<<    <     1 Samuwɛli     10     >    >> 
10
Ayiwa, a Samuwɛli di sìnmɛ gboro la lɔ, na li sìnmɛ pu wo Sɔli ɲuŋɔ ni, na keye taga wu migile na jo: «Mu Tɛhɛnɛ Baa Kilɛ ya shɔɔnri lɔ, kɔnhɔ mʼa bye wu cɛn wu wo ɲuŋɔfɔɔ. 2 Ma ba laha na tàan niɲaa, ma na zhɛ namaa shuun wa ta Arasɛli wo faŋa ki tàan, Bɛnzhamɛ wo kodɛhɛnɛ li na Selisa kulo li ni, pee na ma pye na: ‹Kafazhaa pu tashaga ni ma bi kari ge, pʼa ɲa, ma to wʼa kafazhaa pu wo keree ki yaha kabanugo na nimɛ, na ganha na wu funŋɔ shaa ni yee kaa ni, na jo: “Lekɛ nɛ dʼa yaa na pye na ja wu keree na wɛ?”› 3 Ma bu yìri wee xuu wu ni, na gari taliige ni na shɛ nɔ Tabɔri wo terebɛnti tige ki na, ma na zhɛ namaa taanri wa ta wà, pee na duri na gaaŋi di zhɛ Kilɛ pɛlɛ Bɛtɛli kulo li ni, nigin wa wa ni sikapiye taanri ni, nigin wa di ɲɛ ni buuri tidaya taanri ni, nigin wusama di ɲɛ ni duvɛn ni forogo funŋɔ ni. 4 Pu na ba ma shaari, na xhɔ na buuri tidaya shuun kan ma mu. Yi shɔ. 5 Lee kadugo na mʼa nɔ Gibeya-Eloyimu ni, Filisiti shɛɛn pu wo ɲuŋɔfɛɛ pii wa wake. Ma ba jin kulo li ni, ma na jiri Kilɛ tudunmɔɔ kuruŋɔ ka na ki na diri na yìri fugba wu wo takanga ki ni saraya yi tawologo ki ni. Gboyo fɛɛ, ni taya fɛɛ, ni faangaa fɛɛ, ni konɔyɔ fɛɛ wa pu ɲaha na, pu dʼa foro pu lɛɛ ni, na Kilɛ tuduro yu. 6 Tɛhɛnɛ Baa Kilɛ Munaa na ba digi ma bɛ na, ma bɛ na ganha na Kilɛ tuduro ti pyi ni pu ni, mʼa ɲɛri na pye sipya watii. 7 Kii keree kii bɛɛri ba shɛ fa na foro ma mu, lemu li wa ma mu ma nibyii ge, ma da lee pyi, bani Kilɛ wu wa ni ma ni. 8 Lee kadugo na mʼa ba doro na ɲaha na mʼa se Giligali ni, nɛ na ba shɛ ma ta wà, di saraya nizogoyo ni ɲaɲiŋɛ saraya wolo. Ga ma na ba shɛ na sige na ta, fo cabyaa gbarashuun nɛ ma da pa nɔ. Nɛ ba nɔ, lemu mʼa yaa na pye ge, nɛ na ba lee shɛ ma na.»
9 Ayiwa, ba Sɔli ya laha Samuwɛli tàan wɛ, a Kilɛ di wu zɔ wu ɲɛri, a kii keree kii bɛɛri di fa na foro kee canuŋɔ ke. 10 Ba Sɔli ya nɔ Gibeya ni wɛ, a Kilɛ tudunmɔɔ kuruŋɔ ka di ba wu ɲuŋɔ círi. A Kilɛ Munaa di digi wu na, a wu foro wu lɛɛ ni, na ɲɔ kɔn na Kilɛ tuduro yu ni pu ni. 11 Piimu bɛɛri pu bi wu cɛ ge, a pee bɛɛri di wu ɲa wu na Kilɛ tuduro pyi ni Kilɛ tudunmɔɔ pu ni, a sipyii pʼi ganha na yi yu puyɛ mu na: «A lekɛ di Kishi ja wu ta wɛ? Ta Sɔli bɛ wu ɲɛ Kilɛ tudunmɔɔ pu ni?» 12 A wee xuu wu shɛn wa di jo na: «Jɔgɔ di ɲɛ pu shɔhɔto wu wɛ?» Lee funŋɔ ni le talenɛ le ya foro na: «Ta Sɔli bɛ wu ɲɛ Kilɛ tudunmɔɔ pu ni ya?»a
13 Ba Sɔli ya pa xhɔ Kilɛ tuduro ti na wɛ, na gari saraya yi tawologo ki ni fugba wu wo takanga ki ni. 14 A wu topire lʼi wu ni wu kapyebye wu pye na: «Mii yee di bi kari wɛ?» A Sɔli di wu pye: «Kafazhaa pu tashaga ni wèe di bi kari, ga wèe ya ta shɛ pu ɲa wɛ, na gari Samuwɛli yíri.» 15 A Sɔli topire lʼi jo: «Nʼa ma ɲɛɛri, yemu Samuwɛli ya jo ge, yi ɲaha jo na mu.» 16 A Sɔli di wu topire li pye na: «Wʼa wèe pye na kafazhaa pʼa ɲa.» Ga Samuwɛli ya yemu jo wu mu saanra ti keree na ge, wu ya yaaga bɛ jo wu topire li mu yee ni wɛ.
