Ɲiŋɛ ki wo yeŋmɔnɔ le
(Dutɛrɛnɔmɛ 15:1-11)
25
Ayiwa, a Tɛhɛnɛ Baa Kilɛ di Musa pye Sinayi faaboboŋɔ ki na na:* 2 «Yi jo Izirayɛli nagoo pu mu na: ‹Fiige kemu nʼa da ba gan yi mu ge, yi ba shɛ jé ki ni tuun wemu ni, yi na ba ɲiŋɛ ki yɛri ki da ŋmɔni tɛɛgɛɛ tɛɛgɛɛ Tɛhɛnɛ Baa Kilɛ mu. 3 Yi na ba yi kɛrɛyɛ yi nuri fo yee gbaara, na yi ɛrɛzɛn wu yiile, na wu nagoo pu kɔɔn fo yee gbaara. 4 Ga yee gbarashuun wuu le, lee na ba bye ɲiŋɛ ki wo yeŋmɔnɔ. Ɲiŋɛ ki na ba ŋmɔ lee yee le Tɛhɛnɛ Baa Kilɛ mu. Yi ganha bu kɛrɛyɛ yi nugi lee yee li wɛ, yi ganha bu yi ɛrɛzɛn kɛrɛyɛ yi bɛ yiile wɛ. 5 Shinmapa wemu na viin kɛrɛyɛ yi ni lee yee li ge, yi ganha bu wee kɔn wɛ. Yi ɛrɛzɛn wu yʼa yaha yiile baa ge, wu na ba nagoo piimu pye ge, yi ganha bu pee kɔn wɛ. Lee yee li nibonɔ na ba bye ɲiŋɛ ki wo yeŋmɔnɔ. 6 Lemu na ba fin liyɛ mu ɲiŋɛ ki na ge, lee na ba bye yi bɛɛri wo fooba wuu: Mu ni ma bulona we, ni ma bulozhɔ we, ni ma kapyebye we, ni ma nadadiinmɛ we wee wemu wu wa ma mu tiinnɛ li na ge, 7 ni ma yapɔrɔyɔ ye, ni sige xaara te, lee na ba bye yi bɛɛri wo ɲɔlige.› »Yee kɛlɛɛ kaguro wuu li wo kalenɛ le
8 « ‹Ayiwa, yi na ba ɲiŋɛ ki wo yeŋmɔŋɔɔ gbarashuun tɔrɔ, lee ya li shɛɛ yee gbarashuun tɛhɛɛ gbarashuun, kee na ba bɛ ni yee kɛlɛɛ shishɛɛrɛ ni gbarashɛɛrɛ (49) ni. 9 Lee yee li wo yeŋɛ gbarashuun wogo ki wo cabyaa kɛ wu caŋa, yi na ba maga ki wi kʼi mɛgbɔɔ jo. Kee caŋa ki ɲɛ jurumu yafa wu wo cagbɔhɔ ke, yi na ba maga ki wi fiige ki bɛɛri ni. 10 Yi na ba yee kɛlɛɛ kaguro wuu li yaha Tɛhɛnɛ Baa Kilɛ yahama ni, yʼi ɲuwuuro yee li yɛrɛ pye fiige ki shɛɛn pu bɛɛri mu. Lee yee li mɛgɛ na ba yiri na yee kɛlɛɛ kaguro wo kalenɛ lea. Piimu bɛɛri wo ɲiyɛ yʼa bi pɛrɛ ge, yee na guri gan pu mu. Piimu bɛɛri pu bye bulooro ni ge, pee bɛɛri na yaha voro bulooro ti ni, na guri kari pu kpɔnhɔɔ ki na. 11 Lee yee kɛlɛɛ kaguro wuu li na ba bye kalenɛ yee yi mu. Yi ganha bu yemɛ nugi lee yee li wɛ. Shinma wemu na ba fin wuyɛ mu kɛrɛyɛ yi ni ge, yi ganha bu wee bɛ kɔn yʼi wu mara yaha yi shinma tayahaya ni wɛ. Yi ɛrɛzɛn wu bɛ wʼa yee shɔn yiilebaa ge, yi ganha bu wee bɛ wo nagoo pu kɔn di yaha yiyɛ mu wɛ. 12 Bani yee kɛlɛɛ kaguro wo kalenɛ li yee li ɲɛ lii. Yi na ba li yaha Tɛhɛnɛ Baa Kilɛ yahama ni. Shinma wemu wu da ba fin wuyɛ mu yi kɛrɛyɛ yi ni ge, yi bɛɛri na ba wee kɔɔn na li.
13 « ‹Lee yee kɛlɛɛ kaguro kalenɛ li yee li na, sipya bɛɛri wo ɲiŋɛ kʼa bi pɛrɛ ge, ki na guri gan wufɔɔ mu.
