Kilɛ ya pa foro sanha Solomani na
(2 Caŋa Ɲɛhɛɛ Jomɔ 7:11-22)
9
Ayiwa, ba saannaa Solomani ya Kafɔɔ wo puga ke ni wu wo saannaa puga ke ni wu la bye wu piyɛyɛ yemu bɛɛri yereŋɛ ge, ba wʼa yee yereŋɛ xɔ tuun wemu ni wɛ, 2 a Tɛhɛnɛ Baa Kilɛ di wuyɛ shɛ wu na sanha tɔɔɲii shuun wuu li ni ma na jo ba wʼa wuyɛ shɛ wu na shɛgana lemu na na wu yaha Gabawɔn kulo li ni wɛ. 3 A Kafɔɔ di wu pye: «Ɲɛrɛgɛ ni ɲɛrɛgbɔhɔ kemu mʼa pye ge, nɛ yee logo. Puga kemu mʼa yereŋɛ, nɛ mɛgɛ di bye ki na ge, nɛ na ba kee pye fɛɛfɛɛ. Nɛ ɲii ni na zɔ wu na bye wà tuun bɛɛri ni. 4 Mu wi ge, ma ba ɲaari na ɲii na ni funvige ni, na dii ba ma to Dawuda ya pye wɛ, ma ba nɛ wo saliya wu koo li ɲaari, keree kiimu bɛɛri nɛ jo ma mu ge, ma ba kee bɛɛri koo ɲaari, na nɛ wo tuduro ti bɛɛri pyi, 5 wee tuun wu ni, nɛ na ba fanha le ma saanra ti ni Izirayɛli nagoo pu wo saanra koro li na fo gbee, ba nɛ yi jo ma to Dawuda mu jogana, lemu na wɛ jo: ‹Ma faara na ba daa tuun bɛɛri ni Izirayɛli wo saanra koro li na.› 6 Ga yee ni yi nagoo bu kadugo le nɛ ni, ye bu bye yee di ya nɛ wo tuduro te ni nɛ wo saliya wu co wɛ, yee bu shɛ labye pyi kilɛlɛɛ piitiilee mu, na nuguro sinni pee fɛɛ ni, 7 fiige kemu nɛ kan Izirayɛli nagoo pu mu ge, nɛ na ba pu ɲuŋɔ tugo di laha kee fiige ki ni. Nɛ ke puga kemu pye fɛɛfɛɛ, na na mɛgɛ le ki na ge, nɛ na ba zhe ki ni. Izirayɛli nagoo pu na bye giraya yaŋmuyɔ ni kataanra yaŋmuyɔ shi wu bɛɛri niŋɛ ni. 8 Sipyii piimu na ba doroo ke Kilɛ-pɛɛŋɛ pugbɔhɔ nizaaŋa nidɔɔngɔ ke tàan ge, pee na ba ki wii, lʼa bye pu mu kakanhana, pʼa ganha na ɲɔ siwegee wi na yu: ‹Ɲaha kʼa pye a Tɛhɛnɛ Baa Kilɛ di ke fiige ke ni ke puga ke pye mumɛ wɛ?› 9 Pu na ba pu ɲɔ shɔ na: ‹Bani pʼa kadugo le Tɛhɛnɛ Baa Kilɛ, pu Kilɛ wu ni, wee wemu wʼa pu tii pu yeege Misira fiige ki ni ge, na daha kilɛlɛɛ piitiilee fɛni, na ganha na nuguro sinni pee fɛɛ ni, na labye pyi pee mu. Lee wuu na Tɛhɛnɛ Baa Kilɛ ya ke bɔɔngɔ ke bɛɛri nɔ pu na.› »Solomani wo labye we
(2 Caŋa Ɲɛhɛɛ Jomɔ 8:1-18)
10 Ayiwa, yee kɛlɛɛ shuun (20) funŋɔ ni Solomani ya Tɛhɛnɛ Baa Kilɛ wo puga ke, ni saan wu wo puga ki yàa. 11 Solomani mago bye sɛdiri tiin, ni sipɛrɛ tiin kiimu bɛɛri, ni sanni wemu bɛɛri na ge, Iramu, Tiiri wo saan we, wee wu bi yee bɛɛri kan wu mu. A saannaa Solomani bɛ di kulogoo kɛlɛɛ shuun (20) kan Iramu mu na foro Galile wo fiige ki ni. 12 Solomani ya kulogoo kiimu kan Iramu mu ge, a Iramu di foro Tiiri ni, na shɛ kee wii, a kʼi da ki ya taan wu mu wɛ. 13 A wu jo: «Na ceborona, kulogoo kiikɛ shi mu dʼa kan mɛ nɛ mu wɛ?» A wu ki mɛgɛ le na Kabuli fiige (Takoloŋɔ). Kee mɛgɛ ke pʼa yiri ki na niɲaa we bɛ ni. 14 Sanni tonɔɔ taanri ni kiloo xhuu kaguro (3 500) Iramu bi kan Solomani mu.
