Amalɛki shi shɛɛn pʼa Sikilagi kulo li ja
30
Ayiwa, caŋa taanri wogo ki na a Dawuda ni wu kashɛnŋmuu pʼi nɔ Sikilagi kulo li ni. A pʼi shɛ Amalɛki shi shɛɛn pu ta pʼa shɛ do Zhuda koomɔ pu woroo kulo kacɛ ke ni Sikilagi kulo li na. Pʼa bi Sikilagi kulo li ja, na li sorogo. 2 Pʼa bi kulo li cèe pee ni sipyiire tisara co, sipyilɛyɛ fara nɔhɔpiire na. Ga pu bi ta sipya bɛ gbo pu ni wɛ, pʼa bi pu co yɛ na gaaŋi. 3 A Dawuda ni wu kashɛnŋmuu pʼi nɔ kulo li ni, na li ta lʼa sogi, pu cèe ni pu jalaa ni pu pushaa pu bɛ dʼa co na kari. 4 A Dawuda ni wu kashɛnŋmuu pʼi mɛhɛɛ su na fɛngi, na pu fanhaya xɔ, fo na pye pu ya já mɛhɛɛ su bɛ nige wɛ. 5 Pʼa bi Dawuda cèe shuun wu bɛ co na kari, Jizirɛli shɛɛn Akinɔmu ni Abigali, wee wemu wu bi fɛnhɛ pye Karimɛli shɛɛn Nabali wo shɔ wu ge.a6 A Dawuda funŋɔ di sii cɔnri fo xuuni, bani sipyiire ti bi yu na pu wu wá gbo ni kagereye ni, ma li kaɲuŋɔ pye pu bɛɛri zɔlɔɔ ya tanha pu jalaa ni pu pushaa pu keree na. Ga a Dawuda di fanha ta Tɛhɛnɛ Baa Kilɛ, wu Kilɛ wu ni. 7 A wu Ayimelɛki ja saraya ɲaha shɔɔnrivɛɛ Abiyatari pye: «Nʼa ma ɲɛɛri, pa ni efodi† wu ni!» A Abiyatari di ba ni efodi wu ni Dawuda mu.b 8 A Dawuda di Tɛhɛnɛ Baa Kilɛ yege na: «Nɛ bu ke kuruŋɔ ke nɔhɔ niinɛ, ta nɛ na pu ta di joo?» A Tɛhɛnɛ Baa Kilɛ di jo: «Pu nɔhɔ niinɛ, ma na pu ta, na yi sipyii pu shɔ pu na.»
9 A Dawuda ni wu kashɛnŋmuu xhuu gbaara (600) wu pu nɔhɔ niinɛ. A pʼi shɛ nɔ Bezɔri dugo ki ɲɔ na, piimu pu bi bye kadugo yíri wu ni ge, a pee di gori wà. 10 A Dawuda di doro ni namaa xhuu shishɛɛrɛ (400) ni. A namaa xhuu shuun (200) wu gori Bezɔri dugo ki ɲɔ ki na, pee ya já dugo ki kɔn ɲɛri kanhama keŋɛ ni wɛ. 11 A Dawuda wo namaa pʼi shɛ saha ni Misira shɛn wa ni, na gari ni wee ni Dawuda mu. A pʼi wu kan wʼa li, na gba. 12 A pʼi nitoroŋɔ gatowaara bɛ kan wu mu, ni ɛrɛzɛn gato ɲilee shuun. Ba wʼa li xɔ wɛ, na fanha ta, bani cabyaa taanri ni piiye taanri wu bi ta libaa ni lɔhɔ gbabaa. 13 A Dawuda di wu pye: «Jɔgɔ wo mu di ɲɛ wɛ? Mii ma dʼa yìri wɛ?» A wu jo: «Misira fiige ki lɛvɔɔ wa nɛ ɲɛ, Amalɛki shi shɛn wa wo bulona. Nɛ kafɔɔ wʼa na wá niɲaa ɲɛ li caŋa taanri wogo, ma li kaɲuŋɔ pye nɛ cuuŋɔ wɛ. 14 Kashɛn wèe ya shɛ ŋmɔ Kerecɛɛn pu wo fiige ki woroo kulo kacɛ ki na, ni Zhuda wo fiige ke, ni Kalɛbu wo woroo kulo kacɛ ke. A wèe di Sikilagi kulo li sorogo.» 15 A Dawuda di wu pye: «Ta ma na já nɛ ɲaha co di zhɛ kee kuruŋɔ ki yíri ya?» A ná wu jo: «Fo ma bu fɛnhɛ kàa nɛ mu Tɛhɛnɛ Baa Kilɛ na, na ma wa da na gbo wɛ, ma di wa da na kuruŋɔ di gan na kafɔɔ wu mu wɛ, lee bu bye, nɛ na ma ɲaha co na shɛ kuruŋɔ ki yíri.»
