1 Samuwɛli 21

A Dawuda di gari, a Zhonatan di guri pa kanha ki ni.

Dawuda ya kari saraya ɲaha shɔɔnrivɛɛ Ayimelɛki yíri Nɔbu kulo li ni

2 Ayiwa, a Dawuda di gari Nɔbu kulo li ni, saraya ɲaha shɔɔnrivɛɛ Ayimelɛki yíri. A wee di fya, na ba wu ɲuŋɔ círi na wu pye: «Ɲaha na mu di ɲɛ ma yɛ nigin wɛ? Ɲaha na sipya bɛ di ya ta pinnɛ ni mu ni-i wɛ?» 3 A Dawuda di saraya ɲaha shɔɔnrivɛɛ Ayimelɛki ɲɔ shɔ na: «Tuduro saan wʼa kan nɛ mu, wʼa nɛ pye: ‹Lemu na nʼa ma tun, ni ɲɔmɛɛ lemu nʼa le ma ɲɔ ni ge, sipya wa shishiin ganha bu yee ɲaha cɛ wɛ.› Nɛ na kashɛnŋmuu pu pye jo wù wùyɛ ɲuŋɔ círi we xuu we ni. 4 Ayiwa nimɛ, ɲaha kʼi ɲɛ ma keŋɛ ni wɛ? Buuri ɲuyɔ kaguro kan na mu, kelee yemu bu da.» 5 A saraya ɲaha shɔɔnrivɔɔ wu Dawuda ɲɔ shɔ na: «Buuri nidiimɛ wa naha nɛ mu wɛ, fo buuri wemu wʼa yaha Tɛhɛnɛ Baa Kilɛ yahama ni ge. Ga nɛ na já wee wa kan ma mu li bu shɛ da nago ma lɛvɛɛ pʼa puyɛ co cèe tàan ye piiye ye funŋɔ ni!» 6 A Dawuda di saraya ɲaha shɔɔnrivɔɔ wu pye: «Wèe ya wùyɛ co cèe tàan, bani wèe ba gaaŋi kashɛn na tuun bɛɛri ni, lee wèe ma bye. Na fara lee na, nɛ ba gaaŋi kashɛn na, nɛ kashɛnŋmuu pu yagboyo yi ma bye fɛfɛɛrɛ woyo, lee funŋɔ ni niɲaa wo tuduro ti mɛhɛ bye fɛfɛɛrɛ baa wuuro, tʼa ɲɛri fɛfɛɛrɛ wuuro bani kashɛn yagboyo yi ɲɛ fɛfɛɛrɛ woyo.» 7 Wee tuun wu ni, buuri wemu wʼa yaha Tɛhɛnɛ Baa Kilɛ yahama ni ge, a saraya ɲaha shɔɔnrivɛɛ ɲuŋɔfɔɔ wu wee wa kan wu mu, bani buuri watii bye nige wɛ. Pu bi ma wee buuri we lɔ laha Tɛhɛnɛ Baa Kilɛ ɲaha tàan, na nivomɔ taga wu faa. 8 Lee bi Sɔli wo kapyebye wa ta wʼa pa ke caŋa ke di ba kaa la shɔɔnri Tɛhɛnɛ Baa Kilɛ ɲaha tàan. Wu mɛgɛ ki bye na Dowɛgi, Edomu fiige ki shɛn wu bye wii, na ɲɛ Sɔli wo yatɔɔnahamaa pu ɲuŋɔfɔɔ.

9 A Dawuda di Ayimelɛki pye: «Ta canmi kelee ŋmɔpara la wa ma mu wɛ? Nɛ ta na ŋmɔpara li lɔ di da nɔ na kashɛn yagboyo yi na wɛ, bani tuduvuuro ti bye saan wu tuduro te.» 10 A saraya ɲaha shɔɔnrivɔɔ wu jo: «Filisiti shɛɛn Goliyati wemu mʼa gbo Terebɛnti wu wo faaya yi tɛ fawii li ni ge, wee wo ŋmɔpara li le, ma li migile fàŋa ka ni na yaha efodi† wu kadugo yíri. Ma bi ɲɛ lee fɛni, li lɔ, bani latii wa naha nige wɛ.» A Dawuda di jo: «Li ɲɔhɔ ɲɛ wɛ, li kan naha.»

Dawuda ya kari Gadi kulo wo Filisiti shɛɛn pu yíri

11 A Dawuda di baa kee caŋa ke kɔnhɔ wu shɔ Sɔli na. A wu gari Akishi yíri, Gati wo saan we. 12 A Akishi wo kapyebyii pʼi wu pye: «Ta Dawuda bɛ wu ɲɛ we wɛ, fiige ki wo saan we? Ta we mu bɛ pʼa ciire ti cee wɛ na yu:

‹Sɔli ya sipyii kabɔfoŋɔɔ niɲɛhɛŋɛɛ gbo,

a Dawuda di sipyii kabɔfoŋɔɔ kɛlɛɛ niɲɛhɛmɛɛ gbo!› »

13 A Dawuda di pee jomɔ pu co ni sɛɛ ni. A wu sii fya Akishi na fo xuuni, Gati wo saan we. 14 Wee tuun wu ni a wu wuyɛ yaha pu ɲaha tàan ba ɲuŋmoyirinɛ fɔɔ ɲɛ wɛ. A wu ganha na ɲaari na yeree pu ɲahagbaa na, na fɛ pa kani gburaya yi na, na ɲɔlɔhɔ ke yaha ki na woni wu ɲahazhɔ wu na. 15 A Akishi di wu kapyebyii pu pye: «Yee ya li cɛ cɔ na ɲuŋmoyirinɛ fɔɔ wu ɲɛ we ná we! Ɲaha na yi da pa ni wu ni na mu wɛ? 16 Ta ɲuŋmoyirinɛ fɛɛ pʼa na kuuŋɔ, fo yi pa ni we ni na mu wu pa ɲuŋɔ baa keree pyi na ɲaha tàan ya? Ta we ná we tuugo tajege wa nɛ puga ya?»