Dawuda ya Sɔli yaha gbobaa
24
Lee kadugo na a Dawuda di yìri wee xuu wu ni na gari Eyini-Gedi wo yaŋa gologoloyo yi ni, na shɛn diin wà. 2 Ba Sɔli ya pa Filisiti shɛɛn pu niinɛ xɔ na kuri pa wɛ, a pʼi wu pye na Dawuda wa Eyini-Gedi wo siwaga ki ni. 3 A Sɔli di kashɛnŋmuu kabɔfoŋɔɔ taanri (3.000) shɔɔnri lɔ, piimu kabee ya sin xuuni Izirayɛli bɛɛri ni ge. A wu gari ni pee ni Dawuda ni wu kashɛnŋmuu pu fɛni, sikapee pu wo faaboboŋɔ ki fɛɛ li ni.a 4 A pʼi shɛ nɔ yatɔɔgbaya ya na koo li ɲɔ ki na, lee di faaga wege ka ta wà. A Sɔli di jé kee faaga wege ki ni kɔnhɔ wu shɛ wu nugunŋɔ kuri. Lee bi Dawuda ni wu kashɛnŋmuu pu ta kee faaga wege ki funŋɔ ki tɛhɛnɛ li na. 5 A Dawuda wo kashɛnŋmuu pʼi wu pye kalɔhɔrɔ ni na: «Tɛhɛnɛ Baa Kilɛ bi caŋa kemu kaa jo na wee na ba ma pɛn wu le ma keŋɛ ni, kɔnhɔ mʼa wu pye ma ɲidaan ge, kee caŋa ke ki wa niɲaa.» A Dawuda di Sɔli fadegbɔhɔ ki ɲɔwaŋa ka peele kɔn. 6 Ba lee ya pye wɛ, a Dawuda zɔ wu ganha na guuŋi fo xuuni, bani wʼa bi Sɔli fadegbɔhɔ ki ɲɔwaŋa ki kɔn. 7 A wu wu kashɛnŋmuu pu pye: «Bada! Tɛhɛnɛ Baa Kilɛ wu na tanha lee shi na, na keŋɛ taha na kafɔɔ wu na, Tɛhɛnɛ Baa Kilɛ ya wemu shɔɔnri lɔ ge! Bani wee Tɛhɛnɛ Baa Kilɛ ya shɔɔnri lɔ.» 8 Pee jomɔ pu Dawuda ya jo na wu sipyii pu yereŋɛ, na pu ɲaha kɔn pu ya to Sɔli na wɛ. A Sɔli di xhɔ na foro faaga wege ki ni, na koo le na gaaŋi.9 Lee kadugo na a Dawuda bɛ di foro faaga wege ki ni, na ɲɔ kɔn na xhuulo Sɔli kadugo yíri na yu: «Ee saan we, na kafɔɔ we!» A Sɔli di gara wii, a Dawuda di nuguro sin, na ɲaha ke buri ɲiŋɛ ke na. 10 A Dawuda di Sɔli pye: «Piimu pʼa mu pyi na nɛ wʼa mu shaa ni kakuunɔ ni ge, ɲaha na mu di pee wo nijoyo yi nuri wɛ? 11 Ma bile lʼa li ɲa ma ɲii li na niɲaa wo caŋa ɲii le ni na Tɛhɛnɛ Baa Kilɛ ya mu le nɛ keŋɛ ni niɲaa faaga wege ki ni. Pʼa jo na nɛ wu mu gbo, ga a nɛ mu yaha wà, na jo: ‹Nʼa da keŋɛ taha na kafɔɔ wu na wɛ, bani wee Tɛhɛnɛ Baa Kilɛ ya shɔɔnri lɔ.› 12 Wii tofɔɔ we, ma fadegbɔhɔ ki ɲɔwaŋa ki ke nɛ keŋɛ ni. Ma fadeŋɛ ki ɲɔwaŋa ke yɛ nigin nɛ kɔn, nɛ ta ma gbo wɛ. Ma ɲii wa li ni na ma funguuŋɔ wa nɛ mu wɛ, nɛ wa nʼa she fɔɔ bɛ wɛ, nɛ di wa jurumu bɛ pye ma na wɛ. Ga mu dʼa taha yaha nɛ na na niinɛ, na na munaa li shaa di wolo! 13 Tɛhɛnɛ Baa Kilɛ na ba bye kiiri kɔnvɔɔ nɛ ni mu tɛ ni. Nɛ kunni wa da na keŋɛ yirige ma fɛni wɛ, ga Tɛhɛnɛ Baa Kilɛ wʼa da ba nɛ wo foo li tɔ ma mu. 14 Ma na jo ba le talenɛ le wʼa yu wɛ na: ‹Kuumɔ fɔɔ ni kuumɔ ya fòro.› Nɛ kunni wa da na keŋɛ yirige ma fɛni wɛ. 15 Jɔgɔ fɛni Izirayɛli wo saan wu da kashɛn keŋɛ yirige wɛ? Jɔgɔ mu di wa niinɛ wɛ? Ta poxhugo,b kelee fyɛngɛ bɛ wɛ? 16 Tɛhɛnɛ Baa Kilɛ wu da ba kaɲii li kan, wee wu da ba bye kiiri kɔnvɔɔ nɛ ni mu tɛ ni. Wu na ba nɛ keree ki wii na nɛ yogo jo, wu na ba kiiri wu kɔn, na nɛ wolo ma keŋɛ ni.»
17 Ba Dawuda ya yee jo xɔ ni Sɔli ni wɛ, a Sɔli di jo: «Na ja Dawuda, ta mu wo mujuu li wa le can na ya?» A Sɔli di mɛɛgɛ le na suu. 18 Lee kadugo na, a wu Dawuda pye: «Mu ya tii na ye nɛ na, bani mu ya saama pye nɛ na, ma li ta nɛ dʼa kuumɔ pye mu na. 19 Mu ya li shɛ niɲaa na mu bi nɛ co ni funzaaŋa ni. Tɛhɛnɛ Baa Kilɛ bi nɛ le mu keŋɛ ni, a mu di bye mu ya ta nɛ gbo wɛ. 20 Sipya bu wu pɛn ta co, ta wu da wu yaha wu da se ɲaɲiŋɛ na ya? Lemu mʼa pye mɛ na na niɲaa ge, Tɛhɛnɛ Baa Kilɛ wu li foo tɔ ma mu! 21 Nimɛ kunni, nɛ li cɛ jo ma na ba bye saan, jo Izirayɛli wo saanra ti na ba fanha ta ma keŋɛ ni. 22 Kàa Tɛhɛnɛ Baa Kilɛ na na mu, na ma wa da ba na shi wu tɔ na kadugo wɛ, ma di wa da ba na mɛgɛ ki piinŋɛ na puga ki ni wɛ.» 23 A Dawuda di gàa Sɔli mu lee na. Lee kadugo na, a Sɔli di gari wu puga, a Dawuda ni wu kashɛnŋmuu pʼi guri dugi pu talaraga ki ni.