Yakuba ya ɲibaŋa keree jo wu jalaa pu shizhaa na
49
Ayiwa a Yakuba di ba wu jalaa pu yiri na pu pye: «Yi pa binnɛ na tàan, di yi ɲibaŋa keree jo yi mu.2 ‹Yi pa binnɛ, yʼi ɲuwegee shan
Yakuba jalaa! Yi pa logo yi to Izirayɛli wu ɲɔ na!›
3 ‹Urubɛn, mu wu ɲɛ nɛ jashiimɛ we,
Mu wu ɲɛ nɛ fanha ke ni na baraga ki ɲɔkɔɔnrɔ,
Ma wa pusamaa ɲaha na baraga ni, na ɲɛ pu ɲaha na sefɛɛrɛ ni.
4 Ma fanha kʼa ɲɛhɛ ba lofomɔ ɲɛ wɛ,
mu da ba bye nige ɲahagbaa li na wɛ.
Bani mu ya dugi ma to wu kajaŋa ki na,
mu ya dugi nɛ kajaŋa ki na, na ki nɔhɔ.›
5 ‹Sipyinumɔɔ pu ɲɛ Simiɲɔ ni Levi,
Pu ŋmɔparaa kʼa kakara pyi.
6 Nɛ zɔ wu wa ni pu ni pu woni wu na wɛ.
Nɛ zɔ wu ya binnɛɛ ni pu ni pu pinnɛrɛ na wɛ!
Bani pu loyire wuu ya sipyii gbo,
na nupɛhɛɛ tɔɔyɔ kavaan kɔn pu wo ɲidaan funŋɔ ni.
7 Pu wo loyire lʼa laŋi nɔ pu na, bani pu kafugo kʼa pɛlɛ toro.
Pu kafugo kʼa laŋi, bani pu ya ɲuŋɔ ɲaari wɛ!
Nɛ na ba pu waagi laha puyɛ na Yakuba nagoo pu niŋɛ ni,
Nɛ na ba pu caaga Izirayɛli nagoo pu tɛ ni.›
8 ‹Zhuda, mu ma cebooloo pʼa da ba sɔni.
Ma keŋɛ na ba bye ma pɛɛn gaɲa ni,
Ma to jalaa na ba nuguro sinni ma fɛɛ ni.
9 Zhuda ɲɛ ba cɛnripige ɲɛ wɛ,
Na ja, xaara tacoŋɔ ni mu ya yìri!
Mu ya nuguro sin, na sinnɛ ba cɛnri ɲɛ wɛ,
Ba cɛnrizhɔ ɲɛ wɛ, jɔgɔ di da ba mu yirige wɛ?
10 Fanha pubiin li na ba gori Zhuda keŋɛ ni,
Ɲuŋɔfɛɛrɛ ti bɛ na ba gori wu puga.
Lee na gori mu fo yi kafɔɔ wuyɛ pyaa cabaŋa na,
shi wu bɛɛri na ba wemu pɛlɛ ge.
11 Wu na ba wu kafaŋa ki puu ɛrɛzɛn tige na,
na wu kafabige ki puu ɛrɛzɛn tige nijeŋɛ ka na.
Wu na ba wu fàŋa ki jii duvɛn ni,
na wu fadeboroŋɔ ki jii ɛrɛzɛn lɔhɔ ni.
12 Wu ɲìi ki na ba ɲaaŋa duvɛn na,
na wu ganhaa ki fiinŋɛ nujirimɛ na.›
13 ‹Zabulɔn na ba diin suumɔ lɔhɔ ɲɔ na.
Lɔhɔ kɔrɔyɔ yi tayerege ki na ba bye wu tatɛɛngɛ.
Wu tɛhɛnɛ na ba gari fo Sidɔn yíri.›
14 ‹Isakari ɲɛ ba kafaŋa baraga wogo ɲɛ wɛ.
Yatɔɔgbaha kemu ya kuuri ɲɔ ni kasɔrɔyɔ shuun ni ge,
kee ni wʼa shuun.
15 Wʼa li ɲa na wu tashɔngɔ kʼa ɲɔ, fiige ki bɛ dʼa taan ge,
a wu wu kapaŋa duuri le tuguro nɔhɔ ni,
na guu bulooro kapyeŋɛɛ ki mu.›
16 ‹Dan na ba kiiri kɔn wu wo sipyii pu na,
ba Izirayɛli gbaweye yisaya ɲɛ wɛ.
