2 Samuwɛli
Samuwɛli wo sɛmɛ shuun wo we
Pʼa Sɔli ni Zhonatan xhu jo Dawuda ɲii na
1
Ayiwa, Dawuda ya se ta Amalɛki shi shɛɛn pu na, na guri pa Sikilagi kulo li ni tuun wemu ni ge, lee bi Sɔli ta wʼa xu na xɔ. A Dawuda di cabyaa shuun pye Sikilagi ni. 2 Caŋa taanri wogo ki na, a ná wa di ba na yìri Sɔli wo kashɛn keŋɛ ki yíri, wu fàya yi dʼa shɛɛngi, ɲuŋɔ ke dʼa tɔ gbazhɛnhɛ na. Ba wʼa nɔ Dawuda na wɛ, na nuguro sin na ɲaha ke buri ɲiŋɛ ke na. 3 A Dawuda di wu yege na: «Mii mu dʼa yìri wɛ?» A wu jo: «Nɛ paa shɔ, na yìri Izirayɛli shɛɛn pu wo kashɛn keŋɛ ki na.» 4 A Dawuda di wu pye: «Ɲaha ni ɲaha ki dʼa pye wà wɛ? Nʼa ma ɲɛɛri, yi ɲaha jo na mu!» A ná wu jo: «Kashɛnŋmuu pʼa paa na caaga, pu niɲɛhɛmɛɛ pʼa to na xu. Sɔli yɛpyaa ki bɛ ni wu ja Zhonatan ya xu.» 5 Lɛvɔɔ wu wʼa pee jomɔ pu jo ge, a Dawuda di wu yege na: «A mʼi li cɛ dii na Sɔli ni wu ja Zhonatan ya xu wɛ?» 6 A lɛvɔɔ wu jo: «Nɛ bi bye Gilibowa faaboboŋɔ ki na, lee bi Sɔli ta wʼa wu canmi wu taga wuyɛ tɔhɔ, kashɛn wotoriyo fɛɛ pu dʼa wu fɔri.a 7 A wu ŋmahana ɲɛri, na nɛ ɲa, na nɛ yiri, a nɛ jo: ‹Ooyi› 8 A wu nɛ pye: ‹Jɔgɔ mu di ɲɛ wɛ?› A nɛ wu pye: ‹Amalɛki shi shɛn nɛ ɲɛ.› 9 A wu nɛ pye: ‹Nʼa ma ɲɛɛri, pa yere na tàan, mʼa na gbo, bani nɛ bɛɛri wu ɲɛ ɲawɔhɔ, ali ma na yaha bɛ ɲiifɛɛrɛ ni.› 10 A nɛ fulo wu na, na wu gbo, bani wu bi da ga já voro li ni wɛ. Saanra ɲudɔnɔ le li bye wu ɲuŋɔ ki ni ge, ni ɲɔhɔrɔ te ti bye wu keŋɛ ki na ge, a nɛ yee lɔ na pa ma mu, na kafɔɔ we!»11 Lee na, a Dawuda di wu fàya yi shɛɛngi, piimu bɛɛri pu bye ni wu ni ge, a pee bɛ di pu wo fàya yi shɛɛngi. 12 A pʼi tataara pye, na mɛhɛɛ su, na suun le fo na shɛ nɔ yakoŋɔ ki na, Sɔli ni wu ja Zhonatan, ni Tɛhɛnɛ Baa Kilɛ wo kashɛn keŋɛ ke, ni Izirayɛli shɛɛn pu wuu na, pee piimu pʼa bi kori kashɛn ki ni ge.
