Kariɲɛɛgɛ ɲɔmɛɛ li wo keshi we ni wu ɲɔtɔŋɔa ki yàa we
37
Ayiwa, a Bɛtisalɛli di kariɲɛɛgɛ ɲɔmɛɛ li keshi wu yàa ni akasha tiire ni. A wu ɲidaa lʼi bye keŋɛ ɲii shuun ni taaga. A wu kadaa lʼi bye keŋɛ ɲii nigin ni taaga. A wu tɔɔngɔ kʼi bye keŋɛ ɲii nigin ni taaga. 2 A wu sanni nidiimɛ taga wu funŋɔ ke ni wu kadugo ki bɛɛri tɔ, na sanni ɲɔ kabara le wu ɲɔ ki na na ki maha círi. 3 A wu sanni shɔhɔ na pye kaŋmegee shishɛɛrɛ, na kee le wu guzheŋɛɛ shishɛɛrɛ wu na, kabanugo bɛɛri kaŋmegee shuun. 4 A wu akasha tiye pubegee shuun tɛ, na sanni taga ki tɔ. 5 A wu kee pubegee ki le sanni kaŋmegee ki ni keshi wu kabanuyo yi na, pu da kee taga pʼa wu luu. 6 A wu keshi wu ɲɔtɔŋɔ ki yàa ni sanni nidiimɛ ni, kee kemu ki ɲɛ jurumu yafa wu wo xuu wu ge. Ki ɲidaa li bye keŋɛ ɲii shuun ni taaga. Ki kadaa li ɲɛ keŋɛ ɲii nigin ni taaga. 7 A wu sanni shɔhɔ na taga serubɛɛnb shuun yàa keshi wu ɲɔtɔŋɔ ki ɲuyɔ shuun wu na. 8 A wu serubɛn nigin wa yàa ke ɲuŋɔ ke na, na nigin wa yàa ke ɲuŋɔ ke bɛ na. A wu serubɛɛn pu pinnɛ yàa ni keshi wu ɲɔtɔŋɔ ki ni, a yi bɛɛri di binnɛ pye nigin. 9 Serubɛɛn pʼa bi ɲahaya ye saha ni puyɛ ni, na keshi wu ɲɔtɔŋɔ ki wii, na kapaya ye yirige fugba we ni na taga keshi wu ɲɔtɔŋɔ ki tɔ. Serubɛɛn pu ɲahaya yi bi tagi keshi wu ɲɔtɔŋɔ ki yíri.Tabali wu ni wu yagbegeye ye
10 Ayiwa, a Bɛtisalɛli di tabali wu yàa ni akasha tiire ni. Wu ɲidaa li ɲɛ keŋɛ ɲii shuun, wu kadaa li ɲɛ keŋɛ ɲii nigin. Wu ɲuŋɔkana li ɲɛ keŋɛ ɲii nigin ni taaga. 11 A wu sanni nidiimɛ taga wu bɛɛri wɔɔgɔ, na wu ɲɔ ki maha círi ni sanni kabara ni. 12 A wu koɲɔgoŋɔ yàa taga ki ɲɔ ki maha círi. Kee koɲɔgoŋɔ ki pɛɛrɛ ti bye kabɛhɛɛ shishɛɛrɛ ɲuŋɔkana na. A wu sanni taga kee bɛ wɔɔgɔ círi. 13 A wu sanni yàa na pye kaŋmegee shishɛɛrɛ, na kee le tabali wu guzheŋɛɛ shishɛɛrɛ wu na, tɔɔyɔ shishɛɛrɛ wu tàan. 14 Kee kaŋmegee ki bye koɲɔgoŋɔ ki tàan, kee ni pu bi tabali wu lɔlɔbegee ki leni. 15 A wu begee ki yàa ni akasha tiye ni, na sanni taga ki wɔɔgɔ. Kee ni pu bi tabali wu luu. 16 Yagbegeye yemu yi ma daha tabali wu na ge, a wu yee bɛ yàa ni sanni nidiimɛ ni. Yee ɲɛ golɛyɛ ni pɛhɛɛ, ni booyo, ni cɛɛgbuugoo saraya niwoyo yi wo kapyeŋɛɛ ki kaa na.
