Ɛkizode 10

Kawaa gbarataanri wuu le: Kabeeŋɛ

Ayiwa a Tɛhɛnɛ Baa Kilɛ di Musa pye: «Shɛ Farawɔn mu. Nɛ wʼa pu niwegee waha wu ni wu fanha ki sipyii pu ni, kɔnhɔ di kii kakanhaŋaa kii pye pu niŋɛ ni. 2 Nɛ Misira shɛɛn pu co cogana lemu na, na kakanhaŋaa kiimu pye pu niŋɛ ni ge, nɛ kee pye kɔnhɔ ma da ki paari ma nagoo ni ma ɲabiye yi mu. Lee na yʼa da ba li cɛ na nɛ wu ɲɛ Tɛhɛnɛ Baa Kilɛ we.»

3 A Musa ni Arɔn di shɛ Farawɔn mu, na wu pye na Tɛhɛnɛ Baa Kilɛ, Heburuu pu wo Kilɛ wʼa jo: «Mu na ba sɔɔ na mayɛ tirige nɛ mu fɔ tuun wekɛ ni wɛ? Na sipyii pu yaha pʼi shɛ saraya wolo na mu. 4 Ma bye ma di ya sɔɔ na na sipyii pu yaha kari wɛ, ɲiga na nʼa da ba kabeeŋɛ tun ma fiige ki kabaya yi bɛɛri na. 5 Kee na ba ɲiŋɛ ki bɛɛri tɔ, fo ki da da ɲaa wɛ. Zanha kagereye yʼa toro yaaga kemu bɛɛri ɲuŋɔ ni ge, kee na ba keesaŋa li. Ki na ba tiye yi bɛɛri li. 6 Ma piyɛyɛ ye, ni ma fanha ki sipyii pu wo piyɛyɛ ye, ni Misira shɛɛn pu bɛɛri wo piyɛyɛ yi na ba ɲi kabeeŋɛ na. Ma tii pee, ni ma tii pu wo tii pee, ma lɔ pu cazege na, fo na pa nɔ niɲaa na, wee wa shishiin ya le la shi ɲa ɲa wu ɲii na wɛ.» A Musa di yìri laha Farawɔn tàan, na gari. 7 Ayiwa, a Farawɔn wo sipyii pʼi wu pye: «We ná we na ba daha yaha wèe na da gana fo na shɛ nɔ tuun wekɛ na wɛ? Pii sipyii pii yaha pu da se pʼi shɛ saraga wolo Tɛhɛnɛ Baa Kilɛ pu Kilɛ wu mu. Ta mu sanha li cɛ na Misira fiige ki wa gyɛɛgi na gaaŋi wɛ?»

8 Ayiwa, a pʼi Musa ni Arɔn yiri pa sanha Farawɔn ɲaha tàan. A Farawɔn di pu pye: «Yʼa se yʼi shɛ saraga wolo Tɛhɛnɛ Baa Kilɛ yi Kilɛ wu mu. Ga piikɛ pu wa da ba shɛ wɛ?» 9 A Musa di jo: «Wee bɛɛri pu wa gaaŋi, wèe ni wù nɔhɔpiire, ni wù nɔhɔlɛɛ, ni wù jalaa, ni wù poro pushaa, ni wù yatɔɔbya, ni wù niiyɛ yi bɛɛri. Bani wèe ya yaa na kalenɛ pye Tɛhɛnɛ Baa Kilɛ mu.» 10 A Farawɔn di jo: «Oo dɛ, Tɛhɛnɛ Baa Kilɛ wu pye ni yi ni! Oo nɛ wu na yee ni yi nagoo yaha yʼa se! Yi kasɛɛgɛ yaha yiyɛ na dɛ! Yee fungɔnyɔ yʼa ɲɔ wɛ! 11 Lee da ga bye wɛ! Yee namaa puyɛ pu shɛ saraya wolo Tɛhɛnɛ Baa Kilɛ mu, bani lee yi wʼa zhaa.» A pʼi Musa ni Arɔn kɔri laha Farawɔn ɲahagbaa na. 12 A Tɛhɛnɛ Baa Kilɛ di Musa pye: «Ma keŋɛ ki sanha Misira fiige ki ɲuɲɔ na, kɔnhɔ kabeeŋɛ di ba Misira fiige ki ni. Ɲà kemu bɛɛri kʼa kori zanha kagereye yi nidoxhɔgɔ na ge, kabeeŋɛ kʼi ba kee bɛɛri li.» 13 A Musa di wu pubiin li yaaŋa Misira fiige ki ɲuɲɔ na, a Tɛhɛnɛ Baa Kilɛ di kafɛɛgɛ ja na yìri Kilɛ-nɔhɔ ki na. A kee di caŋa ke ni piige ki bɛɛri pye na fùu. Ɲiga kʼa jo kʼa mugi ge, lee bi kabeeŋɛ ki ta kʼa pa. 14 A kee kabeeŋɛ kʼi digi, na jaaga Misira fiige ki bɛɛri ni. Kʼa bi sii ɲɛhɛ ɲɛhɛgana lemu na ge, lee ɲɔhɔ bi sanha bye ɲa bada wɛ, li ɲɔhɔ di wa da bye bɛ nige bada wɛ. 15 Kʼa bi ɲiŋɛ ki bɛɛri tɔ, a ɲiŋɛ ki bɛɛri di wɔ foro kabeeŋɛ ki na. Ɲà kemu ni tiye yasɛyɛ yemu yʼa kori zanha kagereye yi nidoxhɔgɔ na ge, a kʼi yee bɛɛri li. Wɛŋɛ niburege ka shishiin ya kori tige kelee ɲakaŋa na Misira fiige ki kabaŋa ka shishiin na wɛ.

