36
«Ayiwa, Bɛtisalɛli ni Oliyabu, na fara sipyii pusamaa bɛɛri na, piimu bɛɛri mu Tɛhɛnɛ Baa Kilɛ ya fungɔngɔ fɛɛrɛ ni lajɛ kan Fàya Puga ki wo labye wu tuuyo yi bɛɛri kaa na ge, pee pu da ba we labye we bɛɛri pye na saha ni Tɛhɛnɛ Baa Kilɛ wo nijoyo yi ni.»Musa ya kacɛŋɛɛ cɛvɛɛ pu bɛɛri yiri
2 A Musa di Bɛtisalɛli ni Oliyabu yiri. Tɛhɛnɛ Baa Kilɛ ya shizhiinmɛ le kacɛŋɛɛ cɛvɛɛ piimu bɛɛri funyɔ ni ge, ni piimu bɛɛri pʼa bi puyɛ kan pʼi we labye we pye ge, a wu pee bɛ yiri. 3 Izirayɛli nagoo pʼa pa ni yakanya yemu ni Ɲuŋɔ Tacirige Fàya Puga ki yàa wu kaa na ge, a kapyebyii pʼi yee shɔ Musa mu. Sipyiire ti bi ma sanha caŋa bɛɛri ɲisɔɔgɔ na na ma na yakanya kaan Musa mu. 4 Ayiwa kacɛŋɛɛ cɛvɛɛ piimu bɛɛri pʼa bi Ɲuŋɔ Tacirige Fàya Puga ki labye wu pyi ge, a pee bɛɛri di pu wo labye wu yereŋɛ, na fulo Musa na, 5 na wu pye: «Wèe mago wa yaŋmuyɔ yemu na di Tɛhɛnɛ Baa Kilɛ wo labye wu pye ge, sipyiire ti wo niganya yʼa ɲɛhɛ yee na na kanha.» 6 A Musa di jo na pu tuduro yaha nɔ buguro ti kabaya yi bɛɛri na na cee fara ná na, na wa shishiin ganha ba nige ni yakanga ka shishiin ni Ɲuŋɔ Tacirige Fàya Puga ki wo yàa wu kaa na wɛ. A pʼi sipyiire ti ɲaha kɔn mu lee kɔngana li na, wa ya pa nige ni yaaga ka ni wɛ. 7 Yaŋmuyɔ yemu yʼa bi pinnɛ ta ge, a yee di labye wu bɛɛri xɔ fɛɛfɛɛ fo yisaya na kori.
Fàya puga ki yàa we
8 Ayiwa, kacɛbyii piimu pu bi labye wu pyi ge, a pee di fakuuyo tabaaya kɛ shin yemu yʼa gbile ge, na yee taga fàya puga ki yàa. Yee bi shin ni lɛn lize, ni bula ɲaha lize, ni lomasa lize, ni lizeɲɛ ni, na serubɛɛn yàa yi na, na lize taga pee su. 9 Fakuugo ka bɛɛri ɲidaa bye keŋɛ ɲii kɛlɛɛ shuun ni gbarataanri (28), ki kadaa di ɲɛ keŋɛ ɲii shishɛɛrɛ. Fakuuyo yi bɛɛri wo ɲuŋɔkana li bye nigin. 10 A pʼi fakuuyo kaguro wa jooli gbara yiyɛ na, na kaguro wusama bɛ jooli gbara yiyɛ na. 11 A pʼi yapɔɔrɔ ta shin ni bula ɲaha lize ni, na ta le le fakuuyo kaguro wa wo fakuusaŋa ki na, na ta le le wewu kaguro wu bɛ wo fakuushiige ki na. 12 A pʼi yapɔɔrɔ kɛlɛɛ kaguro (50) le fakuuyo kaguro nizhiimɛ wu wo fakuushiige ki na, na yapɔɔrɔ kɛlɛɛ kaguro (50) le wewu kaguro wu bɛ wo fakuusaŋa ki na, na yapɔɔrɔ ti saha saha ni tiyɛ ni. 13 A pʼi sanni gbaragaa kɛlɛɛ kaguro (50) yàa na kee taga yee fatɔyɔ shuun wu co gbara yiyɛ na. Lee funŋɔ ni a fàya puga ki bɛɛri di bye fatɔgbɔhɔ nigin.
14 A pʼi guri sanha na fakuuyo nigbiliye kɛ ni nigin wa bɛ shin ni sika shiire ni, na yee pye fàya puga ki fatɔŋɔ. 15 Kee fakuugo ka bɛɛri wo tɔɔngɔ bye keŋɛ ɲii kɛlɛɛ taanri (30), ki kadaa di ɲɛ keŋɛ ɲii shishɛɛrɛ. Yee fakuuyo kɛ ni nigin wu bɛɛri wo ɲuŋɔkana di bye nigin. 16 A pʼi fakuuyo kaguro jooli gbara yiyɛ na na pye fakuugo nigin, na gbaara wusama jooli gbara yiyɛ na na pye fakuugo nigin wa bɛ. 17 A pʼi yapɔɔrɔ kɛlɛɛ kaguro (50) le fakuuyo kaguro wu wo fatɔŋɔ ki wo fakuusaŋa ki na, na yapɔɔrɔ kɛlɛɛ kaguro (50) wa le fakuuyo gbaara wu wo fatɔŋɔ ki wo fakuushiige ki na. 18 A pʼi daɲaa gbaragaa kɛlɛɛ kaguro (50) yàa na kee taga yee fàya shuun wu co gbara yiyɛ na, kɔnhɔ yʼi bye fatɔgbɔhɔ nigin. 19 A pʼi guri sanha na dubyapee sɛɛyɛ ɲaaŋa, na yee taga fatɔgbɔhɔ ka yàa, na kee taga yeyi fatɔgbɔyɔ yi tɔ, sɛɛgboyo yemu yʼa panhaŋaa ge, na na kuri na yee wo fatɔgbɔhɔ ki taga yi bɛɛri ɲɔ tɔ.
