Saraya nizogoyo yi tawologo ki yàa we
38
Ayiwa, a Bɛtisalɛli di saraya nizogoyo yi tawologo ki yàa ni akasha tiire ni. A wu ki ɲidaa li pye keŋɛ ɲii kaguro, na ki kadaa li bɛ pye keŋɛ ɲii kaguro. Ki kabanuyo shishɛɛrɛ wu bɛɛri wu bye nigin. Ki ɲuŋɔkana li ɲɛ keŋɛ ɲii taanri. 2 A wu yeŋɛɛ shishɛɛrɛ yàa ki guzheŋɛɛ shishɛɛrɛ wu na, kee yeŋɛɛ ki bi pinnɛ tɛ ni ki ni shiizhan. A wu daɲaa taga yi tɔ. 3 A wu saraya nizogoyo yi tawologo ki yagbegeye yi bɛɛri yàa: Ki shɔɔnrɔ yaleye ye, ni ki shɔɔnrɔ yakuuyo ye, ni ki tasaa pee, ni ki xaara su su ŋmahaa kee, ni ki na yalɔyɔ ye. A wu yee yagbegeye yi bɛɛri yàa ni daɲaa ni. 4 A wu daɲaa giriyazhi wa yàa, na wee shan saraya tawologo ki funŋɔ ni, ki niŋɛ ke ni, ɲɔ kabara li nɔhɔdaan wu ni. 5 A wu kaŋmegee shishɛɛrɛ yàa, na kee le saraya tawologo ki giriyazhi wu guzheŋɛɛ shishɛɛrɛ wu na, na pye begee taleye. 6 A wu akasha begee ki yàa, na ki wɔɔgɔ ni daɲaa ni. 7 A wu kee begee ki le le daɲaa kaŋmegee ki na saraya tawologo ki kabanugo ki na, na pye ki lɔ lɔ begee. A wu saraya nizogoyo yi tawologo ki yàa ni akasha kɔɔjaya ni, na ki funŋɔ ki niwaga yaha.Pɛgɛ ki yàa we
8 A wu pɛgɛ ki bɛ yàa ni daɲaa ni, na ki serege ki bɛ yàa ni daɲaa ni. Cèe piimu pu bi pu wo labye wu pyi Ɲuŋɔ Tacirige Fàya Puga ki tajege ki ɲɔ na ge, pee cèe pu wo jaawiiye wu bi shɔ na taga pɛgɛ ke ni ki serege ki yàa.
Fàya puga ki kaaŋa ki yàa we
9 Ayiwa, a wu xhɔ, na fàya puga ki kaaŋa ki wo maha maha fakuuyo yi yàa. Ki woroo kulo kacɛ ki maha maha fakuuyo yi bi yàa ni lɛn lize ni. Kee kabanugo ki tɔɔngɔ ki bye keŋɛ ɲii xhuu nigina (100). 10 Tinyeeŋɛɛ kɛlɛɛ shuun (20) wu bi le yee fakuuyo yi tàan, kee wo ɲidahaa ki bye daɲaa ɲidahaa kɛlɛɛ shuun (20). Tinyeeŋɛɛ ki wo nigee kee, ni fakuuyo yi wo taha taha tinbaraa ki ɲɛ warifyɛn. 11 Ki suumɔ kulo kacɛ ki wo fakuuyo yi tɔɔngɔ ki bɛ ɲɛ keŋɛ ɲii xhuu nigin (100). Ki tinyeeŋɛɛ ki ɲɛ kɛlɛɛ shuun (20), kee wo ɲidahaa ki ɲɛ daɲaa ɲidahaa kɛlɛɛ shuun (20). Tinyeeŋɛɛ ki wo nigee kee, ni fakuuyo yi wo taha taha tinbaraa ki ɲɛ warifyɛn. 12 Ki caŋatomɔ kacɛ ki wo fakuuyo yi tɔɔngɔ ki ɲɛ keŋɛ ɲii kɛlɛɛ kagurob (50). Ki tinyeeŋɛɛ ki ɲɛ kɛ, kee wo ɲidahaa ki ɲɛ ɲidahaa kɛ. Tinyeeŋɛɛ ki wo nigee kee, ni fakuuyo yi wo taha taha tinbaraa ki ɲɛ warifyɛn. 13 Kaaŋa ki Kilɛ-nɔhɔ kacɛ ke, kee kemu ki ɲɛ kaaŋa ki tajege ki ge, kee kabanugo ki bɛ wo ɲidaa li ɲɛ keŋɛ ɲii kɛlɛɛ kaguro (50). 14 Kee kabanugo ke, ki kanige cɛ wu wo fakuuyo yi tɔɔngɔ ki bye keŋɛ ɲii kɛ ni kaguro, yi tinyeeŋɛɛ ki ɲɛ taanri, kee wo ɲidahaa ki bɛ ɲɛ taanri 15 Kabanugo ki kamɛnɛ cɛ wu bɛ ɲɛ mu. Kaaŋa ki tajege ki kabanugo ka bɛɛri wo fakuuyo yi ɲidaa li bye keŋɛ ɲii kɛ ni kaguro. Ki tinyeeŋɛɛ ki ɲɛ taanri, ki ɲidahaa ki bɛ ɲɛ taanri.
