Kariɲɛɛgɛ Ɲɔmɛɛ li Keshi wʼa yaha Kilɛ-pɛɛŋɛ pugbɔhɔ ki funŋɔ ni
(2 Caŋa Ɲɛhɛɛ Jomɔ 5:2—6:2)
8
Ayiwa, a saannaa Solomani di Izirayɛli nɔhɔlɛɛ pee, ni Izirayɛli gbaweye yi ɲuŋɔfɛɛ pu bɛɛri, ni pu kpɔnhɔɔ fɛɛ pu yiri pinnɛ wuyɛ tàan Zheruzalɛmu ni, kɔnhɔ pʼi shɛ Tɛhɛnɛ Baa Kilɛ wo Kariɲɛɛgɛ Ɲɔmɛɛ li Keshi wu lɔ Dawuda wo kulo li ni, lee ɲɛ Siyɔn kulo le.2 A Izirayɛli wo namaa pu bɛɛri di ba binnɛ saannaa Solomani tàan, Etanimu yeŋɛ ki ni, kalenɛ li kaa na, kee bye yeŋɛ gbarashuun wogo kea.
3 Ba Izirayɛli nɔhɔlɛɛ pu bɛɛri ya nɔ wɛ, a saraya ɲaha shɔɔnrivɛɛ pʼi Kariɲɛɛgɛ Ɲɔmɛɛ li Keshi wu lɔ. 4 A saraya ɲaha shɔɔnrivɛɛ pee, ni Levi wo tirige shɛɛn pʼi Tɛhɛnɛ Baa Kilɛ wo Kariɲɛɛgɛ Ɲɔmɛɛ li Keshi wu lɔ, ni Ɲuŋɔ Tacirige Fàya Puga ke, ni fɛfɛɛrɛ yagbegeye yemu bɛɛri yi bye Ɲuŋɔ Tacirige Fàya Puga ki ni ge. 5 A Izirayɛli nagoo pu bɛɛri di ba na pa binnɛ saannaa Solomani tàan, Kariɲɛɛgɛ Ɲɔmɛɛ li Keshi wu tàan. A pʼi yapɔrɔyɔ nibiire, ni nigbɔyɔ niɲɛhɛyɛ gbo na pye saraga, yi ɲɛhɛ wu keŋɛ ni, yi bi da ga já dɔrɔ wɛ, yi pɛrɛmɛ pu ɲuŋɔkana bɛ bi da ga já jɛ wɛ. 6 A saraya ɲaha shɔɔnrivɛɛ pʼi shɛ Tɛhɛnɛ Baa Kilɛ wo Kariɲɛɛgɛ Ɲɔmɛɛ li Keshi wu yaha wu tayahaŋa ni Kilɛ wo fɛfɛɛrɛ puga ki ni, fɛfɛɛrɛ ti bɛɛri wo fɛfɛɛrɛ puga ki ni, serubɛɛn pu kapaya yi nɔhɔ ni. 7 Bani serubɛɛn pu kapaya yi bi pii Kariɲɛɛgɛ Ɲɔmɛɛ li Keshi wu tayahaŋa ki ɲuɲɔ wu na. Serubɛɛn pu bi Kariɲɛɛgɛ Ɲɔmɛɛ li Keshi we, ni wu lɔ lɔ begee ki tɔ. 8 Kee begee ki bi tɔnnɔ tɔnnɔ fo wa bu bye fɛfɛɛrɛ xuu wu ni, wʼa ganha na ki ɲuyɔ yi ɲaa, ga wa bu bye kpɛɛngɛ ki na, wufɔɔ da ki ɲa wɛ. A yi gori yaha wà, fo na pa nɔ niɲaa na. 9 Yaaga bi ta pye Kariɲɛɛgɛ Ɲɔmɛɛ li Keshi wu funŋɔ ni wɛ, fo faaya kɔɔgɔɔ shuun. Musa wu bi kee kɔɔgɔɔ shuun wu le wu ni Orɛbu faaboboŋɔ ki na tuun wemu ni Tɛhɛnɛ Baa Kilɛ ya kariɲɛɛgɛ ɲɔmɛɛ li lɔ ni Izirayɛli nagoo pu ni pu foroduun wu ni Misira fiige ki ni ge.