14 « ‹Ayiwa, wa ba da ɲiŋɛ ka pɛrɛ wu shi shɛn wa mu, kelee wa ba da ɲiŋɛ ka shɔ wu shi shɛn wa mu, wa shishiin ganha bu do wu ceboro na wɛ. 15 Kemu ma da zhɔ ma shi shɛn wu mu ge, yee kiimu kʼa toro taha yee kɛlɛɛ kaguro wu wo kalenɛ li na ge, kee yee ki niŋɛ ganha bu le pɛrɛmɛ pu ni wɛ. Ma shi shɛn wemu bɛ wʼa ki pɛrɛɛ ma mu ge, ɲiŋmɔyɔ yemu yʼa kori yee kɛlɛɛ kaguro wo kalenɛ lʼi guri nɔ sanha ge, yee yɛ wo pɛrɛmɛ wu da jo. 16 Yee ɲiŋmɔyɔ yi bu da yʼa ɲɛhɛ, ki pɛrɛmɛ pu na dugi, yee ɲiŋmɔyɔ yi bu da yi yʼa ɲɛhɛ wɛ, ki pɛrɛmɛ pu na digi. Bani ɲiŋmɔyɔ yemu ma da ba bye na ki tunni ge, yee wʼa da ba bɛrɛ ma mu. 17 Yi ganha ba dun yi sipyiɲii na wɛ, ga yʼa fyagi yi Kilɛ wu na. Nɛ wu ɲɛ Tɛhɛnɛ Baa Kilɛ, yi Kilɛ we.
18 « ‹Yʼa na wo saliya wu koo ɲaari, yʼi kasɛɛgɛ yaha na ɲɔmɛjogoo ki na, yi da ki koo ɲaari. Lee bu bye, yi ɲaɲiŋɛ wuu na ba diin fiige ki ni. 19 Yi faa yapyiire ti na ba ɲɔgi, yi na ba li na dinni, yi ɲaɲiŋɛ wuu na diin fiige ki ni.
20 « ‹La wa la ni yi na ba yu na: “Wèe na ba ganha na ɲaha li ɲiŋɛ ki wo yeŋmɔnɔ li na wɛ? Bani wʼà da ba yemɛ nugi wɛ, wù di wa da ba yalɔɔrɔ lɔ wɛ.” 21 Ayiwa, nɛ na ba baraga le ɲiŋɛ ki ni yee gbaara wuu li ni, kʼa yee taanri lada kan yi mu lee yee le. 22 Yee gbarataanri wuu li na, yi na ba yemɛ nugi, ga yee gbaara wuu li wo shinma wu yʼa da ba li sanha fo na shɛ nɔ yee gbarashɛɛrɛ wuu li na. Fo na shɛ nɔ wee shinmafomɔ wu wo yalɔɔrɔ ti na, shinmalɛ wu yʼa da ba li.› »
Wa bu ɲiŋɛ pɛrɛ, wu na já ba ki ɲuŋɔ wolo
23 « ‹Na ɲiŋɛ pɛrɛ fɛɛfɛɛ, lee ya yaa na byi wɛ, bani nɛ wogo ki ɲɛ fiige ke. Nadadiinmɛɛ ni nabuun yee ɲɛ nɛ mu. 24 Ɲiŋɛ bɛɛri wo fɛɛrɛ yi da ba da ke fiige ke ni ge, yʼi saliya wa teŋɛ, wa bu wu wo ɲiŋɛ ka pɛrɛ, wee saliya we di koo kan wufɔɔ mu wu já kuri ki shɔ sanha.
25 « ‹Funmɔ bu wɛri ma ceboro wa na fo na wu pye wʼa wu ɲiŋɛ ka pɛrɛ, wu puga ki sipya wa na já ba ɲiŋɛ ki pɛrɛmɛ pu tɛrɛŋɛ ki shɔvɔɔ wu na, na ki ɲuŋɔ wolo. 26 Tɛgɛ ki ɲuŋɔ wolovɔɔ bu bye wu ya ta wemu mu we, se ba jé wuyɛ pyaa ki ni na nɔ wu ki ɲuŋɔ wolo, 27 kʼa yee kiimu pye ki shɔvɔɔ wu mu ge, wu kee jate, yee kiimusaŋaa kʼa kori yee kɛlɛɛ kaguro wu wo kalenɛ lʼi nɔ ge, wu kee wo pɛrɛmɛ tɛrɛŋɛ ki shɔvɔɔ wu na. Lee bu bye ɲiŋɛ ki na guri bye wu wogo. 28 Se bye wu ya ta wu ni wu ki shɔvɔɔ wu wuu li tɛrɛŋɛ wu na wɛ, ɲiŋɛ ki na gori ki shɔvɔɔ wu mu fo na shɛ nɔ yee kɛlɛɛ kaguro wo kalenɛ li na. Ki shɔvɔɔ wu na ba wu keŋɛ laha ki na yee kɛlɛɛ kaguro wu kalenɛ li ni, kʼa guri pye ki kafɔɔ wu wogo sanha› ».
