Yakuba ni wu jalaa pʼa nɔ Misira fiige ki ni
47
Ayiwa, a Yusufu di gari Farawɔn yíri na shɛ wu pye: «Nɛ to we, ni na cebooloo pʼa pa na yìri Kana fiige ki ni, pu ni yapɔrɔyɔ, ni pu keŋɛ yaŋmuyɔ yi bɛɛri. Goshɛni koomɔ pu ni pu wa.» 2 Wu ɲahafɛɛ kaguro wa Yusufu bi pinnɛ ni wuyɛ ni, a wu pee shɛ Farawɔn na. 3 A Farawɔn di Yusufu ɲahafɛɛ pu pye: «Ɲaha tuugo wo baari yee di byi wɛ?» A pʼi Farawɔn pye: «Yapɔrɔyɔ fɛɛ pu ɲɛ ma kapyebyii pee, ba wù tii pʼa pye wɛ.» 4 A pʼi Farawɔn pye sanha na: «Wèe ya pa wù ba diin naha ke fiige ke ni, bani xuugo kʼa kolo fo na doro Kana fiige ki ni, fo yapɔrɔyɔ tanahaŋa bɛ ya daa wɛ. W’à ma ɲɛɛri jo ma ma kapyebyii pu yaha pʼi shɛ diin Goshɛni koomɔ pu ni.»5 A Farawɔn di Yusufu pye: «Mu to we, ni ma cebooloo pʼa pa naha ma yíri. 6 Misira fiige ki ke ma ɲaha taan, fiige ki tasaaŋa ka wii, mʼa ma to we, ni ma cebooloo pu teŋɛ wà. Pu na já zhɛ diin Goshɛni koomɔ pu ni. Ma bu pii ta pu tɛ ni piimu kaan ya waha ge, pee na ba bye nɛyɛ pyaa wo yapɔrɔyɔ yi na.»
7 A Yusufu di ba ni wu to Yakuba wu ni na pa zhɛ Farawɔn na. A Yakuba di duba pye Farawɔn mu. 8 A Farawɔn di Yakuba pye: «Mu shi wʼa yee juu xɔ wɛ?» 9 A Yakuba di wu pye: «Nɛ yee xhuu nigin ni kɛlɛɛ taanri (130) wu ɲɛ niɲee nadadɛɛnrɛ ni. Nɛ yee ya ta ɲɛhɛ wɛ, ki torogogana bɛ dʼa kolo. Nɛ shi wu sanha na tii pu wo wu xɔ wɛ. Nadadiinmɛɛ pu bye pu bɛ ba nɛ ɲɛ wɛ.» 10 A Yakuba di duba pye sanha Farawɔn mu, na laha wu tàan.
11 A Yusufu di tatɛɛngɛ kan wu to we, ni wu cebooloo pu mu, na tɛyɛ kan pu mu Misira fiige ki tasaaŋa ki ni, Aramusɛsi wo koomɔ pu ni, na saha ni Farawɔn wo nijoyo yi ni. 12 A Yusufu di kasɛɛgɛ yaha wu to we, ni wu cebooloo pee, ni pu puga shɛɛn pu bɛɛri na, na ɲɔlige kaan pu mu na saha ni pu nagoo pu ɲɔ ki ni.
Yusufu ni Misira shɛɛn
13 Ayiwa, a xuugo kʼi ba golo fo yalige bɛ ya daa nige fiige ki bɛɛri ni wɛ. A Misira fiige ke, ni Kana fiige ki fanha di xhɔ kee xuugo ki keŋɛ ni. 14 A Yusufu di Misira fiige ke, ni Kana fiige ki wo wari wu bɛɛri faara pinnɛ shinmapɛrɛnɛ li funŋɔ ni. A wu wee wari we le Farawɔn wo wari keshi wu ni. 15 A Misira fiige ke, ni Kana fiige ki wo wari wu ba xhɔ. A Misira shɛɛn pu bɛɛri di ba Yusufu mu, na ba wu pye: «Yalige kan wù mu! Ɲaha na mu di da wèe yaha wèe pu xu ma tàan wari baara na wɛ?» 16 A Yusufu di jo: «Wari wu bu xhuuŋɔ, yʼa ma ni yi yapɔrɔyɔ yi ni, nɛ na da shinma wu kaan yi mu yapɔrɔyɔ yi wo faara.» 17 A pʼi ganha na ma ni pu yapɔrɔyɔ yi ni Yusufu mu. A Yusufu di ganha na shinma wu fari pu mu pu shɔnyɔ ye, ni pu dubyaa ni pu sikaa, ni pu niiyɛ, ni pu kafaya yi na. A wu lee yee li wo shinma wu kan pu mu yapɔrɔyɔ yi na.
