Kilɛ na ba Izirayɛli nagoo pu shɔ
6
A Tɛhɛnɛ Baa Kilɛ di Musa pye: «Lemu nʼa da ba bye Farawɔn na ge, nimɛ ma da ba lee ɲa. Nɛ wo fanha keŋɛ kʼa da ba wu pye wʼa Izirayɛli nagoo pu yaha kari. Nɛ wo fanha keŋɛ kʼa da ba wu pye wʼa pu kɔri yeege wu wo fiige ki ni.» 2 A Kilɛ di nugo Musa pye sanha na: «Nɛ wu ɲɛ Tɛhɛnɛ Baa Kilɛ we. 3 Nɛ nayɛ shɛ Ibirayima ni Ishaaga ni Yakuba na, jo nɛ wu ɲɛ Se Bɛɛri Fɔɔ Kilɛa we. Ga nɛ mɛgɛ kemu ki ɲɛ na Tɛhɛnɛ Baa Kilɛ ge, nɛ ta kee shɛ pu na na mɛgɛ wɛ. 4 Nɛ kariɲɛɛgɛ leŋɛ ni pu ni, na ɲɔmɛɛ lɔ pu mu jo nɛ na ba Kana fiige ki kan pu mu, kee kemu ni pʼa nadadɛɛnrɛ pye toro ge. 5 Shiinnɛ lemu na Izirayɛli nagoo pu wa bulooro ti ni Misira shɛɛn pu keŋɛ ni ge, nɛ lee logo nimɛ, na na funŋɔ yaha nidogo na ɲɔmɛɛ li na. 6 Lee wuu na shɛ yi jo Izirayɛli nagoo pu mu na: ‹Nɛ wu ɲɛ Tɛhɛnɛ Baa Kilɛ we! Nɛ na ba yi yeege kii fanha kapyeŋɛɛ kii ni. Misira shɛɛn pʼa yi le bulooro temu ni ge, nɛ na ba yi yeege tee ni. Nɛ na ba yi ɲuŋɔ wolo ni sefɛɛrɛ nigbɔɔrɔ ni, na kiiri nigbɔ shan Misira shɛɛn pu ɲuŋɔ ni. 7 Nɛ na ba yi pye na sipyii, nɛ ma bye yi Kilɛ. Lee funŋɔ ni yi da ba li cɛ na nɛ wu ɲɛ Tɛhɛnɛ Baa Kilɛ yi wo Kilɛ we, wee wemu wʼa da yi shɔ Misira shɛɛn wo fanha kapyeŋɛɛ ki na ge. 8 Nɛ kàa jo nɛ na ba fiige kemu kan Ibirayima, ni Ishaaga, ni Yakuba mu ge, nɛ na ba yi ɲaha co zhɛ kee fiige ki ni, na ki kan yi mu, kʼi bye yi wogo. Nɛ Tɛhɛnɛ Baa Kilɛ wʼa jo mu.› »9 Ayiwa, a Musa di shɛ pee jomɔ pu jo Izirayɛli nagoo pu mu. Ga bulooro temu ni pu bye ge, tee wo kapyegee niwagaa ki wo ɲatanhaŋa keŋɛ ni, pu ya Musa jomɔ pu logo wɛ.
10 A Tɛhɛnɛ Baa Kilɛ di Musa pye na: 11 «Shɛ yi jo Farawɔn mu, Misira fiige ki saan we, na wu Izirayɛli nagoo pu yaha pʼi foro wu fiige ki ni.» 12 Ga, a Musa di Tɛhɛnɛ Baa Kilɛ pye: «Ali piimu pu ɲɛ Izirayɛli nagoo pu ge, pee ya nɛ jomɔ pu logo wɛ, ɲaha na shɛ Farawɔn pye wu nɛ jomɔ logo wɛ, nɛ wemu wu ɲɛ jomɔ ya faha nɛ mu-i ge?»
13 Ayiwa, a Tɛhɛnɛ Baa Kilɛ di jo ni Musa ni Arɔn ni sanha Izirayɛli nagoo pee ni Farawɔn keree na, Misira saan we, kɔnhɔ Izirayɛli nagoo pʼi foro Misira fiige ki ni.