10 Tuun wemu ni saraya ɲaha shɔɔnrivɛɛ pu bi fòro fɛfɛɛrɛ xuu wu ni ge, a ɲahaŋa di Tɛhɛnɛ Baa Kilɛ wo puga ki ɲi. 11 Saraya ɲaha shɔɔnrivɛɛ pu ya já pu wo labye wu pye nige ɲahaŋa ki keŋɛ ni wɛ, bani Tɛhɛnɛ Baa Kilɛ wo nɔɔrɔ wu bi Tɛhɛnɛ Baa Kilɛ wo puga ki ɲi.
12 Wee tuun wu ni a Solomani di jo:
«Tɛhɛnɛ Baa Kilɛ ya jo na
wee na ba diin nibiigbɔhɔ ki ni!
13 Nɛ puga ka yereŋɛ ma mu,
xuu wemu ni ma da ba diin yaha gbee ge!»
Solomani ya Kilɛ-pɛɛŋɛ pugbɔhɔ ki kan Kilɛ mu
(2 Caŋa Ɲɛhɛɛ Jomɔ 6:3-11)
14 Lee kadugo na, a saan wu ŋmahana ɲɛri, na duba pye Izirayɛli nagoo pu bɛɛri mu, lee bi sipyiire ti bɛɛri ta tʼa yere. 15 A saan wu jo: «Baraga ki taha Tɛhɛnɛ Baa Kilɛ, Izirayɛli wo Kilɛ wu na, bani wu ɲɔ ki bi ɲɔmɛɛ lemu lɔ nɛ to Dawuda mu ge, wu keye yʼa lee ɲɔmɛɛ le fa. Wʼa bi jo na: 16 ‹Na co fo caŋa kemu nɛ na sipyii, Izirayɛli nagoo pu yeege Misira fiige ki ni ge, nɛ ta kulo la shishiin shɔɔnri lɔ, Izirayɛli gbawege ka shishiin ni, puga na yereŋɛ lemu ni, nɛ mɛgɛ di bye ki na wɛ, ga Dawuda nɛ shɔɔnri lɔ, kɔnhɔ wee di bye Izirayɛli ɲuŋɔ ni, nɛ wo sipyii pee.› 17 Lʼa bye nɛ to Dawuda funŋɔ ni na puga yereŋɛ Tɛhɛnɛ Baa Kilɛ mɛgɛ na, Izirayɛli wo Kilɛ we. 18 A Tɛhɛnɛ Baa Kilɛ di nɛ to Dawuda pye: ‹Ma na jo lʼa bye mu zɔ wu na mu wu puga yereŋɛ nɛ mɛgɛ na, kee fungɔngɔ ke kʼa bye ma mu ge, kee ya ɲɔ fo xuuni. 19 Ga mu bɛ wu ɲɛ kee puga ke wo yereŋɛvɔɔ wɛ. Ma ja, mayɛ pyaa ki wo yasege, kee kʼa da ba puga ki yereŋɛ nɛ mɛgɛ na.› 20 Pee jomɔ pemu Tɛhɛnɛ Baa Kilɛ bi jo ge, wʼa pu ɲɔ fa. Nɛ na to Dawuda wu faa, nɛ tiin Izirayɛli wo saanra koro li na, ma na jo ba Tɛhɛnɛ Baa Kilɛ bi yi jo wɛ, na puga ki bɛ yereŋɛ Tɛhɛnɛ Baa Kilɛ mɛgɛ na, Izirayɛli wo Kilɛ we. 21 Nɛ xuu wa gbegele yaha Kariɲɛɛgɛ Ɲɔmɛɛ li Keshi wu kaa na, wee keshi wemu ni Tɛhɛnɛ Baa Kilɛ wo kariɲɛɛgɛ ɲɔmɛɛ li ɲɛ ge, lee lemu wʼa lɔ ni wèe tii pu ni, pu foroduun wu ni Misira fiige ki ni ge.»
