Sokinnaa pu singana
8
Ayiwa, a Tɛhɛnɛ Baa Kilɛ di Musa pye: 2 «Yi jo Arɔn mu na wu ba da sokinnaa pu le tuun wemu ni, na wu pɛhɛɛ gbarashuun wu bɛɛri ɲaha tii sokinnafaraya yi ɲahagbaa na, kɔnhɔ ki kpɛɛngɛ kʼi do sokinnafaraya yi ɲahagbaa na.» 3 A Arɔn di li pye mu. A wu sokinna pɛhɛɛ ki le sokinnafaraya yi na, na ki ɲaha tagi sokinnafaraya yi ɲahagbaa na ba Tɛhɛnɛ Baa Kilɛ ya yi jo jogana lemu na Musa mu wɛ. 4 Sanni pu bi shɔhɔ wuyɛ na, ma taga yee sokinnafaraya yi yàa, na co yi ɲidaa li na fo na shɛ nɔ yi tige fyɛɛnrɛ ti jaalaa pu bɛɛri na. Sokinnafaraya tuugo kemu Tɛhɛnɛ Baa Kilɛ bi shɛ Musa na ge, kee tuugo ke wo yaagana na wu bi yi yàa.*Levi wo tirige shɛɛn pʼa yaha Tɛhɛnɛ Baa Kilɛ yahama ni
5 Ayiwa, a Tɛhɛnɛ Baa Kilɛ di Musa pye: 6 «Levi wo tirige shɛɛn pu lɔ yeege Izirayɛli nagoo pusamaa tɛ ni, mʼa pu pye fɛɛfɛɛ. 7 Le pyegana le na ma da pu pye fɛɛfɛɛ: Ma da jurumu yafa wo lɔhɔ ka ɲɛrɛgi ɲɛrɛgi pu na, pʼi pu ceesɛɛgɛ ki shiire ti bɛɛri xuu ni pɔrɔgɔ ni, pʼi pu fàya yi je, pu na bye fɛɛfɛɛ. 8 Lee kadugo na pʼi ba ni nupepinŋɛ nigin ni, ni ki myɛ saraga, na sìnmɛ taga pu tɔnhɔ. Mayɛ pyaa ki bɛ di ba ni nupee nigin wa ni, lee di ba bye jurumu yafa wo saraga ke. 9 Mʼa ba ni Levi wo tirige shɛɛn pu ni Ɲuŋɔ Tacirige Fàya Puga ki ɲɔ na. Mʼa Izirayɛli nagoo pu bɛɛri yiri pinnɛ. 10 Mʼa Levi wo tirige shɛɛn pu yereŋɛ Tɛhɛnɛ Baa Kilɛ ɲaha tàan, Izirayɛli nagoo pʼi pu keye taha pu na. 11 Lee kadugo na Arɔn di Levi wo tirige shɛɛn pu kan Tɛhɛnɛ Baa Kilɛ mu Izirayɛli nagoo pu kanma ni ba pu ma saraga figi figi mɛ, na ki kan Kilɛ mu wɛ. Pu na ba yaha Tɛhɛnɛ Baa Kilɛ wo labye wu mɛgɛ na. 12 Lee kadugo na Levi wo tirige shɛɛn pʼi pu keye taha nupɛhɛɛ ki ɲuyɔ ni, Arɔn di nupee nigin wa pye jurumu yafa saraga, wu lisana pye saraga nizogoŋɔ Tɛhɛnɛ Baa Kilɛ mu, wu jurumu yafa wo yaaŋa ki pye Levi wo tirige shɛɛn pu na. 13 Mu Musa di Levi wo tirige shɛɛn pu yereŋɛ Arɔn ni wu jalaa pu ɲaha tàan, ma pu kan Tɛhɛnɛ Baa Kilɛ mu ba pu ma saraga figi figi mɛ na ki kan Kilɛ mu wɛ. 14 Lee waagana li na ma da ba Levi wo tirige shɛɛn pu waa yaha pu yɛ, pʼa bye nɛ wuu. 15 Lee bu bye wee tuun wu ni Levi wo tirige shɛɛn pu na já Ɲuŋɔ Tacirige Fàya Puga ki wo labye wu ɲɔ co.
