Filisiti shɛɛn pʼa kashɛn gbegele Izirayɛli shɛɛn pu kaa na
28
Yee caya yi na a Filisiti shɛɛn pʼi pu kashɛn keye yi bɛɛri pinnɛ na pye kashɛn keŋɛ nigin, kɔnhɔ pʼi shɛ kashɛn kɔn Izirayɛli shɛɛn pu na. A Akishi di Dawuda pye: «Li cɛ yaha na ma ni ma sipyii pu na ba shɛ fara nɛ na kashɛn ki ni.» 2 A Dawuda di Akishi pye na: «Ayiwa, lemu nʼa da ba shɛ bye ge, ma na ba lee ɲa!» A Akishi di Dawuda pye: «Lee na dɛ, nʼa da ba ma pye nayɛ pyaa wo ɲuŋɔ sigevɔɔ fo gbee.»Sɔli ya shɛ xuu yirivɔɔ wa mu
3 Ayiwa, lee bi Samuwɛli ta wʼa xu, a Izirayɛli shɛɛn pu bɛɛri di yamɛhɛɛ su wu na, na shɛ wu le Arama kulo li ni, wuyɛ pyaa wo kulo le. Sɔli bi xuu yirivɛɛ pee ni celɔbyii pu bɛɛri wo labye wu yereŋɛ fiige ki ni.a
4 A Filisiti shɛɛn pʼi shɛ binnɛ, na pu kashɛn keŋɛ ki sin Shunɛmu kulo li ni. A Sɔli di Izirayɛli shɛɛn pu bɛɛri pinnɛ, na shɛ pu kashɛn keŋɛ ki sin Gilibowa wo faaboboŋɔ ki na. 5 Ba Sɔli ya Filisiti shɛɛn pu wo kashɛn keŋɛ ki ɲa wɛ, na fya, a wu zɔ wu sii kɔn to. 6 A wu shɛ Tɛhɛnɛ Baa Kilɛ yege, ga Tɛhɛnɛ Baa Kilɛ ya ta wu ɲɔ shɔ wɛ: Wu ya wu ɲɔ shɔ ŋmunɔgɔ ni wɛ, wu ya wu ɲɔ shɔ ni urimu† wu ni wɛ, wu di ya Kilɛ tudunmɔ wa bɛ taga wu ɲɔ shɔ wɛ.b
7 Lee funŋɔ ni, a Sɔli di wu kapyebyii pu pye: «Yi shɛ cee wa sha, wemu ya xuu yegee ge, kɔnhɔ di shɛ wu mu.» A pʼi wu pye: «Cee wa wà Eyini-Dɔri kulo li ni na xuu yegee.» 8 A Sɔli di fàya yatii le kɔnhɔ wa ganha bu wu cɛ wɛ. A wu gari ni namaa shuun ni. A pʼi shɛ nɔ cee wu puga piige ni. A Sɔli di cee wu pye: «Nʼa ma ɲɛɛri, gbo wa yiri, mʼa celɔrɔ pye na mu. Gbo wemu nʼa da ba zhɛ ma na ge, mʼa wee yiri.» 9 A cee wu wu pye: «Sɔli ya lemu pye ge, go mʼa li cɛ. Wʼa xuu yirivɛɛ pee ni celɔbyii pu bɛɛri wo labye wu yereŋɛ. Ɲaha na ma dʼa pa tifuugo taga na pɛri, kɔnhɔ mʼa na le xu ni wɛ?» 10 A Sɔli di ke kaaga ke kàa wu mu Tɛhɛnɛ Baa Kilɛ mɛgɛ na na: «Tɛhɛnɛ Baa Kilɛ ɲìi wo wu mɛgɛ na, jaagi wa shishiin wʼa da do ma ɲuŋɔ ni le kaa le ni wɛ.» 11 A cee wu jo: «Ma funŋɔ wa di gbo wekɛ yiri wɛ?» A wu jo: «Samuwɛli yiri.»