16 Wee tuun wu ni a Farawɔn di Musa ni Arɔn yiri tɔvuyo na, na jo: «Nɛ jurumu pye Tɛhɛnɛ Baa Kilɛ na, yi wo Kilɛ we, na jurumu pye yee bɛ na. 17 Ayiwa nimɛ, yi yafa na mu le tɔɔɲii le bɛ ni sanha, yʼi Tɛhɛnɛ Baa Kilɛ ɲɛɛri na mu, yi wo Kilɛ we, kɔnhɔ wu le xu pubiin le sanha lii na na.» 18 A Musa di laha Farawɔn tàan, na Tɛhɛnɛ Baa Kilɛ ɲɛɛri. 19 A Tɛhɛnɛ Baa Kilɛ di kafɛɛgbɔhɔ ka yirige na yìri caŋatomɔ pu ni, a kee di ba kabeeŋɛ ki bɛɛri lɔ na shɛ wà Suumɔ Loɲiga ki ni. Ali kabeeŋɛ nigin bɛ ya shɔ to xuu wa shishiin ni Misira fiige ki ni wɛ. 20 Ga a Tɛhɛnɛ Baa Kilɛ di Farawɔn ɲuwii waha. Wu ya ta sɔɔ na Izirayɛli nagoo pu yaha kari wɛ.

Kawaa gbarashɛɛrɛ wuu le: Nibiigbɔhɔ

21 A Tɛhɛnɛ Baa Kilɛ di Musa pye: «Ma keŋɛ ki yirige fugba wu ni, kɔnhɔ nibiigbɔhɔ di jé Misira fiige ki ni, fo sipyii pu da daala nibiige ki ni.» 22 A Musa di wu keŋɛ ki yirige fugba wu ni, a nibiigbɔhɔ di jé Misira fiige ki kabaya yi bɛɛri ni fo cabyaa taanri. 23 Sipya ya bi wu sipyiɲii ɲaa wɛ. Sipya wa shishiin ya yìri wu tatɛɛngɛ ni kee cabyaa taanri wu funŋɔ ni wɛ. Ga kpɛɛngɛ bi bye Izirayɛli nagoo pu wo xuu wu ni. 24 A Farawɔn di Musa yiri na wu pye: «Yʼa se yʼi shɛ saraya wolo Tɛhɛnɛ Baa Kilɛ mu. Yʼa se ni yi nɔhɔpiire ti bɛ ni. Yʼi yatɔɔbya we ni yatɔɔyɔ nigbɔyɔ yi yɛ yaha naha.» 25 A Musa di jo: «Wee tuun wu ni, saraya ni saraya nizogoyo yemu w’à da zhɛ wolo Tɛhɛnɛ Baa Kilɛ mu ge, ta mu wu wʼa da zhɛ yee kan wèe mu? 26 Wèe yatɔɔyɔ yi bɛɛri yʼa da gari ni wèe ni, ali ka feenɛ nigin bɛ da ga ba gori wèe kadugo wɛ, bani yemu wèe ya yaa na pye saraga Tɛhɛnɛ Baa Kilɛ, wèe wo Kilɛ wu mu ge, wèe da ga yee cɛ, na ta wee sanha nɔ wà ke wɛ.» 27 Ga a Tɛhɛnɛ Baa Kilɛ di Farawɔn ɲuwii waha, wu ya ta sɔɔ na sipyii pu yaha kari wɛ. 28 A Farawɔn di Musa pye: «Nimɛ ya ma ta mʼa toro laha na ɲahagbaa na! Kasɛɛgɛ yaha mayɛ na dɛ! Di ganha da ma ɲa naha nige wɛ. Nɛ ɲii ga fin ma na caŋa caŋa, kee na bye ma caxhugo.» 29 A Musa di jo: «Mʼa can jo, ma ɲii kunni da ga fin nɛ na nige wɛ.»