Na puga pɛrɛ, lee wo kodorogoo
29 « ‹Kulo lemu lʼa kuuri ni kashɛn ɲuŋɔ círi círi kasɔrɔgɔ ni ge, wa bu wu puga pɛrɛ lee kulo la ni, ki kafɔɔ wu na já ki shɔvɔɔ wu wuu li tɛrɛŋɛ wu na tɛɛrɛ la funŋɔ ni, na co ki cabɛrɛgɛ ki na fo na shɛ nɔ yee nigin na. Kee puga ki wo ɲuwuuro ti wo saliya wu tɛhɛnɛ li ɲɛ yee nigin. 30 Kulo lemu lʼa kuuri ni kashɛn ɲuŋɔ círi círi kasɔrɔgɔ ni ge, puga kemu ki ɲɛ lee ni ge, yee li bu maha círi na ta ki kafɔɔ wu ya já ki ɲuŋɔ wolo ki shɔvɔɔ wu mu wɛ, kee puga ki na gori yaha gbee ki shɔvɔɔ wu mu, wu ni wu kadugo shi nibama wu ni. Ali yee kɛlɛɛ kaguro wo kalenɛ li bɛ mɛhɛ nɔ wu da ki kan nige wɛ.
31 «‹Kulogoo kiimu ki ɲɛ kashɛn ɲuŋɔ círi círi kasɔrɔgɔ ya taga ki kuuri wɛ ge, kee kulogoo ki wo piyɛyɛ yi na ba wii ba kɛrɛyɛ yi ɲɛ wɛ. Yi kafɛɛ na já da yi ɲuŋɔ wo tuun bɛɛri ni. Yee kɛlɛɛ kaguro wo kalenɛ li bɛ bu nɔ, piyɛyɛ yʼa pɛrɛ piimu mu ge, pee di foro yi ni, pʼi yi yaha yi kafɛɛ pu mu.
32 «‹Kii ki ɲɛ Levi wo tirige shɛɛn pu wo kulogoo ki ge, Levi wo tirige shɛɛn pu na ba pu wo kulogoo ki wo piyɛyɛ yi ɲuyɔ wo fo gbee, tɛhɛnɛ baa. 33 Ali puga ki shɔvɔɔ wu bɛ mɛhɛ bye Levi wo tirige shɛn wa bɛ, yee kɛlɛɛ kaguro kalenɛ li bu nɔ, wu da voro puga ki ni, na ki kan ki kafɔɔ wu mu, bani Levi wo tirige shɛɛn pu wo piyɛyɛ ye, yee yi ɲɛ pu wo loolodahaa kee pu wo kulogoo ki ni, Izirayɛli nagoo pu niŋɛ ni. 34 Pu kulogoo ki wo mahama pu wo kɛrɛyɛ ye, yee da já da bɛrɛɛ wɛ, bani pu woyo yʼa sii yere fo gbee.›»
Funmɔ fɛɛ tɛgɛgana wo kodorogoo
35 « ‹Ayiwa, funmɔ bu nɔ ma ceboro na, na wu pye wu ya jani nige wuyɛ na wɛ, wu tɛgɛ kɔnhɔ wu bɛ di bye ɲìi na ma tàan, ali wu mɛhɛ bye nadadiinmɛ kelee nabun bɛ.* 36 Yaaga kemu foo wʼa lɔ ma mu ge, ma ganha bu la taha kee na wɛ, ma di ganha bu pɛrɛmɛ nide bɛ jo ki na wɛ. Ga ma da fyagi ma Kilɛ wu na, kɔnhɔ ma ceboro wu bye ɲìi na ma tàan. 37 Ma bu wari foo le wu na, ma ganha bu ɲudahara sha wu mu wɛ. Ma bu ɲɔlige foo le wu na, ma ganha bu ɲudahara sha ki na wu mu wɛ.* 38 Nɛ wu ɲɛ Tɛhɛnɛ Baa Kilɛ, yi Kilɛ we. Nɛ wʼa yee yeege Misira fiige ki ni, na Kana fiige ki kan yi mu, na bye yi Kilɛ.› »
Buloo wo ɲuwuuro ti kodorogoo
39 Ayiwa, funmɔ bu nɔ ma ceboro na, a wu wuyɛ pɛrɛ ma mu, ma ganha ba bulooro kapyeŋɛɛ kaan wu mu wʼa byi wɛ.* 40 Wu na ba bye ma mu ba ma kapyebye ɲɛ wɛ, kelee ba ma nabun ɲɛ wɛ. Wu na ba kapyeŋɛɛ pyi ma mu fo na shɛ nɔ yee kɛlɛɛ kaguro wu wo kalenɛ li na. 41 Yee kɛlɛɛ kaguro kalenɛ li ba nɔ, wu na ba foro ma mu, wu ni wu jalaa pu ni, na gari wu wo gbawege ki ni, na shɛ diin wu tii pu wo taa li ɲuŋɔ ni. 42 Bani nɛ wo buloo pu ɲɛ pii, piimu bɛɛri nɛ yeege Misira fiige ki ni ge. Lee wuu na, pu ya yaa na bɛrɛɛ ba buloo ɲɛ-ɛ wɛ. 43 Ma ganha ba ma fanha ki digee pu na wɛ, ga ta fyagi ma Kilɛ wu na.