16 Kaaŋa ki maha maha fakuuyo yi bɛɛri yi bi yàa ni lɛn lize ni. 17 Tinyeeŋɛɛ ki wo ɲidahaa ki ɲɛ daɲaa. Ki nigee kee, ni fakuuyo yi wo taha taha tinbaraa ki ɲɛ warifyɛn. Tige tɛŋɛɛ kiimu kʼa bi tinyeeŋɛɛ ki ɲuyɔ yi tɔ ge, kee bɛ bi wɔɔgɔ ni warifyɛn ni. Warifyɛn tinbaraa ki bi kaaŋa ki tinyeeŋɛɛ ki bɛɛri sogi sogi kiyɛ na.
18 Kuɲɔparaga kemu ki bye kaaŋa ki tajege ki ɲɔ ki na ge, kee bi sii kemɛ su ni bula ɲaha lize ni, ni lomasa lize, ni lizeɲɛ, ni lɛn lize ni. Ki tɔɔngɔ ki bye keŋɛ ɲii kɛlɛɛ shuun (20). Ki ɲuŋɔkana lʼi ɲɛ keŋɛ ɲii kaguro, ba kaaŋa ki fakuuyo yi ɲɛ wɛ. 19 Ki tinyeeŋɛɛ shishɛɛrɛ we ni wu ɲidahaa shishɛɛrɛ wu ɲɛ daɲaa. Kee wo nigee kee, ni ki taha taha tinbaraa ki ɲɛ warifyɛn. Tige tɛŋɛɛ kiimu ki bi tinyeeŋɛɛ ki ɲuyɔ yi tɔ ge, kee bɛ bi wɔɔgɔ ni warifyɛn ni. 20 Fàya puga ki wo sikaŋaa ki bɛɛri ni kaaŋa ki wo sikaŋaa ki bɛɛri bi yàa ni daɲaa ni.