Solomani wo ɲɛrɛgɛ ke
(2 Caŋa Ɲɛhɛɛ Jomɔ 6:12-40)
22 Ayiwa, a Solomani di yere Tɛhɛnɛ Baa Kilɛ wo saraya tawologo ki ɲahagbaa na, na saha ni Izirayɛli nagoo pu pinnɛgɛ ki bɛɛri ni. A wu keye ye yirige fugba we ni, 23 na jo: «Tɛhɛnɛ Baa Kilɛ, Izirayɛli wo Kilɛ we, Kilɛ wa ɲɛ wà nige fugba we ni, kelee nɔhɔdaan wu ni, ɲiŋɛ ke na, wemu wu ɲɛ ba mu ɲɛ-ɛ wɛ. Ma kapyebyii piimu pʼa ɲaari ma ɲaha tàan ni pu zɔlɔɔ pu bɛɛri ni ge, mu ya ma kariɲɛɛgɛ ke ni ma ɲɔmɛɛ fɛɛrɛ ti mara pee shizhaa na. 24 Lee funŋɔ ni, yemu mu bi jo ma kapyebye we, nɛ to Dawuda mu ge, mu ya kasɛɛgɛ yaha yi na, yemu ma ɲɔ kʼa bi jo ge, ma keŋɛ kʼa yee ɲɔ fa, ma na jo ba li wa mɛ niɲaa wɛ. 25 Ayiwa, nimɛ Tɛhɛnɛ Baa Kilɛ, Izirayɛli wo Kilɛ we, kasɛɛgɛ yaha pe jomɔ pe bɛ na, pee pemu mʼa jo nɛ to Dawuda wu mu ge na: ‹Ma jalaa pu bu kasɛɛgɛ yaha pu kozhɛɛ li na, na ɲaari nɛ ɲaha tàan, ma na jo ba mʼa ɲaari nɛ ɲaha tàan wɛ, wa na ba da tuun bɛɛri ni nɛ ɲaha tàan, wemu na ba diin Izirayɛli wo saanra koro li na ge.› 26 Ayiwa, nimɛ Izirayɛli wo Kilɛ we, nʼa ma ɲɛɛri, pee jomɔ pemu mʼa jo ma kapyebye Dawuda mu, nɛ to wu ge, pee yaha pʼi fa foro!
27 «Ga li can koo ni, ta Kilɛ tatɛɛngɛ wa naha ke ɲiŋɛ ke na ya? Fugba wu ni wu bɛlɛ wu ni, ma tatɛɛngɛ ɲɛ wà wɛ, pu da jo ke puga kemu nɛ yereŋɛ ge! 28 Ga lee bɛ na Tɛhɛnɛ Baa Kilɛ, na Kilɛ, ma na ba ɲaha tagi nɛ wo ɲɛrɛgɛ ki yíri, nɛ wo ɲɛɛgbɔhɔ ki yíri, mʼa na mujuu li logo, kee ɲɛrɛgɛ kemu ma kapyebye wʼa byi ma mu niɲaa mɛ ge. 29 Ma ɲìi ki shan yaha ke puga ke na caŋa fara piige na, wee xuu wemu shizhaa na mu ya jo ge, na: ‹Naha nɛ mɛgɛ ki da ba bye.› Ɲɛrɛgɛ kemu nʼa byi wee xuu wu ni ge, ki logo. 30 Nɛ ni Izirayɛli nagoo pu ni, ma sipyii pee, wù ba ɲaha tagi ke puga ke yíri tuun bɛɛri ni, na ma ɲɛɛri, mʼa wù ɲɛrɛgɛ ki logo. Na ma yaha ma tatɛɛngɛ ki ni fugba wu ni, wù ɲɛrɛgɛ ki logo, mʼa yafa wù mu.
31 «Wa bu jurumu pye wu sipyiɲii na, a pʼi wu pye na wu kaaga kàa, wufɔɔ bu ba di ba gàa saraya yi tawologo ki ɲahagbaa na, ke puga ke ni, 32 ma na ba diin fugba wu ni, na wu jomɔ pu logo, mʼa wee kiiri wu kɔn ma kapyebyii pu tɛ ni, mʼa kaɲii baa fɔɔ wu jaagi, mʼa wu jaagi kanhama pu shan wu ɲuŋɔ ni, mʼa kaɲii li kan li fɔɔ mu, wu ni lemu ya yaa wu wo tiimɛ pu funŋɔ ni ge, lee di bye wu mu.
