Dawuda ya shɛ diin Filisiti shɛɛn pu wo fiige ki ni
27
Ayiwa, a Dawuda di ba wu funŋɔ kɔn na jo: «Caŋa nigin Sɔli wa da ga ba nɛ gbo, le lʼa pɔrɔ nɛ mu ge, na fɛ, na shɛ diin Filisiti shɛɛn pu wo fiige ki ni, kɔnhɔ Sɔli di ŋmɔ na niinɛ wu tàan Izirayɛli fiige ki ni, lee bu bye nɛ na zhɔ wu na.» 2 Lee funŋɔ ni a Dawuda di yìri ni wu kashɛn namaa xhuu gbaara (600) wu ni, na gari Gati wo saan wu mu, wee ɲɛ Mawɔki ja Akishi. 3 A Dawuda ni wu sipyii pu ni pu puga shɛɛn pʼi shɛ diin Akishi mu Gati kulo li ni. Dawuda bi bye ni wu cèe shuun wu ni, Jizirɛli shɛɛn Akinɔmu, ni Abigali. Karimɛli shɛɛn Nabali wemu wʼa xu ge, wee wo shɔ wu bye Abigali. 4 A pʼi shɛ Sɔli pye na Dawuda ya paa kari Gati kulo li ni, a Sɔli di Dawuda wu niinɛ wu ɲɔ yaha.5 A Dawuda di Akishi pye: «Nɛ kaa bu da lʼa taan ma mu, nʼa ma ɲɛɛri jo ma ɲà funŋɔ kulo la kan na mu nɛ na já zhɛ diin lemu ni ge. Nɛ wemu wu ɲɛ ma kapyebye ge, nɛ yaa na pinnɛ tiin ni mu ni saanra kulo li ni wɛ.» 6 Ayiwa, kee caŋa kiyɛ pyaa a Akishi di Sikilagi kulo li kan Dawuda mu. Lee lʼa Sikilagi kulo li pye li na ɲɛ Zhuda saannaa pu wo kafɛɛrɛ ni fo na pa nɔ niɲaa we bɛ na.
7 Tuun wemu Dawuda ya pye Filisiti shɛɛn pu wo fiige ki ni ge, wee ya pye yee nigin ni yebyaa shishɛɛrɛ. 8 Dawuda ni wu kashɛnŋmuu pu bi se na kashɛn kɔɔn Geshuri shi shɛɛn, ni Giriziti shi shɛɛn ni Amalɛki shi shɛɛn pu na, bani na co Shuri wo koomɔ pu na, fo na shɛ nɔ Misira fiige ki ni, pee pu bi tiin kee ɲiŋɛ ki na fo taatuunnɔ ni. 9 Dawuda bi kee fiige ki kyɛɛgi, wu bi namaa pee ni cèe pu bɛɛri xuli, na pu yatɔɔyɔ, ni pu niiyɛ yi coni, ni pu kafaya ye, ni pu ɲɔhɔyɔ ye, ni pu fàya ye. Ba wʼa ya bɛɛri kuu wɛ, wu bu guri kari, wʼa shɛ foro Akishi na. 10 Akishi bu wu yege na: «Xuu wekɛ shɛɛn na yi dʼa shɛ do niɲaa wɛ?» Dawuda ma jo na: «Zhuda fiige ki woroo kulo kacɛ ki na,» kelee «Yeramɛli shi shɛɛn pu wo woroo kulo kacɛ ki na,» kelee «Keni shi shɛɛn pu wo woroo kulo kacɛ ki na.» 11 Dawuda bi ná nigin bɛ, kelee cee nigin bɛ ɲìi wo yɛri wu ta pa ni wu ni Gati kulo li ni wɛ. Bani wu bi fyagi na wee sipya wa ganha bu ba pu kapyegee paari wɛ. Lee Dawuda bi byi wu wo tɛɛrɛ li bɛɛri funŋɔ ni, na wu yaha Filisiti shɛɛn pu wo fiige ki ni. 12 Akishi bi daa Dawuda na, wu bi yu wuyɛ funŋɔ ni na: «Dawuda ya wuyɛ tɔn pɛn fo xuuni Izirayɛli shɛɛn pu mu, wu wo shi shɛɛn pee. Wu na ba gori yaha gbee nɛ wo kapyebye.»