12 Ba cee wʼa Samuwɛli ɲa wɛ, na mɛɛgɛ ja, na Sɔli pye: «Ɲaha na ma dʼa na faanna wɛ? Sɔli mu ɲɛ!» 13 A saan wu jo: «Ma ganha bu da vya wɛ! Ɲaha ma dʼa ɲa wɛ?» A cee wu Sɔli pye: «Nɛ ɲi wa yafugunɔ la ni li na fòro ɲiŋɛ ke ni na duri.» 14 A wu cee wu pye: «Li ɲimɛ kɔn shɛ na na.» A cee wu jo: «Nɔhɔlɛ wa wʼa yìri na duri, fadegbɔhɔ ki wa wu na.» Lee funŋɔ ni a Sɔli di li cɛ na Samuwɛli wu ɲɛ wii, a wu nuguro sin, na ɲaha ke buri ɲiŋɛ ke na. 15 A Samuwɛli di Sɔli pye: «Ɲaha fɛni ma dʼa na tatɛɛngɛ kyɛɛgi, na na pye di yìri dugi wɛ?» A Sɔli di jo: «Nɛ cɔnrɔmɔ wo we bɛɛri wu ɲɛ. Filisiti shɛɛn pʼa kashɛn yirige na fɛni, a Tɛhɛnɛ Baa Kilɛ di laraga kɔn na na. Wu ya ta na ɲɔ shɔ Kilɛ tudunmɔ wa ɲɔ na wɛ, wu di ya na ɲɔ shɔ ŋmunɔgɔ bɛ ni wɛ. Lee wuu na nɛ ma yiri ma ba na nibyii shɛ na na.» 16 A Samuwɛli di jo: «Ni Tɛhɛnɛ Baa Kilɛ ya laraga kɔn mu na, na ɲɛri ma pɛn, wee tuun wu ni ɲaha fɛni ma di na yegee wɛ? 17 Lemu Tɛhɛnɛ Baa Kilɛ ya pye ge, lee wu bi jo nɛ mu nɛ jo mu mu. Tɛhɛnɛ Baa Kilɛ ya saanra ti shɛɛngi wolo ma keŋɛ ni, na ti kan watii mu, wee ɲɛ Dawuda.c 18 Bani mu ya ta Tɛhɛnɛ Baa Kilɛ ɲɔmɛɛ co wɛ, mu ya ta Amalɛki keree shɔɔnri na bɛ ni Tɛhɛnɛ Baa Kilɛ wo luu li yirigana ni wɛ, lee na Tɛhɛnɛ Baa Kilɛ ya le pye ma na niɲaa.d 19 Tɛhɛnɛ Baa Kilɛ na ba mu ni Izirayɛli shɛɛn pu le Filisiti shɛɛn pu keŋɛ ni. Ɲiga na, mu ni ma jalaa pu na ba bye ni nɛ ni, Tɛhɛnɛ Baa Kilɛ na Izirayɛli wo kashɛnŋmuu pu le Filisiti shɛɛn pu keŋɛ ni.» 20 Taapile ni a Sɔli di do ɲiŋɛ na, fo na sanhana. Samuwɛli wo jomɔ pʼa bi wu fya fo xuuni, na fara lee na, wu fanha bɛ ki bi xɔ, bani wu bi ta yaaga li kee caŋa ki fara kee piige ki na wɛ.
21 A cee wu fulo wu na, na wu ta wʼa sii fyaguunɔ fya, na wu pye: «Nɛ wemu wu ɲɛ ma kapyebye wu ge, nɛ mu ɲɔmɛɛ co, nɛ na munaa pɛrɛ fɔ ni mu wo ɲɔmɛcoro ti ni. 22 Nimɛ, nʼa ma ɲɛɛri jo ma bɛ wu na ɲɔmɛɛ co. Na yaha di yalige kan ma mu kɔnhɔ mʼa fanha ta, mʼa da koo lɔ mʼa gaaŋi.» 23 Ga a Sɔli di lee she na jo: «Nʼa da lii wɛ.» A wu sipyii pee, ni cee wʼi wu karamu, a wu ba xhɔ yi yaha pu woyo yi na. A wu yìri laha ɲiŋɛ ki na, na diin yasinnɛgɛ ki na. 24 Lee bi nupepinŋɛ ka ta cee wu mu kashɔ ki ni, a wu tɔgaaya lɔ na kee gbo. A wu farinimyɛ pa lɔ, na pu tɔnhɔ, na shizhɛnhɛrɛ baa buuri wa fɔ, 25 na ba yee yereŋɛ Sɔli ni wu sipyii pu tàan, a pʼi li. Lee kadugo na a pʼi guri kee piinuŋɔ ki ni.