33 «Izirayɛli nagoo, ma sipyii pu ba jurumu pye ma na, a pu pɛɛn pʼi se ta pu na, pu bu guri pa ma mu, na baraga taha ma mɛgɛ ki na, pu bu ɲɛrɛgɛ ni ɲɛɛgbɔhɔ pye ke puga ke ni, 34 na ma yaha fugba wu ni, mʼa ki logo. Mʼa Izirayɛli nagoo pu jurumu wu yafa pu mu, ma sipyii pee, ɲiŋɛ kemu mʼa kan pu tii pu mu ge, mʼa pu kuruŋɔ pa kee na. 35 Pu ba jurumu pye ma na, a lee di bye kaɲuŋɔ na fugba wu pye wʼa tɔ zanha ya dun wɛ, pu bu ɲaha tagi we xuu we yíri na ɲɛrɛgɛ pye, na baraga taha ma na, na guri kadugo, na pu jurumu wu ɲɔ yaha, ma li kaɲuŋɔ pye mʼa kawaa shan pu ɲuŋɔ ni, 36 na ma yaha fugba wu ni, yi logo, mʼa ma kapyebyii pu jurumu wu yafa pu mu, Izirayɛli nagoo pee, ma sipyii pee. Bani kozaana lemu pʼa yaa na ɲaari ge, ma na ba lee shɛɛ pu na, ma da zanhaya shaan ma fiige ki ni, kee kemu mʼa kan ma sipyii pu mu na pye pu cɛn ge.
37 «Xuugo bʼa jé fiige ki ni, kafɛɛgɛ yama bʼa yìri, soko bu foro, kelee gbagara, kabeeŋɛ bu foro, pɛɛn bu ba ma sipyii pu ɲɔ tɔ ni kashɛn keŋɛ ni pu fiige ki ni, pu kulogoo ki tajeye yi ni, kawagaa tuuyo bɛɛri ba pu taa, kelee yama tuuyo bɛɛri, 38 sipya bɛɛri wʼa ɲɛrɛgɛ bɛɛri pye ma sipyii pu ni, kelee Izirayɛli shɛɛn pu na ki pinnɛ pye ge, wa bɛɛri wʼa yá wu zɔ wu na, na wu keye sanha ke puga ke yíri ge, 39 na ma yaha ma tatɛɛngɛ ki ni fugba wu ni, wu ɲɛrɛgɛ ki logo, mʼa yafa wufɔɔ mu, mʼa wa bɛɛri co na bɛ ni wu kapyegee ki ni, bani mʼa wufɔɔ zɔ wu cɛ, bani mu yɛ wʼa sipyii pu bɛɛri wo zɔlɔɔ pu cɛ. 40 Lee funŋɔ ni, pu na da fyagi ma na pu shi wu caŋa ɲɛhɛɛ ki bɛɛri ni ke ɲiŋɛ ke na, kee kemu mʼa kan wù tii pu mu ge.
41 «Mu li wa nabuun pu bɛ shizhaa na, sipya bɛɛri wʼa yìri fiitɔɔngɔ ni na pa ma mɛgɛ ki wuu na, wʼi ɲɛ mu wo sipya wa, Izirayɛli wo sipya wa wɛ, 42 bani pu na ba ma mɛgbɔhɔ ki kaa nuri, ni ma sefɛɛrɛ keŋɛ ke, kee kemu mʼa sanha ge, wu bu ba ɲaha tagi ke puga ke yíri na ɲɛrɛgɛ pye, 43 na ma yaha fugba wu ni ma tatɛɛngɛ ki ni, wu jomɔ pu logo, wee nabun wʼa ma ɲɛɛri lemu bɛɛri shizhaa na ge, mʼa lee pye wu mu, kɔnhɔ ɲiŋɛ ki wo shi wu bɛɛri di ma mɛgɛ ki cɛ, pʼi da fyagi ma na, ba ma sipyii Izirayɛli wu ɲɛ wɛ, pʼi li cɛ sanha bɛ na mu wo mɛgɛ ki wa yiri ke puga ke na, kee kemu nɛ yereŋɛ ge!
44 «Ma ba ma sipyii pu le koo la ni, na kari pu pɛɛn pu fɛni kashɛn na, le kulo le mʼa shɔɔnri lɔ ge, pu bu pu ɲahaya tagi lee yíri, na pu ɲahaya tagi ke puga ke yíri, kee kemu nɛ yereŋɛ ma mɛgɛ ki na ge, na Tɛhɛnɛ Baa Kilɛ ɲɛɛri, 45 mʼa pu ɲɛrɛgɛ ki shɔ na ma yaha fugba wu ni, mʼa yogo jo pu kaa na!
