7
Ayiwa, a Tɛhɛnɛ Baa Kilɛ di Musa pye na: «Li wii, nʼa da fanha kan ma mu mʼa shɛ yere Farawɔn ɲaha tàan ba Kilɛ ɲɛ wɛ. Ma ɲahafɔɔ Arɔn na ba bye ma ɲɔ. 2 Tuduro temu nʼa da ba jo ma mu ge, mʼa tee bɛɛri jo. Ma ɲahafɔɔ Arɔn na ba jo ni Farawɔn ni na wu Izirayɛli nagoo pu yaha pʼi foro wu fiige ki ni. 3 Ga nʼa da ba Farawɔn ɲuwii waha, kɔnhɔ di na sefɛɛrɛ ti shɛ ni ɲaha shɛshɛɛrɛ ni kakanhaŋaa niɲɛhɛŋɛɛ ni Misira fiige ki ni. 4 Ga lee bɛ na Farawɔn da ba ɲuwegee shan ni yee kafila wu ni wɛ. Lee funŋɔ ni, nɛ ma na keŋɛ ki yirige Misira fiige ki fɛni, na na sipyii pee, Izirayɛli nagoo pu yeege yeegegazaana na ba kashɛn keŋɛ ɲɛ wɛ, na jaagi kanhama nigbɔ shan Misira fiige ki ɲuŋɔ ni. 5 Nɛ ba na keŋɛ ki yirige Misira fɛni tuun wemu ni, na Izirayɛli nagoo pu yeege pu niŋɛ ni, wee tuun wu ni Misira shɛɛn na ba li cɛ na nɛ wu ɲɛ Tɛhɛnɛ Baa Kilɛ we.»6 A Musa ni Arɔn di shɛ tee tuduro ti pye cibɛ ba Tɛhɛnɛ Baa Kilɛ ya yi jo pu mu wɛ. 7 Musa ni Arɔn ya jo ni Farawɔn ni tuun wemu ni ge, Musa yee ya bye yee kɛlɛɛ gbarataanri (80). Arɔn yee ya bye yee kɛlɛɛ gbarataanri ni taanri (83).
Farawɔn ya she Musa ni Arɔn wo nijoyo yi ni
8 A Tɛhɛnɛ Baa Kilɛ di Musa ni Arɔn pye: 9 «Farawɔn bu yi pye na yi ɲaha shɛshɛɛrɛ ta shɛ, mʼa Arɔn pye na wu wu pubiin li shan ɲiŋɛ ki na Farawɔn ɲahagbaa na. Li na ɲɛri wɔ.» 10 A Musa ni Arɔn di gari Farawɔn yíri. Tɛhɛnɛ Baa Kilɛ ya yemu jo pu mu ge, a pʼi yee pye. A Arɔn di wu pubiin li wá ɲiŋɛ na Farawɔn ni wu fanha ki sipyii pu ɲii na, a lʼi ɲɛri wɔ. 11 Ga a Farawɔn bɛ di wu wo fungɔngɔ fɛɛ ni wu wo cɛmɛ fɛɛ pu yiri. A pu bɛ di pu wo cɛmɛ pu taga lee ɲɔhɔ pye. 12 A wa bɛɛri di wu pubiin wá ɲiŋɛ ki na. A kee pubegee ki bɛɛri di ɲɛri pye wɔlɔɔ. Ga a Arɔn wo pubiin lʼi pu wo pubegee ki lɔ jɔ. 13 Lee bɛ na a Farawɔn di ɲuwii waha, wu ya ta Musa ni Arɔn wo jomɔ pu sha logomɔ wɛ. Lee ya pye na bɛ ni Tɛhɛnɛ Baa Kilɛ wo nijoyo yi ni.