17 Dan ɲɛ wɔ koo ɲɔ na, matɔn wu ɲɛ wii koo ni.
Na shɔnyɔ nɔni yi ɲidaveŋɛɛ na,
fo na yi dugivɛɛ shaan na jari.›
18 ‹Tɛhɛnɛ Baa Kilɛ,
mu wo ɲuwuuro te nɛ wʼa zigee!›
19 ‹Ŋmɔparaa fɛɛ na ba gburogi Gadi fɛni,
Ga wʼa gburogi pu fɛni, na nɔri pu na.›
20 ‹Azɛri na ba bye yaligee kafɔɔ,
Saannaa yaliceŋɛɛ na ba daa wu mu.›
21 ‹Nɛfitali ɲɛ sɔ wemu wu ɲɛ wuyɛ mu ge.
Kayetanya na ba fòro wu ɲɔ ni.›
22 ‹Yusufu ɲɛ tisɛŋɛ wo geŋɛ.
Tisɛŋɛ wo geŋɛ kemu ki ɲɛ lobulowii ɲɔ na ge.
Ki geye yʼa yìri dugi kasɔrɔgɔ ɲuɲɔ na.
23 Sindaaya fɛɛ pʼa wu kanha xuuni.
Pʼa taha yaha wu fɛni ni pu ŋmaya yi ni,
na wu ŋmuu.
24 Ga wʼa wu wo sindaa ki co ɲɔ.
Wu keye yʼa fanha ta Yakuba wo Se Bɛɛri Fɔɔ
wu wo keŋɛ ki baraga ni.
Mu wʼa pye yatɔɔnahama we,
Izirayɛli wo faakagereŋɛ ke.
25 Ma to wu wo Kilɛ wu baraga ni,
wee wemu wu ɲɛ ma tɛgɛvɔɔ ge,
Se Bɛɛri Fɔɔ wu baraga ni,
wee wemu na ba baraga le ma ni ge.
Wu na ba fugba we ni
ɲiŋɛ ki wo baraga ki tirige ma na,
Wu na ba baraga le cèe pu ni, na sege faha pu mu.
Wu na ba baraga le yapɔrɔyɔ yi ni, na yi ɲɛhɛ.›
26 ‹Ma to wu duba wu fanha ya ɲɛhɛ,
na toro nɛ wo sefɛlɛɛ pu wo wu na,
fo na toro tɛhɛnɛ baa faaboboyo bɛ tàan,
Wee duba we wu tigi Yusufu na.
Yusufu wemu wu ɲɛ wu cebooloo pu wo saan ge,
we duba we wu tigi wu ɲidii li ni.›
27 ‹Bɛnzhamɛ ɲɛ yacoŋɔ kemu ya xaara shɛɛngi ge,
Wu ma wu xaara co ɲisɔɔgɔ na, na xha.
Yakoŋɔ ki ba nɔ, wʼa tisara taa taa.› »
28 Pee pu wa Izirayɛli wo gbaweye kɛ ni shuun (12) we. Ɲibaŋa keree kiimu wʼa jo pu mu ge, kee ki wa kiiri. Wemu ni duba wemu ya yaa ge, a wu wee pye weefɔɔ mu.
Yakuba xu keree
29 Ayiwa, lee kadugo na a Yakuba di te tuduro te kan pu mu na jo: «Nɛ wa gaaŋi di zhɛ binnɛ ni na sefɛlɛɛ pu ni. Yi na ba shɛ na ɲuŋɔ ŋmɔhɔ na tii pu tàan, Xhɛti shi shɛɛn Efurɔn wo faaga wege ki ni. 30 Kee faaga wege ki wa Makipela wo kɛrɛyɛ yi ni Mamure ɲahatiimɛ pu ni Kana fiige ki ni. Ibirayima bi yee kɛrɛyɛ ye ni yi faaga wege ki shɔ Xhɛti shi shɛɛn Efurɔn mu na pye xuu taleŋɛ.* 31 Wà, Ibirayima ni wu shɔ Sara ɲuyɔ wa ŋmɔhɔ, wà Ishaaga ni wu shɔ Erebeka bɛ ɲuyɔ wa ŋmɔhɔ, wà nɛ Leya bɛ ɲuŋɔ ŋmɔhɔ.* 32 Yee kɛrɛyɛ yi wo faaga wege ki bɛɛri ya shɔ Xhɛti wo shi shɛɛn pu mu.»
33 Ayiwa, ba Yakuba ya tee tuduro ti kan xɔ wu jalaa pu mu wɛ, na wu tɔɔyɔ yi durogo kajaŋa ki na, na sinnɛ, na xhu na shɛ binnɛ ni wu sefɛɛ pu ni.