Kilɛ ya Musa yiri
3
Ayiwa, wu yafɛna Zhetoroa yatɔɔyɔ Musa bi naha, Majan shɛɛn wo saraya ɲaha shɔɔnrivɔɔ we. Caŋa ka, a wu ba gari ni yi ni sipoŋɔ ki ni taliige ni, na shɛ nɔ Kilɛ wo faaboboŋɔ ki na kemu mɛgɛ ki ɲɛ Orɛbub ge. 2 A Tɛhɛnɛ Baa Kilɛ wo mɛlɛkɛ wu wuyɛ shɛ wu na naɲiŋɛ ka ni, tahara la niŋɛ ni. A Musa di wii, na tahara li bɛɛri ta na, ga lʼi ya sori wɛ. 3 A Musa di jo wuyɛ funŋɔ ni na: «Nʼa da waa zhɛ le kakanhana nigbɔɔ le shi cɛ, lemu lʼa tahara li pye li ya sori-i ge.» 4 Tɛhɛnɛ Baa Kilɛ ya li ɲa na Musa ya waa na gaaŋi zhɛ li wii ge. A wu diin tahara li niŋɛ ni na wu yiri na: «Musa, Musa.» A Musa di wu ɲɔ shɔ na: «Ooyi.» 5 A Kilɛ di jo: «Ma ganha bu fulo naha wɛ, ma tanhaya yi wolo, bani xuu wemu ni ma ɲɛ ge, wee ɲɛ nɛ yahama ni.» 6 A wu jo sanha na: «Nɛ wu ɲɛ ma to wu wo Kilɛ we, Ibirayima wo Kilɛ we, Ishaaga wo Kilɛ we ni Yakuba wo Kilɛ we.» Ba Musa ya yee logo wɛ, na wu ɲaha tɔ, bani na wu ɲaha kɔ le Kilɛ ni na wii, wu bi fyagi lee na.7 A Tɛhɛnɛ Baa Kilɛ di jo: «Nɛ sipyii piimu pu ɲɛ Misira fiige ki ni ge, nɛ pu ɲaa wu ɲa. Pʼa sipyaa kiimu suu pu ɲaavɛɛ pu keŋɛ ni ge, nɛ kee bɛ logo, na pu kanhama keree ki bɛ cɛ. 8 Lee na nɛ tigi, di ba pu shɔ Misira shɛɛn pu na, di pu yeege Misira fiige ki ni. Di shɛ ni pu ni fiige ka ni, kemu ya ɲɔ, na bɛlɛ na ɲi nujirimɛ ni sɛrɛc na fo yi na fúu ge, kee ɲɛ Kana shɛɛn, ni Xhɛti shi shɛɛn, ni Amɔri shi shɛɛn, ni Ferɛzi shi shɛɛn, ni Xhɛvi shi shɛɛn, ni Zhebusi shɛɛn wo fiige. 9 Nimɛ, Izirayɛli nagoo pu sipyaa kʼa nɔ nɛ na, ɲaa wemu Misira shɛɛn pʼa dɛri pu na ge, nɛ wee ɲa. 10 Ayiwa nimɛ nʼa da ma tun Farawɔn mu, mʼa shɛ na sipyii Izirayɛli nagoo pu yeege Misira fiige ki ni.*»
11 Ga a Musa di Kilɛ ɲɔ shɔ na: «Jɔgɔ nɛ di ɲɛ fo nɛ wu já shɛ Farawɔn mu wɛ? Jɔgɔ nɛ di ɲɛ nɛ wu já Izirayɛli nagoo pu yeege Misira fiige ki ni wɛ?» 12 A Kilɛ di jo: «Nɛ na bye ni ma ni, ɲaha shɛshɛɛrɛ temu tʼa li shɛɛ na nɛ wʼa ma tun ge, tee ɲɛ: Ma ba Izirayɛli nagoo pu ɲaha co na foro Misira ni, ke faaboboŋɔ ke ninuŋɔ na yʼa da ba saraya wolo na mu.» 13 A Musa di Kilɛ ɲɔ shɔ na: «Nɛ bu shɛ Izirayɛli nagoo pu yíri na pu pye: ‹Yi sefɛlɛɛ pu wo Kilɛ wu wʼa nɛ tun yi mu.