Weefɔɔ ya ta Tɛhɛnɛ Baa Kilɛ wo saraga ki wolo ki woloduun ni wɛ. Lee wuu na weefɔɔ wo jurumu wu jaagi kanhama na ba do wu ɲuŋɔ ni. 14 Nabun wemu bu bye tiinnɛ na yi tɛ ni, wu bu jo wu bɛ di da Ɲuwuuro Kalenɛ li pyi Tɛhɛnɛ Baa Kilɛ mu, wʼa yaa na li pyi na saha ni li ɲɔmɛhɛɛ kee ni li kodorogoo ki ni. Saliyanumɔ wʼa da ba bye kantiinlɛɛ pee ni nabuun pu bɛɛri na.› »
Ɲahaŋa kʼa Ɲuŋɔ Tacirige Fàya Puga ki ɲɔ tɔ
15 Ayiwa, caŋa kemu pʼa Ɲuŋɔ Tacirige Fàya Puga ki yàa ge, a ɲahaŋa kʼi ba ki tɔ. A ɲahaŋa kʼi gori yaha Ɲuŋɔ Tacirige Fàya Puga ki ɲuŋɔ ni ba na ɲɛ wɛ, ma co yakoŋɔ ki na fo na shɛ ɲiga ki mugi. 16 Na co kee caŋa ki na, a lee di gori yaha mu fo gbee: Ɲahaŋa ki bi tɔ fàya puga ki ɲuŋɔ ni, piige bu wɔ, kʼa bye ba na ɲɛ wɛ. 17 Kee ɲahaŋa ki bye, ki bu yìri laha Ɲuŋɔ Tacirige Fàya Puga ki ɲuŋɔ ni tuun wemu ni, Izirayɛli nagoo pu bɛ na pu wo buguloo pu kɔɔngi. Ɲahaŋa ki ba shɛ yere xuu wemu ni, pu bɛ na pu wo buguloo pu sin wee xuu wu ni. 18 Lee funŋɔ ni, a Izirayɛli nagoo pʼi ganha na pu buguloo pu kɔɔngi Tɛhɛnɛ Baa Kilɛ ɲɔmɛɛ na, na pu sinni bɛ sanha Tɛhɛnɛ Baa Kilɛ ɲɔmɛɛ na. Pu bu buguro ti sin xuu wemu ni, ɲahaŋa ki ya bu shɛ yìri wee xuu wu ni wɛ, pu bɛ da gɔɔngi wɛ. 19 Ɲahaŋa ki bu gori yaha Ɲuŋɔ Tacirige Fàya Puga ki ɲuŋɔ ni fo na mɔ, Izirayɛli nagoo pu bɛ na Tɛhɛnɛ Baa Kilɛ ɲɔmɛɛ co, na gori yaha wà, pu da ga gɔɔngi wɛ. 20 Ɲahaŋa ki shiin bu da piiye dama dama yɛ na, Tɛhɛnɛ Baa Kilɛ ɲɔmɛɛ na buguloo pu bi sinni, na pu kɔɔngi Tɛhɛnɛ Baa Kilɛ ɲɔmɛɛ na. 21 Tɛɛgɛɛ kii ni ɲahaŋa ki ma piige nigin yɛ nigin pye, ɲimuguro ti na kʼa yìri. Ba kʼa yìri wɛ, Izirayɛli nagoo pu bɛ na pu wo buguloo pu kɔɔngi. Ɲahaŋa ki shiin bu caŋa nigin ni piige nigin pye, ba kʼa yìri wɛ, Izirayɛli nagoo pu bɛ na yìri. 22 Ɲahaŋa ki shiin bu yere yaha Ɲuŋɔ Tacirige Fàya Puga ki ɲuɲɔ na, na piiye shuun pye, kelee yeŋɛ nigin, kelee yee nigin, ki ya bu shɛ yìri wɛ, Izirayɛli nagoo pu da ga pu buguloo pu kɔɔngi wɛ. Ga ki ba yìri tuun wemu ni, pu bɛ na pu wo buguloo pu kɔɔngi. 23 Tɛhɛnɛ Baa Kilɛ wo ɲɔjomɔ na pu bi pu buguloo pu sinni, na pu kɔɔngi bɛ Tɛhɛnɛ Baa Kilɛ ɲɔjomɔ na. Pu bi Tɛhɛnɛ Baa Kilɛ wo ɲɔmɛhɛɛ ki koo ɲaari na saha ni wu ɲɔmɛjogoo ki ni wʼa bi kiimu jo Musa mu ge.