Tɔɔrɔ temu tʼa le fàya puga ki ni ge, tee wo ɲuŋɔkana
21 Ayiwa, Ɲuŋɔ Tacirige Fàya Puga kemu ni kariɲɛɛgɛ ɲɔmɛɛ li saliya wu bi bye ge, tɔɔrɔ temu tʼa le kee ni ki yagboyo yi ni ge, a pʼi tee jate. Levi wo tirige shɛɛn pu pʼa wee jate we wolo Musa ɲɔmɛɛ na. Saraya ɲaha shɔɔnrivɛɛ Arɔn ja Itamari, wee wʼa pye wee labye we wo ɲahagbaa fɔɔ. 22 Yemu bɛɛri Tɛhɛnɛ Baa Kilɛ bi jo Musa mu ge, a Bɛtisalɛli di yee bɛɛri pye. Bɛtisalɛli bi bye Uri wo ja, Uri bɛ di bi bye Xhuri wo ja na foro Zhuda wo gbawege ki ni. 23 Wemu wʼa bi Bɛtisalɛli tɛgɛ ge, wee bye Ayisamaki ja Oliyabu na foro Dan wo gbawege ki ni. Wee bye tɛŋɛ pyevɔɔ ni kacɛŋɛɛ cɛvɔɔ, na fàya suu ni bula ɲaha lize ni, ni lomasa lize, ni lizeɲɛ, ni lɛn lize ni. 24 Sanni wemu wʼa le fɛfɛɛrɛ xuu wu wo labye wu bɛɛri ni ge, wee bɛɛri ya pye sanni kiloo kabɔfonɔ nigin (1.000) shishiin, na saha ni fɛfɛɛrɛ xuu wu wo jate wu kɔngana ni. Wee sanni we, sipyiire ti wo nigan wu bye were Tɛhɛnɛ Baa Kilɛ mu. 25 Izirayɛli nagoo piimu pʼa bi tɔrɔ ge, pee ya warifyɛn wemu pinnɛ ge, a wee di bɛ ni warifyɛn kiloo kabɔfoŋɔɔ taanri di kɛ ni gbarashuun (3.017), ni giramaa xhuu gbarashuun ni kɛlɛɛ kaguro (750), na saha ni fɛfɛɛrɛ xuu wu wo jate wu kɔngana ni. 26 Sipyii kabɔfoŋɔɔ xhuu gbaara ni taanri, di xhuu kaguro ni kɛlɛɛ kaguro (603 550) wemu pʼa tɔrɔ Izirayɛli nagoo pu ni ma lɔ yee kɛlɛɛ shuun (20) na na duri ge, a wee wa bɛɛri wo warifyɛn nigan di bɛ ni warifyɛn garamaa kaguro ni, na saha ni fɛfɛɛrɛ xuu wu wo jate wu kɔngana ni. 27 A pʼi warifyɛn kiloo kabɔfoŋɔɔ taanri (3.000) lɔ ma taga fɛfɛɛrɛ xuu wu kɔrɔyɔ yi wo ɲidahaa kee, ni ɲahaparaga fàŋa ki wo tinyeeŋɛɛ ki wo ɲidahaa ki yàa. Kee ɲidahaa ki bɛɛri ya pye ɲidahaa xhuu nigin (100). A ɲidaa la bɛɛri di bye warifyɛn kiloo kɛlɛɛ taanri (30). 28 Warifyɛn kiloo kɛ ni gbarashuun ni garamaa xhuu gbarashuun ni kɛlɛɛ kaguro (750) wemu wʼa kori ge, a pʼi wa taga tinyeeŋɛɛ ki wo nigee ki yàa. Tige tɛŋɛɛ kiimu kʼa taha taha tinyeeŋɛɛ ki ɲuyɔ ni ge, na wa taga kee wɔɔgɔ. Tinbaraa kiimu kʼa tinyeeŋɛɛ ki sogi sogi kiyɛ na ge, na wa taga kee bɛ wɔɔgɔ.
29 Izirayɛli nagoo pʼa daɲaa tɔɔrɔ temu kan Tɛhɛnɛ Baa Kilɛ mu ge, a tee bɛɛri di bye kiloo kabɔfoŋɔɔ shuun, di xhuu nigin ni kɛlɛɛ shuun ni shishɛɛrɛ (2.124). 30 A pʼi Ɲuŋɔ Tacirige Fàya Puga ki kuɲɔgɔ ki wo tinyeeŋɛɛ ki wo ɲidahaa ki yàa ni wee daɲaa wu ni. Na saraya tawologo ki bɛ ni ki giriyazhi wu yàa ni wee daɲaa wu ni, na fara saraga tawologo ki yagbegeye yi bɛɛri na, 31 ni kaaŋa ki tinyeeŋɛɛ ki wo ɲidahaa kee, ni kaaŋa ki tajege ki wo tinyeeŋɛɛ ki wo ɲidahaa kee, ni Ɲuŋɔ Tacirige Fàya Puga ki wo sikaŋaa kee, ni kaaŋa ki bɛ wo sikaŋaa kee.