15 Solomani bi sipyii piimu le waajibi kapyeŋɛɛ ki ni ge, labye wemu pee ya pye ge, wee wu ɲɛ mɛ: Tɛhɛnɛ Baa Kilɛ wo puga ke, ni wuyɛ pyaa wo puga ke, ni xuu wemu pʼa byi na Milo ge, ni Zheruzalɛmu wo kashɛn ɲuŋɔ círi círi kasɔrɔgɔ ke, ni Asɔri kulo le, ni Megido kulo le, ni Gezɛri kulo le. 16 Farawɔn, Misira fiige ki saan we, wee bi kashɛn keŋɛ yirige na kari Gezɛri kulo li fɛni, na shɛ li co. A wu na le li na, Kana shɛɛn piimu pu bye li ni ge, na pee gbo. A wu xhɔ na li kan wu poro pushɔ wu mu, Solomani wo shɔ we, na pye fundanga yakanga. 17 A Solomani di Gezɛri kulo li sinvonɔ sin, na nɔhɔdaan wo Bɛti-Orɔn kulo li bɛ sinvonɔ sin, 18 ni Baalati kulo le, ni Tadimɔri kulo le siwaga ki wo fiige ki ni. 19 Kulogoo kiimu ki bye Solomani wo shinma tamaraga ki ge, a wu kee bɛ sin, ni wu kashɛn wotoriyo yi wo kulogoo kee, ni shɔnyɔ tamaraya yi wo kulogoo kee. Wu funŋɔ bye yaaŋa kemu bɛɛri na Zheruzalɛmu kulo le, ni Liban fiige ke, ni wu fanha ki kulogoo kiimu bɛɛri ni ge, a wu kee yaaŋa ki bɛɛri pye. 20 Amɔri shi shɛɛn, ni Xhɛti shi shɛɛn, ni Ferɛzi shi shɛɛn, ni Xhɛvi shi shɛɛn, ni Zhebusi shɛɛn piimu bɛɛri pu bye pu ɲɛ Izirayɛli shɛɛn wɛ ge, 21 pee wo nagoo piimu bɛɛri pʼa bi kori fiige ki ni pu kadugo yíri, Izirayɛli nagoo pu di ya já pu ɲuŋɔ tugo Tɛhɛnɛ Baa Kilɛ mu wɛ ge, a Solomani di pee bɛɛri le bulooro kapyewagaa ni, fo na pa nɔ niɲaa we bɛ na. 22 Ga Solomani ya ta Izirayɛli fiige ki shɛn wa shishiin le bulooro ni wɛ, a wu pee pye wu kashɛnŋmuu, ni fanhafɛɛ, ni ɲuŋɔfɛɛ, ni shɔnduguloo ɲuŋɔfɛɛ, ni kashɛn wotoriyo ɲuŋɔfɛɛ. 23 Ɲuŋɔfɛɛ piimu Solomani bi teŋɛ na pye kapyeŋɛɛ ki wo kaɲaha shɔnrimɔɔ pu ge, pee bye sipyii xhuu kaguro ni kɛlɛɛ kaguro (550). Pee bi pu wo fanha ki pyi kapyeŋɛɛ ki pyevɛɛ pu na.
24 A Farawɔn poro wu foro Dawuda wo kulo li ni, na shɛ jé wu wo puga ki ni, kee kemu kʼa bi yàa wu mɛgɛ na ge. Lee kadugo na, a Solomani di da Milo wo xuu wu yàa.
25 Saraya tawologo kemu Solomani bi yereŋɛ Tɛhɛnɛ Baa Kilɛ mu ge, wu bi ma saraya nizogoyo, ni ɲaɲiŋɛ saraya wo kee na tɔɔɲii taanri yee funŋɔ ni. Nudanga saraya tawologo kemu ki bye Tɛhɛnɛ Baa Kilɛ ɲahagbaa na ge, wu bi nudanga yawurire ti bɛ wo kee na. Lee funŋɔ ni, Kilɛ-pɛɛŋɛ pugbɔhɔ kʼa yereŋɛ lemu na ge, a lee di ganha na byi ki ni.
26 A saannaa Solomani di kɔɔgbɔyɔ bɛ yàa Ɛsiyɔn-Gebɛri kulo li ni Elati tàan, Suumɔ Loɲiga ki ɲɔ ki na, Edomu fiige ki ni. 27 A Iramu di wu wo kɔrɔyɔ kapyebyii pii yaha pʼa pa Solomani wo sipyii pu tɛgɛ yee kɔrɔyɔ yi wo kapyeŋɛɛ ki na. Kɔɔpaalaa pu bye pii, piimu ya suumɔ lɔhɔ ki cɛ xuuni ge. 28 A pʼi gari Ofiiri wo koomɔ pu ni, na shɛ ba ni sanni tonɔɔ kɛ ni shuun (12.000) ni, na pa gan saannaa Solomani mu.