Ɛkizode 4

Kilɛ ya ɲaha shɛshɛɛrɛ shuun shɛ Musa na

Ayiwa, a Musa di Kafɔɔ ɲɔ shɔ na: «Izirayɛli nagoo pu wa da zhɛ dà nɛ na wɛ. Pu wa da zhɛ na jomɔ pu logo wɛ. Pʼa nugo jo sanha bɛ na Tɛhɛnɛ Baa Kilɛ yafiin bɛ ya ta nɛ tun wɛ.» 2 A Tɛhɛnɛ Baa Kilɛ di Musa yege na: «Ɲaha ki wa mu keŋɛ ki ni mɛ wɛ?» A Musa di jo: «Pubiin.» 3 A wu jo: «Li wá ɲiŋɛ ki na.» A Musa di li wá ɲiŋɛ ki na, a lʼi ɲɛri pye wɔ. A Musa di laraga kɔn wu na. 4 A Tɛhɛnɛ Baa Kilɛ di Musa pye: «Fulo wu na mʼa ma keŋɛ ki yeege mʼa wu co wu naŋa ki na.» A Musa di fulo wɔ wu na na wu keŋɛ ki yeege na wu co wu naŋa ki na. A wɔ wu guri ɲɛri pye pubiin wu keŋɛ ni. 5 A Tɛhɛnɛ Baa Kilɛ di jo: «Shɛ le ninunɔ pye shɛ Izirayɛli nagoo pu na, kɔnhɔ pʼi dà li na na Tɛhɛnɛ Baa Kilɛ, pu sefɛlɛɛ Ibirayima ni Ishaaga ni Yakuba wo Kilɛ wuyɛ pyaa kʼa wuyɛ shɛ ma na.»

6 A Tɛhɛnɛ Baa Kilɛ di wu pye sanha: «Ma keŋɛ ki le ma fadeŋɛ ki nɔhɔ ni (mʼa ki taha ma dodoŋɔ ki na.)» A Musa di wu keŋɛ ki taha, na ki laha. A ceesɛɛgɛ yama niguumɔ pa di ki co, na ki wogori. 7 A Tɛhɛnɛ Baa Kilɛ di jo: «Ma keŋɛ ki le sanha ma fadeŋɛ ki nɔhɔ ni.» A Musa di wu keŋɛ ki le sanha wu fadeŋɛ ki nɔhɔ ni. Ba wʼa pa ki wolo wɛ, na ki ta ba kʼa bi sii wɛ.

8 A Tɛhɛnɛ Baa Kilɛ di jo na: «Ayiwa, pu bye pʼi ya shɛ dà ma na ɲaha shɛshɛɛrɛ nizhiire ti na wɛ, pu na dà ma na shuun wuuro ti na. 9 Ga lee bɛ na, te ɲaha shɛshɛɛrɛ tɛhɛɛ shuun we bɛ bye wu ya pu pye pʼa dà ma na wɛ, pu bye pʼi ya ma ɲɔmɛɛ co wɛ, mʼa gba lɔhɔ ka ko gba wu ni ma wo ɲiŋɛ ki na. Kee lɔhɔ ke na ba ɲɛri shishan ɲiŋɛ ki na.» 10 A Musa di Tɛhɛnɛ Baa Kilɛ pye: «Ee! Kafɔɔ, nɛ ɲɔ ya taan jomɔ na wɛ dɛ! Lee di wa ɲɔ kɔn kicaŋa wɛ, lʼi wa ɲɔ kɔn taɲaa wɛ, lʼi wa nago kanna nimɛ lʼa ɲɔ kɔn ma joduun wu ni ni ma bulona wu ni wɛ. Nɛ ɲɔ kʼa dugo, na ɲile bɛ dʼa pɔ.» 11 A Tɛhɛnɛ Baa Kilɛ di jo na: «Jɔgɔ wʼa ɲɔ kan sipya mu wɛ? Jɔgɔ wʼa sipya pyi bobo, ɲudunnɔ kelee ɲɛɲaa fɔɔ kelee fyɛn wɛ? Ta nɛ Tɛhɛnɛ Baa Kilɛ bɛ wɛ! 12 Zhɛ wʼa mu lɔ, nɛ na ba ma ɲɔ ki taan, di ma taanni ma nijoyo ni.» 13 A Musa di jo: «A! Kafɔɔ, ɲɔ mayɛ na mʼa watii tun.» 14 A Tɛhɛnɛ Baa Kilɛ luu di yìri Musa tàan, a wu jo: «Ta ma ɲahafɔɔ Arɔn Levi wo tirige shɛn wu wa wɛ? Nɛ li cɛ jo wee ɲɔ ya taan jomɔ na. Wee yɛrɛ ya gbegele di ba ma ɲuŋɔ círi. Wu ba ma ɲa, lee na daan wu ni fo xuuni. 15 Ma na ba yu ni wee ni, ma na ba wu nijoyo le wu ɲɔ ni. Nɛ wi ge, nɛ na ba ma ɲɔ ki tɛgɛ, di wu bɛ wo ɲɔ ki tɛgɛ. Yi na ba lemu pye ge, nɛ na ba yi taanni lee ni. 16 Wee na ba yu ni sipyii pu ni ma tɛgɛ. Wee na ba bye ma ɲɔ, mʼa bye wu ɲaha tàan ba Kilɛ ɲɛ wɛ. 17 Le pubiin le li ge, lee co ma keŋɛ ni, lee ni ma da ba ɲaha shɛshɛɛrɛ ti pyi.»

