1 Samuwɛli 23

Dawuda ya Keyila shɛɛn ɲuŋɔ wolo

Ayiwa, caŋa ka pʼa pa Dawuda pye na Filisiti shɛɛn pʼa shɛ do Keyila kulo li na, na ganha na shogoo ki wo shinma wu kori. 2 A Dawuda di shɛ Tɛhɛnɛ Baa Kilɛ yege na: «Ta nɛ na já zhɛ Filisiti shɛɛn pu fɛni, di shɛ se ta pu na ya?» A Tɛhɛnɛ Baa Kilɛ di wu ɲɔ shɔ na: «Shɛ, ma na zhɛ se ta Filisiti shɛɛn pu na, na Keyila kulo li ɲuŋɔ wolo.» 3 Ga a Dawuda wo kashɛnŋmuu pʼi wu pye: «Ali fyaara na ɲɛ wèe ni naha Zhuda fiige kiyɛ pyaa ni, wù bu shɛ Filisiti shɛɛn pu fɛni Keyila ni, ta tee fyaara ti da golo ye wɛ?» 4 A Dawuda di nɔhɔ Tɛhɛnɛ Baa Kilɛ yege sanha, a Tɛhɛnɛ Baa Kilɛ di wu ɲɔ shɔ na: «Tigi shɛ Keyila kulo li ni, bani nɛ Filisiti shɛɛn pu le ma keŋɛ ni.» 5 Wee tuun wu ni a Dawuda di gari ni wu kashɛnŋmuu pu ni Keyila kulo li ni, na shɛ do Filisiti shɛɛn pu na. A wu pu yapɔrɔyɔ yi shɔ pu na, na sii bɔɔngɔ nigbɔhɔ shan pu ɲuŋɔ ni. A Dawuda di Keyila shɛɛn pu shɔ mu lee shɔgana li na. 6 Tuun wemu ni Ayimelɛki ja Abiyatari ya paa shɛ foro Dawuda mu, Keyila ni ge, wʼa bi kari ni efodi† wu ni wuyɛ keŋɛ ni.

7 A pʼi ba Sɔli pye na Dawuda wa Keyila kulo li ni, a Sɔli di jo: «Kilɛ ya wu le nɛ keŋɛ ni, bani wʼa shɛ wuyɛ ɲɔ tɔ kulo la ni, kashɛn ɲuŋɔ círi círi kasɔrɔyɔ yʼa lemu kuuri, gburaya bɛ di ɲɛ li na yemu yʼa zhɔhɔni ge.» 8 A Sɔli di wu kashɛnŋmuu pu bɛɛri kemɛ pinnɛ, kɔnhɔ wu shɛ Dawuda ni wu kashɛnŋmuu pu ɲɔ tɔ Keyila kulo li ni. 9 Ba Dawuda ya pa li cɛ na le kakuunɔ le Sɔli wʼa gbegele wee fɛni wɛ, na saraya ɲaha shɔɔnrivɛɛ Abiyatari pye na wu pa ni efodi† wu ni. 10 A Dawuda di jo: «Tɛhɛnɛ Baa Kilɛ, Izirayɛli wo Kilɛ we, ma kapyebye wʼa yi logo na Sɔli wʼa gbegele wu ba Keyila kulo li kyɛɛgi nɛ fɛni. 11 Ta Keyila shɛɛn pu na ba nɛ le wu keŋɛ ni ya? Ta Sɔli na ba, ma na jo ba nɛ yi logo logogana lemu na-ɛ ya? Tɛhɛnɛ Baa Kilɛ, Izirayɛli wo Kilɛ we, nʼa ma ɲɛɛri, yi ɲaha jo na mu!» A Tɛhɛnɛ Baa Kilɛ di jo: «Wu na ba.» 12 A Dawuda di jo sanha na: «Ta Keyila shɛɛn pu na ba nɛ ni na kashɛnŋmuu pu le Sɔli keŋɛ ni ya?» A Tɛhɛnɛ Baa Kilɛ di jo: «Pu na ba yee le wu keŋɛ ni.» 13 Lee na, a Dawuda ni wu kashɛnŋmuu pʼi yìri Keyila kulo li ni, na ganha na ɲaari ɲaari pu ɲidaan tɛyɛ ni. Pee bye namaa xhuu gbaara (600) shishiin. A pʼi shɛ Sɔli pye na Dawuda ya fɛ na foro Keyila kulo li ni, a Sɔli di bye wu ya shɛ wà nige wɛ.

