Musa ni Arɔn ya kari Farawɔn yíri
5
Lee kadugo na, a Musa ni Arɔn di nɔ Farawɔn na, na wu pye: «Tɛhɛnɛ Baa Kilɛ, Izirayɛli wo Kilɛ wʼa jo: ‹Na sipyii pu yaha pʼi shɛ kalenɛ li pye na mu sipoŋɔ ki ni.›» 2 A Farawɔn di jo: «Jɔgɔ wu ɲɛ wee Tɛhɛnɛ Baa Kilɛ we, fo nɛ wu wee ɲɔmɛɛ co di Izirayɛli nagoo pu yaha di gari wɛ? Nɛ wee Tɛhɛnɛ Baa Kilɛ wu cɛ wɛ. Nʼa da Izirayɛli bɛ yaha zhɛ wɛ.» 3 A Musa ni Arɔn di jo: «Heburuu Kilɛ wʼa wuyɛ shɛ wèe na. Wù yaha wù shɛ cabyaa taanri ɲara pye sipoŋɔ ki ni, wù shɛ saraya wolo Tɛhɛnɛ Baa Kilɛ, wù Kilɛ wu mu, kɔnhɔ wu ganha da wù kpɔn ni kafɛɛgɛ yama kelee ŋmɔpara ni wɛ.» 4 A Misira fiige ki saan wu jo: «Musa, mu ni Arɔn ni, ɲaha na yee di sipyii pu ɲaha kɔɔn pu labye wu na wɛ? Yi kuri shɛ yi labye wu fɛni.» 5 A wu jo sanha na: «Pati! Sipyii pu ma ɲɛhɛ nimɛ fiige ki ni, yee di wa pu labye wu shaa di yereŋɛ.» 6 Kee caŋa kiyɛ pyaa a Farawɔn di yi jo labye wu ɲuŋɔfɛɛ ni Izirayɛli wo kapyebyii pu ɲahagbaa fɛɛ pu mu na: 7 «Yee pu bi alikama sigiye yi shaa na gaan Izirayɛli nagoo pu mu pu na dufaan wu shaan, yi ganha ba yi shaa nige wɛ. Puyɛ pyaa kʼa da se da yi shaa puyɛ ni nimɛ. 8 Ga lee bɛ na, dufaan ɲɔ ke pʼa tee na zhaan ge, pu da kee ninuŋɔ shaan. Yafiin ganha bu fɔ kee ni wɛ, bani saafɛɛ pu ɲɛ pii, lee lʼa pu pye pu na yu na saraya pee da zhɛ wolo pu Kilɛ mu. 9 Yi labye wu taga pu keye ɲi fo yi pu cɔnri, kɔnhɔ pʼi gori yaha labye wu na. Lee bu bye pʼa da ɲuwegee tagi nige kafinɛyɛ yíri wɛ.»10 Wee tuun wu ni a labye wu ɲuŋɔfɛɛ pee ni Izirayɛli wo kapyebyii pu ɲahagbaa fɛɛ pʼi shɛ sipyii pu pye na: «Farawɔn ya jo na wee da da alikama sigiye yi kaan nige yee mu wɛ. 11 Na xuu wemu bɛɛri ni yʼa da da yi taa ge, na yiyɛ pyaa kʼa se yʼa yi shaa wà, na ga lee bɛ di wa da la wolo labye wu ni wɛ.» 12 Ayiwa, a sipyiire tʼi jaaga Misira fiige ki bɛɛri ni na ɲawaara shaa na gori alikama sigiye yi tɛgɛ. 13 A labye wu ɲuŋɔfɛɛ pʼi sipyiire ti fɔri labye wu fɛni na yu: «Ɲawaara ti bi gaan yee mu yʼi dufaan ɲɔ kemu shaan ge, kee ɲɔnuŋɔ ke yʼa da zhaan.» 14 Pu bi Izirayɛli wo kapyebyii pu ɲahagbaa fɛɛ pu kpɔɔn bɛ, pee piimu pʼa bi teŋɛ pusamaa ɲuŋɔ ni ge. A pʼi ganha na pu pyi: «Ɲaha kʼa li pye yee ya ta ɲɔlɛgɛ ki ta taɲaa ni niɲaa ba yee ya tee na li pyi-i wɛ?»
15 Ayiwa, a Izirayɛli nagoo pu wo kapyebyii pu ɲahagbaa fɛɛ pʼi shɛ pu fiin paari Farawɔn mu na: «Ɲaha na mʼa ma buloo pu pyi le pyegana le na wɛ? 16 Pu ya alikama sigiye yi kaan nige ma buloo pu mu wɛ, lee bɛ na pu di yu sanha na fo wèe pʼa dufaan wu shaan. Pu kunni wa ma buloo pu kpɔɔn bɛ, na ta jaagi wʼi ɲɛ mu wo sipyii puyɛ pyaa na.» 17 A Farawɔn di pu ɲɔ shɔ na: «Dozaya yee ɲɛ, dozatiiye. Lee lʼa yee pye yee ya jo na saraya yee da zhɛ wolo Tɛhɛnɛ Baa Kilɛ mu. 18 Yi toro tii labye wu na nimɛ! Alikama sigiye da gan nige yee mu wɛ, ga ɲɔ kemu yee ya tee na zhaan ge, yʼi nɔhɔ yʼa kee bɛ shaan.»
19 A Izirayɛli nagoo pu wo kapyebyii pu ɲahagbaa fɛɛ pʼi li cɛ na la lʼa fara pu kanhama pu na, bani pʼa pu pye na dufaan ɲɔ kemu kʼa zhaa pu mu caŋa ɲii ni ge, na yaaga bɛ da voro kee ni wɛ. 20 Pu nivorowuu Farawɔn puga ki ni, a pʼi saha ni Musa ni Arɔn ni, pee na yere na pu sigee. 21 A kapyebyii pu ɲahagbaa fɛɛ pʼi pu pye na: «Yee ya wèe tɔn pɛn Farawɔn ni wu fanha ki sipyii pu mu. Ŋmɔpara yee ya le pu keŋɛ ni pu da wèe gbuu. Tɛhɛnɛ Baa Kilɛ wu yee wii wu jaagi kanhama shan yi na.»
22 Wee tuun wu ni a Musa di gari na jo ni Tɛhɛnɛ Baa Kilɛ ni na: «Kafɔɔ, ɲaha na mʼa pii sipyii pii kanha mɛ wɛ? Ɲaha na mʼa na pye nʼa pa naha wɛ? 23 Ba nɛ sii shɛ Farawɔn mu, na jo ni wu ni mu mɛgɛ na wɛ, a wu pii sipyii pii cogana kolo. A mu bɛ di bye mu ya ta ma sipyii pu shɔ wu na wɛ.»