Dawuda ya Sɔli yaha sanha gbobaa
26
Ayiwa, a Zifu shɛɛn pii di shɛ yi jo sanha Sɔli mu Gibeya kulo li ni na: «Dawuda nilaraga ki wa Akila faaboboyo yi ni, na ɲaha tii lɔhɔ baa ɲiŋɛ ki na.»a 2 A Sɔli di gari Zifu siwaga ki ni Dawuda fɛni ni Izirayɛli wo kashɛnŋmɔ-jemɛɛ kabɔfoŋɔɔ taanri (3.000) ni. 3 A wu shɛ wu kashɛn keŋɛ ki sin Akila wo faaboboyo yi ni na ɲaha tii lɔhɔ baa ɲiŋɛ ki na, koo li ɲɔ ki na. Lee bi Dawuda ta siwaga ki ni. Ba wʼa li cɛ na Sɔli wʼa wee nɔhɔ niinɛ fo na shɛ nɔ siwaga ki ni wɛ, 4 a wu kasɛɛgɛ pyevɛɛ pii yaha kari, na li cɛ lee funŋɔ ni na Sɔli ya pa can na. 5 Sɔli ya wu kashɛn keŋɛ ki sin xuu wemu ni ge, a Dawuda di gari wà. Xuu wemu ni Sɔli bi sinnɛɛ ge, a wu wee ɲa na fara Nɛri ja Abunɛri bɛ wo tasinnɛgɛ ki na, Sɔli wo kashɛn keŋɛ ki ɲuŋɔfɔɔ we. Kashɛn keŋɛ ki niŋɛ ni Sɔli bi ma sinnɛ, kashɛnŋmuu pu na sinnɛ na wu maha.6 A Dawuda di Xhɛti shi shɛɛn Ayimelɛki ni Abishayi pye: «Jɔgɔ na ba binnɛ ni nɛ ni wù shɛ Sɔli yíri pu kashɛn keŋɛ ki tasinŋɛ ki ni wɛ?» A Abishayi di jo: «Nɛ na ba binnɛ zhɛ ni ma ni.» Abishayi bi bye Zhowabu wo ceborona, pu nu wu mɛgɛ ki bye na Seruya. 7 A Dawuda ni Abishayi di ba gari piige ni kashɛn keŋɛ ki tasinŋɛ ki ni. Sɔli bi sinnɛ na ŋmunɔɔ kashɛn keŋɛ ki niŋɛ ni, wu canmi wu dʼa sin ɲiŋɛ ke na, wu ɲuŋɔ ki tàan, Abunɛri ni kashɛnŋmuu pusamaa dʼa sinnɛ wu maha. 8 A Abishayi di Dawuda pye: «Kilɛ ya ma pɛn wu le ma keŋɛ ni niɲaa, nʼa ma ɲɛɛri, na yaha di na canmi wu taga wu su di gbara ɲiŋɛ ke na tɔɔɲii nigin na, li wa da tɔɔɲii shuun kaa xɔ wɛ!» 9 Ga a Dawuda di Abishayi pye: «Ma ganha bu wu gbo wɛ! Tɛhɛnɛ Baa Kilɛ ya wemu shɔɔnri lɔ ge, jɔgɔ wu da já keŋɛ taha wee na, wufɔɔ di já kori jaagi baa wɛ?» 10 A Dawuda di jo sanha na: «Tɛhɛnɛ Baa Kilɛ ɲìi wo wu mɛgɛ na, Tɛhɛnɛ Baa Kilɛ yɛ nigin pe wʼa yaa na wu kpɔn. Wu na ba xhu wuyɛ ni, kelee wu na ba gori kashɛn ni. 11 Bada! Tɛhɛnɛ Baa Kilɛ ya wemu shɔɔnri lɔ ge, Tɛhɛnɛ Baa Kilɛ wu na tanha di keŋɛ taha wee na! Nimɛ, nʼa ma ɲɛɛri, wu canmi wu lɔ wu ɲuŋɔ ki tàan wu ni, mʼa wu lɔhɔ yaaga ki bɛ lɔ, wù da gaaŋi.» 12 Wee tuun wu ni a Dawuda di canmi we ni lɔhɔ yaaga ki lɔ Sɔli ɲuŋɔ ki tàan wu ni, a pʼi gari. Sipya bɛ ya pu ɲa wɛ, sipya bɛ ya li cɛ wɛ, sipya bɛ di ya ɲɛ wɛ, bani pu bɛɛri pu bi ŋmunɔɔ, ma li kaɲuŋɔ pye Tɛhɛnɛ Baa Kilɛ bi ŋmunumɔ nigbɔ wá pu na.
