Zhonatan ya keŋɛ pari Dawuda na
20
Ayiwa, a Dawuda di baa foro Nayɔtia ni, Arama kulo li tàan, na gari Zhonatan yíri, na shɛ wu pye: «Lekɛ nɛ dʼa pye wɛ? Kapyebaana lekɛ nɛ dʼa pye wɛ? Jurumu wekɛ nɛ dʼa pye ma to wu na wu di na shaa di gbo wɛ?» 2 A Zhonatan di wu pye: «Bada! Ma da xhuu wɛ. Nɛ to wu yaa kaa la shishiin pyi ni wu ya yi jo nɛ mu wɛ, wee tuun wu ni nɛ to wu ma yee ŋmɔhɔ nɛ na ɲaha na wɛ? Lee ɲɛ wà wɛ.» 3 A Dawuda di gàa na wu pye: «Mu to wʼa li cɛ na nɛ kaa ya waha mu mu, wu na yi jo wuyɛ funŋɔ ni na: ‹Zhonatan ya yaa na li cɛ wɛ, lee na waha wu na.› Ga nʼa kaa, Tɛhɛnɛ Baa Kilɛ ɲìi wo wu mɛgɛ na, na mayɛ pyaa ki bɛ yaha ɲìi na, ɲidaɲii nigin yɛ wu wa nɛ ni xu tɛ ni!»4 A Zhonatan di Dawuda pye: «Lemu kaa li wa ma na ge, nɛ na lee pye ma mu.» 5 A Dawuda di wu pye: «Ɲiga wa yevorovoŋɔ kalenɛ, nɛ yaa na pa shɛ binnɛ li ni saan wu ni, ga na yaha di da gaaŋi, di shɛ lara sige ki ni fo di zhɛ nɔ caŋa taanri wogo ki wo yakoŋɔ ki na.b 6 Ma to wu ba shɛ wii fɔ na ni, ma na wu pye na: ‹Dawuda ya nɛ kemɛ ɲɛɛri na nɛ wu wu yaha wu shɛ tɔvuyo na Bɛtilɛhɛmu ni, wu kulo le, na bani pu kpuun li bɛɛri wo yeeciri saraga kʼa wo.› 7 Wu bu jo: ‹Yʼa bɛ!› Lee ya li shɛɛ na keree ki bɛɛri ya ɲɔ nɛ shizhaa na, ma kapyebye we. Ga wu luu bu yìri, li cɛ na bɔɔngɔ wʼa gbegele yaha. 8 Ma na ba lee pye na mu ma wo ɲɔmɛcoro ti funŋɔ ni, bani mʼa kariɲɛɛgɛ ɲɔmɛɛ lɔ ni na ni Tɛhɛnɛ Baa Kilɛ ɲaha tàan. Nɛ shiin bu shɛ da nɛ kapyebaana la pye, lee ya nɔ ma shɛ ni na ni ma to wu mu wɛ, mayɛ pyaa ki na gbo.»
9 A Zhonatan di wu pye: «Bada! Ma ganha ba giin na nɛ to wu na bɔɔngɔ kaa gbegele mu kaa na, nɛ li cɛ nɛ gori yi jobaa mu mu wɛ!» 10 A Dawuda di Zhonatan pye: «Mu to wu bu shɛ kafilakuumɔ taga mu ɲuŋɔ círi nɛ keree na, jɔgɔ di ba yee jo nɛ mu wɛ?» 11 A Zhonatan di Dawuda pye: «Pa wù foro shɛ sige ki ni.» A pu shuun wu bɛɛri di foro kari sige ki ni. 12 A Zhonatan di Dawuda pye: «Tɛhɛnɛ Baa Kilɛ, Izirayɛli wo Kilɛ wu mɛgɛ na, nʼa da ba na to wu yege ɲiga na kelee ɲigabudoro nimɛtashiin. Nɛ ba li ɲa na bɔɔngɔ wa li koo ni ma shizhaa wɛ, nɛ bye nɛ di ya wa tun wʼa shɛ yi jo ma mu wɛ, 13 Tɛhɛnɛ Baa Kilɛ wu bɔɔngɔ shan na ɲuŋɔ ni, wu da la faraa ki na. Ga wu bu shɛ da wʼa bɔɔngɔ gbegele ma kaa na, nɛ na yee bɛ jo ma mu, na ma yaha na gaaŋi ɲaɲiŋɛ na, Tɛhɛnɛ Baa Kilɛ di bye ni ma ni, ma na jo ba wʼa pye ni nɛ to wu ni wɛ! 14 Ma na yaha ɲiifɛɛrɛ ni, ma na na co na saha ni Tɛhɛnɛ Baa Kilɛ wo ɲɔmɛɛ fɛɛrɛ ti ni, kɔnhɔ di ganha bu xhu wɛ. 15 Ma ganha ga ma ɲɔmɛɛ fɛɛrɛ ti yaha ti kɔn laha na puga ki na bada wɛ, ali Tɛhɛnɛ Baa Kilɛ mɛhɛ ma pɛɛn pu bɛɛri nigin nigin wu xɔ na laha ɲiŋɛ ke na.»c 16 Wee tuun wu ni a Zhonatan di kariɲɛɛgɛ ɲɔmɛɛ lɔ ni Dawuda wo puga ki ni na jo: «Tɛhɛnɛ Baa Kilɛ wu Dawuda wo pɛɛn pu foo tɔ pu mu!» 17 A Zhonatan di Dawuda pye wʼa kàa sanha wu wo taanra ti wuu na Dawuda shizhaa na, bani Dawuda kaa bi dan wu ni ba wuyɛ pyaa ki ɲɛ wɛ.