18 Wee tuun wu ni a Musa di yìri, na guri kari wu yafɛna wu yíri na shɛ wu pye: «Nʼa ma ɲɛri, na yaha di shɛ na cebooloo pu yíri Misira fiige ki ni, di shɛ pu wii pu bi ɲɛ ɲiifɛɛrɛ ni sanha.» A Zhetoro di Musa pye: «Kilɛ wu pa ma naha, wu ba nɔ ni ma ni ɲaɲiŋɛ na.» 19 Na Musa yaha Majan ni sanha, a Tɛhɛnɛ Baa Kilɛ di wu pye: «Kuri shɛ Misira ni, bani sipyii piimu pu bi giin di ma gbo ge, pee bɛɛri ya xu xɔ.» 20 A Musa di wu shɔ we ni wu jalaa pu durogo kafaŋa na, na koo lɔ na gaaŋi Misira ni. Kilɛ bi pubiin lemu kaa jo wu mu ge, a wu gari ni lee bɛ ni wu keŋɛ ni. 21 Ayiwa, a Tɛhɛnɛ Baa Kilɛ di Musa pye: «Ma ba shɛ nɔ Misira ni, kakanhaŋaa kiimu wo bye sefɛɛrɛ nɛ kan ma mu ge, mʼa kee bɛɛri pye Farawɔn ɲii na. Ga nɛ kunni na ba wu nige waha, wʼa bye wu da zɔɔ wu pii sipyii pii yaha pʼa gaaŋi wɛ. 22 Mʼa shɛ Farawɔn pye na Tɛhɛnɛ Baa Kilɛ ya jo na: ‹Nɛ ja wu ɲɛ Izirayɛli, na jashiimɛ wu ɲɛ wii. 23 Nɛ mu pye jo mu wu na ja wu yaha wu shɛ kapyeŋɛɛ pye na mu, ga a mʼi li she. Lee wuu na nʼa da ba muyɛ pyaa ki wo jashiimɛ wu gbo.› »

24 Ayiwa, na Musa yaha koo li na, a pʼi ba shɛ digi xuu wa ni na pʼi shɔn wà. Na pu yaha wee xuu wu ni, a Tɛhɛnɛ Baa Kilɛ di ganha na zhaa di Musa gbo. 25 Wee tuun wu ni a Sefora di faaga ka lɔ kemu ɲɔ ya taan ge, na wu ja wu teŋɛ tige tàan, na lee cekɔɔnrɔ li pye lʼa kpɔn Musa tɔɔyɔ na, na jo: «Tɔn wo poo mu ɲɛ nɛ mu.» 26 Ba lee ya pye wɛ, a Tɛhɛnɛ Baa Kilɛ di Musa yaha wà. Cekɔɔnrɔ ti wuu na Sefora ya jo na: «Tɔn wo poo».

27 Ayiwa, a Tɛhɛnɛ Baa Kilɛ di Arɔn pye: «Shɛ Musa ɲuŋɔ círi sipoŋɔ ki ni.» A Arɔn di yìri na shɛ wu ɲuŋɔ círi Kilɛ wo faabobonagaŋa ki na, na ɲɔsɔɔnrɔ fò kan wu mu. 28 Tɛhɛnɛ Baa Kilɛ ya Musa tun ni jomɔ pemu ni, na ɲaha shɛshɛɛrɛ temu kaa jo wu mu ge, a wu yee bɛɛri jo Arɔn mu. 29 A Musa ni Arɔn di gari Misira ni, na shɛ Izirayɛli nɔhɔlɛɛ pu bɛɛri yiri pinnɛ. 30 Tɛhɛnɛ Baa Kilɛ ya jomɔ pemu jo Musa mu ge, a Arɔn di yee bɛɛri paari, na ɲaha shɛshɛɛrɛ ti bɛ pye sipyii pu ɲii na. 31 A pʼi dà wu na. Pʼa yi logo na Tɛhɛnɛ Baa Kilɛ wʼa pa foro Izirayɛli nagoo pu na, na ɲii taha pu ɲaa keree ki na ge, a pʼi nuguro sin na Kilɛ pɛlɛ.