Yakuba kpɔn pu keree
50
A Yusufu di buri wu to wu nixhugo ki ɲuŋɔ ni, na ɲɔsɔɔnrɔ fo kan wu mu, na ganha na mɛɛ suu. 2 A Yusufu di wu wo wɛbyii pu pye na pu wu to wu nixhugo ki gbegele ni nugo kɔn kɔn yaara ni. A wɛbyii pʼi Izirayɛli gbo wo wu gbegele ni nugo kɔn kɔn yaara ti ni. 3 A wɛbyii pʼi cabyaa kɛlɛɛ shishɛɛrɛ (40) pye wee labye we na, bani pu bu jo pʼi gbo gbegele ni nugo kɔn kɔn yaara ni, cabyaa kɛlɛɛ shishɛɛrɛ (40) pu ma bye wee labye wu na. A Misira shɛɛn di yamɛhɛɛ su gbo wu na fo cabyaa kɛlɛɛ gbarashuun (70).4 Ayiwa, ba gbo wu yamɛhɛɛ ki caya yʼa fa wɛ, a Yusufu di Farawɔn puga shɛɛn pu pye: «Nɛ kaa bu da lʼa taan yi mu, nʼa yi ɲɛɛri jo yi shɛ yi jo Farawɔn mu na: 5 ‹Na nɛ to wu yaha ɲìi na, wʼa nɛ pye nɛ kàa wu mu, na wee ga xhu, na wee ya faŋa kemu gbegele yaha Kana fiige ki ni ge, na di zhɛ wu ɲuŋɔ ŋmɔhɔ wà.› Nʼa ma ɲɛɛri na yaha di shɛ na to wu nixhugo ki le wà, di na guri ba.» 6 A Farawɔn di jo: «Yìri, mʼa shɛ ma to wu ɲuŋɔ ŋmɔhɔ ma na jo ba mʼa kàa wu mu wɛ.»
7 A Yusufu di yìri na shɛ wu to wu ɲuŋɔ ŋmɔhɔ. A Farawɔn wo kapyebyii pu bɛɛri, ni Misira fiige ki nɔhɔlɛɛ pu bɛɛri di binnɛ kari ni wu ni. 8 A Yusufu puga shɛɛn pu bɛɛri ni wu ɲahafɛɛ pee, ni wu to wu puga shɛɛn pu bɛɛri di gari wà. Sipya bɛ ya kori Goshɛni koomɔ pu ni wɛ, fo nɔhɔpiire te, ni yatɔɔbya we, ni niiyɛ yi yɛ. 9 Shɔnyɔ wotoriyo ni shɔnyɔ fɛɛ bɛ bye ni pu ni. Sipyii piimu pʼa kari ni Yusufu ni ge, pu bi sii ɲɛhɛ xuuni.
10 Ba pʼa shɛ nɔ Atadi wo shuu li na, Zhurudɛn Gba wu kɔn-ma-ɲɛrɛmɛ pu ni wɛ, a pʼi sii yamɛgeye wá wà fo xuuni. A Yusufu di wu to wu kpɔn pu le wà na ta cabyaa gbarashuun. 11 Kana shɛɛn piimu bye wà ge, ba pee ya pee kpɔn pu ɲa mu wɛ, na jo: «Pe kpɔn pe wa da da see wo Misira shɛɛn mu dɛ!» Lee na pʼa wee xuu wu mɛgɛ le na «Abɛli-Misiramua». Wee xuu wu wa Zhurudɛn Gba wu kɔn-ma-ɲɛrɛmɛ pu ni. 12 Yakuba bi yemu jo wu jalaa pu mu ge, a pʼi lee koo ɲaari. 13 A pʼi gbo wu lɔ kari Kana fiige ki ni, na shɛ wu ɲuŋɔ ŋmɔhɔ wà Makipela kɛrɛyɛ yi wo faaga wege ki ni, Mamure ɲahatiimɛ pu ni. Ibirayima wu bi kee faaga wege ke ni yee kɛrɛyɛ yi shɔ Xhɛti shi shɛɛn Efurɔn mu na pye wu wo xuu taleŋɛ.* 14 Ba Yusufu ya wu to wu le xɔ wɛ, na guri pa Misira ni, wu ni wu cebooloo pee, ni piimu bɛɛri pu bi kari ni wu ni wu to wu taleŋɛ ni ge.
15 Ayiwa, ba Yusufu cebooloo pʼa li ɲa na pee to wʼa xu wɛ, a pʼi puyɛ pye: «La wa la ni Yusufu na ba wèe kɔ, wèe ya kakuuŋɔɔ kiimu pye wu na ge, na kee bɛɛri foo tɔ wèe mu.» 16 A pʼi tuduro yaha shɛ yi jo Yusufu mu na: «Sani wu xu ge, ma to wʼa bi jo 17 na wèe pu jo ni ma ni, wù ma ɲɛɛri na ma wù kakuuŋɔɔ kee ni wu xakɛ wu yafa wù mu, bani kakuunɔ wèe ya pye ma na. Wèe wa ma ɲɛɛri nimɛ jo ma ma to wu wo Kilɛ wu kapyebyii pu xakɛ wu yafa pu mu.» Ba Yusufu ya yee logo wɛ, na mɛɛ su. 18 Lee kadugo na a wu cebooloo puyɛ pyaa di ba shɛ wu mu, na shɛ nuguro sin wu fɛɛ ni, na jo: «Wèe piiri ma tàan, ma buloo pee!» 19 A Yusufu di pu pye: «Yi ganha bu fya wɛ, ta Kilɛ nɛ ɲɛ ya? 20 Yee bi giin yʼi kakuunɔ pye na na, ga a Kilɛ di li ɲɛri pye kasaana, kɔnhɔ lemu lʼa byi mɛ niɲaa ge, lee ɲɔ di fa. Lee ɲɛ ma sipyii niɲɛhɛmɛɛ shɔ xu na. 21 Nimɛ, yi ganha ba fyagi wɛ, nɛ na ba ɲuŋɔ le yee tàan, yi ni yi puga shɛɛn pu bɛɛri.» A Yusufu di pu logoo ɲiŋɛ mu lee ɲiŋɛgana li na, na jozaama jo ni pu ni.
Yusufu xu keree
22 A Yusufu ni wu to wu kpuun lʼi gori Misira fiige ki ni. A Yusufu shi wu bye yee xhuu nigin ni kɛ (110). 23 A Yusufu di ba wu ja Efirayimu wo nagoo ɲa, na Efirayimu wo ɲabiye yi bɛ ɲa. Manase ja Makiri bɛ wo jalaa ya taha Yusufu tɔɔyɔ na.
24 A Yusufu di ba wu cebooloo pu pye caŋa ka na: «Nʼa da ba xu. Ga, Kilɛ na ba foro yee na see na, na yee yeege ke fiige ke ni na kari fiige katii ni, wu bi kàa na kemu wo ɲɔmɛɛ lɔ Ibirayima, ni Ishaaga ni Yakuba mu ge.» 25 A wu Izirayɛli nagoo pu pye pʼa kàa wu mu, na jo: «Kilɛ ga ba foro yi na tuun wemu ni, yi da gaaŋi ni na kaciiye yi ni.»
26 A Yusufu di xhu na wu shi wu yaha yee xhuu nigin ni kɛ (110) na. A pʼi wu gbo wo wu gbegele ni nugo kɔn kɔn yaara ta ni, na wu le xuleŋɛ ka ni Misira fiige ki ni.