18 A Zhonatan di Dawuda pye: «Ɲiga ki ɲɛ yevorovoŋɔ kalenɛ le, pu na ba li cɛ na mu wa wɛ, bani ma tatɛɛngɛ ki niwaga na ba gori. 19 Xuu wemu ni ma bi shɛ lara keki caŋa ge, ma ba shɛ wee xuu wu ni ɲigabudoro, mʼa shɛ diin Ezɛli faaboboŋɔ ki tàan. 20 Nɛ na ba ŋmaya taanri ŋmɔ wee shizhaa wu na, ma na jo yaaga ka nʼa beele. 21 Lee kadugo na di na kapyebye wu tun di wu pye: ‹Shɛ ŋmaya yi sha ma pa!› Di ba wu pye: ‹Ŋmaya yi ye ma tàan, yi lɔ!›, lee wa li shɛɛ na ma na já ba, na bɔɔngɔ wa li koo ni wɛ. Tɛhɛnɛ Baa Kilɛ ɲìi wo wu mɛgɛ na, kakuunɔ la shishiin wa da ma ta li koo ni wɛ! 22 Ga nɛ bu lɛvɔɔ wu pye: ‹Ŋmaya yi sanha kʼa lii!›, wee tuun wu ni sa, ma na da gaaŋi, bani Tɛhɛnɛ Baa Kilɛ ɲidaan wu wa mʼa gaaŋi. 23 Ga jomɔ pemu wʼà jo na kan wùyɛ mu, nɛ ni ma ni ge, Tɛhɛnɛ Baa Kilɛ wu ɲɛ pee wo sɛɛri tuun bɛɛri ni nɛ ni ma tɛ ni!» 24 A Dawuda di gari na shɛ lara sige ki ni.
Ayiwa, a yevorovoŋɔ kalenɛ lʼi nɔ, a saan wu ba diin kɔnhɔ wu li. 25 A saan wu ba diin wu koo li na ba wʼa sii tee na dɛn wɛ, na kadugo le kasɔrɔgɔ ki ni. A Zhonatan di diin na saha ni wu ni, a Abunɛri di diin na sogi Sɔli na, ga a Dawuda wo tatɛɛngɛ ki niwaga di gori. 26 Sɔli ya yaaga jo kee caŋa wɛ, wu bi li kɔɔn wuyɛ funŋɔ ni na: «Kaa la lʼa duuri jé wu nɔhɔ ni na wu pye fɛfɛɛrɛ baa fɔɔ. Nakaara wa li wɛ, wu ɲɛ fɛfɛɛrɛ fɔɔ wɛ.» 27 Ɲimuguro ti bɛ na, yevorovoŋɔ kalenɛ li caŋa shuun wogo ke, a Dawuda wo tatɛɛngɛ ki niwaga di gori kee caŋa ki bɛ. A Sɔli di wu ja Zhonatan pye: «A ɲaha di Zhese ja wu pye wu ya pa li taɲaa ni niɲaa-i wɛ?» 28 A Zhonatan di Sɔli pye: «Dawuda ya nɛ kemɛ ɲɛɛri xuuni, na nɛ wu wu yaha wu shɛ fo Bɛtilɛhɛmu ni. 29 Wʼa nɛ pye: ‹Nʼa ma ɲɛɛri, na yaha di shɛ bani wèe wo kpuun li wo saraga kʼa wo kulo li ni, a na ceborona wu na yiri. Nɛ keree bu da kʼa taan ma mu, koo kan na mu di shɛ na cebooloo pu ɲa.› Lee lʼa wu pye wu ya ɲa yalige ki talige ni ni saan wu ni wɛ.»
