Fàya puga ki singana, ni ki kangana Kilɛ mu
40
Ayiwa, a Tɛhɛnɛ Baa Kilɛ di Musa pye: 2 «Yee li yeŋɛ nizhiige ki wo cazhiige ki na mʼa da ba fàya puga ki sin, Ɲuŋɔ Tacirige Fàya Puga ke. 3 Mʼa kariɲɛɛgɛ ɲɔmɛɛ li keshi wu leŋɛ yaha ki funŋɔ ni, mʼa ɲahaparaga fàŋa ki pɔ kɔnhɔ keshi wu ganha ba ɲaa wɛ. 4 Mʼa ba ni tabali wu bɛ ni, mʼa ba wu sin, mʼa buuri wu taanni wu na, wee wemu pʼa wo na gaan na mu ge. Mʼa ba ni sokinna tige ki bɛ ni, mʼa ki sokinnaa pu gbegele. 5 Mʼa nudanga yawurire ti wo saraya tawologo sanni wogo ki yereŋɛ kariɲɛɛgɛ ɲɔmɛɛ li keshi wu ɲahagbaa na, mʼa fàya puga ki tajege ki wo kuɲɔparaga ki pɔ.6 «Mʼa saraya nizogoyo yi tawologo ki sin Fàya Puga ki tajege ki ɲahagbaa na, Ɲuŋɔ Tacirige Fàya Puga ke. 7 Mʼa pɛgɛ ki sin Ɲuŋɔ Tacirige Fàya Puga ke ni saraya yi tawologo ki tɛ wu ni, mʼa lɔhɔ le ki ni. 8 Mʼa kaaŋa ki wo fakuuyo yi bɛ sin, mʼa kaaŋa ki tajege ki wo kuɲɔparaga ki pɔ.
9 «Mʼa sindirimɛ pu lɔ, mʼa pa wo Fàya Puga ke, ni ki funŋɔ yaŋmuyɔ yi bɛɛri na, mʼa ki ni ki yagbegeye yi bɛɛri pye fɛɛfɛɛ. Lee bu bye, yi bɛɛri na bye fɛɛfɛɛ. 10 Mʼa sìnmɛ pʼa fara saraya nizogoyo yi tawologo ke ni ki yagbegeye yi bɛɛri na. Mʼa saraya tawologo ki pye fɛɛfɛɛ, lee bu bye, ki na bye fɛɛfɛɛ fo xuuni. 11 Mʼa sìnmɛ pa fara pɛgɛ ke ni ki serege ki bɛ na, mʼa yi pye fɛɛfɛɛ.
Arɔn ni wu jalaa pu yahagana Kilɛ yahama ni
12 «Ayiwa, mʼa ba ni Arɔn ni wu jalaa pu ni Ɲuŋɔ Tacirige Fàya Puga ki tajege ki ɲɔ na, pʼi ba wuli. 13 Pu bu xhɔ, mʼa Arɔn wo fɛfɛɛrɛ fàya yi le wu na, mʼa wu tìre ma yaha na yahama ni, kɔnhɔ wu da saraya ɲaha shɔɔnrivɛɛrɛ ti wo kapyeŋɛɛ ki pyi na mu. 14 Mʼa wu jalaa pu bɛ pye pu fulo, mʼa pu bɛ wo fadegbɔgɔɔ ki le le pu na 15 Mʼa pu bɛ tìre ma yaha na yahama ni ba mʼa pu to wu tìre wɛ, kɔnhɔ pu da saraya ɲaha shɔɔnrivɛɛrɛ ti wo kapyeŋɛɛ ki pyi na mu. Pe sindirimɛ pe na ba pu ni pu kadugo shi nibama wu bɛɛri pye yaha gbee nɛ yahama ni, pʼa bye saraya ɲaha shɔɔnrivɛɛ.»
Musa ya fàya puga ki sin
16 Ayiwa, Tɛhɛnɛ Baa Kilɛ ya tuduro temu bɛɛri jo Musa mu ge, a Musa di tee bɛɛri pye ti pyegana na.
17 Yee shuun wuu li wo yeshiige ki cazhiige ke, a pʼi fàya puga ki sin. 18 A Musa di pu pye pʼa fàya puga ki sin. A pʼi ɲidahaa ki sin sin, na kɔɔjaya yi sin, na tinbaraa ki taga yi pari pari, na tinyeeŋɛɛ ki sin sin. 19 A pʼi fakuuyo yi taha fàya puga ki na, na fatɔgbɔhɔ ki taga yi ɲɔ tɔ, ba Tɛhɛnɛ Baa Kilɛ bi yi jo Musa mu wɛ. 20 A Musa di kariɲɛɛgɛ ɲɔmɛɛ li wo kɔɔgɔɔ ki lɔ, na ki le keshi wu ni. A pʼi keshi wu wo pubegee ki le wu na, na wu ɲɔtɔŋɔa ki tɔ wu na. 21 A pʼi wu lɔ leŋɛ fàya puga ki ni, na xhɔ na ɲahaparaga fàŋa ki pɔ, kɔnhɔ wu ganha ba ɲaa wɛ, ma na jo ba Tɛhɛnɛ Baa Kilɛ bi yi jo Musa mu wɛ.