44 « ‹Shi wemu wʼa yi kuuri ge, yʼa yi wo bulonamaa pee, ni bulozhaa pu shuu wee shi wu mu. 45 Nadadiinmɛɛ piimu pu wa yi mu ge, yi na da pu shuu pee bɛ mu. Pee nadadiinmɛɛ pu na ba nagoo piimu bɛ seni ge, yi na ba pu shuu pee bɛ ni. Pee na ba bye yi wuu. 46 Pee buloo pu na ba bye yi nagoo pu wo cɛn, yi kadugo yíri. Pee na ba bye yaha yi mu buloo fo gbee. Ga yi cebooloo Izirayɛli nagoo pu pi ge, wa shishiin ganha ga wu fanha digi wee wa na wɛ.
47 « ‹Ayiwa, nabuun kelee nadadiinmɛɛ pii pu wa yi tɛ ni ge, wee wa bu bye yara fɔɔ, a funmɔ di ma ceboro wa ta wu tàan fo wʼa wuyɛ pɛrɛ wee nabun nadadiinmɛ wu mu, kelee wu tirige shɛn wa mu, 48 wu na wuyɛ pɛrɛ xɔ na, wu ɲuŋɔ na já wolo. Wu ceboro wa na já wu ɲuŋɔ wolo tee bulooro ti ni. 49 Wu to wu ceboro wa, kelee wee wa wo ja na já wu ɲuŋɔ wolo. Wu kpuun li sipya wemu bɛɛri wʼa wu tɛrɛŋɛ ge, wee na já wu ɲuŋɔ wolo. Kelee se ba jé wuyɛ pyaa ki ni, wu na já wuyɛ ɲuŋɔ wolo. 50 Yee lemu wʼa wuyɛ pɛrɛ ge, na co lee yee li na, fo na shɛ nɔ yee kɛlɛɛ kaguro kalenɛ li wo yee li na, wu ni wu kafɔɔ wu ni, pʼi kee yee ki tɔrɔ. Wu ɲuwuuro ti pɛrɛmɛ pu tɛhɛnɛ na ba gɔn na saha ni kee yee ki ɲɔ ni. Kapyebye ya ɲɔ kemu taa yee funŋɔ ni ge, kee ɲɔ ke ki da lɔ ma taga ɲuwuuro ti pɛrɛmɛ pu tɛhɛnɛ kɔn. 51 Kee yee kii bu da kʼa ɲɛhɛ, wu kafɔɔ wʼa wu shɔ wari ɲɔ kemu na ge, wu na ba wee wari we niɲɛhɛmɛ tɛrɛŋɛ wu kafɔɔ wu na. 52 Yee kiimusaŋaa kʼa kori yee kɛlɛɛ kaguro kalenɛ lʼi nɔ ge, kee bu da ki ya ɲɛhɛ wɛ, wu na ba ki jate, ki bu bɛ ni wari wemu ni, wu wee kan wu kafɔɔ wu mu. 53 Wu na ba bye ba kapyebye ɲɛ wɛ, wemu ya kapyeŋɛɛ pyi saraa na yee funŋɔ ni wu kafɔɔ wu mu ge. Yi ganha bu wu kafɔɔ wu yaha wu wu fanha ki digi wu na wɛ. 54 Wu ɲuŋɔ bye kʼi ya já wolo le wologana lela shishiin na wɛ, yee kɛlɛɛ kaguro wo kalenɛ li ba nɔ yee lemu, wu na voro na bye wuyɛ wo, wu ni wu nagoo pu ni. 55 Bani nɛ wo buloo pu ɲɛ Izirayɛli nagoo pee, nɛ wo kapyebyii pu ɲɛ pii, pee piimu nɛ yeege Misira fiige ki ni ge. Nɛ wu ɲɛ Tɛhɛnɛ Baa Kilɛ, yi Kilɛ we.› »