Ɛkizode 9

Kawaa kaguro wuu le: Yatɔɔxhulo

A Tɛhɛnɛ Baa Kilɛ di Musa pye: «Shɛ yi jo Farawɔn mu na: ‹Tɛhɛnɛ Baa Kilɛ we, Heburuu pu wo Kilɛ wʼa jo na: “Na wo sipyii pu yaha pʼi shɛ saraya wolo na mu.” 2 Ma bye ma di ya sɔɔ na pu yaha kari wɛ, ma bu zhe sanha na pu co na yaha naha, 3 ma yatɔɔyɔ yemu bɛɛri yi wa sige ki ni ge, nɛ Tɛhɛnɛ Baa Kilɛ keŋɛ na ba nɔ yi na, na yama niguudiimɛ wá yi na, ma shɔnyɔ ye, ni ma kafaya ye, ni ma ɲɔhɔyɔ ye, ni ma niiye ye ni ma yatɔɔbya we. 4 Tɛhɛnɛ Baa Kilɛ na ba kasɛɛgɛ yaha Izirayɛli nagoo pu wo yatɔɔyɔ yi na na toro Misira shɛɛn woyo yi na. Bani nigin bɛ da ba xhu Izirayɛli nagoo pu wo yatɔɔyɔ yi ni wɛ.› » 5 Lee na ba bye tuun wemu ni ge, Tɛhɛnɛ Baa Kilɛ ya wee tɛhɛnɛ kɔn xɔ. Wʼa jo na: «Ɲiga na nʼa da ba lee pye fiige ki ni.» 6 Ɲimuguro ti na a Tɛhɛnɛ Baa Kilɛ di lee pye, a Misira shɛɛn pu yatɔɔyɔ yi bɛɛri di xhu, ga yafiin bɛ ya Izirayɛli nagoo pu wo yatɔɔgɔ ka ta wɛ. 7 A Farawɔn di sipyii pii yaha na pu yegeŋɛ pye, a lʼi shɛ da na yafiin bɛ ya Izirayɛli nagoo pu wo yatɔɔgɔ ka ta wɛ. Ga lee bɛ na a Farawɔn di ɲuwii waha, wu ya ta sipyii pu yaha wɛ.

Kawaa gbaara wuu le: Nɔɔwaya

8 A Tɛhɛnɛ Baa Kilɛ di Musa ni Arɔn pye: «Yi yi keye ɲi ni kanra shɔɔnrɔ ni. Musa di ti wá fugba wu ni Farawɔn ɲii na. 9 Tee na ba ɲɛri kafunnuŋɔ, na puuro yeege sipyii pee ni yatɔɔyɔ yi na Misira fiige ki kabaya yi bɛɛri na. Tee puuro ti na ba ɲɛri nɔɔwaya. 10 A Musa ni Arɔn di shɛ kanra shɔɔnrɔ kuu, na shɛ ni ti ni Farawɔn yíri. A Musa di ti ɲɛrɛgi ɲɛrɛgi fugba wu ni. A tee di puuro yeege sipyii pee ni yatɔɔyɔ yi na. A tee puuro tʼi ɲɛri nɔɔwaya. 11 A nɔɔwaya yʼi foro cɛmɛ fɛɛ pu bɛ na ba Misira fiige ki sipyii pusamaa bɛɛri ɲɛ wɛ. A pʼi bye pu ya já shɛ yere Musa ɲaha tàan wɛ. 12 Lee bɛ na a Tɛhɛnɛ Baa Kilɛ di Farawɔn ɲuwii waha sanha. Wu ya ta sɔɔ na logo wɛ.» Lee ya pye na saha ni Tɛhɛnɛ Baa Kilɛ wo nijoyo yi ni Musa mu.

Kawaa gbarashuun wuu le: Zanha kagereye

13 A Tɛhɛnɛ Baa Kilɛ di Musa pye: «Pa soo yìri ɲiga na mʼa shɛ Farawɔn yíri mʼa yi jo wu mu na Tɛhɛnɛ Baa Kilɛ we, Heburuu pu wo Kilɛ wʼa jo: ‹Na sipyii pu yaha pʼi shɛ saraya wolo na mu. 14 Le tɔɔɲii le ni nʼa da ba kanhama nigbɔ niguumɔ shan muyɛ pyaa kee ni ma fanha ki sipyii ni ma sipyii pusamaa na, kɔnhɔ mʼa li cɛ na nɛ ɲɔhɔ ɲɛ ɲiŋɛ ki bɛɛri na wɛ. 15 Nɛ da bi na keŋɛ yirige na mu ni ma sipyii pu kpɔn ni kafɛɛgɛ yama ni, yee ɲuŋɔ bi da dugo ɲiŋɛ ki na. 16 Ga can na nɛ mu yaha wà, kɔnhɔ di na fanha ki shɛ ma na, na mɛgɛ ki sii pɛlɛ koŋɔ ki kabaya yi bɛɛri na. 17 Ali lee bɛ na musama di dɛnri, ma ya go mʼa na sipyii pu yaha pʼa gaaŋi wɛ. 18 Ayiwa, ɲiga nimɛtashiin ni nʼa da ba zanha kagereye shan, yee fanha na ba ɲɛhɛ xuuni. Yee zanha kagereye yi shi sanha do ɲa Misira ni wɛ, ba wʼa sin wɛ. 19 Ayiwa, ma yatɔɔyɔ ye ni ma yaŋmuyɔ yemu yi wa kɛrɛyɛ yi ni ge, tuduro tun sasa na, na yi bɛɛri yi fyaala pa puga. Sipyii pu fara yatɔɔyɔ yi na, kee ka bɛɛri bu gori sige ki ni, zanha kagereye na ba kee kpɔn gbo.› » 20 Farawɔn wo fanha ki sipyii piimu ya Tɛhɛnɛ Baa Kilɛ wo jomɔ pu co ni see ni ge, a pee di pu buloo ni pu wo yatɔɔyɔ yi leŋɛ piyɛyɛ ni. 21 Ga piimu ya ta pu co ni see ni-i ge, a pee di pu wo buloo ni pu wo yatɔɔyɔ yi yaha wà sige ki ni.