46 «Pu ba jurumu pye ma na, bani sipya wa shishiin wa ni wu ya jurumu pyi wɛ, ma ba luu yirige pu tàan, na pu le pu pɛɛn pu keŋɛ ni, piimu pʼa pu co na pye kashɛn buloo ge, pee bu pu co na kari pu pɛɛn pu wo fiige ki ni, kʼa lii la, kʼa tɛɛŋɛ la, 47 fiige kemu ni pʼa pu co na kari ge, pu bu diin kee ni, na pu funyɔ sha, pu bu guri kadugo, na ɲɛɛgbɔhɔ pye na pu yaha pu covɛɛ pu wo fiige ki ni, na jo: ‹Jurumu wèe ya pye, kapyebaagaa wèe ya pye, kuumɔ wèe ya pye!› 48 pu bu guri pa ma mu ni pu zɔlɔɔ pu bɛɛri, ni pu munahaa ki bɛɛri ni, pu pɛɛn piimu pʼa pu co na kari ge, na pu yaha pee wo fiige ki ni, pu bu pu ɲaha tagi pu wo fiige ki yíri, kee kemu mʼa kan pu tii pu mu ge, kulo lemu mʼa shɔɔnri lɔ, ni puga kemu nɛ yereŋɛ ma mɛgɛ ki na ge, pu bu pu ɲahaya tagi lee kulo le, ni kee puga ki yíri, na ɲɛrɛgɛ pye, 49 na ma yaha fugba wu ni ma tatɛɛngɛ ki ni, pu ɲɛrɛgɛ ki logo, mʼa yogo jo pu kaa na, 50 ma sipyii pu pʼa jurumu wu pye ma na ge, mʼa yafa pu mu, katiibaagaa kiimu bɛɛri pʼa pye ma na ge, ma ki bɛɛri yafa pu mu, piimu pʼa pu co na kari ge, mʼa pu ɲiɲaara leŋɛ pee ni, pee di ɲuŋɔ ɲaari pu na. 51 Bani mu wo sipyii pu ɲɛ pii, mu wo cɛn, Misira fiige ki ni mʼa pu yeege, tɔɔrɔ ɲa ɲa na ki ni.
52 «Ma ɲìi ki shan na ɲɛrɛgɛ ke, ni Izirayɛli, ma sipyii pu wo ɲɛrɛgɛ ki na! Tuun bɛɛri ni wʼà ma ɲɛɛri ge, wù ɲɛrɛgɛ ki logo! 53 Bani mu Kafɔɔ Kilɛ wʼa wèe waa laha ɲiŋɛ ki shi wu bɛɛri na, na wèe pye ma wo cɛn, ma na jo ba mʼa yi jo ma kapyebye Musa keŋɛ kurogo, wèe tii pu yeegeduun wu ni Misira fiige ki ni wɛ!»
Solomani ya Kilɛ ɲɛɛri na wu baraga le sipyiire ti ni
54 Ayiwa, ba Solomani ya Tɛhɛnɛ Baa Kilɛ ɲɛɛri na xɔ wɛ, na yiri yere Tɛhɛnɛ Baa Kilɛ wo saraya tawologo ki ɲahagbaa li na, bani nuguro wu bi sin wà, na keye ye yirige fugba wu ni. 55 A wu yere na duba pye Izirayɛli wo pinnɛgɛ ki bɛɛri mu, na jo ni mujugbɔɔ ni na: 56 «Baraga ki taha Tɛhɛnɛ Baa Kilɛ na, wee wemu wʼa ŋmɔnɔ kan wu sipyii, Izirayɛli nagoo pu mu cibɛ ba wʼa bi yi jo wɛ ge! Kasaaŋaa kiimu bɛɛri wo ɲɔmɛɛ wu bi lɔ wu kapyebye Musa keŋɛ kurogo ge, nigin bɛ ya kori fabaa wɛ. 57 Tɛhɛnɛ Baa Kilɛ, wù Kilɛ wu pye ni wù ni, ma na jo ba wʼa pye ni wù tii pu ni wɛ, wu ganha bu kadugo le wù ni wɛ, wu ganha bu wù yaha wɛ, 58 ga wu wù zɔlɔɔ pu ɲaha ɲɛri wuyɛ yíri, kɔnhɔ wù da wu korogoo ki bɛɛri ɲaari, wʼa wu ɲɔmɛjogoo kee, ni wu saliyaa pee, ni wu kodorogoo ki kan wù tii pu mu kangana lemu na ge, wù da ki koo ɲaari lee kangana li na! 59 Jomɔ pemu nɛ jo Tɛhɛnɛ Baa Kilɛ mu na ɲɛrɛgɛ ki ni ge, pee pu pye Tɛhɛnɛ Baa Kilɛ, wù Kilɛ wu ɲaha tàan caŋa fara piige na, wu da yogo yu na ni Izirayɛli, wu sipyii pu kaa na ɲiga bɛɛri, 60 kɔnhɔ ɲiŋɛ ki shi wu bɛɛri di li cɛ na Tɛhɛnɛ Baa Kilɛ wu ɲɛ Kilɛ we, na watii ɲɛ wà nige wɛ. 61 Yee ya yaa na pye ni Tɛhɛnɛ Baa Kilɛ, wù Kilɛ wu ni yi zɔlɔɔ pu bɛɛri na, yʼi daha wu saliyaa pu na, yʼi da wu ɲɔmɛjogoo ki koo ɲaari, ma na jo ba yi wa li pyi mɛ niɲaa wɛ!»
