Kawaa kɛ wuu le: Misira fiige ki nagoo nizhiilee pʼa xu
11
A Tɛhɛnɛ Baa Kilɛ di Musa pye: «Nʼa da ba kawaa la shan sanha Farawɔn ni Misira ɲuŋɔ ni. Lee kadugo na wu na ba koo kan yee mu. Wu bu koo kan yi mu, wu da yee kɔri bɛ yɛrɛ. 2 Yi jo sipyii pu mu, na namaa pu bɛɛri ni cèe pu bɛɛri pu warifyɛn yaŋmuyɔ ni sanni yaŋmuyɔ ɲɛɛri pu tiinɲii pu mu.» 3 A Tɛhɛnɛ Baa Kilɛ di sii pu tɔn taan Misira shɛɛn mu, fo Musa yɛ pyaa bi wii sipyigbɔ fo xuuni Misira fiige ki fanha ki sipyii pee ni sipyii pusamaa bɛɛri mu. 4 A Musa di Farawɔn pye: «Tɛhɛnɛ Baa Kilɛ ya jo, na ɲiɲiŋɛ ki ba ɲi tuun wemu ni na wee na ba Misira fiige ki ɲaari. 5 Misira fiige ki jashiilee pu bɛɛri na ba xhu, Farawɔn wemu wu wʼa tiin saanra koro li ni ge, na ɲɔ kɔn wee wo jashiimɛ wu na, fo na shɛ nɔ bulozhɔ tiratirimɛ wu wo jashiimɛ wu na. Yatɔɔyɔ yi bɛ wo nagoo nizhiilee pu na ba xhu. 6 Yamɛhɛɛ na ba suu Misira kabaya yi bɛɛri na kiimu ɲɔhɔ sanha su ɲa wɛ, ki ɲɔhɔ di wa da zu ɲa bɛ nige bada wɛ. 7 Ga Izirayɛli nagoo pu ni, ali ponɔ bɛ da ba gɛɛnri sipya na kelee yatɔɔgɔ na wɛ, kɔnhɔ yʼi li cɛ na Tɛhɛnɛ Baa Kilɛ ya Misira shɛɛn ni Izirayɛli nagoo cɛ na shɔɔnri puyɛ ni. 8 Wee tuun wu ni, ma kapyebyii piimu pu ɲɛ piiri ge, pee bɛɛri na ba nɛ mu, na nuguro sin nɛ fɛɛ ni, na yu: ‹Yi foro yʼa se ma ni ma sipyii pu ni.› Lee kadugo na nɛ na ba foro fiige ki ni.» A Musa luu di sii yìri fo xuuni, a wu yìri laha Farawɔn tàan. 9 Tɛhɛnɛ Baa Kilɛ bi yemu jo Musa mu ge, a yee ɲɔ di fa. Wu bi jo na: «Farawɔn da ba sɔɔ mu wo nijoyo yi na wɛ, kɔnhɔ nɛ kakanhaŋaa niɲɛhɛŋɛɛ pye Misira ni.» 10 Musa ni Arɔn ya kee kakanhaŋaa ki bɛɛri pye Farawɔn ɲii na, ga a Tɛhɛnɛ Baa Kilɛ di Farawɔn ɲuwii waha. Wu ya ta sɔɔ na Izirayɛli nagoo pu yaha na pu foro wu fiige ki ni wɛ.