18 Ba lee yee lʼa toro wɛ, lemu lʼa taha li na ge, a pʼi ba wu mu na ba wu pye: «Wù kafɔɔ we, w’à da yi ŋmɔhɔ ma na wɛ, wari wʼa xɔ fɛɛfɛɛ, wèe yapɔrɔyɔ yi bɛ dʼa ɲɛri wù kafɔɔ wu woyo. Yaaga wa nige wèe mu na ye wùyɛ pyaa kee ni wu kɛrɛyɛ yi na wɛ. 19 Ma ganha bu wù yaha wù xu ma tàan, wù kɛrɛyɛ yʼi bye wà wɛ. Wù shɔ ni wù kɛrɛyɛ yi ni, mʼa shinma kan wù mu. Lee funŋɔ ni, wù ni wù kɛrɛyɛ yi bɛɛri na bye Farawɔn woyo. Mʼa wù kan nuguzhi bɛ, kɔnhɔ wù bye ɲìi na, wù ganha bu xhu wɛ, kɛrɛyɛ yi bɛ ganha bu ɲɛri goroyo wɛ.» 20 A Yusufu di Misira fiige ki kɛrɛyɛ yi bɛɛri shɔ ma kan Farawɔn mu. Misira shɛɛn pu bɛɛri nigin nigin wu bi pu kɛrɛyɛ yi pɛrɛ, bani xuugo ki bi kolo toro. Lee funŋɔ ni a fiige ki bɛɛri niboŋɔ di ɲɛri pye Farawɔn keŋɛ yaaga. 21 A Yusufu di Misira fiige ki shɛɛn pu bɛɛri ɲɛri na pye buloo ma lɔ fiige ki ɲuŋɔ ka na, fo na shɛ nɔ ka na. 22 Ga wu ya ta saraya ɲaha shɔɔnrivɛɛ pu wo tɛyɛ yi shɔ wɛ, bani Farawɔn bi saliya wa teŋɛ, pu wo kuduun ɲɛ wemu ni ge. Lemu pu bi li ge, Farawɔn wu bi lee kaan pu mu. Lee lʼa pee pye pee ya ta pu wo kɛrɛyɛ yi pɛrɛ wɛ. 23 A Yusufu di sipyiire ti pye: «Nɛ yee ni yi kɛrɛyɛ yi shɔ niɲaa na kan Farawɔn mu. Nʼa da ba nuguzhi kan yi mu, kɔnhɔ yʼi já faa wu pye. 24 Yi ba yalɔɔrɔ ti lɔ, yʼi shinma wu taa taaya kaguro, yʼi ba nigin wu kan Farawɔn mu, yʼi shishɛɛrɛ wu ta. Yi na ba yashi wu wo wee ni, na yi puga shɛɛn pee ni yi nagoo pu ɲɔ shaa ni wee ni.» 25 A pʼi jo: «Mʼa wù shɔ xu na! Wèe kaa ya taan wù kafɔɔ wu mu, wù na ba bye Farawɔn wo buloo.» 26 A Yusufu di lee pye saliya wemu wʼa kori yaha fo na pa nɔ niɲaa na Misira fiige ki ni ge. Fiige ki funŋɔ shinma wu bɛɛri taaga kaguro wogo ki ma bye saan wu wogo. Saraya ɲaha shɔɔnrivɛɛ pu wo kɛrɛyɛ yi yɛ yʼa pye yee ɲɛ Farawɔn woyo wɛ.
Yakuba ni wu jalaa pʼa shɛ diin Goshɛni koomɔ pu ni
27 Ayiwa, a Izirayɛli nagoo pʼi shɛ diin Misira fiige ki ni, Goshɛni ɲiŋɛ ki na. A pu keŋɛ yaŋmuyɔ yʼi sii ɲɛhɛ xuuni wee xuu wu ni. A sege di daan pu na, a pʼi sii ɲɛhɛ xuuni.
28 A Yakuba di yee kɛ ni gbarashuun pye Misira fiige ki ni. A wu shi wu yee ki bɛɛri di bye yee xhuu nigin ni kɛlɛɛ shishɛɛrɛ ni gbarashuun (147). 29 Izirayɛli xuduun ya pa nɔ ge, a wu wu ja Yusufu yiri na wu pye: «Nɛ kaa bu da lʼa taan ma mu, na ma ɲɛɛri, ma keŋɛ ki le naha, na shii li ɲɔhɔ nia, mʼa gàa na mu na ba saama pye na mu ni ɲɔmɛɛ fɛɛrɛ ni, na mu wʼa da ba na nixhugo ki le naha Misira fiige ki ni wɛ. 30 Nɛ ga ba gari na sefɛɛ pu yíri, mʼa na lɔ yeege Misira fiige ki ni, mʼa shɛ na le na sefɛɛ pu wo faya yi ni.» A Yusufu di jo: «Nɛ na ba li pye ba mʼa yi jo wɛ.» 31 A Yakuba di jo: «Kàa na mu!» A Yusufu di gàa. A Izirayɛli di wu nuguro ti sin wu kajaŋa ki ɲuŋɔ tàan.