Filisiti shɛɛn pu ya ta sɔɔ Dawuda wu pinnɛ shɛ ni pu ni kashɛn ki na wɛ
29
Ayiwa, a Filisiti shɛɛn pʼi shɛ pu kashɛn keye yi bɛɛri pinnɛ Afɛki kulo li ni, a Izirayɛli shɛɛn pʼi shɛ pu wo kashɛn keŋɛ ki sin Jizirɛli wo lobulowii li tàan. 2 A Filisiti shɛɛn ɲuŋɔfɛɛ pʼi pu kashɛn kuluyo yi ɲaha co, xhuu nigin nigin (100) wo kuluyo ye, ni kabɔfoŋɔɔ nigin nigin (1.000) wo kuloyo ye. A Dawuda ni wu wo kashɛnŋmuu pʼi kashɛn keye yi ɲɔ tɔ na ma ni saannaa Akishi ni. 3 A Filisiti shɛɛn ɲuŋɔfɛɛ pʼi jo: «Ɲaha pii Heburuu pii di zhaa naha wɛ?» A Akishi di Filisiti shɛɛn ɲuŋɔfɛɛ pu pye: «Dawuda wemu wu bi bye Izirayɛli fiige ki saannaa Sɔli wo kapyebye ge, wee wu wa. Wu wa ni nɛ ni lʼa ɲɛhɛ nimɛ yee na, wu ni wu cabaŋa ni, nɛ sanha digi ɲa wu na wɛ, fo na pa nɔ niɲaa na.» 4 Ga a Filisiti shɛɛn ɲuŋɔfɛɛ pʼi logoo yirige Akishi tàan na wu pye: «We ná we yaha, tatɛɛngɛ kemu mʼa kan wu mu ge, wu guri wʼa se wà, wu ganha bu da zhɛ ni wù ni kashɛn ki na wɛ. Wèe wa fyagi jo wu ganha bu ba shɛ ɲɛri wù pɛn kashɛn ki sige ni wɛ. Dii we ná we di da já wuyɛ tɔn taan wu kafɔɔ wu mu na ta wu ya shɛ ni wèe sipyii pii wo ɲuŋmogoo ni wu mu-i wɛ? 5 Ta we Dawuda we mu bɛ pu bi ciire ti cee na yu wɛ na:‹Sɔli ya sipyii kabɔfoŋɔɔ niɲɛhɛŋɛɛ gbo,
a Dawuda di sipyii kabɔfoŋɔɔ kɛlɛɛ niɲɛhɛmɛɛ gbo!› »a
6 Wee tuun wu ni a Akishi di Dawuda yiri na wu pye: «Tɛhɛnɛ Baa Kilɛ ɲìi wo wu mɛgɛ na, sipya ma ɲɛ wemu ya tii ge, na fara lee na, lʼa bi tàan nɛ ni, mu wu pinnɛ shɛ ni nɛ ni kashɛn ki na, wù shɛ binnɛ kuri. Bani ma ni ma cabaŋa ni nɛ yíri, nɛ sanha kaa la shishiin zɔ ɲa ma na wɛ, fo na pa nɔ niɲaa na. Ga ma kaa ya ta taan Filisiti shɛɛn ɲuŋɔfɛɛ pu mu wɛ. 7 Lee na do, kuri, ma da se ɲaɲiŋɛ na, kɔnhɔ kaa la ganha bu ba ɲa lemu ya bɛ Filisiti shɛɛn ɲuŋɔfɛɛ pu mu wɛ.»
8 A Dawuda di Akishi pye: «Lekɛ nɛ dʼa pye, lee di ɲɛ kaɲuŋɔ di na ɲaha kɔn di zhɛ kashɛn kɔn na kafɔɔ saan wu wo pɛɛn pu na wɛ? Nɛ ni na cabaŋa ni ma yíri, fo na pa nɔ niɲaa na, kaa lekɛ na ma dʼa tigi ɲa ma kapyebye wu na wɛ?» 9 A Akishi di Dawuda pye: «Go nɛ lee cɛ. Bani mu kaa ya dan nɛ ni ba Kilɛ wo tudunmɔ wa ɲɛ wɛ, ga Filisiti shɛɛn ɲuŋɔfɛɛ pʼa jo: ‹Wʼa da ga binnɛ zhɛ ni wèe ni kashɛn ki ni wɛ!› 10 Lee na do, yi pa sɔɔ yìri, ma ni ma ɲuŋɔfɔɔ wu kapyebyii piimu pʼa taha ma fɛni ge, yi pa sɔɔ yìri, ɲiga ba mugi yɛ, yi da gaaŋi.» 11 Ba ɲiga kʼa pa mugi wɛ, a Dawuda ni wu kashɛnŋmuu pʼi sɔɔ yìri, na gaaŋi Filisiti shɛɛn pu wo fiige ki ni. A Filisiti shɛɛn pʼi gari Jizirɛli ni.