Musa se se keree
2
Ayiwa, wee tuun wu ni a Levi wo tirige shɛn ná wa di ba Levi wo kpuun shɛn cee wa leŋɛ. 2 A cee wu yere yacɛrɛ na, na funana se. A wu pya wu ta wʼa ɲɔ, na wu ŋmɔhɔ fo yeye taanri*. 3 Ba wʼa pa li cɛ na wee da já pya wu ŋmɔhɔ nige wɛ, a wu sagana ɲɔtɔŋɔ wuu la lɔ, na lee kemɛ wɔɔgɔ ni kuro ni. Na pubinnɛ li sinniŋɛ lee funŋɔ ni, na li yaha gba wu kabanugo ki na faɲagaya yi ni. 4 A pya wu muzhɔ wu shɛ yere xuu wa ni, na ganha na wii lemu na ba bye pya wu na ge.5 Lee kadugo na a Farawɔn poro fucɛɛrɛ di ba digi pa gba wu ɲɔ ki na, kɔnhɔ wu shɛ wuli. A wu kaafɛɛ fucɛɛbiire tʼi ganha na ɲaari ɲaari gba wu ɲɔ ki na. A wu ba sagana li ɲa faɲagaya yi ni, na wu bulozhɔ wu pye na wu shɛ li lɔ pa wu kan. 6 A wu sagana li ɲɔ mugi na pubinnɛ ta li funŋɔ ni li na mɛɛ suu, a li ɲiɲaara di jé wu ni, a wu jo: «Heburuu wo pya wa wu ɲɛ we!» 7 Wee tuun wu ni a pya wu muzhɔ wu fulo Farawɔn poro fucɛɛrɛ li na, na li pye: «Ta ma funŋɔ ki wa nɛ wu shɛ siivɔɔ wa sha Heburuu cèe pu ni, wee di ba jire kaan pya wu mu ma mu ya?» 8 A Farawɔn poro fucɛɛrɛ lʼi jo: «Uun, shɛ!» A wu shɛ pya wu nusege kiyɛ pyaa yiri pa. 9 A Farawɔn poro fucɛɛrɛ lʼi wu pye: «We pya we lɔ mʼa se, ma shɛ jire kaan wu mu na mu, nɛ wi ge, nɛ na ba ma saraa.» A cee wu gari ni pya wu ni, na ganha na jire kaan wu mu. 10 Ba pya wʼa pa jire yaha wɛ, a wu shɛ wu tɛɛŋɛ kan Farawɔn poro fucɛɛrɛ li mu. A wee di wu co ba wuyɛ pyaa yasege ɲɛ wɛ.* A wu pya wu mɛgɛ le na Musaa, na jo: «Bani lɔhɔ ni nɛ wu yiige.»
Musa ya paa kari Majan ni
11 Ba Musa ya lɛ wɛ, na ba gari wu cebooloo pu yíri caŋa ka. Kapyewagaa kiimu pu bi byi ge, a wu kee sɛɛri. A wu ba Misira shɛn ná wa ɲa wu na wu ceborona Heburu wa kpɔɔn.* 12 A Musa di wii mɛ, na wii mɛ, wu ya sipya ɲa wɛ, na Misira shɛn ná wu gbo, na wu ŋmɔhɔ gbazhɛnhɛ ki ni. 13 Kee caŋa ki ɲimuguro ti na, a wu nɔhɔ kari pu yíri, na shɛ Heburuu shuun ta yogo na. A wu kaɲii baa fɔɔ wu pye: «Ɲaha na mu di ma ceborona wu kpɔɔn wɛ?» 14 A wee ná wu wu ɲɔ shɔ na: «Jɔgɔ wʼa mu teŋɛ na pye wèe ɲuŋɔfɔɔ, na mu wʼa wèe kiiri kɔɔn wɛ? Mʼa giin mʼa na bɛ gbo ba mʼa Misira shɛn ná wu gbo-e ya?»
A Musa di fya, bani lʼa bye wu funŋɔ ni, na: «Nakaara baa, le kaa le ɲɛ nige kaŋmɔhɔnɔ wɛ!»* 15 A Farawɔn shiin di yi logo, na ganha na Musa shaa di gbo. Ga a Musa di baa kari fiige ka ni kemu mɛgɛ ki ɲɛ na Majan ge, lee funŋɔ ni a wu sanha di lii Farawɔn na. Ba wʼa nɔ wà wɛ, na shɛ diin keeŋɛ ka ɲɔ na.*
16 Pushaa gbarashuun bye Majan fiige ki saraya ɲaha shɔɔnrivɔɔ wa mu, a pee di ba ba lɔhɔ ɲi le logbakɔrɔgɔ ki ni, kɔnhɔ pʼi pu to wu yatɔɔbya wu gba. 17 Ga a yatɔɔnahamaa pii bɛ di nɔ, na ganha na pushaa pu kɔri. A Musa di yìri na yogo jo pushaa pu kaa na, na lɔhɔ kan pu yatɔɔyɔ yi mu. 18 Ba pʼa kuri shɛ pu to Erewɛli yíri wɛ, a wee di pu yege na: «Ɲaha kʼa yee pye yee ya wɛri pa niɲaa wɛ?» 19 A pʼi jo: «Misira shɛn ná wa wʼa wèe shɔ yatɔɔnahamaa pu na, na nugo lɔhɔ bɛ yeege wèe mu na kan wèe yatɔɔyɔ yi mu yʼa gba.» 20 A Erewɛli di wu poro pushaa pu yege na: «Mii wee ná wu wa wɛ? Ɲaha na yee dʼa pa na wu yaha wà wɛ? Yi shɛ wu yiri, kɔnhɔ wu ba li!»
21 A Musa di sɔɔ na diin Erewɛli yíri. A wee di wu poro Sefora kan wu mu. 22 A Sefora di ba funana se. A Musa di wee mɛgɛ le na Geresɔmu, (Nadadiinmɛ wake) na jo: «Nɛ pye nadadiinmɛ piitiilee wo fiige ni.»
23 Ba taatuunnɔ ya toro wɛ, a Misira shɛɛn saan wu xhu. Na Izirayɛli nagoo pu yaha pu na zhiin pu bulooro kapyewagaa ki nɔhɔ ni, a pʼi ganha na xhuulo na tɛgɛvɔɔ shaa. A pu xhuulo wu nɔ Kilɛ na. 24 A Kilɛ di pu shiinnɛ li logo, kariɲɛɛgɛ ɲɔmɛɛ lemu wu bi lɔ Izirayɛli nagoo pu tii pu mu pee piimu ɲɛ Ibirayima ni Ishaaga ni Yakuba ge, a wu wu funŋɔ yaha nidogo lee na.* 25 A wu Izirayɛli nagoo pu wii, na ɲuŋɔ ɲaari pu na.