Ɛkizode 8

A Tɛhɛnɛ Baa Kilɛ di nugo Musa pye sanha na: «Yi jo Arɔn mu na wu wu pubiin li lɔ wu li yaaŋa gba lɔhɔyɔ ye ni duyo ye ni canya yi shizhaa na, jasɔn ziraya di foro, yʼi Misira fiige ki ɲi.» 2 A Arɔn di wu keŋɛ ki yaaŋa Misira fiige ki lɔhɔyɔ yi bɛɛri shizhaa na, a jasɔn ziraya di foro na Misira fiige ki ɲi. 3 Ga a Misira cɛmɛ fɛɛ pu bɛ di lee ɲɔhɔ pye ni pu wo cɛmɛ pu ni. A pu bɛ di jasɔn ziraya pye yʼa foro Misira fiige ki ni. 4 A Farawɔn di Musa ni Arɔn yiri, na pu pye: «Yi Tɛhɛnɛ Baa Kilɛ ɲɛɛri xuuni na wu ye jasɔn ziraya ye laha nɛ ni na sipyii pu na. Nɛ na ba Izirayɛli nagoo pu yaha pʼi shɛ saraya wolo wu mu.» 5 A Musa di Farawɔn pye: «Lee pyeduun wo pɛɛŋɛ ki ɲɛ mu wogo. Di Tɛhɛnɛ Baa Kilɛ ɲɛɛri xuuni mu ni ma fanha ki sipyii ni ma sipyii pusamaa mu tuun wekɛ ni, kɔnhɔ wu jasɔn ziraya yi laha mu ni ma piyɛyɛ yi na wɛ? Yi na ba bye gba lɔhɔ ki yɛ ni.» 6 A Farawɔn di jo: «Ɲiga na.» A Musa di jo: «Yemu mu ya jo ge, lee na bye, kɔnhɔ mʼa li cɛ na Tɛhɛnɛ Baa Kilɛ, wèe wo Kilɛ wu ɲɔhɔ ɲɛ wɛ. 7 Jasɔn ziraya yi na ba laha ma ni ma fanha ki sipyii pee ni ma sipyii pusamaa ɲaha tàan, yi na ba foro ma piyɛyɛ yi ni. Yi na ba bye gba lɔhɔ ki yɛ ni.» 8 Ba Musa ni Arɔn ya foro Farawɔn puga wɛ, a Musa di Tɛhɛnɛ Baa Kilɛ ɲɛɛri xuuni jasɔn ziraya yi wuu na, wʼa yemu taga Farawɔn kanha ge. 9 Musa ya lemu ɲɛɛri ge, a Tɛhɛnɛ Baa Kilɛ di lee pye. A jasɔn ziraya yʼi xhu piyɛyɛ ye ni kaaya ye ni kɛrɛyɛ yi ni. 10 A sipyii pʼi yi kuu na yi pinnɛ pinnɛ, a fiige ki nugo di bɛn. 11 Ba Farawɔn ya lee ɲa lʼa fanha wɛ, na wu ɲuwii waha. Wu ya ta Musa ni Arɔn jomɔ pu sha logomɔ wɛ. Lee ya pye na saha ni Tɛhɛnɛ Baa Kilɛ wo nijoyo yi ni.

Kawaa taanri wuu le: Nupaanra

12 A Tɛhɛnɛ Baa Kilɛ di Musa pye na: «Yi jo Arɔn mu na wu wu pubiin li lɔ, wu ɲiŋɛ ki gbagbaŋa ki kpɔn, na gbagbaŋa ki na ba ɲɛri bye nupaanra Misira fiige ki bɛɛri ni.» 13 A pʼi li pye mu. A Arɔn di wu keŋɛ ki yirige ni pubiin li ni na ɲiŋɛ ki gbagbaŋa ki kpɔn. A kʼi ɲɛri pye nupaanra sipyii ni yapɔrɔyɔ yi fɛni. A Misira fiige ki gbagbaŋa ki bɛɛri di ɲɛri pye nupaanra. 14 A cɛmɛ fɛɛ pʼi ganha na giin pʼi pu wo cɛmɛ pu taga nupaanra ti xɔ, ga pu ya já wɛ. A nupaanra tʼi wo sipyii pee ni yapɔrɔyɔ yi na. 15 A cɛmɛ fɛɛ pʼi Farawɔn pye na: «Kilɛ kabee li ɲɛ le.» Lee bɛ na a Farawɔn di wu ɲuwii waha, wu ya sɔɔ na Musa ni Arɔn yɛ jomɔ pu logo wɛ. Lee ya pye na saha ni Tɛhɛnɛ Baa Kilɛ wo nijoyo yi ni.