14 A Dawuda di gari Zifu siwaga ki ni, na shɛ ganha na laraa yee faaya wegeye yi ni. Ɲiga bɛɛri Sɔli bi wu shaa, ga Kilɛ ya ta wu le Sɔli keŋɛ ni wɛ.

15 A Dawuda di li ɲa na Sɔli ya foro na wee munaa li shaa di wolo. Lee bi Dawuda ta Zifu siwaga ki ni Ɔrisha ni. 16 Wee tuun wu ni a Sɔli ja Zhonatan di shɛ foro Dawuda na Ɔrisha ni na wu luu li waha Kilɛ na. 17 A wu Dawuda pye: «Ma ganha bu fya wɛ, nɛ to Sɔli wʼa da ga ma ta wɛ. Mu wʼa da ba bye Izirayɛli wo saan we, nɛ ma daha ma na, nɛ to Sɔli wuyɛ pyaa ki bɛ ya lee cɛ.» 18 A pu shuun wu kariɲɛɛgɛ ɲɔmɛɛ lɔ ni puyɛ ni Tɛhɛnɛ Baa Kilɛ ɲaha tàan. A Dawuda di gori Ɔrisha ni, a Zhonatan di guri kari wu kaban.

Kilɛ ya Dawuda shɔ Sɔli na

19 Ayiwa, a Zifu shɛɛn pii di ba yìri kari Sɔli yíri Gibeya kulo li ni na shɛ wu pye: «Dawuda ya shɛ lara yaŋa gologoloyo yi ni wèe mu, Ɔrisha ni, Akila wo faaboboyo yi ni, lɔhɔ baa ɲiŋɛ ki woroo kulo kacɛ ki na. 20 Nimɛ saan we, lee bu da lʼa bɛ ma mu, tigi shɛ wu fɛni, wèe na zhɛ wu le ma keŋɛ ni.» 21 A Sɔli di jo: «Tɛhɛnɛ Baa Kilɛ wu baraga le yi ni, yee pii pʼa ɲuŋɔ ɲaari nɛ na ge. 22 Nʼa yi ɲɛɛri, yi shɛ yʼi shɛ kasɛɛgɛ pye sanha, xuu wemu ni wʼa toro ɲɛri ge, yʼi yegeŋɛ pye wemu ya ta wʼa wu ɲa ge, bani pʼa nɛ pye na wʼa shiige shɛn. 23 Yi wu talaraya yi bɛɛri sha cɛ, kadugo tàan yʼi ba yi fiinŋɛ jo na mu, di binnɛ gari ni yi ni. Wu bu shɛ da fiige ki ni, nɛ na ba Zhuda ɲiŋɛ ki bɛɛri ɲɛri le kiyɛ ni wu fɛni.» 24 A pee Zifu shɛɛn pʼi guri pa Zifu ni. Pʼa bii toro Sɔli ɲaha na. Lee bi Dawuda ni wu kashɛnŋmuu pu ta Mawɔn siwaga ki wo mura wu ni, lɔhɔ baa ɲiŋɛ ki woroo kulo kacɛ ki na.

25 A Sɔli ni wu kashɛnŋmuu pʼi gari Dawuda fɛni. A pʼi shɛ yi jo Dawuda mu, a wu digi faaboboŋɔ ki na, na ba diin Mawɔn siwaga ki ni. Ba Sɔli ya yee logo wɛ, na ganha na wu nɔhɔ niinɛ Mawɔn siwaga ki ni. 26 Sɔli bi doroo faaboboŋɔ ki kabanugo ka na, Dawuda ni wu kashɛnŋmuu pu di doroo keki kabanugo ki na. Pʼa bi tɔɔyɔ wɛrɛŋɛ kɔnhɔ pʼi shɔ Sɔli na. Ga lee bi Sɔli ni wu kashɛnŋmuu pu ta pʼa Dawuda ni wu kashɛnŋmuu pu jegele wolo na xɔ, na giin di pu co. 27 Ga a tudunmɔ wa di nɔ na Sɔli pye: «Kuri pa tɔvuyo na, Filisiti shɛɛn pʼa gburogi jé fiige ki ni.» 28 A Sɔli di guri kadugo, na Dawuda wo niinɛ wu ɲɔ yereŋɛ, kɔnhɔ wu shɛ Filisiti shɛɛn pu ɲuŋɔ círi. Lee na pʼa wee xuu wu mɛgɛ le na Sela-Malekɔti (Lee kɔri na ma laha wu na wo faaboboŋɔ).