Musa ni Arɔn nɔhɔ tayirige
14 Ayiwa, Izirayɛli nagoo pu wo kpɔnhɔɔ fɛɛ pu mɛyɛ yi ye: Urubɛn, Izirayɛli wo jashiimɛ we, wee wo jalaa mɛyɛ yi wa ye: Henɔki, ni Palu, ni Ɛsirɔmu ni Karimi. Kii kpɔnhɔɔ kii kʼa pye Urubɛn wo gbawege ki wo kpɔnhɔɔ kee.
15 Simiɲɔ wo jalaa pu ɲɛ: Yemuwɛli, ni Yamini, ni Owadi, ni Yakini, ni Zowari, ni Sɔli, wee wo nu wu bye Kana shɛn cee. Kii kpɔnhɔɔ kii kʼa pye Simiɲɔ wo gbawege ki wo kpɔnhɔɔ kee.
16 Levi wo jalaa pee ni pu wo tirige shɛɛn pu mɛyɛ yi ɲɛ: Gɛrɛshɔn ni Kexhati, ni Marari. Levi wo shi wu caŋa ɲii lʼa pye yee xhuu nigin ni kɛlɛɛ taanri ni gbarashuun (137).* 17 Gɛrɛshɔn wo jalaa pu ɲɛ: Libini, ni Shimeyi, ni pu kpɔnhɔɔ. 18 Kexhati wo nagoo pu ɲɛ: Amuramu ni Zhizari ni Eburɔn ni Uziyɛli. Kexhati wo shi wu caŋa ɲii lʼa pye yee xhuu nigin ni kɛlɛɛ taanri ni taanri (133). 19 Marari wo jalaa pu ɲɛ: Makili ni Mushi. Kii kpɔnhɔɔ kii kʼa pye Levi wo gbawege ki wo kpɔnhɔɔ kee, pu ni pu tirige shɛɛn pu ni.
20 Ayiwa, a Amuramu di Zhokebɛdi leŋɛ wu shɔ, wee ya pye wu to wu wo cuun. A wee di funaŋaa shuun se wu mu. Arɔn ni Musa. Amuramu wo shi wu caŋa ɲii lʼa pye yee xhuu nigin ni kɛlɛɛ taanri ni gbarashuun (137). 21 Zhizari wo jalaa pu ɲɛ: Kore ni Nefɛgi ni Zikiri. 22 Uziyɛli wo jalaa pu ɲɛ: Mishayɛli, ni Elizafan, ni Sitiri.
23 A Arɔn di Elisheba leŋɛ wu shɔ, wee bye Aminadabu wo poro, na ɲɛ Nasɔn wo ceboroshɔ. A wee di Nadabu ni Abiyu, ni Eleyazari ni Itamari se wu mu.
24 Kore wo jalaa pu ɲɛ: Asiri, ni Ɛlikana, ni Abiyasafu. Kee kpɔnhɔɔ ki kʼa pye Kore wo kpɔnhɔɔ kee.
25 A Arɔn ja Eleyazari di Putiyɛli wo poro wa leŋɛ, a wee di funana se, na li mɛgɛ le na Finiyasi.
Pee pʼa pye Levi wo shi wu wo ɲuŋɔfɛɛ pee na saha ni pu kpɔnhɔɔ ki ni.
26 Ayiwa, wee Arɔn we ni wee Musa we Tɛhɛnɛ Baa Kilɛ ya pye: «Yi Izirayɛli nagoo pu yeege Misira fiige ki ni, na pu tahala tahala puyɛ na kagɛrɛyɛ kagɛrɛyɛ ba kashɛn keŋɛ ɲɛ wɛ.» 27 Wee Arɔn we ni wee Musa wu wa shɛ jo ni Farawɔn ni, Misira fiige ki saan we, na wu Izirayɛli nagoo pu yaha pʼi foro Misira fiige ki ni.
Kilɛ ya fanha nigbɔhɔ kan Musa mu
28 Ayiwa, Tɛhɛnɛ Baa Kilɛ bi ye jo ni Musa ni na wu yaha Misira fiige ki ni na: 29 «Nɛ wu ɲɛ Tɛhɛnɛ Baa Kilɛ we. Yemu nʼa yu ma mu ge, yee bɛɛri jo Misira fiige ki saan Farawɔn mu.» 30 Ga a Musa di Tɛhɛnɛ Baa Kilɛ pye na: «Nɛ ɲɔ ya tàan jomɔ na wɛ, ta Farawɔn na zɔɔ wu nɛ jomɔ logo ya?»