13 Lɛvɔɔ wu wʼa pee jomɔ pu jo Dawuda mu ge, a Dawuda di wu yege na: «Mii shɛn mu di ɲɛ wɛ?» A wu jo: «Amalɛki shi shɛn nadadiinmɛ wa wo ja nɛ ɲɛ.» 14 A Dawuda di wu pye: «Tɛhɛnɛ Baa Kilɛ ya ná wemu shɔɔnri lɔ ge, a mu di bye dii na sɔɔ, na já keŋɛ taha wee na, na wu gbo wɛ?» 15 A Dawuda di wu kapyebye wa yiri na wu pye: «Fulo, mʼa we gbo!» A wee ná wu Amalɛki shi shɛn wu kpɔn, a wu xhu. 16 A Dawuda di jo: «Ma shishan pu foo li to mayɛ pyaa ki ɲuŋɔ ni! Mayɛ pyaa ɲɔ kʼa pye ma sɛɛri, bani mʼa jo na: ‹Tɛhɛnɛ Baa Kilɛ ya ná wemu shɔɔnri lɔ ge, nɛ wu gbo!› »
Dawuda ya yamɛɛ lemu su Sɔli ni Zhonatan na ge
17 Ayiwa, a Dawuda di le yamɛɛ le su Sɔli ni wu ja Zhonatan na. 18 A wu jo na pu Zhuda wo tirige shɛɛn pu taanni lee yamɛɛ li ni. Ŋmaŋmɔŋɔ wo yoceege ki ɲɛ kii, kʼa ka tiimɛ fɔɔ wu wo sɛmɛ wu ni na:b
19 «Ee, Izirayɛli, ma naŋmaya ya gbo ma faaboboyo yi na!
A kashɛn naŋmaya yʼi bye dii na do na xu wɛ?
20 Yi ganha bu shɛ yee jo Gati kulo li ni wɛ.
Yi ganha bu yi jo jaaga Ashikalɔn kulo li kakuuyo yi ni wɛ,
kɔnhɔ Filisiti shɛɛn pushaa pu ganha bu funŋɔ tàan wɛ,
kɔnhɔ cekɔnbaalaa pushaa pu ganha ba sirani dadaga na wɛ.
21 Gilibowa wo faaboboyo ye, mɛŋɛ ganha ga da gbɔn yee na nige wɛ,
zanha ganha ga do nige yee na wɛ.
Faa ɲiŋɛ nijeŋɛ ganha ga da nige yee na wɛ.
Bani wà kashɛn naŋmaya yi wo ŋmasigiye yʼa shiige,
Sɔli wo ŋmasigiŋɛ ke, sìnmɛ ya taga ki jɔgɔ wɛ.
22 Zhonatan wo sindaa ki ya shɛ ɲa kashɛn na,
ni ki ya pɛɛn pu wo shishan wo,
na kashɛn naŋmaya gbo wɛ.
Sɔli wo ŋmɔpara li bi fòro
ni li ya kaa shɛ li pɛɛn pu na wɛ.
23 Sɔli ni Zhonatan tɔn bi taan
pu shi wu caŋa ɲɛhɛɛ ki bɛɛri ni.
Pu ya waa laha puyɛ na pu xuduun wu bɛ ni wɛ.
Pu tɔɔyɔ bi wɛri na ye ɲaa bɛ na.
Pu baraga bi pɛlɛ na ye cɛnri bɛ na.
24 Izirayɛli pushaa, yi yamɛhɛɛ su Sɔli na.
Wee wu bi fazaaya leni yee na,
na sanni taga na yee faleye yi toni.
25 A kashɛn naŋmaya yʼi bye dii na do na xu,
na kashɛn ki yaha ki niŋɛ ni wɛ?
A Zhonatan di bye dii na xhu ma faaboboyo yi na wɛ?
26 Na ceborona Zhonatan, mu wuu na funyaŋa wa nɛ na!
Ma kaa bi waha na mu fo xuuni.
Ma taanra ti baraga bi pɛlɛ nɛ mu na ye cee wo taanra na.
27 A kashɛn naŋmaya yʼi bye dii na do na xu wɛ?
A kashɛn yagboyo yʼi bye dii na gyɛɛgi wɛ?»