Lee pyegana li na ma da ba pu pye fɛɛfɛɛ, na pu kan Tɛhɛnɛ Baa Kilɛ mu ba pu ma saraga figi figi, na ki kan Kilɛ mu wɛ. 16 Bani pʼa kan nɛ mu fɛɛfɛɛ na foro Izirayɛli nagoo pu ni. Nɛ pu lɔ pye nayɛ wuu Izirayɛli nagoo pu wo jashiilee pu bɛɛri faara. 17 Ma li kaɲuŋɔ pye Izirayɛli nagoo nizhiilee pu bɛɛri ɲɛ nɛ wuu, sipyii pu wo jalaa nizhiilee pee ni yapɔrɔyɔ yi bɛ wo bee nizhiilee pee. Nɛ Izirayɛli nagoo nizhiilee pu bɛɛri yaha nayɛ yahama ni fo caŋa ɲii lemu ni nɛ Misira fiige ki nagoo nizhiilee pu bɛɛri gbo ge.* 18 Ga na Levi wo tirige shɛɛn pu lɔ ma yaha Izirayɛli nagoo pu wo jashiilee pu bɛɛri faara.» 19 Nɛ Levi wo tirige shɛɛn pu kan Arɔn ni wu jalaa pu mu, na foro Izirayɛli nagoo pu ni, kɔnhɔ pu da labye pyi Ɲuŋɔ Tacirige Fàya Puga ki ni Izirayɛli nagoo pu mu. Pu na ba bye kaɲuŋɔ Izirayɛli nagoo pu na ganha na pu wo jurumu yafa wu taa, kɔnhɔ Izirayɛli nagoo pu ba fulo fɛfɛɛrɛ xuu wu na tuun bɛɛri ni, bɔɔngɔ ganha bu pu ta wɛ.»
20 Ayiwa Tɛhɛnɛ Baa Kilɛ ya yemu bɛɛri jo Musa mu Levi wo tirige shɛɛn pu shizhaa na ge, a Musa ni Arɔn ni Izirayɛli nagoo pʼi lee bɛɛri pye Levi wo tirige shɛɛn pu na. 21 A Levi wo tirige shɛɛn pʼi puyɛ pye fɛɛfɛɛ, na pu fàya yi je. A Arɔn di pu kan Tɛhɛnɛ Baa Kilɛ mu ba pu mʼa saraga figi figi mɛ na ki kan Kilɛ mu wɛ. A wu xhɔ na jurumu yafa wo yaaŋa ki pye pu na, kɔnhɔ wu pu pye fɛɛfɛɛ. 22 Ba lee ya pye xɔ wɛ, a Levi wo tirige shɛɛn pʼi pu wo labye wu ɲɔ kɔn Ɲuŋɔ Tacirige Fàya Puga ki ni Arɔn ni wu jalaa pu ɲaha tàan. Mu na pʼa Tɛhɛnɛ Baa Kilɛ wo nijoyo yi bɛɛri koo ɲaari Levi wo tirige shɛɛn pu shizhaa na, ba wʼa bi yi jo Musa mu wɛ.
23 Ayiwa, a Tɛhɛnɛ Baa Kilɛ di Musa pye sanha na: 24 «Levi wo tirige shɛɛn pʼa yaa na pu labye wu ɲɔ kɔɔn yee kɛlɛɛ shuun ni kaguro (25) na. Wa bɛɛri di da wu nibyii pyi Ɲuŋɔ Tacirige Fàya Puga ki ni. 25 Wemu bu yee kɛlɛɛ kaguro (50) ta, weefɔɔ di wu keŋɛ wolo wee labye wu ni. Wufɔɔ ganha ba wee labye wu pyi nige wɛ. 26 Ga lee bɛ na, wufɔɔ di kasɛɛgɛ yaha wu cebooloo pu na pu labye wu na Ɲuŋɔ Tacirige Fàya Puga ki ni, ga wuyɛ pyaa kunni wa da bye ni wuyɛ mɛgɛ nibyii ni nige wɛ. Kii kodorogoo kii mʼa yaa na fani Levi nagoo pu wo kapyeŋɛɛ ki shizhaa na.»