Sɔli xu keree
31
Ayiwa, lee bi Filisiti shɛɛn pu bɛ ta pʼa kashɛn yirige Izirayɛli shɛɛn pu fɛni, a Izirayɛli shɛɛn pʼi baa Filisiti shɛɛn pu ɲaha na. A pʼi Izirayɛli shɛɛn niɲɛhɛmɛɛ gbo Gilibowa faaboboŋɔ ki na. 2 A Filisiti shɛɛn pʼi daha Sɔli ni wu nagoo pu na. A pʼi Sɔli jalaa taanri wu gbo: Zhonatan, ni Abinadabu, ni Maliki-Shuwa. 3 A kashɛn kʼi digi Sɔli na. A sindaaya fɛɛ pii di ba shɛ wu ɲa na wu cɛ. A ŋmaga ka di wu bana fo xuuni. 4 A Sɔli di wu kashɛn yagboyo yi covɔɔ wu pye: «Ma ŋmɔpara li kɔɔngi mʼa na gbo, kɔnhɔ di ganha ba bye pii cekɔnbaalaa pii mu yaxɔnhɔŋɔ wɛ.» A wu kashɛn yɛrɛyɛ yi lɔvɔɔ wu bye wu ya sɔɔ na lee pye wɛ, bani wu bi fya xuuni. Wee tuun wu ni a Sɔli yɛpyaa di wu wo ŋmɔpara li lɔ, na wuyɛ yaha to li ɲuŋɔ ni. 5 Ba wu kashɛn yagboyo yi lɔvɔɔ wʼa lee ɲa wɛ, a wu bɛ di wuyɛ yaha to wu wo ŋmɔpara li ɲuŋɔ ni, a wu ni Sɔli bɛɛri di xhu. 6 Ayiwa, a Sɔli ni wu jalaa taanri we, ni wu kashɛn yagboyo yi lɔvɔɔ we, ni wu kashɛnŋmuu pusamaa bɛɛri di binnɛ xu mu kee caŋa. 7 Izirayɛli shɛɛn piimu pu bye tiinnɛ na faaya yi tɛ fawii li kogii wu na ge, ni piimu pu bye Zhurudɛn gba wu kogii wu na ge, a pee di Izirayɛli wo kashɛn keŋɛ ki sipyii pu ɲa pu na fe na jaaga, Sɔli ni wu jalaa pu bɛ dʼa xu. A pu bɛ di fɛ, na pu wo kulogoo ki yaha yaha, a Filisiti shɛɛn pʼi shɛ diin kee ni.8 Ɲimuguro ti na, a Filisiti shɛɛn pʼi ba di ba xuu pu yaŋmuyɔ yi kuu lɔ, na ba Sɔli ni wu jalaa taanri wu nixhuyo ta Gilibowa faaboboŋɔ ki na. 9 A pʼi Sɔli ɲuŋɔ kɔn, na wu kashɛn yagboyo yi lɔ. Lee kadugo na a pʼi lee kataan li jo na caaga Filisiti fiige ki bɛɛri ni, pu yapɛrɛɛ gbaya ye, ni sipyiire ti mu. 10 A pʼi Sɔli wo kashɛn yagboyo yi yaha yapɛrɛɛ Ashera wo gbaha ki ni, na wu nixhugo ki kori Bɛti-Shan kulo li wo kashɛn ɲaha kɔn kɔn kasɔrɔgɔ ki na.
11 Filisiti shɛɛn pʼa lemu pye Sɔli na ge, ba Galadi koomɔ pu wo Yabɛshi shɛɛn pʼa yee logo wɛ, 12 a pu kashɛn naŋmaya yi bɛɛri di piige ki bɛɛri pye ɲara na, na shɛ Sɔli nixhugo ke ni wu jalaa pu nixhuyo yi laha Bɛti-shan wo kashɛn ɲaha kɔn kɔn kasɔrɔgɔ ki na. Lee kadugo na, a pʼi guri pa Yabɛshi kulo li ni, na ba pu sorogo wà. 13 A pʼi pu kaciiye yi lɔ, na yi le tamali tige ka nɔhɔ ni Yabɛshi kulo li ni. A pʼi suun le na ta cabyaa gbarashuun.