Dawuda ya se ta Amalɛki shi shɛɛn pu na
16 A Misira shɛn wu Dawuda ɲaha co lee cogana li na na kari Amalɛki shi shɛɛn pu wo kuruŋɔ ki yíri. Lee bi Amalɛki shi shɛɛn pu ta pʼa caaga siwaga ki bɛɛri ni, na li, na gbuu, na kalenɛ pyi pu yaŋmudaya yi wuu na, pʼa yemu kuu lɔ Filisiti shɛɛn pu wo fiige ke ni Zhuda wu fiige ki ni ge. 17 A Dawuda di nɔ na do pu na, na ganha na kashɛn kɔɔn pu na, na lɔ ɲimuguɲɔ wu na, fo na shɛ nɔ ɲimuguro ti wo yakoŋɔ ki na. Shɛn nigin bɛ ya shɔ to pu ni wɛ, fo lɛvɛɛ xhuu shishɛɛrɛ (400) wemu yɛ wʼa dugi ɲɔhɔyɔ na, na baa gbee ge. 18 Yaŋmuyɔ yemu bɛɛri Amalɛki shi shɛɛn pʼa bi kuu lɔ ge, a Dawuda di yee bɛɛri shɔ pu na. A wu wu cèe shuun wu bɛ shɔ pu na. 19 Shɛn nigin bɛ ya ta wʼa fɔ Dawuda wo sipyii pu ni wɛ, sipyilɛgɛ fara nɔhɔcɛrɛ na, pu jalaa pu fara pu pushaa pu na. Amalɛki shi shɛɛn pʼa bi pu yaŋmuyɔ yemu shɔ pu na, na yemu bɛɛri kuu na kari ge, nigin bɛ ya fɔ yee bɛ ni wɛ. A Dawuda di yi bɛɛri kuruŋɔ na pa. 20 A Dawuda di yapɔrɔbya we ni yapɔrɔgbɔyɔ yi shɔ pu na. Piimu pʼa bi yee yapɔrɔyɔ yi kɔri na ma ge, a pee di ganha na yu na: «Dawuda wo kashɛn yataya yi ɲɛ ye!»
21 Ayiwa, namaa xhuu shuun (200) wemu wʼa bi sii kanha fo xuuni na da Bezɔri dugo ki ɲɔ ki na ge, a Dawuda di shɛ nɔ pee na. A pee di yìri na shɛ Dawuda ni sipyiire ti ɲuŋɔ círi. A Dawuda di fulo pu na, na pu shaari. 22 Sipyikuuyo ni laɲɔbaalaa piimu pu bi bye Dawuda wo sipyii pu ni ge, a pee di jo: «Ni pii di ya ta shɛ ni wèe ni wɛ, yaŋmuyɔ yemu bɛɛri wèe ya ta kashɛn ki ni ge, yaaga bɛ da gan we wa mu yee ni wɛ, fo pu cèe pu ni pu nagoo pu yɛ. Pu pa pee lɔ, pu da gaaŋi.» 23 Ga a Dawuda di jo: «Lemu Tɛhɛnɛ Baa Kilɛ ya kan wèe mu ge, wù ganha bu lee pye le pyegana le na wɛ. Bani wʼa wèe mara, kashɛn keŋɛ ke kʼa pa do wèe na ge, na kee le wèe keŋɛ ni. 24 Sipya wa shishiin wa da zɔɔ le na yee mu wɛ. Wemu ya shɛ kashɛn ki na ge, ni wemu wʼa kori yɛrɛyɛ yi tàan naha ge, pee bɛɛri wo tahaa ya yaa na pye ninuŋɔɔ. Yaŋmuyɔ ya yaa na taa nidannumɔ na pu bɛɛri na.» 25 Na co kee caŋa ki na, a lee di bye kodoronɔ, na bye kalɛɛ Izirayɛli fiige ki ni fo na pa nɔ niɲaa na.
26 Ba Dawuda ya kuri pa nɔ Sikilagi kulo li ni wɛ, yaŋmuyɔ yemu wʼa ta kashɛn ki ni ge, a wu yee ya kan kari Zhuda wo nɔhɔlɛɛ pu mu, wu naɲiinɛɛ pee, na pu pye: «Yee wo ma yakanya yi wa ye na foro Tɛhɛnɛ Baa Kilɛ wo pɛɛn pu wo yaŋmuguuyo yi ni!» 27 A wu ya yaha kari Bɛtɛli wuu pu mu, na ya yaha kari Aramoti wuu pu mu woroo kulo kacɛ ki na, na ya yaha kari Yatiri wuu pu mu, 28 na ya yaha kari Aroyɛri wuu pu mu, na ya yaha kari Sifimoti wuu pu mu, na ya yaha kari Ɛshimowa wuu pu mu, 29 na ya yaha kari Arakali wuu pu mu, na ya yaha kari Yeramɛli shi shɛɛn pu wo kulogoo ki wuu pu mu, na ya yaha kari Keni shi shɛɛn pu wo kulogoo ki wuu pu mu, 30 na ya yaha kari Ɔrima wuu pu mu, na ya yaha kari Bɔri-Ashan wuu pu mu, na ya yaha kari Ataki wuu pu mu, 31 na ya yaha kari Eburɔn wuu pu mu. Dawuda ni wu sipyii pʼa ɲaari toro kulogoo kiimu bɛɛri ni ge, a wu ya yaha kari kee kulogoo ki wo nɔhɔlɛɛ pu mu.