Sokinnaa tige ke ni ki sokinnaa pu yàa we
17 A wu sokinnaa tige ki yàa ni sanni nidiimɛ ni. Sokinnaa tige ki ɲidaa le, ni ki ceefuu le, ni ki geye ye, na fara yaara ta na temu ɲɛ ba tige yasɛyɛ ɲɛ-ɛ ge, na yaginɛginɛgɛɛ kii yàa tee fɛɛ ni, na fara tige fyɛɛnrɛ na, a wu sanni shɔhɔ na taga yee bɛɛri pinnɛ yàa shiizhan. 18 A wu geye gbaara yàa sokinnaa tige ki ceefuu li na. A wu taanri wa yaha ke kabanugo ke na, na taanri wa yaha ke kabanugo ke bɛ na. 19 A wu tige yasɛyɛ taanri taanri yàa geye yi bɛɛri nigin nigin na ba amandi tige yasɛyɛ ɲɛ wɛ, yi ni yi yaginɛginɛgɛɛ kee, ni yi tige fyɛɛnrɛ ti bɛ. A wu geye gbaara wu bɛɛri yàa mu lee yaagana li na. 20 A wu tige yasɛyɛ shishɛɛrɛ yàa sokinnaa tige ki ceefuu li bɛ na ba amandi tige yasɛyɛ ɲɛ wɛ, yi ni yi yaginɛginɛgɛɛ kee ni yi tige fyɛɛnrɛ ti bɛ. 21 Yaginɛginɛrɛ nigin wa bye geye nizhiiye shuun wu wo geshɔhɔmɔ pu ni tige ki ceefuu li na, geye shuun we wʼa taha yee na ge, la di ɲɛ yee wo geshɔhɔmɔ pu ni, la di ɲɛ yisaya wo geshɔhɔmɔ pu ni. A geye gbaara wu bɛɛri di bye ni yaginɛginɛgɛɛ ki ni yi geshɔhɔmɔ pu ni. 22 Yaginɛginɛgɛɛ ki fara geye yi na, yi bɛɛri bi pinnɛ yàa ni sokinnaa tige ki ni. Sanni nidiimɛ wo tuukunnɔgɔ nigin wu bi shɔhɔ taga yi pinnɛ yàa. 23 A wu xhɔ na sokinna pɛhɛɛ gbarashuun, ni pu yàa yàa gbaragaac ni pu shɔɔnrɔ kuu kuu yɛrɛyɛ yi bɛɛri yàa ni sanni nidiimɛ ni. 24 Sanni nidiimɛ kiloo kɛlɛɛ taanri (30), wee pʼa taga sokinnaa tige ke ni ki yatoyo yi bɛɛri yàa.
Nudanga yawurire te ni ti saraya yi tawologo ki yàa we
25 Ayiwa, a Bɛtisalɛli di nudanga yawurire ti wo saraya yi tawologo ki yàa ni akasha tiire ni. Ki kabanuyo shishɛɛrɛ wu bɛɛri wu bye nigin, kabanugo ka bɛɛri ɲɛ keŋɛ ɲii nigin. Ki ɲuŋɔkana li ɲɛ keŋɛ ɲii shuun. A wu yeŋɛɛ shishɛɛrɛ yaha ki guzheŋɛɛ shishɛɛrɛ wu na. Kee yeŋɛɛ ki bi pinnɛ yàa ni ki ni. 26 A wu sanni nidiimɛ shɔhɔ, na wee taga ki bɛɛri tɔ, ki fugba we, ni ki yeŋɛɛ kee, ni ki kabanuyo ye. A wu sanni kabara taga ki ɲɔ ki maha círi. 27 A wu sanni kaŋmegee shuun shuun le ki kabanuyo shuun wu na ɲɔ kabara li nɔhɔdaan wu ni, ki lɔlɔbegee ki wo taleye. 28 A wu kee begee ki bɛ yàa ni akasha tiin ni, na sanni taga ki wɔɔgɔ. 29 A wu nudanga yawurire yaavɔɔ wa pye wʼa fɛfɛɛrɛ sindirimɛ nudanga wo pu yàa, ni nudanga yawurire fɛfɛɛrɛ wuuro te ni.*