Dawuda ya ɲɛri kuruŋɔ ka ɲuŋɔfɔɔ
22
Ayiwa, a Dawuda di yìri wee xuu wu ni, na gari Adulamu wo faaga wege ki ni. A wu ceboronamaa ni wu kpuun li shɛɛn pu bɛɛri di yee logo, na digi na kari na shɛ binnɛ ni wu ni.a 2 Piimu bɛɛri pu bye cɔnrɔmɔ fɛɛ, ni fɔhɔɔ fɛɛ, kelee funyaŋa fɛɛ ge, a pee bɛɛri di ba binnɛ ni wu ni, a wu bye pee bɛɛri wo ɲuŋɔfɔɔ. Namaa xhuu shishɛɛrɛ (400) shishiin wu bye ni wu ni wà.3 A Dawuda di yìri wà, na gari Mowabu wo Misipe ni. A wu shɛ Mowabu wo saan wu pye: «Nʼa ma ɲɛɛri, na to we ni na nu wu yaha pʼi diin ma mu, Kilɛ na ba na pye lemu ge, fo di ba shɛ lee cɛ.» 4 A wu gari ni pu ni Mowabu saan wu mu. Tuun wemu bɛɛri Dawuda ya pye na laraa ge, a wu sefɛɛ pʼi wee tuun wu bɛɛri pye Mowabu saan wu mu.
5 A Kilɛ tudunmɔɔ Gadi di Dawuda pye: «Ma ganha bu diin yaha ma talaraga ki ni wɛ. Ta se Zhuda fiige ki ni.» A Dawuda di gari, na shɛ jé Erɛti wo taha ki ni.
Sɔli ya Nɔbu kulo li wo saraya Ɲaha shɔɔnrivɛɛ pu gbo
6 Ayiwa, a Sɔli di ba yi logo caŋa ka na pii ya Dawuda ni wu sipyii pu sanha cɛ. Lee bi Sɔli ta wʼa tiin Gibeya kulo li ni, faaboboŋɔ ki na, tamali tige ka nɔhɔ ni. Wu canmi wu bye wu keŋɛ ni, wu fanha ki sipyigbɔɔ pu bɛɛri di ɲɛ wu tàan. 7 A Sɔli di pu pye: «Bɛnzhamɛ tirige shɛɛn, nʼa yi ɲɛɛri, yi ye logo! Ta kɛrɛyɛ ni ɛrɛzɛn tɛyɛ Zhese ja wu wʼa da ba gan yee bɛɛri mu ya? Ta wʼa da ba yee bɛɛri pye kabɔfoŋɔɔ nigin nigin (1.000) ɲuŋɔfɛɛ, ni xhuu nigin nigin (100) ɲuŋɔfɛɛ ya? 8 Lee bɛ wɛ, ɲaha na yee bɛɛri dʼa ɲɔfaanga pɔ nɛ fɛni, na bye shɛn nigin bɛ ya ta nɛ kaala na nɛ ja Zhonatan ni Dawuda wʼa kariɲɛɛgɛ ɲɔmɛɛ lɔ puyɛ mu-i wɛ?» Ɲaha na shɛn nigin bɛ ya ta yee ni wemu ya wu funŋɔ shaa ni nɛ kaa ni-i wɛ? Ɲaha na shɛn nigin bɛ ya ta nɛ funŋɔ to na nɛ ja wʼa nɛ kapyebye wu yirige nɛ fɛni, kɔnhɔ wu tifuugo pɛri nɛ koo ni, ba wʼa li pyi mɛ niɲaa-i wɛ?
