Samuwɛli xu keree
25
Ayiwa, a Samuwɛli di ba xhu. A Izirayɛli shɛɛn pu bɛɛri di puyɛ pinnɛ na yamɛhɛɛ su, a pʼi wu le wuyɛ pyaa wu kulo li ni Arama ni.Nabali ya li she wu da Dawuda tɛgɛ wɛ
Ayiwa, lee kadugo na a Dawuda di yìri wà, na gari Paran siwaga ki ni. 2 Ná wa bye Mawɔn kulo li ni wu keŋɛ yaŋmuyɔ ya di ɲɛ Karimɛli kulo li ni. Naafuugbɔ fɔɔ wu bye wii. Dubyaa kabɔfoŋɔɔ taanri (3.000) ni sikaa kabɔfonɔ nigin (1.000) wu bye wu mu. Lee bi wee ná wu ta Karimɛli kulo li ni wee tuun wu ni na wu dubyaa shiire kɔɔn. 3 Wee ná wu mɛgɛ ki bye na Nabali wu shɔ mɛgɛ di ɲɛ na Abigali. Cee wu bye fungɔngɔ fɔɔ, wu dʼa sii ɲɔ ɲɛwiinɛ ni. Ga ná wu keree ki bi waha, wu kapyegee bɛ dʼa kolo. Kalɛbu wo tirige shɛn wa wu bye wii. 4 A Dawuda di yi logo siwaga ki ni na Nabali wʼa wu dubyaa shiire kɔɔn. 5 A wu sipyii kɛ wa tun wu mu na pu pye: «Yi shɛ Karimɛli kulo li ni, yʼi shɛ Nabali pye na nɛ wu shaari. 6 Yʼi wu pye sanha na: ‹Kilɛ wu shi kan ma mu, Kilɛ wu ɲaɲiŋɛ tirige ma ni ma puga shɛɛn pu na ni ma keŋɛ yaŋmuyɔ yi bɛɛri! 7 Nɛ logo na ma dubyaa shiire mʼa gɔɔn. Tuun wemu ni ma yatɔɔnahamaa pu bye ni wèe ni ge, wèe ya ta kakuunɔ la shishiin pye pu na wɛ, pʼi ya buun dubya nigin bɛ ni na pu yaha ni wèe ni Karimɛli kulo li ni wɛ. 8 Ma na já ma sipyii pu yege kii keree kii na, pu na ki ɲaha jo ma mu. Lee wuu na nʼa li shaa ma mu jo ma na sipyii pu ɲuŋɔ círi ma ɲɔ, bani kalenɛ caŋa na wʼà pa ma mu. Lemu li wa ma keŋɛ ni ge, wʼà ma ɲɛɛri, wèe piimu pu wa ma kapyebyii ge, wèe ni ma ja Dawuda wu ni, lee kan wù mu.› »
9 Ba Dawuda wo sipyii pʼa nɔ wɛ, yemu bɛɛri Dawuda bi jo pu mu ge, a pʼi yee bɛɛri paari cibɛ Nabali mu. Ba pʼa yi jo xɔ wɛ, na cari puyɛ na. 10 A Nabali di Dawuda wo kapyebyii pu pye na: «Jɔgɔ wu ɲɛ Dawuda wɛ? Jɔgɔ wu ɲɛ Zhese wo ja wu wɛ? Niɲaa we ni buloo niɲɛhɛmɛɛ pʼa fe na fòro pu kafɛɛ mu! 11 Buuri we ni logbaga ni xaara temu nɛ gbegele na yatɔɔyɔ yi shiire ti kɔnvɛɛ pu mu ge, nɛ ma yee lɔ na kan sipyii pii mu, nɛ piimu tayirige bɛ yɛrɛ cɛ-ɛ ya?»
12 A Dawuda wo sipyii pʼi guri pa, ba pʼa nɔ wɛ, na yi bɛɛri jo Dawuda mu. 13 Lee funŋɔ ni a Dawuda di wu sipyii pu pye: «Wa bɛɛri wu wu ŋmɔpara lɔ pɔ wuyɛ na.» A wa bɛɛri di wu ŋmɔpara lɔ pɔ wuyɛ na. A Dawuda yɛpyaa bɛ di wu wo ŋmɔpara li pɔ wuyɛ na, a namaa xhuu shishɛɛrɛ (4.000) shishiin di gari ni wu ni kashɛn ki na. A namaa xhuu shuun (200) wu gori yɛrɛyɛ yi tàan.