22 Ayiwa, a Tɛhɛnɛ Baa Kilɛ di Musa pye: «Ma keŋɛ ki yirige fugba wu ni, kɔnhɔ zanha kagereye di do sipyiire ti bɛɛri ni yatɔɔyɔ ye ni ɲà tuuyo yi bɛɛri ɲuŋɔ ni Misira fiige ki kabaya yi bɛɛri na.» 23 A Musa di wu pubiin li yirige fugba wu ni, a Tɛhɛnɛ Baa Kilɛ di Kilɛ-sɛlɛŋɛɛ ni zanha kagereye ni na yaha shan. A Kilɛ-sɛlɛŋɛɛ ki kpɛɛngɛ kʼi ɲiŋɛ ki bɛɛri tɔ, a Tɛhɛnɛ Baa Kilɛ di zanha kagereye shan Misira fiige ki bɛɛri ni. 24 A zanha kagereye di sii wo, a na di suri yi ni. Yi fanha bi sii ɲɛhɛ xuuni. Ba Misira fiige ki da bye fiige wɛ, lee shi bi sanha bye ɲa bada wɛ. 25 Yaaga yaaga kʼa bi bye sige ki ni ge, na co sipyii na na nɔ yatɔɔyɔ na, zanha kagereye yʼa yee bɛɛri kpɔn, na ɲà ki kpɔn, na tiire ti bɛ kpɔn na kɛgi kɛgi Misira fiige ki kabaya yi bɛɛri na. 26 Ga Izirayɛli nagoo pu bi bye Goshɛni koomɔ pemu ni ge, zanha kagereye yi ya ta nɔ pee koomɔ pu kabaŋa ka shishiin ni wɛ.

27 Ayiwa, a Farawɔn di Musa ni Arɔn yiri, na pu pye: «Le tɔɔɲii le ni kunni, nʼa nahana. Tɛhɛnɛ Baa Kilɛ wʼa tii. Nɛ ni na wo sipyii pu pʼa jaagi. 28 Yi Tɛhɛnɛ Baa Kilɛ ɲɛɛri na wu Kilɛ-sɛlɛŋɛɛ kee ni zanha kagereye yi yereŋɛ. Nɛ na yi yaha yʼa gaaŋi, w’à da yi co yaha sanha wɛ.»

29 A Musa di jo: «Nɛ ba foro kulo li ni tuun wemu ni, nɛ na keye yirige Tɛhɛnɛ Baa Kilɛ mu na wu ɲɛɛri. Kilɛ-sɛlɛŋɛɛ ki na yere, zanha kagereye yi bɛ na yere, kɔnhɔ mʼa li cɛ na Tɛhɛnɛ Baa Kilɛ wogo ki wa ɲiŋɛ ke. 30 Ga nɛ li cɛ jo mu ni ma wo sipyii pu kunni wa da ga Tɛhɛnɛ Baa Kilɛ ɲɔmɛɛ co nimɛ bɛ wɛ.»

31 Ayiwa, shinma wemu wu ɲɛ na ɔrijɛ ge, wee bi se xɔ, wemu wu ɲɛ na lɛn ge, wee dʼa fyɛɛnrɛ ɲɔ kɔn na byi. A zanha kagereye yʼi wee shinma wu bɛɛri kyɛɛgi. 32 Ga shinma wemu wu ɲɛ kurogo wo ma na jo alikama ni epotiri ge, zanha kagereye yi ya ta wee kyɛɛgi wɛ.

33 Ayiwa, a Musa di yìri laha Farawɔn tàan, na foro kari kanha ki kadugo. A wu wu keye yi yirige, na Tɛhɛnɛ Baa Kilɛ ɲɛɛri. A Kilɛ-sɛlɛŋɛɛ kee ni zanha kagereye yʼi yere, a zanha kʼi ga. 34 Ba Farawɔn ya zanha kagereye, ni Kilɛ-sɛlɛŋɛɛ ki ɲa kʼa yere, a zanha ki bɛ di ga wɛ, a wu gori yaha sanha wu jurumu wu ni, a wu ni wu fanha ki sipyii pʼi pu niye waha. 35 Farawɔn ya ta sɔɔ na Izirayɛli nagoo pu yaha pʼa gaaŋi wɛ. A wu nige waha ma na jo ba Tɛhɛnɛ Baa Kilɛ bi yi jo Musa mu wɛ.