9 Edomu shɛɛn Dowɛgi wu bye Sɔli wo sipyii pu ɲahagbaa fɔɔ wu ge, a wee di jo: «Nɛ Zhese ja wu ɲa wʼa kari Nɔbu kulo li ni Ayitubi ja Ayimelɛki yíri.b 10 A Ayimelɛki di Tɛhɛnɛ Baa Kilɛ yege wu keree na, na yaligee kan wu mu, na Filisiti shɛɛn Goliyati bɛ wo ŋmɔpara li kan wu mu.» 11 A saan wu saraya ɲaha shɔɔnrivɛɛ Ayimelɛki yiri, Ayitubi ja we, wu ni wu puga shɛɛn pu bɛɛri, pee piimu pu bye saraya ɲaha shɔɔnrivɛɛ Nɔbu kulo li ni ge. A pu bɛɛri di ba yere saan wu ɲaha tàan. 12 A Sɔli di jo: «Ayitubi ja we nʼa ma ɲɛɛri, ɲuwegee shan!» A Ayimelɛki di jo: «Uun na kafɔɔ!» 13 A Sɔli di jo: «Ɲaha na yee dʼa ɲɔyɔ faanri nɛ kaa na, mu ni Zhese ja wu ni wɛ? Ɲaha na mʼa da yaligee ni ŋmɔpara kan wu mu, na Kilɛ bɛ yege wu keree na, kɔnhɔ wu yìri na fɛni, wu shɛ jé ŋma ni na fɛni, ma na jo ba lee wa mɛ niɲaa-i wɛ?» 14 A Ayimelɛki di saan wu pye: «Ma kapyebyii pu bɛɛri ni, wekɛ wu ɲɛ nʼa daa fɔɔ ba Dawuda ɲɛ-ɛ wɛ? Wʼa nɔhɔ pye saan wu yafɛna bɛ sanha, na ɲɛ ma ɲuŋɔ sigevɛɛ pu wo ɲuŋɔfɔɔ, ma puga ki sipyii pu bɛɛri di pɛɛŋɛ tari wu na. 15 Ta niɲaa nɛ ɲɔ kɔn na Kilɛ yegee wu keree na ya? Nɛ da wɛ! Saan wu ya yaa na te tuguro te taha nɛ ɲuŋɔ ni, kelee na puga ki sipya wu ɲuŋɔ ni wɛ, bani nɛ ta yafiin bɛ cɛ kii keree kii ni wɛ, li nigbɔɔ fara li nifɛnhɛnɛ na.» 16 A saan wu jo: «Mu Ayimelɛki, ma ni ma puga ki bɛɛri, yee bɛɛri pu da xhuu.» 17 Kashɛnŋmuu piimu pu bi saan wu ɲuŋɔ sigee ge, a wu pee pye: «Yi ŋmahana ɲɛri yʼi Tɛhɛnɛ Baa Kilɛ wo saraya ɲaha shɔɔnrivɛɛ pu gbo, bani pee bɛ pʼa keŋɛ le Dawuda mu. Pʼa bi li cɛ na wʼa fe, pu di ya ta yaaga jo nɛ mu wɛ.» Ga kashɛnŋmuu pu ya ta sɔɔ na keŋɛ taha Tɛhɛnɛ Baa Kilɛ wo saraya ɲaha shɔɔnrivɛɛ pu na gbo kaa na wɛ. 18 Wee tuun wu ni a saan wu Edomu shɛɛn Dowɛgi pye: «Mu wu toro ɲɛri pu fɛni, mʼa pu gbo.» A Dowɛgi di doro ɲɛri, wee wʼa saraya ɲaha shɔɔnrivɛɛ pu gbo. A wu gbo kee caŋa ke namaa kɛlɛɛ gbarataanri ni kaguro (85) pee piimu pu bi lɛn fàya wo efodi† wu leni ge. 19 Lee kadugo na a Sɔli di Nɔbu kulo li sipyii pu bɛɛri gbo ni ŋmɔpara ni, saraya ɲaha shɔɔnrivɛɛ pu wo kulo le, namaa fara cèe na, nɔhɔpiire ni pubinŋɛɛ, niiyɛ, kafaya, dubyaa ni sikaa, a yee bɛɛri di gbo ni ŋmɔpara ni.
20 Ayiwa, ja nigin pe wee wʼa shɔ to Ayitubi ja Ayimelɛki nagoo pu ni. Wee mɛgɛ ki bye na Abiyatari. A wee di baa kari na shɛ daha Dawuda fɛni. 21 A Abiyatari di Dawuda pye na Sɔli ya Tɛhɛnɛ Baa Kilɛ wo saraya ɲaha shɔɔnrivɛɛ pu gbo. 22 A Dawuda di Abiyatari pye: «Nɛ bi li cɛ ke caŋa ke, jo Edomu shɛɛn Dowɛgi wu bye wà ge, jo wu da ba gori ye jobaa Sɔli mu wɛ. Nɛ wʼa pye ma puga shɛɛn pu bɛɛri wo kaxulo li kaɲuŋɔ. 23 Kori naha ni na ni, ma ganha bu fya wɛ, bani wemu wʼa nɛ munaa li shaa ge, wee wʼa mu bɛ wuu li shaa. Ma bu bye nɛ tàan, ma ɲuŋɔ na da sigee saama na.»