Abigali ya Dawuda luu ɲiŋɛ
14 Ayiwa, a Nabali wo kapyebye wa di shɛ Nabali shɔ Abigali pye na: «Dawuda ya tudunmɔɔ yaha na pa na yìri siwaga ki ni di ba wèe kafɔɔ wu shaari, a wèe kafɔɔ wu pu fanha. 15 Ma li ta bɛ pii sipyii pii ya saama pye wèe na xuuni. Na wèe yaha sige ki ni, tuun wemu bɛɛri wèe ya pye ni pu ni shiizhan ge, kakuunɔ la shishiin ya wèe ta wɛ, wèe di ya buun wu yaaga nigin bɛ ni wɛ. 16 Tuun wemu bɛɛri wèe ya pye ni pu ni na wù yatɔɔyɔ yi naha ge, pʼa bi wèe ɲuŋɔ sigee caŋa fara piige na, ba kashɛn ɲaha kɔn kɔn kasɔrɔgɔ ɲɛ wɛ. 17 Mu mu li wa nimɛ, lemu mʼa yaa na pye ge, mʼa ma funŋɔ kɔn lee na, bani wèe kafɔɔ we ni wu puga ki bɛɛri wo bɔɔngɔ kʼa gbegele xɔ. Wu keree dʼa waha, sipya ya já jo ni wu ni wɛ.»
18 A Abigali di yìri tɔvuyo na, na buuri ɲuyɔ xhuu shuun (200) lɔ, ni duvɛn foroyo shuun, ni dubyaa kaguro xaara, ni shinma kaaga yataanga ɲii kaguro, ni ɛrɛzɛn niwaara tidaya ɲilee xhuu nigin (100), ni nitoroŋɔ niwaga tidaya ɲilee xhuu shuun (200), na yee taha kafaya ya na. 19 A wu wu kapyebyii pu pye: «Yi toro na ɲaha na, nɛ wa yi kadugo.» Wu ya yaaga jo wu poo Nabali mu wɛ. 20 A wu dugi kafaŋa ka na, na ganha na diri na se faaboboŋɔ ki tigitigimɛ pu ni, lee bi Dawuda ni wu sipyii pu ta pee bɛ na faaboboŋɔ ka tiri wu ɲahatiimɛ pu ni, a pʼi jiri. 21 Lee bi Dawuda ta wʼa jo wuyɛ funŋɔ ni na: «Tawaga ni nɛ we ná we yaŋmuyɔ yi bɛɛri mara siwaga ki ni. Nigin bɛ ya piin wu yaŋmuyɔ yi bɛɛri ni wɛ. A wu ba kakuunɔ taga nɛ wo nizaana li foo tɔ. 22 Sani ɲiga ɲisɔɔgɔ tɛ ni, ná nigin bɛ bu shɔ to Nabali puga ki ni gbobaa, Kilɛ wu bɔɔngɔ shan na ɲuŋɔ ni, wu da la faraa ki na!»
23 Ba Abigali ya Dawuda ɲa wɛ, na tɔɔyɔ wɛrɛŋɛ tigi kafaŋa ki na, na nuguro sin, na ɲaha ke buri ɲiŋɛ ke na, Dawuda ɲahagbaa na. 24 A wu tee nuguro ti sin Dawuda fɛɛ ni na jo: «Na kafɔɔ nɛ wo pu wa nahama pe, nʼa ma ɲɛɛri jo ma logo na ɲɔ na. Nɛ ɲɛ ma kapyebye. 25 Nʼa ma ɲɛɛri jo ma ganha bu shɛ Nabali wo keree ki fɛni wɛ. Wu ɲɛ sipya wɛ. Wu mɛgɛ kʼa wu co xuuni. Wu mɛgɛ ki ɲɛ na Nabali: Nabali kɔri wu ɲɛ na fungɔngɔ baa fɔɔ, wu di fungɔngɔ baa keree bɛ pyi. Nɛ ta ma tudunmɔɔ pu ɲa wɛ. 26 Nimɛ, Tɛhɛnɛ Baa Kilɛ ɲìi wo wu mɛgɛ na, na mayɛ pyaa ki bɛ yaha ɲìi na, Tɛhɛnɛ Baa Kilɛ wʼa ma ɲaha kɔn ma ganha bu shishan wo wɛ, kɔnhɔ mayɛ pyaa ki ganha bu ma wo loyire li foo tɔ wɛ. Ma wo pɛɛn pee, piimu pʼa ma shaa ni kakuunɔ ni ge, pee bɛɛri pu pye ba Nabali ɲɛ wɛ. 27 Yaŋmuyɔ yemu nʼa pa gan ma mu ge, yee shɔ mʼa yi loolo ma ɲaariɲii pu na. 28 Nʼa ma ɲɛɛri jo ma na nahama pu yafa na mu. Tɛhɛnɛ Baa Kilɛ na ba saanra koo li koroŋɔ yaha mu wo puga ki ni, bani Tɛhɛnɛ Baa Kilɛ wo kashɛn ke mʼa ŋmuu. Kakuunɔ la shishiin da ba ɲa ma na ma ɲiifɛɛrɛ ti bɛɛri ni wɛ. 29 Ná wa bu daha ma na na niinɛ, na ma munaa li shaa di wolo, Tɛhɛnɛ Baa Kilɛ, ma Kilɛ wu na ba ma munaa li kemɛ mara xuuni wuyɛ tàan. Ga wu na ba ma pɛɛn pu le sɔwa ni, na pu wá taliige ni. 30 Tɛhɛnɛ Baa Kilɛ ya saama pemu bɛɛri ɲɔmɛɛ lɔ ma mu ge, wu ba ba pee bɛɛri ɲɔ fa ma mu, na ma teŋɛ na pye Izirayɛli shɛɛn ɲuŋɔfɔɔ, 31 funyaŋa kelee funzhaga ka shishiin da ba ma ta na bani mʼa shishan wo kaɲuŋɔ baa wɛ, na bani mayɛ pyaa kʼa ma wo loyire li foo tɔ wɛ. Tɛhɛnɛ Baa Kilɛ ba ba saama pye ma mu, mʼa ma funŋɔ yaha nidogo ni na kaa ni!»