Fàya puga ki wo tiin kee
20 Ayiwa, a pʼi xhɔ na akasha tige kɔrɔyɔ ya ja, na yi tɛ tɛ, na yee sin sin. 21 Kee kɔrɔgɔ ka bɛɛri ɲidaa bye keŋɛ ɲii kɛ, ki kadaa di ɲɛ keŋɛ ɲii nigin ni taaga. 22 Tɔɔyɔ shuun shuun wu bye yiyɛ tàan yee kɔrɔyɔ yi bɛɛri na. A pʼi fàya puga ki kɔrɔyɔ yi bɛɛri pye mu. 23 A pʼi kɔrɔyɔ kɛlɛɛ shuun (20) yàa fàya puga ki woroo kulo kacɛ ki kaa na. 24 A pʼi warifyɛn ɲidahaa kɛlɛɛ shishɛɛrɛ (40) yàa kɔɔjaya kɛlɛɛ shuun (20) wu kaa na. Kɔɔjaga ka bɛɛri, pʼa warifyɛn ɲidahaa shuun le ki tɔɔyɔ yi na. 25 A pʼi kɔɔjaya kɛlɛɛ shuun (20) wa bɛ yàa puga ki suumɔ kulo kacɛ ki kaa na, 26 ni warifyɛn ɲidahaa kɛlɛɛ shishɛɛrɛ (40). Kɔrɔgɔ ka bɛɛri ɲidahaa shuun ma le ki nɔhɔ ni. 27 A pʼi kɔɔjaya gbaara tɛ fàya puga ki kadugo yíri wu kaa na, caŋatomɔ kacɛ ki na. 28 A pʼi kɔɔjaya shuun shuun tɛ puga ki kadugo yíri guzheŋɛɛ ki kaa na. 29 Yi shuun wu bi sin yiyɛ tàan nɔhɔdaan wu ni, na shɛ kaŋmii nigin taga yi co gbara yiyɛ na fugba wu ni. Lee pyegana li na pu bi guzheŋɛɛ shuun wu wo kɔrɔyɔ shuun shuun wu bɛɛri pye. 30 A yi bɛɛri di bye kɔɔjaya gbarataanri ni warifyɛn ɲidahaa kɛ ni gbaara, kɔɔjaga ka bɛɛri ɲidahaa shuun. 31 A pʼi akasha tinbaraa kaguro tɛ ke kabanugo ke wo kɔɔjaya yi kaa na, 32 na tinbaraa kaguro wa tɛ ke kabanugo ke bɛ wo kɔɔjaya yi kaa na, na kaguro wa bɛ tɛ puga ki kadugo yíri wu kaa na, caŋatomɔ kacɛ ki na. 33 A pʼi tinbara la le niŋɛ ki bɛ ni, a lee di kɔrɔyɔ yi bɛɛri co niŋɛ ke ni, na co fàya puga ki ɲuŋɔ ka na fo na shɛ nɔ keki ɲuŋɔ ki na 34 A pʼi sanni taga yee kɔrɔyɔ ye ni kee tinbaraa ki bɛɛri tɔ tɔ, na sanni kaŋmegee yàa kɔrɔyɔ yi na, tinbaraa ki wo taleye.
Fàya puga ki wo ɲahaparaga fàŋa ke ni kuɲɔparaga ke
35 Ayiwa, a pʼi Fàya puga ki ɲahaparaga fàŋa ki yàa ni bula ɲaha lize, ni lomasa lize, ni lizeɲɛ, ni lɛn lize ni. A kacɛbyii pʼi serubɛɛn wo jaalaa yàa ki na, na pee su. 36 A pʼi akasha tiin shishɛɛrɛ tɛ, na ki bɛɛri wɔɔgɔ ni sanni ni, na sanni nigee le le ki na, kee kiimu ni ɲahaparaga fàŋa ki da ba le ge, na warifyɛn ɲidahaa shishɛɛrɛ yàa, na kee tiin ki le le kee ɲidahaa ki ni.
37 A pʼi Fàya Puga ki tajege ki wo kuɲɔparaga ki bɛ yàa ni bula ɲaha lize, ni lomasa lize, ni lizeɲɛ, ni lɛn lize ni, na ki bɛ su. 38 A pʼi tiin kaguro tɛ, na nigee bɛ yaha ki na, fàŋa kʼi ba le kee ni. Fàŋa ki na ba daha pubegee kiimu na ge, ni tige kɔrɔyɔ yemu yʼa kee pubegee ki tɔ ge, a pʼi sanni taga yee bɛɛri wɔɔgɔ. A pʼi daɲaa ɲidahaa kaguro yàa tiin ki zin wu kaa na.