22 A Musa di tabali wu sin Ɲuŋɔ Tacirige Fàya Puga ki ni suumɔ kulo kacɛ ki na, ɲahaparaga fàŋa ki ɲahagbaa na. 23 Buuri wemu pʼa wo na gaan Tɛhɛnɛ Baa Kilɛ mu ge, a pʼi wee taanni tabali wu na, ma na jo ba Tɛhɛnɛ Baa Kilɛ bi yi jo Musa mu wɛ.
24 A Musa di sokinnaa tige ki sin Ɲuŋɔ Tacirige Fàya Puga ki ni, woroo kulo kacɛ ki na, na saha ni tabali wu ni. 25 A wu sokinnaa pu le le Tɛhɛnɛ Baa Kilɛ ɲaha tàan ba Tɛhɛnɛ Baa Kilɛ bi yi jo wu mu wɛ.
26 A wu saraya tawologo sanni wogo ki sin Ɲuŋɔ Tacirige Fàya Puga ki ni, ɲahaparaga fàŋa ki ɲahagbaa na, 27 na pu pye pʼa nudanga yawurire ta sòrogo ki ni ba Tɛhɛnɛ Baa Kilɛ bi yi jo Musa mu wɛ.
28 A pʼi Fàya Puga ki tajege ki wo kuɲɔparaga ki pɔ. 29 A Musa di saraya nizogoyo tawologo ki sin Ɲuŋɔ Tacirige Fàya Puga ki tajege ki ɲɔ na, a pʼi saraya nizogoŋɔ ka wolo ki na, na myɛ bɛ wo saraga ka wolo ki na ma na jo ba Tɛhɛnɛ Baa Kilɛ bi yi jo Musa mu wɛ.
30 A Musa di pɛgɛ ki sin Ɲuŋɔ Tacirige Fàya Puga ke ni saraya tawologo ki tɛ wu ni, na ki ɲi lɔhɔ na fɛfɛɛrɛ kalɛgɛɛ ki wo bye wu kaa na. 31 A Musa ni Arɔn ni wu jalaa pʼi pu keye ni pu tɔɔyɔ je kee ni. 32 Pu ba da jé Ɲuŋɔ Tacirige Fàya Puga ki ni tuun bɛɛri ni, kelee pu ba da vulo saraya tawologo ki na tuun bɛɛri ni, pʼa kee lɔhɔ ke taga puyɛ pye fɛɛfɛɛ ba Tɛhɛnɛ Baa Kilɛ bi yi jo Musa mu wɛ.
33 A Musa di kaaŋa ki maha maha fakuuyo yi bɛ sin na taga fàya puga ke ni saraya tawologo ki maha círi. A wu kaaŋa ki tajege ki wo kuɲɔparaga ki pɔ.
Ayiwa, a Musa di labye wu bɛɛri pye mu lee pyegana li na fo na wu xɔ.
Tɛhɛnɛ Baa Kilɛ wo nɔɔrɔ wʼa puga ki ɲi
34 Wee tuun wu ni a ɲahaŋa kʼi zhigile Ɲuŋɔ Tacirige Fàya Puga ki ɲuŋɔ ni, a Tɛhɛnɛ Baa Kilɛ wo nɔɔrɔ wʼi puga ki ɲi. 35 Musa ya já jé Ɲuŋɔ Tacirige Fàya Puga ki ni wɛ, bani kee ɲahaŋa ki bi kori yaha puga ki ɲuŋɔ ni, a Tɛhɛnɛ Baa Kilɛ wo nɔɔrɔ wu bɛ di puga ki ɲi. 36 Kee ɲahaŋa ki bye ki bu yìri dugi fàya puga ki ɲuɲɔ wu na tuun wemu ni, Izirayɛli nagoo pu na ganha na se ɲaha na. Kee fɛni Izirayɛli nagoo pʼa bi se, na yeree na se. 37 Ga, ɲahaŋa ki bu bye ki sanha yìri dugi fàya puga ki ɲuɲɔ wu na wɛ, pu bɛ da ga shɛ wɛ, fo ɲahaŋa ki ba shɛ yìri dugi tuun wemu ni. 38 Caŋa ni Tɛhɛnɛ Baa Kilɛ wo ɲahaŋa ki bi ma bye fàya puga ki ɲuɲɔ na. Piige bu wɔ, na ma bye ki ni Izirayɛli nagoo pu bɛɛri ɲii na. Mu na lee bi byi pu ɲaagoo li bɛɛri na.