Yakuba ya duba pye Yusufu jalaa pu mu
48
Ayiwa, ba kee keree kʼa toro wɛ, a pʼi ba Yusufu pye caŋa ka na: «Li wii, ma to wʼa yá.» A Yusufu di gari ni wu jalaa shuun wu ni Manase ni Efirayimu. 2 A pʼi shɛ Yakuba pye na wu ja Yusufu wʼa pa di ba wu pɛrɛgi. A Izirayɛli di la le wuyɛ ni na yìri tiin wu kajaŋa ki na. 3 A Yakuba di Yusufu pye: «Ma nɛ yaha Kana fiige ki ni, Se Bɛɛri Fɔɔ Kilɛ ya wuyɛ shɛ nɛ na Luzi ni, na baraga le nɛ ni. 4 A wu nɛ pye: ‹Nɛ na ba ma pye sege fɔɔ, nɛ na ba ma nagoo pu ɲɛhɛ, nɛ na ba shi niɲɛhɛmɛ yeege ma ni, na ke fiige ke kan ma tirige shɛɛn pu mu ma kadugo yíri, kʼa bye pu wogo fo gbee.› » 5 A Yakuba di Yusufu pye sanha na: «Ayiwa, nimɛ, jalaa shuun wemu wʼa se ma mu naha Misira fiige ki ni, na ta nɛ sanha ba ma yíri wɛ ge, pee na bye nɛ wuu. Efirayimu ni Manase na ba bye nɛ jalaa ba Urubɛn ni Simiɲɔ ɲɛ wɛ. 6 Ga nagoo piimu na ba se pee kadugo na ge, pee na ba bye mayɛ pyaa ki wuu. Pee na ba pu wo taa cɛn wu lɔ pu ɲahafɛɛ pu mɛgɛ na. 7 Nɛ na yìri Padani-Aramu wo mura wu ni na ma, a Arasɛli di ba fɔ nɛ mu koo na Kana fiige ki ni, Efirata kulo li tàan. A nɛ wu ɲuŋɔ ŋmɔhɔ wà Efirata koo li na.» Wee Efirata we ninumɔ pʼa byi na Bɛtilɛhɛmua.8 A Izirayɛli di Yusufu jalaa shuun wu ɲa na jo: «Jɔgɔ yɛ pu ɲɛ piiri wɛ?» 9 A Yusufu di wu to ɲɔ shɔ na: «Kilɛ ya jalaa piimu kan nɛ mu naha ge, pee pu wa.» A Izirayɛli di jo: «Nʼa ma ɲɛɛri, pu fulo na na kɔnhɔ di duba pye pu mu.» 10 Lee bi lɛgɛ ki ta kʼa Izirayɛli ɲìi ki fanha xɔ, a wu bye wu ya ɲaa nige xuuni wɛ. A Yusufu di pu fulo wu na, a Izirayɛli di ɲɔsɔɔnrɔ fo kan pu mu, na pu puro gbara wuyɛ na. 11 A Izirayɛli di Yusufu pye: «Nɛ bi tiin ni li ni jo nɛ na ɲii taha sanha mu na wɛ. Ga li le dɛ, Kilɛ ya na pye nʼa ma nagoo bɛ ɲa.» 12 A Yusufu di pu lɔ laha wu to wu tɔɔyɔ yi na, na nuguro sin, na ɲaha ke buri ɲiŋɛ na. 13 A Yusufu di pu shuun wu co, na fulo ni pu ni Izirayɛli na. Efirayimu bye wu kanige keŋɛ ni ma ɲaha tii Izirayɛli wo kamɛnɛ keŋɛ ki na. Manase di ɲɛ wu kamɛnɛ keŋɛ ni ma ɲaha tii Izirayɛli wo kanige keŋɛ ki na. 14 Ga a Izirayɛli di wu keye yi sanha na yi pari, na kanige keŋɛ ki taha Efirayimu ɲuŋɔ ni, wee ɲɛ cuunvɔɔ we, na kamɛnɛ wogo ki taha Manase ɲuŋɔ ni, ma li ta bɛ Manase wu bye jalɛ we. 15 A wu duba pye Yusufu mu na jo:
«Nɛ tii pʼa ɲaari Kilɛ wemu ɲaha taan ge,
Ibirayima ni Ishaaga ni,
Kilɛ wemu wʼa pye nɛ nahavɔɔ
na lɔ na nɔhɔpiire ti na fo na pa nɔ niɲaa na ge,
16 Mɛlɛkɛ wemu wʼa nɛ shɔ kakuuŋɔɔ bɛɛri na ge,
wee wu baraga le kii funaŋaa kii ni.
Kee funaŋaa kii kʼa yiri nɛ mɛgɛ na,
ni na tii Ibirayima ni Ishaaga mɛyɛ na ge,
Pʼi se ɲɛhɛ xuuni fiige ki ni!»
17 Ayiwa, Yusufu ya wu to wu ɲa wʼa wu kanige keŋɛ ki taha Efirayimu ɲuŋɔ ni ge, lee ya taan wu ni wɛ. A wu wu to wu kanige keŋɛ ki lɔ laha Efirayimu ɲuŋɔ ni, na giin di ki taha Manase wogo ki na, 18 na wu to wu pye: «Mumɛ ya Baa? We wʼa lɛ, ma kanige keŋɛ ki taha wee wogo ki ni.» 19 Ga a tofɔɔ wu li she, na jo: «Nɛ li cɛ, na ja, nɛ li cɛ. We bɛ na ba bye shi wa, wu bɛ na ba bye sipyigbɔ wa, ga wu cuun wu na ba bye sipyigbɔ na toro wu tàan, shi niɲɛhɛmɛ bɛ na foro wu tirige shɛɛn pu ni.»
20 A wu duba pye pu mu kee caŋa ke, na jo: «Izirayɛli nagoo pu na ba yi mɛyɛ luu na daga na pu duba wu pyi. Pu na ba yu: ‹Kilɛ wu ma pye ba Efirayimu ni Manase ɲɛ wɛ!› » Mu na wʼa pye na Efirayimu yaha Manase ɲaha na.
21 Lee kadugo na, a Izirayɛli di Yusufu pye: «Li wii, nɛ na ba xhu! Ga Kilɛ na gori ni yi ni, na ba yi kuruŋɔ sanha ma shɛ yaha yi sefɛlɛɛ pu wo fiige ki ni. 22 Nʼa da ba la fara ma wo cɛn taa li na, lee di bɛlɛ ma cebooloo pu wogoo ki na. Sisɛmu koomɔ pemu nɛ shɔ Amɔri shi shɛɛn pu na, na ŋmɔpara le ni na sindaa ki baraga ni ge, nɛ pee kan ma mu.»