Tɛhɛnɛ Baa Kilɛ ya Sɔli shɔɔnri lɔ na pye Izirayɛli saan
17 A Samuwɛli di Izirayɛli nagoo pu bɛɛri yiri pa Misipa ni Tɛhɛnɛ Baa Kilɛ ɲaha tàan, 18 na ba pu pye: «Yemu Tɛhɛnɛ Baa Kilɛ, Izirayɛli wo Kilɛ wʼa jo ge, yee yi wa mɛ: ‹Nɛ wʼa yee yeege Misira fiige ki ni, na yee shɔ Misira shɛɛn na, na yee shɔ saannaa pusamaa bɛɛri bɛ na, pee piimu ya yee kanha ge. 19 Ga yee ya she yi wo Kilɛ wu ni niɲaa, wee wemu wʼa yee shɔ yi kanhama keree kee ni yi ɲaa keree ki bɛɛri na ge. Yʼa jo na wu saan wa teŋɛ yi ɲuŋɔ ni. Ayiwa, nimɛ yi bɛɛri pu yere yere Tɛhɛnɛ Baa Kilɛ ɲaha tàan gbaweye gbaweye ni kpɔnhɔɔ kpɔnhɔɔ.› »
20 Ayiwa, a Samuwɛli di Izirayɛli nagoo pu gbaweye yi bɛɛri pye yi na doroo nigin nigin. A Tɛhɛnɛ Baa Kilɛ di Bɛnzhamɛ wo gbawege ki shɛ. 21 A Bɛnzhamɛ wo gbawege kʼi fulo kpɔnhɔɔ kpɔnhɔɔ. A Tɛhɛnɛ Baa Kilɛ di Matiri wo kpuun li shɛ. Lee bɛɛri kadugo na a wu na Kishi ja Sɔli shɛ. Ga a pʼi Sɔli sha kanha pu ya wu ɲa wɛ. 22 Wee tuun wu ni a pʼi nugo Tɛhɛnɛ Baa Kilɛ yege sanha na: «Ta we ná we ya pa mɛ naha?» A Tɛhɛnɛ Baa Kilɛ di jo na wu nilaraga ki wa yɛrɛyɛ yi tɛ ni. 23 A pʼi baa kari na shɛ ba ni Sɔli ni na wu yeege sipyiire ti niŋɛ ni. Wʼa bi sii tuun sipyii pusamaa bɛɛri na. 24 A Samuwɛli di sipyiire ti pye: «Tɛhɛnɛ Baa Kilɛ ya ná wemu shɔɔnri lɔ ge, yi wu wii. Ta wu ɲɔhɔ wa sipyiire ti tɛ ni?» A sipyiire ti bɛɛri di ganha na xhuulo na: «Kilɛ wu ɲɛmɔnɔ da saan wu mu!»
25 Lee bɛɛri kadugo na saan nibyii ɲɛ lemu ge, ni wu ni lemu ya yaa ge, a Samuwɛli di yee bɛɛri jo sipyiire ti mu na yi bɛɛri ka bɛ sɛmɛ wa ni, na yi yaha Tɛhɛnɛ Baa Kilɛ ɲaha tàan. Ba wʼa xɔ wɛ, na sipyiire ti bɛɛri yaha kari pu piyɛyɛ ni.
26 A Sɔli bɛ di gari wu kaban, Gibeya ni. Kilɛ bi jo ni sipyigbɔɔ pii ni pu zɔlɔɔ pu na, a pee di wu torogo kari. 27 Ga lee bɛ na, yahagaguuŋɔɔ fɛɛ pii ya ta na jo na: «Na ɲaha? Ta we na já bye wèe wo ɲuŋɔ wolovɔɔ we?» A pee di ganha na wu fanri, na bye pu ya ta ma yakanga ka shishiin kan wu mu wɛ, ga Sɔli kunni ya ɲɔ shan pu ni wɛ.