Kawaa shishɛɛrɛ wuu le: nukɔnrɔyɔ

16 A Tɛhɛnɛ Baa Kilɛ di Musa pye na: «Pa soo yìri mʼa Farawɔn ɲuŋɔ círi, wu ba fòro da se gba wu ɲɔ ki na tuun wemu ni, mʼa wu pye na: ‹Tɛhɛnɛ Baa Kilɛ ya jo na: “Na sipyii pu yaha pʼi shɛ saraya wolo na mu.” 17 Ma bye ma di ya pu yaha wɛ, nɛ na ba nukɔnrɔyɔ tun mu ni ma fanha ki sipyii pee ni ma sipyii pusamaa mu, yee na ba jé ma piyɛyɛ yi ni. Misira shɛɛn pu piyɛyɛ yi na ba ɲi nukɔnrɔyɔ na, yi na ba ɲiŋɛ ki bɛ tɔ. 18 Ga kee caŋa, nɛ na ba Goshɛni koomɔ pu tanha yee nukɔnrɔyɔ yi na, xuu wemu ni nɛ wo sipyii pʼa tiin ge. Nukɔnrɔgɔ nigin bɛ wa da ba ɲa Goshɛni koomɔ pu ni wɛ, kɔnhɔ mʼa li cɛ na wee xuu wu ni nɛ Tɛhɛnɛ Baa Kilɛ ɲɛ. 19 Nɛ na ba na wo sipyii pu tɛhɛnɛ wolo ma wuu pu ni, na na wuu pu ɲuŋɔ wolo lee kawaa li ni. Ɲiga na lee kakanhana lʼa da ba bye.› » 20 A Tɛhɛnɛ Baa Kilɛ di li pye mu, a nukɔnrɔyɔ niɲɛhɛyɛ di jé Farawɔn ni wu fanha ki sipyii pu piyɛyɛ ye ni Misira fiige ki bɛɛri ni. A nukɔnrɔyɔ yʼi fiige ki bɛɛri kyɛɛgi.

21 Ayiwa, a Farawɔn di Musa ni Arɔn yiri na pu pye: «Yi shɛ saraya yi wolo yi wo Kilɛ wu mu, ga yʼi yi wolo fiige ki ni naha.» 22 A Musa di jo: «Lee da zaha wɛ, bani saraya yemu wèe da ba wolo Tɛhɛnɛ Baa Kilɛ wù wo Kilɛ wu mu ge, yee na ba bye Misira shɛɛn mu yafunyɔ. Wèe di bu Misira shɛɛn wo yafunyɔ wolo pu ɲii na, ta pu da ba wèe wá gbo ni kagereye ni wɛ? 23 Cabyaa taanri ɲara wèe wa da ba bye sipoŋɔ ki ni, wù shɛ saraya wolo Tɛhɛnɛ Baa Kilɛ, wù Kilɛ wu mu, ma na jo ba wʼa yi jo wù mu wɛ.»

24 A Farawɔn di jo: «Ayiwa, nɛ na ba yi yaha yʼi shɛ saraga wolo Tɛhɛnɛ Baa Kilɛ, yi wo Kilɛ wu mu sipoŋɔ ki ni. Ga yi ganha bu lii yɛ wɛ dɛ! Yʼi Kilɛ ɲɛɛri na mu.»

25 A Musa di jo: «Nɛ ba foro naha yɛ, nʼa da Tɛhɛnɛ Baa Kilɛ ɲɛɛri. Wu na ba ye nukɔnrɔyɔ ye laha yi ɲuŋɔ ni ɲiga na, ma ni ma fanha ki sipyii pee, ni ma sipyii pusamaa bɛɛri ni. Ga ma bɛ ganha da wù faanna sanha, mʼa zhe wù yahaŋa na kɔnhɔ wù shɛ saraya wolo Tɛhɛnɛ Baa Kilɛ mu wɛ dɛ!»

26 Ayiwa, Musa ya laha Farawɔn tàan ge, na Tɛhɛnɛ Baa Kilɛ ɲɛɛri. 27 Lemu Musa ya ɲɛɛri ge, a Tɛhɛnɛ Baa Kilɛ di lee pye. A wu nukɔnrɔyɔ yi laha Farawɔn ni wu fanha ki sipyii pee, ni wu sipyii pusamaa bɛɛri na. Nukɔnrɔgɔ nigin bɛ ya kori wà wɛ. 28 Ga a Farawɔn di nige waha sanha, wu ya ta sɔɔ na Izirayɛli nagoo pu yaha pʼa gaaŋi wɛ.