Yakuba ni wu nagoo pʼa yìri na gaaŋi Misira fiige ki ni
46
Ayiwa, a Izirayɛli di wu keŋɛ yaŋmuyɔ bɛɛri lɔ na gaaŋi. Ba wʼa shɛ nɔ Bɛɛrisheba ni wɛ, na saraya ya wolo wà wu to Ishaaga wo Kilɛ wu mu. 2 A Kilɛ di ba kashɛɛ la shɛ wu na piige ka ni na jo: «Yakuba, Yakuba!» A wu jo: «Ooyi!» 3 A Kilɛ di jo: «Nɛ ɲɛ Kilɛ, ma to wu wo Kilɛ we. Fyaara ganha bu jé ma ni Misira wo zhɛ wu na wɛ, bani wee xuu wu ni nʼa da ba shɛ ma pye shigbɔ. 4 Nɛyɛ pyaa kʼa da ba binnɛ ni ma ni na kari Misira fiige ki ni. Nɛyɛ pyaa kʼa da ba ma kuruŋɔ bɛ sanha na pa naha. Ma xuduun ba nɔ Yusufu wʼa da ma ɲìi ki tɔ.»5 A Yakuba di yìri foro Bɛɛrisheba ni na kari. Farawɔn bi wotoriyo yemu yaha pa pu fɛni ge, a Izirayɛli jalaa pʼi pu to Yakuba ni pu nagoo ni pu cèe pu lɔ yee wotoriyo yi ni. 6 Yaŋmuyɔ yemu bɛɛri pʼa ta Kana fiige ki ni ge, a pʼi gari ni yee bɛɛri ni, na gari ni pu yapɔrɔyɔ yi bɛ ni. A pʼi gari Misira fiige ki ni, Yakuba ni wu nagoo pu bɛɛri ni. 7 Wu jalaa ni wu pushaa, na fara wu ɲabiye yi bɛɛri na, a wu gari ni wu puga shɛɛn pu bɛɛri ni Misira ni.
Yakuba wo kpuun le Misira fiige ki ni
8 Ayiwa, Izirayɛli shɛɛn piimu pʼa kari Misira ni ge, ma na jo Yakuba ni wu jalaa pu ge, pee wo mɛyɛ yi wa ye: Urubɛn, wee ɲɛ Yakuba jashiimɛ. 9 Urubɛn wo jalaa pu ɲɛ: Henɔki, ni Palu, ni Ɛsirɔmu, ni Karimi. 10 Simiɲɔ wo jalaa pu ɲɛ: Yemuwɛli, ni Yamini, ni Owadi, ni Yakini, ni Zowari, ni Sɔli, wee ɲɛ Kana shɛn cee wu wo ja we. 11 Levi wo jalaa pu ɲɛ: Gɛrɛshɔn, ni Kexhati ni Marari. 12 Zhuda wo jalaa pu ɲɛ: Ɛri, ni Ona, ni Shela, ni Pɛrɛzi, ni Zera. Ɛri ni Ona ya xu Kana fiige ki ni. Pɛrɛzi wo jalaa pu ɲɛ Ɛsirɔmu ni Amuli. 13 Isakari wo jalaa pu ɲɛ: Tola, ni Puva, ni Zhobi, ni Shimurɔn. 14 Zabulɔn wo jalaa pu ɲɛ: Serɛdi, ni Elɔn ni Yalɛli. 15 Pee ya pye Yakuba shɔ Leya wo nagoo, piimu ya se Padani-Aramu wo mura wu ni ge, na fara wu poro pushɔ Dina na. Pee ni pu wo jalaa pu bɛɛri ya pye sipyii kɛlɛɛ taanri ni taanri (33).