Kawaa nizhiinɛ le: Lɔhɔ kʼa ɲɛri shishan
14 Wee tuun wu ni a Tɛhɛnɛ Baa Kilɛ di Musa pye na: «Farawɔn nige kʼa waha, wu ya ta sɔɔ na sipyii pu yaha kari wɛ. 15 Shɛ wu mu ɲiga ɲisɔɔgbɔhɔ na, wu ba gaaŋi tuun wemu ni gba wu ɲɔ ki na, mʼa wu ɲuŋɔ círi, pubiin lemu lʼa ɲɛri wɔ wu ge, mʼa lee co ma keŋɛ ni. 16 Mʼa wu pye na: ‹Tɛhɛnɛ Baa Kilɛ we, Heburuu wo Kilɛ we, wee wʼa nɛ tun nɛ wu pa ma pye: “Na sipyii pu yaha pʼi shɛ saraya wolo na mu sipoŋɔ ki ni.” Ga fo nimɛ mu sanha sɔɔ na nɛ wo nijoyo yi logo wɛ. 17 Ayiwa Tɛhɛnɛ Baa Kilɛ ya jo na pubiin le li wa nɛ keŋɛ ni ge, na nɛ wu lee taga gba lɔhɔ ki kpɔn, na ki na ɲɛri shishan. Na lee na mʼa da ba li cɛ na wee ɲɛ Tɛhɛnɛ Baa Kilɛ. 18 Gba wu fyaa pu na ba xhu, gba lɔhɔ ki na fɔnhɔ fo Misira shɛɛn na bye pu ya já ki gba nige wɛ.› »
19 A Tɛhɛnɛ Baa Kilɛ di Musa pye sanha na: «Yi jo Arɔn mu na wu wu pubiin li yirige Misira lɔhɔyɔ yi ɲuɲɔ na, pu gbalaa ni pu duyo ni pu canya ni pu lowegeye yi bɛɛri ɲuyɔ ni. Yee lɔhɔyɔ yi bɛɛri na ba ɲɛri shishan. Misira fiige ki bɛɛri na ba bye shishan. Lɔhɔyɔ yemu yi ɲɛ ali tiye wo pɛyɛ ye ni faaya wo pɛyɛ yi funŋɔ ni ge, yee bɛɛri na ba ɲɛri shishan.» 20 Tɛhɛnɛ Baa Kilɛ ya yemu jo Musa ni Arɔn mu ge, a pʼi lee pye. A Arɔn di pubiin li yirige, na li taga gba lɔhɔ ki kpɔn Farawɔn ni wu fanha ki sipyii pu ɲii na. A gba lɔhɔ ki bɛɛri di ɲɛri shishan. 21 A gba wu fyaa pu bɛɛri di xhu, a wu lɔhɔ kʼi fɔnhɔ. A Misira shɛɛn pʼi bye pu ya já gba wu lɔhɔ ki gba nige wɛ. A Misira fiige ki bɛɛri di bye shishan. 22 Ga a Misira cɛmɛ fɛɛ pu bɛ di li shi pye ni pu wo cɛmɛ pu ni. A Farawɔn di wu ɲuwii waha, wu ya ta sɔɔ na Musa ni Arɔn jomɔ pu logo wɛ. Lee ya pye ba Tɛhɛnɛ Baa Kilɛ ya bi yi jo wɛ. 23 A Farawɔn di kadugo le na se puga, wu ya ta lee bɛ wii yaaga wɛ. 24 A Misira shɛɛn pu bɛɛri di wegeye tugi gba wu ɲɔ ki na na logbaga shaa, bani gba wu lɔhɔ ki bi já gba wɛ. 25 Tɛhɛnɛ Baa Kilɛ ya lɔhɔ ki kpɔn mu ge, a pʼi cabyaa gbarashuun pye lee ni.
Kawaa shuun wuu le: Jasɔn ziraya ya fiige ki ɲi
26 Lee kadugo na a Tɛhɛnɛ Baa Kilɛ di Musa pye: «Shɛ Farawɔn mu mʼa shɛ wu pye: ‹Na sipyii pu yaha pʼi shɛ labye pye na mu. 27 Ma bye ma di ya pu yaha wɛ, nʼa da ba jasɔn ziraya pye yʼa foro, na ma fiige ki bɛɛri ɲi. 28 Jasɔn ziraya yi na ba ɲɛhɛ gba lɔhɔ ki ni fo na doro. Yi na ba foro gba lɔhɔ ki ni, na ba jé ma puga ki ni, na jé ma pushɔngɔ ki ni, na shɛ dugi ma yasinnɛgɛ ki na. Yi na ba jé ma fanha ki sipyii pu piyɛyɛ yi ni, na jé ma fiige ki sipyii pu piyɛyɛ yi ni. Yi na ba jé ma buuri tafɔyɔ yi ni, na jé ma buuri yàa yàa yɛrɛyɛ yi ni. 29 Jasɔn ziraya yi na ba sirani na duri ma na, na sirani na duri ma sipyii pu na, na sirani na duri ma fanha ki sipyii pu na.› »