Fɛfɛɛrɛ puga ki sokinnaa tige ke
24
A Tɛhɛnɛ Baa Kilɛ di Musa pye: 2 «Yi jo Izirayɛli nagoo pu mu na pu pa ni olivu sìnmɛ nijemɛ ni ma mu. Pee na ba leni sokinnaa tige ki sokinnaa pu ni, kɔnhɔ pu da ɲi tuun bɛɛri ni. 3 Arɔn na ba sokinnaa tige ki yaha Ɲuŋɔ Tacirige Fàya Puga ki ni, ɲahaparaga fàŋa ki ɲahagbaa na, kee kemu kʼa kariɲɛɛgɛ ɲɔmɛɛ li Keshi wu tɔ ge. Sokinnaa pu na ba ɲí yaha gbee Tɛhɛnɛ Baa Kilɛ ɲaha tàan tuun bɛɛri ni, na co yakoŋɔ ki na fo na shɛ ɲiga ki mugi. Wee na ba bye saliya wemu da ga yìri wɛ, yee ni yi kadugo shi nibama wu mu. 4 Arɔn na ba sokinna pu taha taha sokinnaa tige ki na, kee kemu kʼa yàa ni sanni nidiimɛ ni ge, kɔnhɔ pu da ɲi gbee Tɛhɛnɛ Baa Kilɛ ɲaha tàan.»Buuri wemu pʼa wo na gaan Kilɛ mu ge
5 A Tɛhɛnɛ Baa Kilɛ di nugo Musa pye: «Myɛviinmɛ pa lɔ, mʼa buuri ɲuyɔ kɛ ni shuun wa yàa, buuri ɲuŋɔ ka bɛɛri myɛ kiloo gbaara.* 6 Mʼa wee buuri wu taanni kuuyo shuun sanni tabali wu na Tɛhɛnɛ Baa Kilɛ ɲaha tàan, kuugo ka bɛɛri buuri ɲuyɔ gbaara. 7 Mʼa nudanga yawurire nijɛrɛ wo kee kuugo ka bɛɛri ɲuŋɔ ni. Tee yawurire te na ba sòrogo fɛɛfɛɛ buuri wu tɛgɛ nɛ Tɛhɛnɛ Baa Kilɛ mu. Lee na ba bye fundogo kaa. 8 Cadɛɛnyɛ yi bɛɛri ni yʼi da wee buuri we yɛri gbee nɛ Tɛhɛnɛ Baa Kilɛ ɲaha tàan. Lee wa kariɲɛɛgɛ ɲɔmɛɛ Izirayɛli nagoo pu na ba lemu koo ɲaari gbee ge. 9 Wee buuri wu na ba bye Arɔn ni wu jalaa pu wo. Pu na ba wu li fɛfɛɛrɛ xuu wa ni, bani buuri wu ɲɛ wii wemu wu ɲɛ fɛfɛɛrɛ wo fo xuuni ge, na foro Tɛhɛnɛ Baa Kilɛ wo yakanya yi ni yemu yi ma sòrogo fɛɛ fɛɛ ge. Wee ɲɛ saliya wemu da ga yìri bada wɛ.
Ma bu Kilɛ mɛgɛ kyɛɛgi, ma ni lemu lʼa yaa ge
10 Ayiwa, Izirayɛli shi wu wo poro pushɔ wa bi gbaga jé Misira shɛn wa mu. Caŋa ka yogo ya pa jé wee ni Izirayɛli shɛn ná wa tɛ ni buguro ti na. 11 A Izirayɛli poro pushɔ wu wo ja wu Kilɛ mɛgɛ kyɛɛgi, na laŋi pye. A pʼi shɛ ni wu ni Musa mu. Wu nu wu mɛgɛ ki bye na Shelomiti. Dibiri wo poro pushɔ wu bye wii na foro Dan wo gbawege ki ni. 12 A pʼi wee ná wu kemɛ mara xuu wa ni fo pu ba shɛ Tɛhɛnɛ Baa Kilɛ ɲidaan cɛ le kaa le ni.
13 Wee tuun wu ni a Tɛhɛnɛ Baa Kilɛ di Musa pye: 14 «Wemu wʼa laŋi wu pye ge, yi wufɔɔ yeege buguro ti kadugo yíri. Piimu bɛɛri pʼa laŋi wu logo wu ɲɔ na ge, pee di pu keye taha wu ɲuŋɔ ni, lee kadugo na sipyiire ti bɛɛri di wu wá gbo. 15 Mʼa yi jo Izirayɛli nagoo pu mu na: ‹Sipya bɛɛri wʼa wu Kilɛ wu laŋi ge, tee tigire ti na bye wu ɲuŋɔ ni. 16 Sipya bɛɛri wʼa Tɛhɛnɛ Baa Kilɛ mɛgɛ kyɛɛgi ge, weefɔɔ na gbo. Sipyiire ti bɛɛri na wufɔɔ wá gbo ni kagereye ni. Wʼa pye nadadiinmɛ la, wʼa pye kantiinlɛ la, wu na gbo wu Kilɛ mɛkyɛɛgɛrɛ ti wuu na.›»
Ɲii li ɲɛ ɲii wo tɛgɛ, gaan di ɲɛ gaan wo tɛgɛ
17 «‹Sipya bɛɛri wʼa wu sipyiɲii kpɔn na gbo ge, weefɔɔ bɛ na gbo.*
18 «‹Wu bu yapɔrɔgɔ kpɔn gbo, wu ki tɛgɛ kan. Munaa li ɲɛ munaa wo tɛgɛ.
19 «‹Sipya wa bu wu sipyiɲii bana, pu na wu bɛ bana lee wo tɛgɛ. 20 Sipya bu wu sipyiɲii yatɛngɛ kɛgi, wu wogo ki na gɛgi. Ma bu wa ɲii ja, ma wuu la na ja, ma bu wa gaan wolo, ma wuu la na wolo. Ma bu manɛ wemu tuugo bɛɛri yaha ma sipyiɲii na, wee manɛ we tuugo pu da yaha ma bɛ na. 21 Ma bu wa yapɔrɔgɔ gbo, ma na kee tɛgɛ kan, ga ma bu sipya gbo, pu da ma bɛ gbo.
22 «‹We saliyanumɔ we wu wa sipyiire ti bɛɛri na, nadadiinmɛ fara kantiinlɛ na. Nɛ wu ɲɛ Tɛhɛnɛ Baa Kilɛ, yi Kilɛ we.*›»
Pʼa Kilɛ mɛkyɛɛgɛrɛ fɔɔ wu wá gbo
23 Ayiwa, ba Musa ya yee jo Izirayɛli nagoo pu mu wɛ, a pʼi laŋi wu pyevɔɔ yeege buguro ti kadugo yíri, na wu wá gbo ni kagereye ni. Kodoronɔ lemu Tɛhɛnɛ Baa Kilɛ ya shɛ Musa na ge, a Izirayɛli nagoo pʼi lee koo ɲaari.