32 A Dawuda di Abigali pye: «Baraga ki taha Tɛhɛnɛ Baa Kilɛ, Izirayɛli wo Kilɛ wu na, wee wemu wʼa mu tun na pa nɛ ɲuŋɔ círi niɲaa ge! 33 Kilɛ wu baraga le ma ni ma fungɔngɔ fɛɛrɛ ti wuu na! Mʼa na ɲaha kɔn shishan wonɔ na niɲaa, a nɛ bye nɛyɛ pyaa ya ta na wo loyire li foo tɔ wɛ. 34 Tɛhɛnɛ Baa Kilɛ ɲìi wo wu mɛgɛ na, Izirayɛli wo Kilɛ we, wee wemu wʼa nɛ ɲaha kɔn kakuunɔ bye na mu na ge, mu da bye mu ya tɔɔyɔ wɛrɛŋɛ na pa jiri nɛ na wɛ, sani ɲiga ki mugi ge, ali ná nigin bɛ bi da zhɔ do Nabali wo puga ki ni wɛ!» 35 Yaŋmuyɔ yemu ni Abigali ya pa ge, a Dawuda di yee shɔ, na wu pye: «Ta se ma puga ɲaɲiŋɛ na. Nʼa ma jomɔ pu logo, na sɔɔ ma nijoyo yi na.»
Nabali ya xu, a Dawuda di Abigali leŋɛ
36 A Abigali di guri kari wu puga, na shɛ nɔ Nabali ta wʼa kalenɛ nigbɔɔ la gbegele ba saannaa wuu ɲɛ wɛ. Wu fundangbɔhɔ wo wu bye, wu da sii gba fo na ɲi duvɛn na. Abigali ya yaaga jo wu mu wɛ, fo na shɛ ɲiga ki pye kʼa mugi. 37 Ɲisɔɔgɔ ki na, lee bi sinmɛ pu ta pʼa Nabali yaha, lemu lʼa pye toro ge, a wu shɔ wu yee paari wu mu. A wu bye kanna yaaga ka kʼa wu su wu zɔ wu na, a wu bye ba faapinnɛ ɲɛ wɛ. 38 Ba cabyaa kɛ shishiin ya toro lee kadugo na wɛ, a Tɛhɛnɛ Baa Kilɛ di Nabali kpɔn, a wu xhu.
39 Ba Dawuda ya Nabali xhu wu logo wɛ, na jo: «Baraga ki taha Tɛhɛnɛ Baa Kilɛ na, wee wʼa yogo jo nɛ kaa na, Nabali wo fanhara ti keree na, na nɛ ɲaha kɔn kakuunɔ bye na! Kakuunɔ lemu Nabali ya pye ge, Tɛhɛnɛ Baa Kilɛ ya li kuruŋɔ shan wuyɛ pyaa ki ɲuŋɔ ni.»
Lee kadugo na a Dawuda di tudunmɔɔ tun Abigali mu na wee funŋɔ ki wa wu wu leŋɛ wu shɔ. 40 A Dawuda wo tudunmɔɔ pʼi gari Karimɛli kulo li ni, na shɛ Abigali pye na: «Dawuda wʼa wèe tun pa ma mu na wu funŋɔ ki wa wu ma leŋɛ wu shɔ.» 41 A Abigali di nuguro sin, na ɲaha ke buri ɲiŋɛ ke na na jo: «Nɛ ɲɛ wu kapyebye. Nɛ na ba bye wu bulozhɔ, na ganha na wu kapyebyii pu tɔɔyɔ yi jii, na kafɔɔ we.» 42 A Abigali di yìri tɔvuyo na, na dugi kafaŋa ka na, na doɲiŋɛ pushaa kaguro wa lɔ pinnɛ ni wuyɛ ni, na binnɛ kari di Dawuda wo tudunmɔɔ pu ni. A wu bye mu lee pyegana li na Dawuda shɔ.
43 Lee bi Dawuda ta wʼa Jizirɛli shɛɛn Akinɔmu bɛ lɔ. A pu shuun wu bɛɛri di bye wu cèe. 44 Sɔli wo poro pushɔ Mikali wemu wu bye Dawuda wo shɔ wu ge, lee bi Sɔli ta wʼa wee kan Galimu shɛɛn Paliti mu, Layishi wo ja we.