› Pu bu na yege na dii wu mɛgɛ di ɲɛ wɛ do? Di yekɛ jo pu mu wɛ?»* 14 A Kilɛ di Musa pye: «Nɛ ɲɛ wemu wu ɲɛ ge. Mʼa yi jo Izirayɛli nagoo pu mu na wemu mɛgɛ ki ɲɛ na: ‹Nɛ ɲɛ ge,› na wee wʼa mu tun pu mu.»* 15 A wu Musa pye sanha: «Yi jo Izirayɛli nagoo pu mu, na Tɛhɛnɛ Baa Kilɛ, pu sefɛlɛɛ pu wo Kilɛ we, Ibirayima wo Kilɛ we, Ishaaga wo Kilɛ we, Yakuba wo Kilɛ we, wee wʼa mu tun pu mu. Kee ki ɲɛ nɛ mɛgɛ tuun bɛɛri ni. Piimu bɛɛri pu ɲɛ yi kadugo yaseye ge, pee bɛɛri na ba nɛ yiri mu.
16 «Ayiwa nimɛ, shɛ Izirayɛli nagoo pu nɔhɔlɛɛ pu pinnɛ mʼa pu pye na Tɛhɛnɛ Baa Kilɛ, pu sefɛlɛɛ pu wo Kilɛ we, Ibirayima wo Kilɛ we, Ishaaga wo Kilɛ we, Yakuba wo Kilɛ we, na wee ya wuyɛ shɛ mu na, na jo na wee ya pa foro pu na, lemu lʼa byi pu na Misira ni ge, na wee ɲii wa li ni. 17 Lee wuu na, wʼa jo na wee na pu yeege Misira fiige ki kanhama pu ni, wu shɛ ni pu ni Kana shɛɛn, ni Xhɛti shi shɛɛn, ni Amɔri shi shɛɛn, ni Ferɛzi shi shɛɛn, ni Xhɛvi shi shɛɛn, ni Zhebusi shɛɛn wo fiige ki ni, kee kemu kʼa ɲi nujirimɛ ni sɛrɛd na fo yi na fúu ge.
18 «Nɔhɔlɛɛ pu na ba sɔɔ ma jomɔ pu na. Mʼa shɛ ni pu ni Misira shɛɛn saan wu mu. Yʼi shɛ wu pye na: ‹Tɛhɛnɛ Baa Kilɛ, Heburuu pu wo Kilɛ we, wʼa wuyɛ shɛ wèe na. Wù yaha wù shɛ cabyaa taanri ɲara pye sipoŋɔ ki ni, Wù shɛ saraya wolo Tɛhɛnɛ Baa Kilɛ, wù Kilɛ wu mu.› 19 Ga nɛ kunni ya li cɛ jo fanha keŋɛ ka shishiin wa da ga Misira shɛɛn saan wu pye wu sɔɔ yee pu shɛ wɛ, fo nɛ wogo ki yɛ. 20 Nɛ na ba pu kpɔn ni na fanha keŋɛ ki ni, di kakanhaŋaa pye Misira ni, di kanhama tuugo bɛɛri shan pu ɲuŋɔ ni. Lee bu bye, wu na yi yaha yʼa gaaŋi. 21 Nɛ na ba we shi we tɔn taan Misira shɛɛn pu mu. Wu kewaya wo da ba gari wu kariduun ni wɛ. 22 Izirayɛli nagoo pu wo cee wa bɛɛri na ba wu Misira shɛn ceɲii ni wu tiinɲii pye na wu warifyɛn ni sanni yaŋmuyɔ kan wee mu, ni fàya nizaaya. Yi na ba yee leni yi jalaa pee ni yi pushaa pu na. Mu yʼa da ba Misira shɛɛn pu keŋɛ yaŋmuyɔ yi lɔ na kari, na pu kewaya wuu yaha.*»