Saraya yemu pʼa wolo Tɛhɛnɛ Baa Kilɛ mu ge
(2 Caŋa Ɲɛhɛɛ Jomɔ 7:4-10)
62 Ayiwa, a saan we, ni Izirayɛli bɛɛri di saraya wolo Tɛhɛnɛ Baa Kilɛ mu. 63 A Solomani di ɲaɲiŋɛ saraga ka wolo; a wu yapɔrɔgbɔyɔ kabɔfoŋɔɔ kɛlɛɛ shuun ni shuun (22.000), ni yapɔrɔbya kabɔfoŋɔɔ xhuu nigin ni kɛlɛɛ shuun (120.000) wolo Tɛhɛnɛ Baa Kilɛ mu. Lee kangana li na saan we ni Izirayɛli shɛɛn pu bɛɛri ya Kilɛ-pɛɛŋɛ pugbɔhɔ ki kan Tɛhɛnɛ Baa Kilɛ mu. 64 Kee caŋa kiyɛ pyaa, kaaŋa kemu ki ɲɛ Tɛhɛnɛ Baa Kilɛ wo puga ki ɲahagbaa li na ge, a saan wu kee bɛ kan Tɛhɛnɛ Baa Kilɛ mu: a wu saraya nizogoyo yi wolo wà, ni shinma saraya, ni ɲaɲiŋɛ saraya yi wo sìnmɛ pe, bani daɲaa saraya nizogoyo yi tawologo kemu ki ɲɛ Tɛhɛnɛ Baa Kilɛ ɲahagbaa na ge, ki bi cɛ́rɛ toro saraya nizogoyo ye, ni shinma saraya ye, ni ɲaɲiŋɛ saraya yi wo sìnmɛ pu wolo wu ni.
65 A Solomani di Buguloo pu wo Kalenɛ li bɛ pye wee tuun wu ni. A wu ni Izirayɛli shɛɛn pu bɛɛri di li pinnɛ pye. Sipyiire ti bi yìri fiige ki bɛɛri ni na pa, na lɔ Lebo-Amati tajege ki na, suumɔ kulo kacɛ ki na, fo na shɛ nɔ Misira wo dugo ki na, woroo kulo kacɛ ki na. A pʼi ba yere Tɛhɛnɛ Baa Kilɛ, wù Kilɛ wu ɲaha tàan na ta cabyaa gbarashuun, na guri cabyaa gbarashuun wa bɛ pye sanha, a ki bɛɛri di bye cabyaa kɛ ni shishɛɛrɛ. 66 Cewuu shuun wuu li wo caŋa gbarashuun wogo ki wo ɲimuguro ti na, a saan wu koo kan sipyiire ti mu. A sipyiire tʼi duba pye saan wu mu, na gari pu piyɛyɛ yi ni. Tɛhɛnɛ Baa Kilɛ bi saama pemu bɛɛri pye wu kapyebye Dawuda, ni Izirayɛli, wu sipyii pu mu ge, sipyiire ti bi funŋɔ taan pee saama pu wuu na.