Sɔli ya Zhonatan fanha Dawuda keree na
30 Lee funŋɔ nid a Sɔli luu di yìri Zhonatan tàan fo xuuni, a wu jo: «Mu cekuuŋɔ ja, ceshiige ja we! Ta mu ya giin na nɛ li cɛ na jo Zhese ja Dawuda wu ɲɛ mu naɲii-i wɛ? Ta mu ya cɛ na jo ma ni ma nu wu wo shiige ki wa kee naɲɛɛgɛ ke wɛ? 31 Bani na wu yaha ɲìi na ke ɲiŋɛ ke na, mu wa da ɲaha ta wɛ, ma saanra ti bɛ di wa da ɲaha ta wɛ. Lee wuu na, wa tun shɛ wu fɛni, pʼi shɛ ba ni wu ni, bani wʼa yaa na wu gbo.» 32 A Zhonatan di wu to Sɔli pye: «Ɲaha na ma di da wu gbo wɛ? Lekɛ wu dʼa pye wɛ?» 33 Taapile ni a Sɔli di wu canmi wu taga Zhonatan wá di gbo. Wee tuun wu ni a Zhonatan di li cɛ na wee to wʼa li yereŋɛ fo wu Dawuda gbo. 34 A Zhonatan loyire wo di yiri yalige ki ɲuŋɔ ni, wu ya ta yaaga ka shishiin li yevorovoŋɔ kalenɛ li caŋa shuun wogo ki na wɛ. Wu to wu bi Dawuda fanha fanhagana lemu na ge, lee bi waha wu na fo xuuni.
Zhonatan ya Dawuda kaala
35 Ayiwa, ɲimuguro ti na a Zhonatan di gari sige ki ni, wu ni Dawuda bi xuu wemu shɛ puyɛ na ge, wee xuu wu ni. Wu ni funabilere la li bye. 36 A wu lee funabilere li pye: «Ŋmaya yemu nʼa da ba ŋmɔ ge, paa shɛ yi lɔ pa.» A funana lʼi baa kari, a Zhonatan di ŋmaga ka ŋmɔ, a kee di shɛ doro li tàan. 37 Ba pya wʼa nɔ Zhonatan ŋmaga ki tatogo ki ni wɛ, a Zhonatan di jo ni mujugbɔɔ ni na: «Ŋmaga ki sanha wʼa lii mu na dɛ!» 38 A wu mujugbɔɔ wá sanha na: «Fyaala shɛ tɔvii na, ma ganha bu yere wɛ!» A Zhonatan wo funabilere lʼi ŋmaya yi lɔ, na guri pa wu kafɔɔ wu yíri. 39 Funana li bi ta yi ɲaha cɛ wɛ, Zhonatan ni Dawuda yɛ pu bye kii keree kii fiin. 40 A Zhonatan di kashɛn yagboyo yi le funana li keŋɛ ni, lee lemu li bye ni wu ni ge, na li pye: «Ta se ni yi ni kanha ki ni.» 41 Ba funana lʼa kari wɛ, a Dawuda di foro na yìri woroo kulo kacɛ ki na, na nuguro sin na ɲaha ke buri ɲiŋɛ ke na fo na shɛ da tɔɔɲii taanri. A Dawuda ni Zhonatan di ɲɔsɔɔnrɔ fò kan puyɛ mu, a pu bɛshuun wu ganha na mɛhɛɛ suu, ga Dawuda wo mɛɛ li tɛhɛnɛ lʼa pa dɔnnɔ. 42 A Zhonatan di Dawuda pye: «Ta se ɲaɲiŋɛ na, mʼa ma funŋɔ yaha nidogo ni wù kariɲɛɛgɛ ɲɔmɛɛ li ni, lee lemu wʼà lɔ wùyɛ mu Tɛhɛnɛ Baa Kilɛ mɛgɛ na ge, na jo: ‹Tɛhɛnɛ Baa Kilɛ wu pye sɛɛri nɛ ni ma tɛ ni, ni nɛ wo tirige shɛɛn pee ni ma wo tirige shɛɛn pu tɛ ni fo gbee!› »