16 Gadi wo jalaa pu ɲɛ: Zijɔn, ni Agi, ni Shuni, ni Ɛzibɔn, ni Ɛri, ni Arodi, ni Areyɛli. 17 Azɛri wo jalaa pu ɲɛ: Yimina, ni Yishiva, ni Yishivi, ni Beriya, ni pu ceboroshɔ Sera. Jalaa shuun wu bye Beriya mu, pee ɲɛ Ebɛri ni Malikiyɛli. 18 Leya to Laban wu bi Zilipa kan Leya mu na pye wu bulozhɔ. Wee Zilipa wu wo nagoo pʼa pye piiri, Yakuba mu wʼa pu se. Pu bɛɛri pʼa pye sipyii kɛ ni gbaara.
19 Yakuba shɔ Arasɛli wo jalaa pu ɲɛ: Yusufu ni Bɛnzhamɛ. 20 Jalaa shuun Yusufu ya ta Misira fiige ki ni, pee ɲɛ Manase ni Efirayimu. Wu shɔ Asenati wʼa bi pee se wu mu. Wee bye Oni kulo li wo saraya ɲaha shɔɔnrivɛɛ Potifera wo poro. 21 Bɛnzhamɛ wo jalaa pu ɲɛ: Bela, ni Bekɛri, ni Ashibɛli, ni Gera, ni Naama, ni Eyi, ni Ɔrɔshi, ni Mupimi, ni Upimi, ni Aradi. 22 Pee ya pye Arasɛli wo tirige shɛɛn, wʼa piimu ta Yakuba mu ge. Pu bɛɛri ya pye sipyii kɛ ni shishɛɛrɛ.
23 Dan wo ja wu ɲɛ Ushimi. 24 Nɛfitali wo jalaa pu ɲɛ: Yaseyɛli, ni Guni, ni Yesɛri, ni Shilɛmu. 25 Arasɛli to Laban wu bi Bila kan Arasɛli mu na pye wu bulozhɔ. Wee Bila wu wo nagoo pʼa pye piiri, Yakuba mu wʼa pu se. Pu bɛɛri pʼa pye sipyii gbarashuun.
26 Yakuba ni wu puga shɛɛn piimu pʼa kari ni wu ni Misira fiige ki ni ge, pee ya pye sipyii kɛlɛɛ gbara ni gbara (66). Wu jalaa cèe pu niŋɛ na foro wà. 27 Jalaa shuun wemu Yusufu ya ta Misira ni ge, pee bu fara wà pʼa bye sipyii kɛlɛɛ gbarashuun (70).
28 A Yakuba di Zhuda yaha kari wuyɛ ɲaha na Yusufu yíri, na wu shɛ wu ɲuŋɔ círi Goshɛni koomɔ pu ni. A pʼi shɛ nɔ Goshɛni ni. 29 A Yusufu di wu shɔnyɔ wotori wu pɔ, na gari Goshɛni ni na shɛ wu to Izirayɛli ɲuŋɔ círi. Ba wʼa wu ɲa wɛ, na migile wu katige ni, na mii su ma mɔ. 30 A Izirayɛli di Yusufu pye: «Nɛ na já xhuu nimɛ, bani nʼa ɲii taha ma na, na li cɛ jo ma wa ɲìi na sanha.»
31 A Yusufu di wu cebooloo pee, ni wu to wu puga shɛɛn pu pye: «Nʼa da zhɛ Farawɔn yíri, di shɛ wu funŋɔ to jo na cebooloo pee, ni na to wu puga shɛɛn piimu pu bye Kana fiige ki ni ge, jo pʼa pa. 32 Jo yapɔrɔyɔ fɛɛ pʼa pii, pu wo labye wu ɲɛ yapɔɔbɔɔnɔ. Pʼa pa ni pu yapɔrɔyɔ, ni pu yaŋmuyɔ yi bɛɛri ni. 33 Farawɔn bu yi yiri, na yi yege na lekɛ lʼi wa yi wo nibyii wɛ? 34 Yi na wu pye na: ‹Yapɔrɔyɔ fɛɛ pu wa ma kapyebyii pee, ma co wù nɔhɔpiire wuu na, fo na pa gbara niɲaa na, ba wù tii pu bi li pyi wɛ.› Lee bu bye yi na ba diin Goshɛni koomɔ pu ni, bani yapɔrɔyɔ fɛɛ kaa wa dan Misira shɛɛn ni wɛ.»