13 A Dawuda di shɛ yere taliige ni, kabanugo ka na faaboboŋɔ ka wo ɲidii ni, na laraga nigbɔhɔ le wu ni Sɔli wo kashɛn keŋɛ ki tɛ ni. 14 A Dawuda di mujugbɔɔ wá sipyiire te ni Nɛri ja Abunɛri mu na: «Abunɛri, ta mʼa da na ɲɔ shɔ wɛ?» A Abunɛri di jo: «Mu wemu wʼa mujugbɔɔ waa saan wu mu ge, mu di ɲɛ jɔgɔ wɛ?» 15 A Dawuda di Abunɛri pye: «Ta ná bɛ mu ɲɛ wɛ? Mu ɲɔhɔ wekɛ wʼi ɲɛ Izirayɛli ni wɛ? Ɲaha na mu di ya ta saan wu ɲuŋɔ sige-e wɛ, ma kafɔɔ we? Sipya wa wu bi pa saan wu fɛni di ba gbo! 16 Le mu ya pye mɛ ge, li ya ɲɔ wɛ. Tɛhɛnɛ Baa Kilɛ ɲìi wo wu mɛgɛ na, yee ya yaa na yee gbo, bani yee ya ta yi kafɔɔ wu ɲuŋɔ sige wɛ, wee wemu Tɛhɛnɛ Baa Kilɛ ya shɔɔnri lɔ ge! Wii, canmi we ni lɔhɔ yaaga kemu ki bye saan wu ɲuŋɔ ki tàan ge, mii yi wa wɛ?»
17 A Sɔli di Dawuda mujuu li cɛ, na jo: «Na ja Dawuda, ta mu wʼa yu mɛ ya?» A Dawuda di jo: «Oo saan we, na kafɔɔ we, nɛ wu wa!» 18 A wu jo sanha na: «Ɲaha na ma di na niinɛ wɛ? Lekɛ di da pye wɛ? Kapyebaana lekɛ di da pye wɛ? 19 Nimɛ, saan we, na kafɔɔ we, nʼa ma ɲɛɛri jo ma niwegee shan ni na jomɔ pu ni. Li bu da nago Tɛhɛnɛ Baa Kilɛ wʼa mu pye mu na nɛ niinɛ, wee tuun wu ni, wu sɔɔ na mu di yakanga kan wu mu. Ga li shiin bu shɛ da sipyii wo kabee, pee pu laŋi Tɛhɛnɛ Baa Kilɛ ɲaha tàan, bani pʼa na niinɛ niɲaa kɔnhɔ pʼi na waa laha Tɛhɛnɛ Baa Kilɛ wo fiige ki na, na di shɛ kilɛlɛɛ piitiilee pɛlɛ. 20 Ee, nɛ ganha bu da xhuu ma na yaha nʼa lii Tɛhɛnɛ Baa Kilɛ na wɛ! Bani fyɛngɛ nidiige fɛni Izirayɛli wo saan wʼa kashɛn yirige, ma na jo ba pu da ba shazho niinɛ mɛ faaboboyo yi ni wɛ.» 21 A Sɔli di jo: «Jurumu nɛ pye! Na ja Dawuda, kuri pa! Nʼa da kakuunɔ pye nige ma na wɛ, bani nɛ munaa li kaa ya waha ma mu niɲaa wo caŋa ɲii le ni. Fungɔngɔ baara kaa nɛ pye, nɛ piin fo xuuni.» 22 A Dawuda di jo: «Saan wu canmi wu we, ma kashɛnŋmɔ wa yaha pa wu shɔ. 23 Tɛhɛnɛ Baa Kilɛ na ba wù bɛɛri nigin nigin wu saraa na bɛ ni wu tiimɛ pe ni wu ɲɔmɛɛ fɛɛrɛ ti ni, bani Tɛhɛnɛ Baa Kilɛ bi mu le nɛ keŋɛ ni niɲaa, ga nɛ funŋɔ ya pye na kakuunɔ pye mu na wɛ, bani Tɛhɛnɛ Baa Kilɛ wʼa mu shɔɔnri lɔ. 24 Ayiwa, ma munaa li kaa ya waha na mu niɲaa wahagana lekɛ na ge, lee wahagana li na nɛ munaa lʼa da ba waha Tɛhɛnɛ Baa Kilɛ mu, wʼa nɛ wolo na cɔnrɔmɔ pu bɛɛri ni.» 25 A Sɔli di Dawuda pye: «Kilɛ wu baraga le ma ni na ja Dawuda! Lemu bɛɛri ma da ba bye ge, li bɛɛri na ba ɲaha ta ma keŋɛ ni!» A Dawuda di doro na gaaŋi wu tashɛyɛ ni, a Sɔli di guri kari wu puga.